Category: سکھر

سکھر(باغی ٹی وی نامہ نگار) کرپشن کے خلاف زیرو ٹالرنس، تین پولیس اہلکار برطرف

سکھر میں پولیس کے اعلیٰ افسران کی جانب سے کرپشن اور اختیارات کے ناجائز استعمال کے خلاف سخت کارروائی عمل میں لائی گئی ہے۔ ڈی آئی جی سکھر کیپٹن (ر) فیصل عبداللہ چاچڑ نے آئی جی سندھ غلام نبی میمن کے واضح پالیسی احکامات کی روشنی میں ضلع سکھر کے تین اہلکاروں کے خلاف سخت تادیبی اقدامات اٹھائے ہیں۔

تفصیلات کے مطابق، سب انسپیکٹر عبدالرحمان کاکیپوٹو، ہیڈ کانسٹیبل ضمیر قاضی اور پولیس کانسٹیبل حضور بخش ملک پر کرپشن، غیر قانونی سرگرمیوں اور اختیارات سے تجاوز سمیت سنگین الزامات عائد تھے۔ ان الزامات پر ڈی آئی جی سکھر نے شوکاز نوٹس جاری کرتے ہوئے سکھر رینج کے ایک سینئر آفیسر کو میرٹ کی بنیاد پر محکمہ جاتی انکوائری کا حکم دیا تھا۔

انکوائری آفیسر کی رپورٹ کا بغور جائزہ لینے کے بعد ڈی آئی جی سکھر نے اردلی روم کے دوران اہم فیصلے صادر کیے۔ سب انسپیکٹر عبدالرحمان کاکیپوٹو پر تمام الزامات ثابت ہونے پر انہیں میجر پنشمنٹ کے تحت ایک سال کی سروس سے برخاست کر دیا گیا۔ اسی طرح ہیڈ کانسٹیبل ضمیر قاضی پر بھی الزامات ثابت ہونے پر انہیں ایک سال کی سروس سے برخاست کرتے ہوئے تعلقہ پنو عاقل میں دوبارہ تعیناتی پر پابندی عائد کر دی گئی۔ تاہم، پولیس کانسٹیبل حضور بخش ملک کو تنبیہ کرتے ہوئے آئندہ محتاط رہنے کی ہدایت کی گئی۔

علاوہ ازیں، برطرف کیے گئے پولیس کانسٹیبل منصور پتافی کی نوکری پر بحالی کی اپیل منظور کر لی گئی جبکہ ایک اور برطرف کانسٹیبل جاوید احمد کلهوڑو کی بحالی کی اپیل مسترد کر دی گئی۔ ڈی آئی جی سکھر نے ایک انسپیکٹر اور چار اسسٹنٹ سب انسپیکٹرز کی تبادلوں کی درخواستوں پر بھی احکامات جاری کیے۔

اپنے پیغام میں ڈی آئی جی سکھر نے واضح کیا کہ کسی بھی قسم کی غفلت، مجرمانہ سرگرمیوں، اختیارات سے تجاوز یا سماجی برائیوں میں ملوث افسران و اہلکار کسی رعایت کے مستحق نہیں ہوں گے اور ان کے خلاف سخت ترین قانونی و محکمہ جاتی کارروائی عمل میں لائی جائے گی۔ ان سخت اقدامات سے سکھر پولیس میں کرپشن کے خلاف ایک واضح پیغام دیا گیا ہے۔

میرپور ماتھیلو (نامہ نگارمشتاق لغاری) خانپور مہر کے نواحی علاقے ہیکل پٹ میں ایک افسوسناک واقعے میں مسلح افراد نے کورائی برادری کے گھروں پر دھاوا بول دیا۔ اندھا دھند فائرنگ کے نتیجے میں ایک ہی خاندان کے چار افراد موقع پر ہی جاں بحق ہو گئے۔

