Category: سکھر

میر پور ماتھیلو (باغی ٹی وی نامہ نگار مشتاق علی لغاری)ایس ایس پی گھوٹکی ڈاکٹر سمیع اللہ سومرو کی ہدایت پر جرائم پیشہ عناصر کے خلاف کریک ڈاؤن جاری ہے۔ تھانہ بی سیکشن پولیس نے حساس ادارے کی اطلاع پر نیشنل ہائی وے پر کندھ کوٹ-کشمور روڈ کے قریب کامیاب کارروائی کرتے ہوئے 3 خطرناک ملزمان کو اسلحے کے بھاری ذخیرے سمیت گرفتار کر لیا۔

ڈی ایس پی گھوٹکی زاہد حسین میرانی، ایس ایچ او رفیق احمد سومرو اور ان کی ٹیم نے کارروائی کے دوران ناکہ بندی کر کے میاں والی کے رہائشی تین افراد محمد عمران ولد محمد اسلم نیازی، مزمل حسین ولد محمد حنیف شاہ، اور ظفر اقبال ولد احمد یار کلیار کو ایک ٹرالر (TLV 549) سمیت گرفتار کر لیا۔ ٹرالر سے دو ہزار کلاشنکوف اور جی تھری رائفلز کی گولیاں برآمد ہوئیں، جنہیں ملزمان پنجاب سے کراچی اسمگل کرنے کی کوشش کر رہے تھے۔

پولیس نے ملزمان کو اسلحہ سمیت تھانے منتقل کر کے ان کے خلاف مقدمہ نمبر 50/2025 بجرم دفعہ 23 سندھ آرمز ایکٹ درج کر لیا ہے۔ مزید تفتیش جاری ہے تاکہ اسلحہ اسمگلنگ کے پورے نیٹ ورک کو بے نقاب کیا جا سکے۔

ایس ایس پی ڈاکٹر سمیع اللہ سومرو نے کامیاب کارروائی پر پولیس ٹیم کو شاباش دی اور تعریفی سرٹیفکیٹس دینے کا اعلان کیا۔ پولیس کی یہ کارروائی گھوٹکی میں اسلحہ کی غیر قانونی نقل و حمل کے خلاف ایک بڑی پیش رفت قرار دی جا رہی ہے۔

میر پور ماتھیلو (باغی ٹی وی نامہ نگار مشتاق علی لغاری)ایس ایس پی گھوٹکی ڈاکٹر سمیع اللہ سومرو کی قیادت میں جرائم کی روک تھام کے لیے گھوٹکی پولیس نے بڑی کامیابی حاصل کر لی۔ حساس ادارے کی نشاندہی پر تھانہ اوباڑو پولیس نے نیشنل ہائی وے پر رینی کینال پل کے قریب کامیاب کارروائی کرتے ہوئے غیر قانونی ایرانی تیل سے بھرا ٹینکر قبضے میں لے لیا اور دو ملزمان کو گرفتار کر لیا۔

پنجاب سے سندھ آنے والے آئل ٹینکر نمبر 3145 MNS کو تحویل میں لیا گیا، جس میں 5000 لیٹر اسمگل شدہ ایرانی تیل موجود تھا۔ اس غیر قانونی تیل کی مالیت لاکھوں روپے بتائی جا رہی ہے، جسے مختلف علاقوں میں سپلائی کیا جانا تھا۔

گرفتار ملزمان کی شناخت غازی خان ولد حاجی خان سرکی (سکنہ سنجرپور، تحصیل صادق آباد، ضلع رحیم یار خان) اور صُفیان ولد محمد یاسین آرائیں (سکنہ صادق آباد، ضلع رحیم یار خان) کے طور پر ہوئی ہے۔ ضابطے کی کارروائی مکمل کرنے کے بعد دونوں ملزمان کے خلاف مقدمہ نمبر 97/2025 بجرم دفعہ 279، 285، 286 ت پ درج کر لیا گیا ہے۔

ایس ایس پی گھوٹکی ڈاکٹر سمیع اللہ سومرو نے کامیاب کارروائی پر پولیس پارٹی کو شاباش دی اور تعریفی سرٹیفکیٹ دینے کا اعلان کیا۔ پولیس کی اس کارروائی کو علاقے میں اسمگلنگ کے خلاف اہم پیش رفت قرار دیا جا رہا ہے۔

