Category: سکھر

میرپور ماتھیلو (نامہ نگار مشتاق علی لغاری) گھوٹکی سے تعلق رکھنے والا نوجوان فوجی اہلکار امتیاز علی چنہ کراچی میں ڈیوٹی کے دوران دل کا دورہ پڑنے سے شہید ہو گیا۔ اس افسوسناک خبر کے بعد گھوٹکی اور اس کے گردونواح میں غم و سوگ کی لہر دوڑ گئی۔

شہید امتیاز علی چنہ کا تعلق گھوٹکی تعلقہ کے گاؤں دیہہ چنگل سے تھا۔ وہ ایک بہادر، محب وطن اور فرض شناس سپاہی کے طور پر جانے جاتے تھے۔ ان کی اچانک موت سے نہ صرف ان کا خاندان بلکہ پوری برادری صدمے کی کیفیت میں ہے۔

شہید کی میت کو فوجی اعزاز کے ساتھ ان کے آبائی گاؤں دیہہ چنگل لایا گیا۔ ان کی نماز جنازہ اور تدفین میں رشتہ داروں، عزیزوں، معززینِ علاقہ اور گاؤں کے لوگوں کی ایک بڑی تعداد نے شرکت کی۔ ہر آنکھ اشکبار تھی اور ہر شخص نے اپنے بہادر بیٹے کو نم آنکھوں سے الوداع کیا۔

علاقہ مکینوں کا کہنا ہے کہ امتیاز علی چنہ کی شہادت خاندان کے ساتھ ساتھ پورے علاقے کے لیے ایک بہت بڑا نقصان ہے۔ تاہم، ان کی ملک کے لیے دی گئی قربانی کو ہمیشہ یاد رکھا جائے گا۔

میرپور ماتھیلو (نامہ نگار مشتاق علی لغاری): اوباڑو سے تعلق رکھنے والا ایک غریب نوجوان ناصر پنہور کینسر جیسے موذی مرض میں مبتلا ہے اور اس کی زندگی خطرے میں ہے۔ مہنگے علاج کے اخراجات برداشت نہ ہونے کی وجہ سے اس کا خاندان بے بس ہو چکا ہے۔

ڈاکٹروں نے ناصر کی حالت کو تشویشناک قرار دیتے ہوئے کہا ہے کہ اگر فوری علاج شروع نہ کیا گیا تو اس کی جان جا سکتی ہے۔ بیماری نے اسے بہت کمزور کر دیا ہے اور وہ بستر پر پڑا ہے۔

ناصر کا خاندان انتہائی بے سہارا ہے اور اس کے علاج کا خرچہ نہیں اٹھا سکتا۔ ایسے میں وہ امید کی نظر سے مخیر حضرات اور فلاحی اداروں کی طرف دیکھ رہے ہیں۔ ان کی زندگی بچانے کے لیے معمولی سی مالی مدد بھی ایک نئی امید پیدا کر سکتی ہے۔

انسانیت اور ہمدردی کے جذبے کے تحت اہل خیر حضرات سے اپیل ہے کہ وہ اس مشکل گھڑی میں ناصر پنہور کی مدد کے لیے آگے آئیں اور ایک قیمتی جان بچانے میں اپنا کردار ادا کریں۔ آپ کی چھوٹی سی مدد کسی کی زندگی بچانے کا ذریعہ بن سکتی ہے۔

میرپور ماتھیلو (نامہ نگار مشتاق علی لغاری) میرپور ماتھیلو میں سندھ بینک کے منیجر پرویز شاہ کے خلاف سیلاب متاثرین نے شدید احتجاج کیا ہے۔ مظاہرین نے منیجر پر کرپشن، بدعنوانی اور عوام دشمن رویہ رکھنے کے سنگین الزامات عائد کیے ہیں۔

متاثرین کا کہنا ہے کہ پرویز شاہ نے بینک کو اپنی ذاتی جاگیر بنا رکھا ہے اور غریب عوام کے لیے مختص امدادی فنڈز اور سہولتوں میں بڑے پیمانے پر بدعنوانی کر رہا ہے۔ ان کے مطابق ضرورت مند اور بے سہارا افراد کو ریلیف دینے کے بجائے انہیں ذلیل و خوار کیا جاتا ہے، جس سے عوام میں شدید مایوسی پائی جاتی ہے۔

احتجاجی مظاہرین کا کہنا ہے کہ منیجر اپنے سیاسی تعلقات کی بنا پر احتساب سے بچتا رہا ہے، لیکن اب اس کا رویہ سب کے سامنے آ چکا ہے۔ عوام نے مطالبہ کیا ہے کہ اعلیٰ حکام اس معاملے کا فوری نوٹس لیں اور اس کرپٹ منیجر کو اس کے عہدے سے ہٹائیں۔ انہوں نے خبردار کیا ہے کہ اگر ان کے مطالبات پورے نہ کیے گئے تو وہ بڑے پیمانے پر احتجاجی تحریک شروع کرنے پر مجبور ہوں گے۔