پولیس کے مطابق ہلاک ہونے والوں کی شناخت گلشیر کورائی، ان کے بھائی گل میر کورائی، گلشیر کی بیوی شریفاں اور ان کی والدہ اختیاراں کورائی کے ناموں سے ہوئی ہے۔ مسلح افراد نے گھر میں گھس کر ان پر براہ راست فائرنگ کی، جس سے موقع پر ہی ان کی موت واقع ہو گئی۔

واقعے کے بعد علاقے میں خوف و ہراس پھیل گیا۔ مقامی ذرائع کے مطابق اطلاع دینے کے باوجود پولیس کافی دیر تک جائے وقوعہ پر نہیں پہنچ سکی، جس کے باعث مقتولین کی لاشیں کھلے آسمان تلے پڑی رہیں۔ اس تاخیر پر علاقہ مکینوں نے شدید غم و غصے کا اظہار کیا۔

ذرائع نے یہ بھی بتایا کہ تھانہ مبارک پور اور تھانہ خانپور مہر کی پولیس کے درمیان علاقے کی حدود کے تعین پر تنازعہ پایا جاتا ہے، جس کی وجہ سے ابتدائی طور پر یہ واضح نہیں ہو سکا کہ کس تھانے کی پولیس جائے وقوعہ کی ذمہ داری لے گی۔ اس مبینہ تنازعے کے باعث مقتولین کی نعشیں کئی گھنٹوں تک جائے وقوعہ پر پڑی رہیں۔

بعد ازاں اعلیٰ پولیس حکام نے واقعے کا نوٹس لیتے ہوئے تحقیقات کا آغاز کر دیا۔ ابتدائی تحقیقات کے مطابق، پولیس حکام نے اس واقعے کو پرانی دشمنی کا نتیجہ قرار دیا ہے۔ تاہم، انہوں نے مزید تفتیش کی یقین دہانی کرائی ہے تاکہ حقائق کو مکمل طور پر واضح کیا جا سکے۔

اس دلخراش واقعے نے علاقے میں سوگ کی فضا طاری کر دی ہے اور مقتولین کے لواحقین گہرے صدمے سے دوچار ہیں۔ علاقہ مکینوں نے مطالبہ کیا ہے کہ واقعے میں ملوث ملزمان کو جلد از جلد گرفتار کر کے قانون کے مطابق سخت سزا دی جائے۔

میرپور ماتھیلو (باغی ٹی وی، نامہ نگار مشتاق علی لغاری)گھوٹکی پولیس نے ایس ایس پی گھوٹکی ڈاکٹر سمیع اللہ سومرو کی ہدایت پر بہترین پولیس پکٹنگ اور گشت کے ذریعے ایک بڑی کارروائی کرتے ہوئے اغوا کی ایک کوشش کو بروقت ناکام بنا دیا۔

تھانہ بی سیکشن کے ایس ایچ او محمد قابل بھیو نے اپنی ٹیم کے ہمراہ جدید ٹیکنالوجی کی مدد سے ناکہ بندی کے دوران محمد پور کے قریب سے تعلقہ جمرود ضلع خیبر ایجنسی خیبر پختونخوا کے رہائشی سید جمال ولد فقیر شاہ کو اغوا ہونے سے بچا لیا۔

تحقیقات کے مطابق سید جمال ایک نسوانی آواز کے ذریعے ایک خاتون سے شادی کرنے کے لیے کچے کے علاقے میں جا رہے تھے جہاں انہیں اغوا کیا جانا تھا۔ سید جمال نے پولیس کو بتایا کہ انہیں کچھ دنوں سے نامعلوم موبائل فون نمبروں سے لڑکی کی کالیں آ رہی تھیں اور وہ ان سے شادی کرنے کا کہہ رہی تھی، جس کے نتیجے میں ان کی دوستی ہو گئی تھی۔ آج وہ اسی سلسلے میں شادی کے لیے جا رہے تھے۔

سید جمال شاہ نے ایس ایس پی گھوٹکی ڈاکٹر سمیع اللہ سومرو اور ان کی ٹیم کا دل کی گہرائیوں سے شکریہ ادا کیا جنہوں نے انہیں اغوا ہونے سے بچا لیا۔