میرپور ماتھیلو (نامہ نگار باغی ٹی وی مشتاق علی لغاری)گزشتہ روز سوشل میڈیا پر ایک دل دہلا دینے والی ویڈیو وائرل ہوئی تھی جس میں ایک شخص کو ایک خاتون پر تشدد اور تذلیل کرتے ہوئے دیکھا گیا۔ ویڈیو منظر عام پر آنے کے بعد عوامی حلقوں میں شدید غم و غصہ پایا گیا۔

واقعے کا سختی سے نوٹس لیتے ہوئے ایس ایس پی گھوٹکی ڈاکٹر سمیع اللہ سومرو نے فوری کارروائی کا حکم جاری کیا۔ ان کے احکامات پر عمل کرتے ہوئے ایس ایچ او اے سیکشن محمد قابل بھیو نے فوری ایکشن لیتے ہوئے ویڈیو میں نظر آنے والے ملزم عبدالقدیر ولد زاہد حسین سندرانی سکنہ شانتی نگر گھوٹکی کو گرفتار کر لیا۔

پولیس نے ملزم کے خلاف سرکار کی مدعیت میں مقدمہ نمبر 189/2025 بجرم دفعات 354، 337-A(i)، 337-F(i) تعزیرات پاکستان کے تحت درج کر لیا ہے۔ ایس ایس پی گھوٹکی کا کہنا ہے کہ ایسے واقعات کسی صورت برداشت نہیں کیے جائیں گے اور قانون کی مکمل عملداری کو یقینی بنایا جائے گا۔

مزید تحقیقات جاری ہیں، اور پولیس کی جانب سے ملزم کو جلد عدالت میں پیش کیے جانے کا امکان ہے۔

میرپورماتھیلو (باغی ٹی وی، نامہ نگار مشتاق علی لغاری)بدنام زمانہ منشیات فروشوں کے خلاف گھیراؤ اور گھر گھر تلاشی، کئی ملزمان فرار

ایس ایس پی گھوٹکی ڈاکٹر سمیع اللہ سومرو کی خصوصی ہدایت پر میرپور ماتھیلو میں منشیات فروشوں اور جرائم پیشہ عناصر کے خلاف بڑا آپریشن شروع کر دیا گیا۔ ڈی ایس پی میرپور ماتھیلو محمد یونس کی سربراہی میں ایس ایچ او تھانہ میرپور ماتھیلو بدرالدین برڑو اور دیگر پانچ تھانوں کی پولیس کی بھاری نفری نے مختلف علاقوں کا محاصرہ کر کے گھر گھر تلاشی کا آغاز کیا۔

کارروائی کے دوران منشیات مافیا سے تعلق رکھنے والے بدنام زمانہ افراد ساگر بوزدار، چاکر بوزدار، سھیل بوزدار، عمران بوزدار، اختر بوزدار، جیوا بوزدار، مسمات حوراں اور مسمات میراں کے گھروں اور ٹھکانوں پر چھاپے مارے گئے۔ تاہم متعدد ملزمان آپریشن سے قبل ہی گھروں کو چھوڑ کر فرار ہو گئے۔

آپریشن کے دوران پولیس نے چرس، منشیات کی فروخت میں ملوث عناصر کے علاوہ چوری کی وارداتوں میں مطلوب بشیر احمد جلبانی اور منظور احمد جلبانی کے گھروں پر بھی ریڈ کیے، مگر وہ بھی فرار نکلے۔

ڈی ایس پی محمد یونس کے مطابق منشیات مافیا کے خلاف یہ آپریشن ان کے مکمل خاتمے تک جاری رہے گا اور کسی بھی ملزم کو بخشا نہیں جائے گا۔ پولیس کی کارروائی سے علاقے میں منشیات فروشوں میں کھلبلی مچ گئی ہے، جب کہ عوامی حلقوں نے پولیس آپریشن کو سراہا ہے۔

سانگھڑ( باغی ٹی وی،نامہ نگار مشتاق لغاری) چوٹیاری ڈیم میں چار نوجوان ڈوب کر جاں بحق، لاشیں ہسپتال منتقل

