Category: شوبز

اداکارہ مومنہ اقبال کو ہراساں کرنے اور جان سے مارنے کی دھمکیاں دینے کے مقدمے میں پیش رفت، سیشن کورٹ لاہور نے پنجاب اسمبلی کے رکن ثاقب چدھڑ اور ان کی اہلیہ کی عبوری ضمانت میں 2 جولائی تک توسیع کر دی۔

لاہور کی سیشن عدالت میں ایڈیشنل سیشن جج نے مقدمے کی سماعت کی، جس دوران ثاقب چدھڑ اپنی اہلیہ کے ہمراہ عدالت میں پیش ہوئے اور عبوری ضمانت کی درخواست پر دلائل سنے گئے۔سماعت کے دوران تفتیشی افسر نے عدالت کو آگاہ کیا کہ ملزمان کے موبائل فون فارنزک تجزیے کے لیے بھجوا دیے گئے ہیں جبکہ مقدمے کی تفتیش مکمل کرنے کے لیے مزید وقت درکار ہے۔عدالت نے تفتیشی عمل کی پیش رفت کا جائزہ لیتے ہوئے نیشنل سائبر کرائم انویسٹی گیشن ایجنسی سے آئندہ سماعت پر مکمل تفتیشی رپورٹ طلب کر لی۔عدالت نے کیس کی مزید سماعت 2 جولائی تک ملتوی کرتے ہوئے ملزمان کی عبوری ضمانت میں بھی اسی تاریخ تک توسیع برقرار رکھی۔

‎پاکستان کے معروف گلوکار عاصم اظہر کی اسپتال سے شیئر کی گئی ایک تصویر نے مداحوں کو تشویش میں مبتلا کر دیا۔ سوشل میڈیا پر تصویر سامنے آنے کے بعد ان کے چاہنے والوں نے گلوکار کی صحت کے بارے میں سوالات اٹھانا شروع کر دیے۔
‎عاصم اظہر نے اپنی انسٹاگرام اسٹوری پر ایک سیلفی شیئر کی جس میں وہ نیبولائزر ماسک پہنے ہوئے نظر آئے۔ تصویر کے ساتھ انہوں نے مختصر کیپشن "Welcome Back” لکھا، جس کے بعد مداحوں نے ان کی خیریت دریافت کرنا شروع کر دی۔
‎مداحوں کی تشویش کو دیکھتے ہوئے گلوکار نے ایک اور انسٹاگرام اسٹوری کے ذریعے وضاحت کی کہ ان کی طبیعت سے متعلق کوئی سنگین مسئلہ نہیں ہے۔ انہوں نے بتایا کہ وہ صرف ٹانسلز اور گلے کے انفیکشن کا شکار ہوئے تھے اور اب صحت یاب ہو رہے ہیں۔
‎عاصم اظہر نے مداحوں سے مخاطب ہوتے ہوئے لکھا کہ ان کا مقصد کسی کو پریشان کرنا نہیں تھا۔ انہوں نے مزاحیہ انداز میں کہا، "ڈاکٹرز کہہ رہے ہیں، بیٹا بہت گا لیا ہے، اب ذرا گھر بیٹھو۔”
‎گلوکار نے مزید کہا کہ ان کے نئے گانوں کو مداحوں کی جانب سے ملنے والی محبت اور حوصلہ افزائی نے انہیں پہلے ہی بہتر محسوس کروانا شروع کر دیا ہے۔ انہوں نے حال ہی میں ریلیز ہونے والے اپنے گانے "آرزو” اور "تو ہے وہی” کو پسند کرنے پر مداحوں کا شکریہ بھی ادا کیا۔
‎عاصم اظہر کی وضاحت کے بعد مداحوں نے ان کی جلد مکمل صحت یابی کے لیے نیک خواہشات کا اظہار کیا اور امید ظاہر کی کہ وہ جلد دوبارہ اپنی موسیقی کی سرگرمیوں میں مصروف نظر آئیں گے۔

‎ممبئی: بالی ووڈ اداکارہ سارہ علی خان اور ہالی ووڈ کے معروف برطانوی اداکار ہنری کیول کی ایک ساتھ لی گئی تصاویر سوشل میڈیا پر تیزی سے وائرل ہو رہی ہیں، جنہیں دیکھ کر مداح حیرت اور خوشی کا اظہار کر رہے ہیں۔
‎یہ غیر متوقع ملاقات انگلینڈ میں جاری دنیا کے معروف گھڑ دوڑ کے تہوار رائل اسکوٹ کے موقع پر ہوئی، جہاں دونوں عالمی شہرت یافتہ گھڑی ساز کمپنی لانجینز (Longines) کے برانڈ ایمبیسیڈر کی حیثیت سے شریک ہوئے۔
‎تقریب کے دوران سارہ علی خان اور ہنری کیول نے مشترکہ فوٹو شوٹ بھی کروایا، جس کی تصاویر سامنے آنے کے بعد سوشل میڈیا پر خوب توجہ حاصل کر رہی ہیں۔ دونوں فنکار پہلی مرتبہ کسی بین الاقوامی ایونٹ میں ایک ساتھ نظر آئے۔
‎اس موقع پر سارہ علی خان نے روایتی برطانوی انداز اپناتے ہوئے سفید رنگ کا خوبصورت لباس اور اس سے ہم آہنگ ٹوپی پہن رکھی تھی، جبکہ ہنری کیول کلاسک بلیک ٹیل کوٹ، سفید شرٹ، ٹائی اور روایتی ٹاپ ہیٹ میں ملبوس دکھائی دیے۔
‎سارہ علی خان نے اپنے انسٹاگرام اکاؤنٹ پر تصاویر شیئر کرتے ہوئے مختصر کیپشن میں لکھا، "لانجینز کے ساتھ ایک شاہی تقریب”۔تصاویر شیئر ہوتے ہی مداحوں کی جانب سے دلچسپ تبصروں کا سلسلہ شروع ہو گیا۔
‎ایک صارف نے لکھا، "یہ واقعی حیران کن کراس اوور ہے، کبھی سوچا بھی نہیں تھا کہ سارہ علی خان اور ہنری کیول ایک ہی فریم میں نظر آئیں گے۔” ایک اور مداح نے تبصرہ کیا، "ایک طرف پٹودی خاندان کی شہزادی اور دوسری طرف سپرمین، دونوں ایک ساتھ بے حد خوبصورت لگ رہے ہیں۔”
‎تفریحی حلقوں میں بھی اس ملاقات کو خاصی توجہ دی جا رہی ہے، جبکہ مداح دونوں عالمی ستاروں کی مشترکہ تصاویر کو سوشل میڈیا پر بڑے پیمانے پر شیئر کر رہے ہیں۔

