Category: سکھر

میرپورماتھیلو (باغی ٹی وی ،نامہ نگارمشتاق لغاری) گھوٹکی اور اس کے گرد و نواح کے علاقوں میں فضائی آلودگی کی سنگین صورتحال نے شہریوں کی زندگیوں کو متاثر کرنا شروع کر دیا ہے۔ میرانی بائی پاس اور عادل پور روڈ کے علاقوں میں موجود اینٹوں کے بھٹوں سے نکلنے والا زہریلا دھواں ماحول کو آلودہ کر رہا ہے، جس کی وجہ سے شہریوں کو سانس، دل اور پھیپھڑوں کی بیماریوں کا سامنا کرنا پڑ رہا ہے۔

شہریوں کا کہنا ہے کہ زہریلے دھویں کی وجہ سے وہ مختلف بیماریوں میں مبتلا ہو رہے ہیں اور بچوں اور بزرگوں کی صحت پر منفی اثرات مرتب ہو رہے ہیں۔ افسوسناک بات یہ ہے کہ ضلعی انتظامیہ کی طرف سے اس مسئلے کے حل کے لیے کوئی مؤثر اقدامات نہیں کیے جا رہے ہیں۔ رحمت پٹھان، غلام رسول کلوڑ، اور دیگر مقامی قوموں کے بھٹوں پر بغیر کسی حفاظتی اقدامات (SOP) کے کام جاری ہے۔

شہریوں نے اس سنگین صورتحال پر اعلیٰ حکام سے نوٹس لینے کی اپیل کی ہے۔ وہ سیشن جج گھوٹکی، ڈپٹی کمشنر گھوٹکی، ایس ایس پی گھوٹکی، اسسٹنٹ کمشنر گھوٹکی، مختیارکار گھوٹکی، اور دیگر افسران سے مطالبہ کر رہے ہیں کہ وہ ان بھٹوں کے خلاف قانونی کارروائی کریں اور عوام کو انصاف فراہم کریں۔

میرپور ماتھیلو(باغی ٹی وی ،نامہ نگارمشتاق لغاری) سومرا کالونی میں محکمہ انہار کی زمین پر بااثر مافیا کا قبضہ،مکین مشکلات کا شکار

تفصیل کے مطابق میرپور ماتھیلو کے علاقے سومرا کالونی میں ایریگیشن کی زمین پر بااثر افراد نے قبضہ کر رکھا ہے اور وہاں غیر قانونی آبادی قائم کی جا رہی ہے۔ مقامی افراد کے مطابق جب اس زمین میں فصل اگانے کے لیے نالیوں کا گندا پانی چھوڑا جاتا ہے تو پورے علاقے میں بدبو پھیل جاتی ہے، جس سے سانس لینا مشکل ہو جاتا ہے۔ اس آلودگی کے باعث مختلف بیماریوں نے بھی علاقے کو اپنی لپیٹ میں لے لیا ہے، جس سے مقامی مکینوں کو شدید مشکلات کا سامنا کرنا پڑ رہا ہے۔

علاقہ مکینوں نے ان مسائل کے خلاف مشترکہ طور پر اسسٹنٹ کمشنر میرپور ماتھیلو سے شکایت کی۔ اسسٹنٹ کمشنر نے فوری طور پر نوٹس لیتے ہوئے ایریگیشن کے انجینئر کو احکامات جاری کیے اور علاقے کے رہائشیوں کو یقین دلایا کہ اس مسئلے پر جلد عملی اقدامات کیے جائیں گے۔ انہوں نے یہ بھی واضح کیا کہ جو افراد غیر قانونی طور پر زمین پر قبضہ کر کے آبادکاری کر رہے ہیں، ان کے خلاف قانونی کارروائی کی جائے گی۔

میرپورماتھیلو(باغی ٹی وی ،نامہ نگار مشتاق لغاری)گھوٹکی کے علاقے رحموالی فیڈر پر سیپکو کی جانب سے بدترین لوڈشیڈنگ کا سلسلہ جاری ہے، جس نے عوام کی زندگی اجیرن بنا دی ہے۔ 12 سے 14 گھنٹے طویل غیر اعلانیہ بجلی کی بندش نے علاقے کے رہائشیوں کو شدید مشکلات سے دوچار کر رکھا ہے۔

مسلسل بجلی کی عدم دستیابی کے باعث گھریلو زندگی، کاروبار اور تعلیمی سرگرمیاں مفلوج ہو چکی ہیں۔بزرگوں، مریضوں اور بچوں کو خاص طور پر مشکلات کا سامنا ہے جبکہ کاروباری افراد کو بھی نقصان اٹھانا پڑ رہا ہے۔

علاقے کے شہریوں نے سیپکو کے چیف آپریٹنگ آفیسر، ایگزیکٹو انجینئر، اور سب ڈویژنل آفیسر سے مؤدبانہ درخواست کی ہے کہ اس غیر اعلانیہ اور طویل لوڈشیڈنگ کا فوری خاتمہ کیا جائے۔ عوام کا کہنا ہے کہ اگر یہ مسئلہ جلد حل نہ ہوا تو وہ احتجاج پر مجبور ہو جائیں گے۔

رہائشیوں نے زور دیا ہے کہ بجلی کی بلاتعطل فراہمی ان کا بنیادی حق ہے اور سیپکو انتظامیہ کو اس سنگین مسئلے پر فوری توجہ دینی چاہیے۔ انہوں نے اُمید ظاہر کی ہے کہ متعلقہ افسران اس مسئلے کا فوری نوٹس لے کر اسے حل کریں گے۔ شہریوں کا کہنا ہے کہ اگر لوڈشیڈنگ کا خاتمہ کر دیا گیا تو وہ سیپکو کے شکر گزار ہوں گے۔