تفصیل کے سانگھڑ کے قریب چوٹیاری ڈیم میں افسوسناک واقعہ پیش آیا جہاں پکنک منانے کے لیے آئے چار نوجوان نہاتے ہوئے پانی میں ڈوب کر جاں بحق ہو گئے۔ واقعے کی اطلاع ملتے ہی ایس ایس پی سانگھڑ غلام نبی کیریو نے ایس ایچ او چوٹیاریو کو فوری کارروائی کی ہدایت دی۔

ایس ایچ او نبی بخش لاشاری نے فوری طور پر مقامی غوطہ خوروں کی مدد سے امدادی کارروائی شروع کی۔ چند گھنٹوں کی کوششوں کے بعد چاروں نوجوانوں احتشام، عمر، امان اللہ اور شاہزیب کی لاشیں نکال لی گئیں اور فوری طور پر سول ہسپتال سانگھڑ منتقل کر دی گئیں۔ جاں بحق ہونے والوں کی عمریں 12 سے 24 سال کے درمیان تھیں۔

پولیس نے متوفیوں کے ورثا سے بھی رابطہ کیا، تاہم اہل خانہ نے کسی قانونی کارروائی سے انکار کر دیا ہے۔

میرپورماتھیلو(باغی ٹی وی ،نامہ نگار مشتاق لغاری)صوبہ سندھ کے شہر سکھر کے علاقے روہڑی کے قریب جھانگڑو تھانے کی حدود میں بھینس چوری کے تنازع پر جاگیرانی برادری کے دو گروپوں کے درمیان ہونے والے مسلح تصادم میں 3 افراد ہلاک اور ایک بچہ زخمی ہوگیا۔ پولیس کے مطابق یہ واقعہ عید کے روز پیش آیا، جس نے علاقے میں کشیدگی کو ایک بار پھر بڑھا دیا۔

پولیس ذرائع کے مطابق، تنازع کی ابتدا گزشتہ سال اس وقت ہوئی جب جاگیرانی برادری کے ایک گروپ نے دوسرے گروپ پر بھینس چوری کا الزام عائد کیا تھا۔ اس الزام کے بعد دونوں گروپوں کے درمیان کشیدگی بڑھ گئی، جو وقتاً فوقتاً پرتشدد جھڑپوں کی شکل اختیار کرتی رہی۔ پولیس کا کہنا ہے کہ اس تنازع کے نتیجے میں گزشتہ سال سے اب تک 13 افراد اپنی جانوں سے ہاتھ دھو بیٹھے ہیں۔

چند ماہ قبل دونوں فریقین کے درمیان مقامی جرگے کے ذریعے صلح کرائی گئی تھی، اور امید کی جا رہی تھی کہ یہ تنازع ختم ہو جائے گا۔ تاہم، عید کے روز ایک بار پھر دونوں گروپوں کے درمیان تلخ کلامی ہوئی، جو دیکھتے ہی دیکھتے مسلح تصادم میں تبدیل ہوگئی۔ اس جھڑپ میں فائرنگ کے نتیجے میں تین افراد موقع پر ہی ہلاک ہوگئے، جبکہ ایک بچہ شدید زخمی ہوا۔ زخمی بچے کو فوری طور پر طبی امداد کے لیے قریبی اسپتال منتقل کیا گیا، جہاں اس کی حالت تشویشناک بتائی جا رہی ہے۔

جھانگڑو تھانے کے پولیس حکام نے واقعے کی تصدیق کرتے ہوئے بتایا کہ فائرنگ کے تبادلے کے بعد علاقے میں کشیدگی بدستور برقرار ہے۔ پولیس نے جائے وقوعہ پر پہنچ کر صورتحال پر قابو پانے کی کوشش کی اور لاشوں کو پوسٹ مارٹم کے لیے اسپتال منتقل کیا۔ مزید خونریزی روکنے کے لیے علاقے میں پولیس کی اضافی نفری تعینات کردی گئی ہے۔

ایس ایچ او جھانگڑو تھانے نے میڈیا کو بتایا کہ ابتدائی تحقیقات کے مطابق یہ واقعہ پرانے تنازع کا تسلسل ہے۔ انہوں نے کہا کہ دونوں گروپوں کے اہم افراد سے رابطہ کیا جا رہا ہے تاکہ مزید تصادم کو روکا جا سکے۔ پولیس نے واقعے کا مقدمہ درج کرلیا ہے اور ملزمان کی گرفتاری کے لیے چھاپے مارے جا رہے ہیں۔

