Category: سکھر

میرپور ماتھیلو، باغی ٹی وی (نامہ نگار مشتاق علی لغاری)صوبہ سندھ کے ضلع گھوٹکی کے علاقے ڈہرکی کے قریب رکن سندھ اسمبلی جام مہتاب کے قافلے پر نامعلوم مسلح افراد نے حملہ کردیا، فائرنگ کے نتیجے میں گارڈ اور ڈرائیور جاں بحق ہوگیا، 2 گارڈ شدید زخمی ہوئے۔

رکن صوبائی اسمبلی جام مہتاب پر ڈہرکی نرلی پل کے مقام پر مسلح افراد نے حملہ کیا، اس دوران جام مہتاب حسین کا ایک گارڈ اور ڈرائیور جاں بحق ہوگیا، جبکہ 2 گارڈ شدید زخمی ہوگئے، حملے کے دوران جام مہتاب حسین محفوظ رہے۔ پولیس نے علاقے کو گھیرے میں لے لیا۔

رپورٹ کے مطابق جاں بحق گارڈ کی لاش اور زخمیوں کو ڈہرکی ہسپتال پہنچایا گیا، جہاں سے زخمیوں کو شیخ زید ہسپتال رحیم یار خان منتقل کردیا گیا۔

ترجمان جام ہاؤس کے مطابق جام مہتاب حسین ڈہر اپنی زرعی زمینوں پر گئے ہوئے تھے۔ ایم پی اے جام مہتاب حسین ڈہر کا کہنا ہے کہ ہماری گاڑیوں پر فائرنگ کی گئی ہے، تین سے 4 افراد زخمی ہوئے ہیں، پولیس کو طلب کیا گیا ہے۔ انہوں نے الزام لگایا کہ مجھ پر حملہ سابق رکن صوبائی اسمبلی شہریار شر نے کیا ہے۔ انہوں نے کہا کہ ہم شہریار شر سے اس کا بھرپور انتقام لیں گے۔

دوسری جانب وزیر داخلہ سندھ ضیاء الحسن لنجار نے ایس ایس پی گھوٹکی سے تفصیلات طلب کر لی ہیں۔

وزیراعلیٰ سندھ کا نوٹس
وزیراعلیٰ سندھ نے ایم پی اے جام مہتاب ڈہر کے قافلے پر فائرنگ کا نوٹس لے لیا۔ ترجمان کے مطابق وزیراعلیٰ نے واقعے کی شدید الفاظ میں مذمت کرتے ہوئے آئی جی پولیس کو ہدایت کی ہے کہ ملزمان کی گرفتاری عمل میں لائی جائے۔

میرپورماتھیلو، باغی ٹی وی (نامہ نگار مشتاق لغاری) جروار میں بجلی چوری کے خلاف سیپکو کی کارروائی، مزاحمت پر جھڑپیں، اہلکار زخمی، احتجاج جاری

تفصیلات کے مطابق گھوٹکی کی تحصیل میرپورماتھیلو کے شہر جروار میں سیپکو، پولیس اور رینجرز نے بجلی چوری کے خلاف مشترکہ کارروائی کی، جس پر مقامی افراد نے شدید مزاحمت کی۔ صورتحال اس وقت کشیدہ ہوگئی جب میر خان گبول کے رہائشیوں نے سیپکو کے ملازمین اور پولیس اہلکاروں پر حملہ کر دیا، جس میں ایک سیپکو اہلکار زخمی ہوگیا جبکہ سیپکو کی گاڑی کو بھی شدید نقصان پہنچا۔

پولیس نے کارروائی کرتے ہوئے گبول برادری کے ایک نوجوان کو گرفتار کرلیا، جس کے بعد علاقے میں کشیدگی مزید بڑھ گئی۔ گرفتاری کے خلاف گبول برادری کے افراد نے جروار میں احتجاج شروع کر دیا، مظاہرین نے مطالبہ کیا کہ گرفتار نوجوان کو فوری رہا کیا جائے اور سیپکو کی جانب سے کی جانے والی کارروائیوں کو روکا جائے۔

ادھر، سیپکو حکام کا کہنا ہے کہ بجلی چوری کے خلاف مہم بلا تفریق جاری رہے گی، جبکہ پولیس نے واضح کیا ہے کہ قانون ہاتھ میں لینے والوں کے خلاف سخت کارروائی کی جائے گی

دوسری طرف بجلی چوری کے خلاف کارروائی کے دوران جروار میں درگاہ حاصل فقیر بوزدار کا ٹرانسفارمر سیپکو واپڈا نے رینجرز کی مدد سے اتار کر لے گئے ہیں۔

میرپور ماتھیلو(نامہ نگارمشتاق لغاری) پنوعاقل سے اغوا کیے گئے معصوم سید عابد شاہ پٹھان کی بازیابی کے لیے آج 14ویں روز بھی علامتی بھوک ہڑتال جاری رہی۔ احتجاج میں ورثاء سمیت مختلف سیاسی و سماجی رہنماؤں نے بھرپور شرکت کی اور مغوی کی فوری بازیابی کا مطالبہ کیا۔