میرپورماتھیلو(باغی ٹی وی ،نامہ نگارمشتاق لغاری) ایس ایس پی گھوٹکی ڈاکٹر حفیظ الرحمن بگٹی پر لگائے گئے تمام الزامات بے بنیاد ثابت ہو گئے ہیں۔ آئی جی سندھ کو صدر مملکت آصف علی زرداری کی جانب سے ہدایت دی گئی ہے کہ امن و امان کی صورتحال اور کسی بھی خون خرابے سے بچنے کے لیے ڈاکٹر حفیظ بگٹی کو دوبارہ گھوٹکی میں تعینات کیا جائے۔

ذرائع کے مطابق، اب کیس کی انکوائری صرف ڈی آئی جی سکھر پیر محمد شاہ کریں گے۔ سات دنوں کے اندر ڈاکٹر حفیظ بگٹی کو گھوٹکی کے ایس ایس پی کا چارج دوبارہ سونپ دیا جائے گا۔

حفیظ بگٹی پہلے بھی وفاقی حکومت کے خصوصی حکم پر گھوٹکی میں تعینات کیے گئے تھے، جہاں انہوں نے 20 دنوں میں علاقے کے کچے اور پکے علاقوں میں ڈاکوؤں کی سرگرمیوں کو بے نقاب کر کے نمایاں کامیابیاں حاصل کیں۔ ان کی فوری کارروائیوں نے عوام کے دلوں میں ان کے لیے احترام اور محبت پیدا کی۔

مقامی افراد کا کہنا ہے کہ ایس ایس پی حفیظ بگٹی کی واپسی سے علاقے میں امن و امان کی بحالی میں مزید بہتری کی توقع کی جا رہی ہے۔

میرپور ماتھیلو (باغی ٹی وی، نامہ نگار مشتاق علی لغاری) سبزی منڈی گھوٹکی کے ایک بیوپاریوں سے لوٹی گئی رقم کی عدم واپسی پر شہری اتحاد کی جانب سے آج ایک بڑی احتجاجی ریلی نکالی گئی۔ ریلی کا آغاز سبزی منڈی سے ہوا اور شرکاء نے پریس کلب گھوٹکی تک مارچ کیا۔

ریلی کے دوران مظاہرین نے پولیس کے خلاف شدید نعرے بازی کی اور لوٹی گئی رقم کی واپسی کا مطالبہ کیا۔ شہری اتحاد کے رہنماؤں نے پولیس کی کارکردگی پر سوالات اٹھاتے ہوئے کہا کہ کئی دن گزر جانے کے باوجود بیوپاری کی لوٹی ہوئی رقم واپس نہیں کی گئی، جس سے شہریوں میں بے چینی اور غم و غصہ بڑھ رہا ہے۔

مظاہرین نے مطالبہ کیا کہ پولیس فوری طور پر تحقیقات مکمل کر کے لوٹی گئی رقم واپس دلوائے اور مجرموں کو کیفر کردار تک پہنچائے، بصورت دیگر احتجاج کا دائرہ مزید وسیع کیا جائے گا۔

خیرپور (باغی ٹی وی،نامہ نگار) خیرپور کے علاقے پیرجو گوٹھ میں ایک ہی خاندان کے 13 افراد کی پراسرار ہلاکت کا ڈراپ سین ہوگیا ہے۔ پولیس نے 13 افراد کے قتل کے الزام میں گھر کی بیٹی اور اس کے ساتھی کو گرفتار کر لیا۔

تفصیلات کے مطابق بیٹی شائستہ نے اپنے ساتھی امیر بخش بروہی کے ساتھ مل کر پورے خاندان کو زہر دے کر قتل کیا۔پولیس کا کہنا ہے کہ شائستہ اور امیر بخش نے اعتراف کیا کہ انہوں نے آٹے میں زہر ملا کر خاندان کو کھلایا کیونکہ خاندان پسند کی شادی کے لیے راضی نہیں تھا۔

یاد رہے کہ 17 اگست کو اس واقعے میں محنت کش گل بیگ، ان کی بیوی، 8 بچے، بھائی اور بھتیجے جاں بحق ہو گئے تھے، جن کی عمریں 4 سے 20 سال کے درمیان تھیں۔

پوسٹ مارٹم رپورٹ میں انکشاف ہوا کہ مرنے والوں کو زہریلی اشیاء دی گئی تھیں۔ پولیس نے واقعے کا مقدمہ سرکار کی مدعیت میں درج کر لیا ہے اور ملزمان سے مزید تفتیش جاری ہے۔

سینئر سپرنٹنڈنٹ پولیس (ایس ایس پی) ڈاکٹر سمیع اللہ سومرو کے مطابق جاں بحق ہونے والوں کے جسمانی نمونے لیے گئے تھے، اور میڈیکل رپورٹ نے ثابت کیا کہ زہر دینے کی وجہ سے ان کی موت واقع ہوئی۔ انہوں نے کہا کہ واقعے کے تمام پہلوؤں کا باریک بینی سے جائزہ لیا جا رہا ہے اور مزید تفتیش جاری ہے۔

یہ ہولناک واقعہ پورے علاقے کے لیے ایک صدمہ ہے خاص طور پر جب کہ مرنے والے معصوم بچے اور ایک ہی خاندان کے افراد تھے۔