اس واقعے کے بعد روہڑی اور اس کے ملحقہ علاقوں میں خوف و ہراس پھیل گیا ہے۔ مقامی لوگوں کا کہنا ہے کہ جاگیرانی برادری کے درمیان یہ تنازع نہ صرف خاندانوں بلکہ پورے علاقے کے امن کے لیے خطرہ بن چکا ہے۔ کچھ رہائشیوں نے مطالبہ کیا ہے کہ انتظامیہ اور مقامی عمائدین مل کر اس تنازع کا مستقل حل نکالیں تاکہ مزید جانی نقصان سے بچا جا سکے۔

بھینس چوری کے تنازعات دیہی سندھ میں اکثر خاندانی دشمنیوں کا باعث بنتے ہیں، کیونکہ مویشی دیہی معیشت میں اہم کردار ادا کرتے ہیں۔ اس طرح کے تنازعات اکثر جرگوں کے ذریعے حل کیے جاتے ہیں، لیکن بعض اوقات صلح کے باوجود دشمنی دوبارہ سر اٹھاتی ہے، جیسا کہ اس واقعے میں دیکھا گیا۔

پولیس اور مقامی انتظامیہ نے عوام سے اپیل کی ہے کہ وہ افواہوں پر کان نہ دھریں اور امن و امان برقرار رکھنے میں تعاون کریں۔ حکام کا کہنا ہے کہ وہ اس معاملے کو سنجیدگی سے لے رہے ہیں اور جلد ہی ملزمان کو قانون کے کٹہرے میں لایا جائے گا۔

میرپورماتھیلو (باغی ٹی وی، نامہ نگار مشتاق لغاری) گھوٹکی پولیس نے کچے کے علاقے میں ممکنہ اغواء کی کوشش ناکام بناتے ہوئے ڈیرہ غازی خان کے رہائشی شہری کو بحفاظت بازیاب کروا لیا۔ پولیس نے نیشنل ہائی وے پر بروقت ناکہ بندی اور موثر گشت کے ذریعے اغواء کاروں کے منصوبے کو ناکام بنایا۔

تفصیلات کے مطابق ایس ایس پی گھوٹکی ڈاکٹر سمیع اللہ سومرو کی ہدایت پر پولیس کی جرائم پیشہ عناصر کے خلاف کارروائیاں تیز کر دی گئی ہیں۔ تھانہ سرحد پولیس نے جدید ٹیکنالوجی کی مدد سے نیشنل ہائی وے کے قریب ٹنڈو ہوٹل کے مقام پر کارروائی کرتے ہوئے غلام حسن خان ولد قالو خان کھوسہ سکنہ راجپوت کالونی ڈیرہ غازی خان کو اغواء ہونے سے بچا لیا۔

غلام حسن کھوسہ نے پولیس کو بتایا کہ اس کا بیٹا ایک لڑکی سے فون پر رابطے میں تھا، جو اسے شادی کے لیے بلوا رہی تھی۔ آج وہ اپنے بیٹے کا رشتہ طے کرنے کے لیے کچے کے علاقے جا رہا تھا کہ پولیس نے بروقت کارروائی کرتے ہوئے اسے اغواء ہونے سے بچا لیا۔ پولیس کا کہنا ہے کہ یہ ایک منظم اغواء کا جال تھا جسے لڑکی کے ذریعے پھنسایا گیا تھا۔

بازیاب ہونے والے شہری نے ایس ایس پی گھوٹکی ڈاکٹر سمیع اللہ سومرو اور ان کی ٹیم کا شکریہ ادا کرتے ہوئے کہا کہ اگر پولیس بروقت مداخلت نہ کرتی تو وہ ڈاکوؤں کے ہتھے چڑھ چکا ہوتا۔

ایس ایس پی گھوٹکی ڈاکٹر سمیع اللہ سومرو نے اس کامیاب کارروائی پر پولیس ٹیم کو شاباش دیتے ہوئے کہا ہے کہ عوام کی جان و مال کی حفاظت پولیس کی اولین ترجیح ہے، اور ایسے جرائم پیشہ عناصر کے خلاف کارروائیاں جاری رہیں گی۔