سیلاب متاثرین نے خصوصی طور پر سردار محمد بخش خان مہر سے اپیل کی ہے کہ وہ اس معاملے میں مداخلت کریں اور انصاف کی فراہمی کو یقینی بنائیں۔

میرپورماتھیلو(نامہ نگار باغی ٹی وی، مشتاق علی لغاری)ڈی آئی جی سکھر رینج کیپٹن (ر) فیصل عبداللہ چاچڑ نے یومِ آزادی اور چہلم شہدائے کربلا کے پیش نظر سکھر رینج میں سکیورٹی ہائی الرٹ کر دی ہے۔ انہوں نے سکھر، خیرپور میرس اور گھوٹکی کے تمام ایس ایس پیز کو ریلیوں، تقریبات، جلوسوں اور مجالس کو فول پروف سیکیورٹی فراہم کرنے کے احکامات جاری کیے ہیں۔

جاری کردہ ہدایات کے مطابق شرپسند عناصر اور مشکوک افراد پر کڑی نظر رکھی جائے گی اور امن و امان کی فضا ہر صورت قائم رکھی جائے گی۔ ڈی آئی جی سکھر نے تمام ایس ایس پیز کو غیر معمولی حفاظتی انتظامات پر مشتمل فول پروف سیکیورٹی پلان ترتیب دینے اور عوام کی جان و مال کے تحفظ کو یقینی بنانے کا حکم دیا ہے۔

سکولوں، کالجوں، جامعات، پریس کلبوں، جشن آزادی کی تقریبات اور چہلم شہدائے کربلا کے جلوسوں کے راستوں کو محفوظ بنانے کے لیے سخت اقدامات کیے جائیں گے۔ ان مقامات کے اطراف میں رینڈم اسنیپ چیکنگ، پکٹنگ اور دیگر سیکیورٹی میئرز کو یقینی بنایا جائے گا۔ تمام اہم مقامات، جلوسوں کے روٹس، چوراہوں، داخلی و خارجی راستوں پر پولیس کی اضافی نفری تعینات کی جائے گی۔

ریلوے اسٹیشنز، بس ٹرمینلز، سرکاری و نجی املاک، گنجان آباد علاقوں اور بازاروں میں موبائل اور موٹر سائیکل گشت میں بھی اضافہ کیا جائے گا۔ ون ویلنگ کرنے والے منچلے نوجوانوں اور شرپسند عناصر کے خلاف سخت قانونی کارروائی کی جائے گی۔

ڈی آئی جی سکھر نے تمام اضلاع میں ضروری سہولیات سے آراستہ کنٹرول رومز قائم کرنے کی بھی ہدایت کی ہے تاکہ لمحہ بہ لمحہ صورتحال سے باخبر رہا جا سکے۔ اقلیتی برادریوں اور ان کی عبادت گاہوں کی سیکیورٹی سخت کرنے کا حکم بھی دیا گیا ہے۔

اس کے علاوہ چینی باشندوں کی حفاظت کے لیے وضع کردہ ایس او پیز پر بھی سختی سے عملدرآمد کیا جائے گا۔ ڈی آئی جی نے سیکیورٹی اہلکاروں کو بریفنگ دینے اور ہر وقت الرٹ رہنے کی بھی ہدایت کی ہے۔

اپنے پیغام میں ڈی آئی جی سکھر رینج نے کہا کہ یوم آزادی اور چہلم شہدائے کربلا کے سیکیورٹی پلان کے مطابق تمام افسران و اہلکار مستعدی سے اپنے فرائض انجام دیں۔ کسی بھی قسم کی غفلت اور لاپرواہی کی صورت میں سخت محکمانہ کارروائی عمل میں لائی جائے گی۔

میرپور ماتھیلو (نامہ نگار مشتاق علی لغاری) ایس ایچ او تھانہ میرپور ماتھیلو بدر دین برڑو نے اپنی ٹیم کے ساتھ لنک روڈ حیات پتافی کے قریب کاٹھ پل پر واردات کی نیت سے موجود 4 مسلح ڈاکوؤں کے ساتھ مقابلہ کیا۔

پولیس اور ڈاکوؤں کے درمیان دو طرفہ فائرنگ کے تبادلے کے بعد، پولیس نے ایک ڈاکو عبدالواحد ولد میر محمد چاچڑ کو زخمی حالت میں گرفتار کر لیا۔ گرفتار ملزم کے قبضے سے ایک پسٹل بھی برآمد ہوئی ہے۔ جبکہ اس کے تین نامعلوم ساتھی فرار ہونے میں کامیاب ہو گئے۔ زخمی ڈاکو کو طبی امداد کے لیے مقامی ہسپتال منتقل کر دیا گیا ہے۔