ایس ایس پی گھوٹکی ڈاکٹر سمیع اللہ سومرو نے اس کامیاب کارروائی پر ایس ایچ او تھانہ بی سیکشن محمد قابل بھیو اور ان کی ٹیم کو شاباشی کا پیغام بھیجا ہے۔

میرپور ماتھیلو (باغی ٹی وی نامہ نگار مشتاق علی لغاری) ایس ایس پی گھوٹکی ڈاکٹر سمیع اللہ سومرو کی ہدایات پر گھوٹکی پولیس نے ضلع بھر میں جرائم پیشہ عناصر کے خلاف جاری کریک ڈاؤن کے سلسلے میں ایک اہم کامیابی حاصل کی ہے۔ تھانہ اے سیکشن گھوٹکی پولیس نے بہترین اور بروقت کارروائی کرتے ہوئے ایک ایسی عورت کو بازیاب کرایا جسے شادی کا جھانسہ دے کر اغوا کیا گیا تھا اور اس گھناؤنے فعل میں ملوث ایک ملزم کو بھی گرفتار کر لیا ہے۔

تفصیلات کے مطابق گزشتہ رات فیصل آباد پنجاب کی رہائشی مسمات روبینہ بنت امیر احمد آرائیں نے تھانہ اے سیکشن گھوٹکی میں اطلاع درج کرائی کہ نور احمد ولد شیخ احمد حسین جو محلہ عثمان آباد فیصل آباد پنجاب کا ہی رہائشی ہے نے اسے شادی کا جھانسہ دے کر اغوا کیا اور اسے کسی اور جگہ فروخت کرنے کی کوشش کر رہا تھا۔ خاتون نے اپنی جان بچا کر تھانے پہنچنے کے بعد بتایا کہ ملزم شیلٹن بائے پاس پر موجود ہے۔

اس اطلاع پر فوری عمل کرتے ہوئے ایس ایچ او تھانہ اے سیکشن گھوٹکی رفیق احمد سیلرو بھاری نفری کے ہمراہ فوراً شیلٹن بائے پاس گھوٹکی پہنچے۔ خاتون کی نشاندہی پر ملزم نور احمد ولد شیخ احمد حسین کو موقع سے گرفتار کر لیا گیا۔

پولیس نے گرفتار ملزم کو تھانہ اے سیکشن منتقل کر دیا اور اس کے خلاف کرائم نمبر 109/2025 بجرم دفعہ 365B کے تحت مقدمہ درج کر لیا ہے۔

دوران تفتیش ملزم نے پولیس کو انکشاف کیا کہ وہ روبینہ بنت امیر احمد آرائیں کو شادی کا جھانسہ دے کر اغوا کر کے کسی اور جگہ فروخت کرنے جا رہا تھا۔ مزید تفتیش سے یہ بھی معلوم ہوا کہ گرفتار ملزم اس طرح خواتین کو شادی کا جھانسہ دے کر اغوا کرتا اور انہیں مختلف شہروں میں فروخت کر دیتا تھا۔ پولیس کے مطابق گرفتار ملزم کے خلاف پنجاب میں بھی اغوا کے متعدد مقدمات درج ہیں۔

مسمات روبینہ آرائیں کو متعلقہ عدالت میں پیش کیا جائے گا، جس کے بعد عدالت کے حکم کے مطابق مزید قانونی کارروائی عمل میں لائی جائے گی۔ پولیس گرفتار ملزم سے مزید تفتیش کر رہی ہے تاکہ اس کے دیگر جرائم اور ساتھیوں کا بھی سراغ لگایا جا سکے۔

ایس ایس پی گھوٹکی ڈاکٹر سمیع اللہ سومرو نے ایس ایچ او تھانہ اے سیکشن اور ان کی پوری ٹیم کی اس بہترین اور بروقت کارروائی پر انہیں خصوصی شاباشی کا پیغام بھیجا ہے۔