گھوٹکی پولیس کے ترجمان کے مطابق، اغواء کی اس ممکنہ کوشش کے پیچھے سرگرم گروہوں کی تلاش کے لیے مزید تحقیقات جاری ہیں۔

میرپور ماتھیلو (باغی ٹی وی، نامہ نگار مشتاق علی لغاری)ایس ایس پی گھوٹکی ڈاکٹر سمیع اللہ سومرو کی ہدایات پر جرائم پیشہ افراد کے خلاف جاری کریک ڈاؤن کے دوران تھانہ بی سیکشن پولیس نے کامیاب کارروائی کرتے ہوئے بھاری مقدار میں شراب اسمگل کرنے کی کوشش ناکام بنا دی۔

ایس ایچ او تھانہ بی سیکشن محمد قابل بھیو نے عملے کے ہمراہ خفیہ اطلاع پر انٹرچینج گھوٹکی کے قریب کارروائی کرتے ہوئے دو ملزمان، فیاض احمد ولد اللہ وسایو چوہان اور سلیم ولد پیر بخش چوہان، سکنہ رفیق آباد رحیم یار خان، کو گرفتار کر لیا۔ پولیس کے مطابق ملزمان کے قبضے سے 288 آدھیہ شراب اور ایک کار برآمد ہوئی۔ ایک اور ملزم، محمد فرخ بشیر ولد بشیر احمد، پولیس کو دیکھتے ہی موقع سے فرار ہو گیا۔

پولیس نے گرفتار ملزمان کو برآمد شدہ شراب سمیت تھانے منتقل کر دیا ہے، جبکہ فرار ہونے والے ملزم کی تلاش جاری ہے۔ ملزمان کے خلاف مقدمہ نمبر 51/2025 بجرم دفعہ 3/4 منشیات حدود آرڈیننس کے تحت درج کر لیا گیا ہے۔

ایس ایس پی گھوٹکی ڈاکٹر سمیع اللہ سومرو نے کامیاب کارروائی پر پولیس ٹیم کو شاباش دیتے ہوئے اسے منشیات کے خلاف جاری جنگ میں اہم پیش رفت قرار دیا ہے۔

میرپور ماتھیلو (باغی ٹی وی، نامہ نگار مشتاق علی لغاری) ضلع گھوٹکی کے کچہ ایریا میں اغواء کاروں اور ڈاکوؤں کے خلاف پولیس اور رینجرز کا مشترکہ ٹارگیٹڈ آپریشن ایس ایس پی گھوٹکی ڈاکٹر سمیع اللہ سومرو کی قیادت میں بھرپور انداز میں جاری ہے۔ شر گینگ، ماچھی گینگ اور میرانی گینگ کے خلاف سب ڈویژن رونتی کے تھانہ شہید دین محمد لغاری کی حدود میں جاری آپریشن میں مغویوں کی بازیابی کے لیے جدید ٹیکنالوجی کے ساتھ کارروائیاں کی جا رہی ہیں۔

پولیس اور اغواء کاروں کے درمیان شدید فائرنگ کا تبادلہ جاری ہے جبکہ پولیس اور رینجرز نے ڈاکوؤں کے ٹھکانوں کا گھیراؤ تنگ کر کے انہیں مسمار کر دیا اور کئی مقامات کو نظر آتش کر دیا گیا ہے۔ کچہ کے دشوار گزار علاقوں میں سخت سرچ آپریشن کیا جا رہا ہے تاکہ ڈاکوؤں کے تمام محفوظ مقامات ختم کیے جا سکیں۔

آج کے آپریشن میں ایس ایس پی گھوٹکی ڈاکٹر سمیع اللہ سومرو کی قیادت میں ڈی ایس پی اباوڑو عبدالقادر سومرو، متعدد تھانوں کے ایس ایچ اوز، اے پی سی چین اور بکتر بند گاڑیوں سمیت پولیس و رینجرز کی بھاری نفری شریک ہے۔

ایس ایس پی ڈاکٹر سمیع اللہ سومرو نے عزم ظاہر کیا ہے کہ انشاء اللہ بہت جلد تمام مغویوں کو بحفاظت بازیاب کروا لیا جائے گا اور اغواء کاروں و ڈاکوؤں کے مکمل خاتمے تک کچہ کے علاقے میں آپریشن جاری رہے گا۔