احتجاج میں شہید بھٹو سندھ کے صوبائی آرگنائزر ایڈووکیٹ قربان علی کلوڑ، ضلعی آرگنائزر سکھر گلشن ملک، سابقہ رجسٹرار نوراللہ ملک، ایم اسحاق جسکانی، کامریڈ لال چاچڑ، لالا نورالدین پٹھان، عبید کلہوڑو، میر محمود کلوڑ، عبد الوحید پٹھان، سید برکت شاہ سمیت دیگر سماجی و سیاسی شخصیات شریک ہوئیں۔

مقررین نے خطاب کرتے ہوئے کہا کہ 14 روز گزرنے کے باوجود پولیس اور متعلقہ ادارے مغوی کی بازیابی میں ناکام رہے ہیں، جو انتہائی افسوسناک ہے۔ انہوں نے حکومتِ سندھ سے مطالبہ کیا کہ مغوی کی فوری اور بحفاظت بازیابی کو یقینی بنایا جائے، بصورتِ دیگر احتجاج کا دائرہ وسیع کیا جائے گا۔

میرپور ماتھیلو (نامہ نگار مشتاق علی لغاری) ڈی آئی جی سکھر کیپٹن (ر) فیصل عبداللہ چاچڑ کے احکامات پر ایس ایس پی گھوٹکی ڈاکٹر سمیع اللہ سومرو اور رینجرز کے ونگ کمانڈر کی نگرانی میں شر گینگز اور ماچھی گینگز کے اغواء کاروں/ڈاکوؤں کے خلاف پولیس اور رینجرز کا مشترکہ آپریشن جاری ہے۔

آج رمضان المبارک کے مہینے میں بھی سب ڈویژن رونتی کے تھانہ شہید دین محمد لغاری کی حدود میں شر گینگ، یاسین ماچھی گینگ، کمال ماچھی گینگ اور دیگر گینگز کے خلاف پولیس اور رینجرز کا مشترکہ آپریشن جاری ہے۔ پولیس اور رینجرز اور اغواء کاروں کے درمیان شدید فائرنگ کا تبادلہ ہوا۔

پولیس کو ڈاکوؤں/اغواء کاروں کے ٹھکانوں سے ہتھیار اور بھاری تعداد میں گولیاں بھی برآمد ہوئی ہیں۔ پولیس اور رینجرز کی جانب سے شر گینگز اور ماچھی گینگ کا گھیرا تنگ کر کے جدید ٹیکنالوجی کو بروئے کار لاتے ہوئے 20 سے زائد شر گینگ، ماچھی گینگ بشمول یاسین ماچھی، کمال ماچھی سمیت دیگر کے ٹھکانوں کو مسمار کر دیا گیا۔

پولیس اور رینجرز کی جانب سے کچہ ایریا میں ڈاکوؤں/اغواء کاروں کے ٹھکانوں کا گھیرا تنگ کر کے سخت سرچ آپریشن کیا جا رہا ہے۔ یہ آپریشن علاقے میں ضلع کشمور سمیت دیگر اضلاع کے مغویان کی بازیابی تک جاری رہے گا۔

میرپور ماتھیلو ،باغی ٹی وی(نامہ نگارمشتاق لغاری) سی پیک روڈ پر حادثہ، مظفرگڑھ کا نوجوان جاں بحق، میاں بیوی زخمی

تفصیل کے مطابق گھوٹکی میں سی پیک روڈ پر پیش آنے والے حادثے میں پنجاب کے ضلع مظفرگڑھ سے تعلق رکھنے والا نوجوان جاں بحق ہوگیا، جبکہ ایک مرد اور خاتون زخمی ہوئے۔

ریسکیو ذرائع کے مطابق حادثہ کشمور کی حدود میں پیش آیا، زخمیوں کو ابتدائی طبی امداد کے بعد تعلقہ اسپتال گھوٹکی سے رحیم یار خان منتقل کر دیا گیا۔

میرپور ماتھیلو ،باغی ٹی وی(نامہ نگارمشتاق لغاری) ڈی آئی جی سکھر کیپٹن (ر) فیصل عبداللہ چاچڑ کے احکامات پر گھوٹکی کے کچہ علاقے میں شر گینگز کے اغواء کاروں اور ڈاکوؤں کے خلاف پولیس اور رینجرز کا مشترکہ آپریشن جاری ہے۔ ایس ایس پی گھوٹکی ڈاکٹر سمیع اللہ سومرو اور رینجرز کے ونگ کمانڈر کی قیادت میں آپریشن گزشتہ 3 سے 4 ہفتوں سے جاری ہے، جس میں شر گینگز کے خلاف گھیرا مزید تنگ کر دیا گیا ہے۔

تازہ کارروائی میں پولیس اور رینجرز کا سب ڈویژن رونتی کے تھانہ شہید دین محمد لغاری کی حدود میں موریو سونانی شر اور چاندی سونانی شر گینگز کے خلاف بڑا آپریشن جاری ہے۔ دونوں اطراف سے شدید فائرنگ کا تبادلہ ہو رہا ہے، جبکہ پولیس نے جدید ٹیکنالوجی کا استعمال کرتے ہوئے چاندی شر، موریو شر، حفیظ شر، گلی شر، سائینداد شر، شبو شر، قائم شر اور احمدو شر کے 15 سے زائد ٹھکانوں کو مسمار کر دیا ہے۔