ابتدائی تفتیش کے مطابق، گرفتار ملزم چوری، رہزنی اور پولیس مقابلوں سمیت دیگر سنگین جرائم میں ملوث رہا ہے۔ پولیس کا کرمنل ریکارڈ چیک کیا جا رہا ہے۔ فرار ہونے والے ملزمان کی گرفتاری کے لیے علاقے میں سرچ آپریشن جاری ہے۔

گرفتار ملزم اور فرار ملزمان کے خلاف پولیس مقابلہ کا مقدمہ درج کیا جا رہا ہے، جبکہ ملزم سے غیر قانونی اسلحہ برآمد ہونے پر اس کے خلاف سندھ آرمز ایکٹ کے تحت ایک اور مقدمہ بھی درج کیا جائے گا۔ گھوٹکی سے محمد انور کھیتران نے پولیس پارٹی کی اس کامیاب کارروائی پر انہیں شاباشی کا پیغام بھیجا ہے۔

میرپور ماتھیلو (باغی ٹی وی،نامہ نگار مشتاق علی لغاری) ایس ایس پی گھوٹکی محمد انور کھیتران کے حکم پر ضلع بھر میں کچے کے علاقے میں ڈاکوؤں اور اغواء کاروں کے خلاف ٹارگیٹڈ آپریشن کا آغاز کر دیا گیا ہے۔

ڈی ایس پی اوباوڑو عبدالقادر سومرو کی سربراہی میں تھانہ کھمبڑا کی حدود کراس بند کراچی کے کچے والے علاقے میں پولیس نے اغواء کاروں کے خلاف آپریشن شروع کیا ہے۔ اس دوران پولیس اور ڈاکوؤں کے درمیان شدید فائرنگ کا تبادلہ جاری ہے۔

10 تھانوں کی پولیس اور بکتر بند گاڑیاں شامل
ڈی ایس پی عبدالقادر سومرو کی قیادت میں 10 مختلف تھانوں کی بھاری نفری، اے پی سی چین اور بکتر بند گاڑیوں کے ساتھ اس آپریشن میں حصہ لے رہی ہے۔ اس آپریشن کا بنیادی مقصد گزشتہ روز اغواء کیے گئے دو مغویوں، صاحب ڈنو اور بالم میگھواڑ کی بازیابی ہے۔

ایس ایس پی گھوٹکی نے واضح کیا ہے کہ یہ آپریشن مغویوں کی بحفاظت بازیابی اور علاقے سے تمام ڈاکوؤں کے مکمل سرنڈر ہونے تک جاری رہے گا۔ یہ کارروائی کچے کے علاقے میں بڑھتے ہوئے جرائم پر قابو پانے کے لیے ایک اہم قدم ہے۔

میرپور ماتھیلو (باغی ٹی وی، نامہ نگار مشتاق علی لغاری)ڈہرکی میں سرکاری زمین پر قبضے کی ایک بڑی سازش عدالت میں بے نقاب ہو گئی۔ ایڈیشنل ڈسٹرکٹ اینڈ سیشن جج پردیپ کمار میٹائی کی عدالت نے دیہہ لکپور، تعلقہ اوباڑو کی 5 ایکڑ 3 گھنٹے سرکاری اراضی پر کی گئی جعلی انٹریاں منسوخ کرتے ہوئے ملوث ریونیو عملے کے خلاف سخت قانونی کارروائی کا حکم جاری کر دیا ہے۔

سول اپیل نمبر 30/2025 پر فیصلہ سناتے ہوئے عدالت نے انٹری نمبر 223-A اور 238 سمیت ساتویں فارم بی پر کی گئی تمام جعلسازیوں کو کالعدم قرار دیا، جب کہ سب رجسٹرار کو ہدایت کی گئی ہے کہ 24 فروری 2000 کو کی گئی جعلی ایکسچینج ڈیڈ نمبر 412 کو بھی منسوخ کیا جائے۔

عدالت نے چیف سیکریٹری سندھ، سینئر ممبر بورڈ آف ریونیو، کمشنر سکھر اور ڈپٹی کمشنر گھوٹکی کو حکم دیا ہے کہ وہ جعلسازی میں ملوث ریونیو عملے کے خلاف بلاامتیاز کارروائی کریں۔

یہ مقدمہ جڑیل میر عرف جڑیل بھٹو کی جانب سے حلیمہ بھٹو و دیگر کے خلاف دائر کیا گیا تھا۔ عدالت کا فیصلہ ضلع گھوٹکی میں زمینوں پر بڑھتے قبضہ مافیا کے خلاف ایک بڑی قانونی پیش رفت قرار دیا جا رہا ہے۔