تقریباً دو ہفتے قبل ان ہی گینگز کے اغواء کاروں نے موٹر وے پر حملہ کر کے ٹرک ڈرائیوروں کو اغواء کرنے کی کوشش کی تھی، جسے پولیس اور رینجرز نے بروقت کارروائی کرکے ناکام بنا دیا۔ اس کے بعد سے مسلسل ٹارگٹڈ آپریشن جاری ہے، جس میں متعدد اغواء کار زخمی ہو چکے ہیں اور کئی ڈاکو پولیس کے خوف سے خود کو حکام کے حوالے کر رہے ہیں۔

پولیس اور رینجرز نے کچہ کے تمام داخلی و خارجی راستوں کو سیل کر کے سخت چیکنگ شروع کر دی ہے۔ آج کے آپریشن میں ایس ایس پی گھوٹکی ڈاکٹر سمیع اللہ سومرو، رینجرز کے ونگ کمانڈر، اے ایس پی میرپور ماتھیلو، ڈی ایس پی اباوڑو، ڈی ایس پی رونتی، مختلف تھانوں کے ایس ایچ اوز، بھاری پولیس نفری اور رینجرز کے ساتھ بکتر بند گاڑیاں بھی حصہ لے رہی ہیں۔

امن و امان کی بحالی تک آپریشن جاری رہے گا۔

میرپورماتھیلو،باغی ٹی وی (نامہ نگارمشتاق لغاری)گھوٹکی بائی پاس پر ایک خوفناک حادثہ پیش آیا ہے جہاں ایک تیز رفتار ٹریلر نے ایک کار کو ٹکر مار دی جس کے نتیجے میں چار افراد زخمی ہو گئے۔

عینی شاہدین کے مطابق، کار سڑک پر جا رہی تھی کہ اچانک ایک ٹریلر بے قابو ہو کر اس سے ٹکرا گیا۔ حادثہ اتنا شدید تھا کہ کار کو شدید نقصان پہنچا اور اس میں سوار افراد زخمی ہو گئے۔

زخمیوں کو فوری طور پر ہسپتال منتقل کر دیا گیا ہے۔ پولیس نے واقعے کی تحقیقات شروع کر دی ہیں اور ٹریلر ڈرائیور کی تلاش جاری ہے۔

مقامی لوگوں کا کہنا ہے کہ گھوٹکی بائی پاس پر اکثر حادثات ہوتے رہتے ہیں جس کی وجہ سے قیمتی جانیں ضائع ہو رہی ہیں۔ انہوں نے مطالبہ کیا ہے کہ انتظامیہ کو اس مسئلے کا نوٹس لینا چاہیے اور حفاظتی اقدامات کرنے چاہئیں۔

میرپور ماتھیلو ،باغی ٹی وی(نامہ نگارمشتاق لغاری) گھوٹکی پولیس کی فوری اور مؤثر کارروائی کے نتیجے میں لاپتہ ہونے والا کمسن بچہ بحفاظت والدین کے حوالے کر دیا گیا۔ ایس ایس پی گھوٹکی ڈاکٹر سمیع اللہ سومرو کی خصوصی ہدایت پر پولیس نے فوری تلاش شروع کی اور قانونی کارروائی مکمل کرنے کے بعد بچے کو والدین سے ملایا۔

تفصیلات کے مطابق میرپور ماتھیلو کے علاقے سومرو کالونی کے رہائشی حافظ اظہر سعید کھوکھر نے تھانہ میرپور ماتھیلو میں اطلاع دی کہ ان کا 5 سے 6 سالہ بیٹا محمد عمر گھر سے نکلنے کے بعد لاپتہ ہو گیا ہے اور کافی تلاش کے باوجود نہیں مل رہا۔ اس اطلاع پر میرپور ماتھیلو پولیس نے فوری کارروائی کرتے ہوئے جہانگیر بیس کنٹرول اور ضلع کے دیگر تھانوں کو اطلاع دی۔

واقعے کی سنگینی کے پیش نظر ایس ایس پی گھوٹکی ڈاکٹر سمیع اللہ سومرو نے بچے کو جلد از جلد تلاش کرنے کا حکم دیا، جس پر ایس ایچ او میرپور ماتھیلو لیاقت علی لاشاری نے اپنی ٹیم کے ہمراہ بھرپور کوششوں کے بعد بچے کو بحفاظت بازیاب کرلیا۔ قانونی کارروائی مکمل ہونے کے بعد بچہ والدین کے سپرد کر دیا گیا، جس پر اہلخانہ نے پولیس کا شکریہ ادا کیا۔

ایس ایس پی گھوٹکی نے کامیاب کارروائی پر ایس ایچ او میرپور ماتھیلو اور ان کی ٹیم کو شاباشی دی اور کہا کہ عوام کی خدمت اور حفاظت پولیس کی اولین ترجیح ہے۔