متنازع مذہبی شخصیت مفتی عبدالقوی نے اداکارہ مومنہ اقبال اور مسلم لیگ (ن) کے رکنِ صوبائی اسمبلی ثاقب چدھڑ کے درمیان جاری تنازع پر اپنا ردِعمل دیتے ہوئے دلچسپ تبصرہ کیا ہے، جو سوشل میڈیا پر توجہ کا مرکز بن گیا۔

مفتی عبدالقوی نے حال ہی میں ایک پوڈکاسٹ میں بطور مہمان شرکت کی، جہاں میزبان کی جانب سے ان سے مومنہ اقبال اور ثاقب چدھڑ کے درمیان جاری تنازع کے حوالے سے سوال کیا گیا۔سوال کے جواب میں مفتی عبدالقوی نے کہا کہ اگر مومنہ اقبال نے حمزہ حبیب سے نکاح کا فیصلہ کیا ہے تو وہ انہیں سلام پیش کرتے ہیں۔ ان کا کہنا تھا کہ ’’میں مومنہ اقبال کو سلیوٹ کرتا ہوں، آپ نے بالکل درست فیصلہ کیا ہے۔‘‘گفتگو کے دوران مفتی عبدالقوی نے ثاقب چدھڑ کو مخاطب کرتے ہوئے کہا کہ جب ان کے پاس پہلے ہی دو بیویاں موجود ہیں تو انہیں تیسری شادی کے بارے میں سوچنے کی ضرورت نہیں۔ انہوں نے مزاحیہ انداز میں مزید کہا کہ ’’اگر آپ میری طرح ذہین ہوتے تو بات نکاح تک پہنچتی۔‘‘

واضح رہے کہ مفتی عبدالقوی کا یہ بیان ایسے وقت میں سامنے آیا ہے جب مومنہ اقبال اور ثاقب چدھڑ سے متعلق خبروں اور سوشل میڈیا پر جاری بحث نے خاصی توجہ حاصل کر رکھی ہے۔ مفتی عبدالقوی کے ریمارکس کے بعد سوشل میڈیا صارفین کی جانب سے بھی مختلف ردِعمل سامنے آ رہے ہیں۔

متنازع مذہبی شخصیت مفتی عبدالقوی ایک بار پھر خبروں کی زینت بن گئے ہیں، اس بار سوشل میڈیا انفلوئنسر فریحہ فرخ کے حق میں دیا گیا ان کا بیان توجہ کا مرکز بن گیا ہے۔

فریحہ فرخ حالیہ دنوں ایک پوڈکاسٹ میں دیے گئے اپنے بیانات کے باعث سوشل میڈیا پر زیرِ بحث ہیں۔ دیسی کھانوں سے متعلق تبصروں اور دیگر غیر معمولی خیالات پر انہیں شدید تنقید اور میمز کا سامنا کرنا پڑا، جبکہ ان کے مختلف کلپس سوشل میڈیا پلیٹ فارمز پر وائرل ہو چکے ہیں۔اسی دوران مفتی عبدالقوی نے ایک ویڈیو بیان میں فریحہ فرخ کے ہمراہ کھڑے ہو کر دعویٰ کیا کہ فریحہ فرخ ان کی پوتی ہیں اور دونوں کے درمیان دادا پوتی کا رشتہ ہے۔ انہوں نے کہا کہ اگر کوئی فریحہ فرخ کے خلاف بات کرے گا تو وہ ان کا دفاع کریں گے۔

مفتی عبدالقوی کے اس دعوے کے بعد سوشل میڈیا پر نئی بحث چھڑ گئی ہے۔ صارفین کی جانب سے اس بیان پر مختلف ردِعمل سامنے آ رہے ہیں، جبکہ بعض افراد نے دونوں شخصیات کو تنقید کا نشانہ بھی بنایا ہے۔مفتی عبدالقوی کی ویڈیو اور ان کا یہ دعویٰ تیزی سے وائرل ہو رہا ہے، تاہم فریحہ فرخ کی جانب سے تاحال اس مبینہ رشتے داری کے دعوے پر کوئی عوامی ردِعمل سامنے نہیں آیا۔ سوشل میڈیا پر جاری بحث کے باعث یہ معاملہ مسلسل توجہ حاصل کر رہا ہے۔

اداکارہ مومنہ اقبال نے اپنے وکیل ایڈووکیٹ عدنان احسان خان کے ذریعے ناصر مدنی کو قانونی نوٹس بھجوا دیا ہے، جس میں مبینہ ہتک آمیز بیانات پر وضاحت، غیر مشروط معافی اور متعلقہ مواد ہٹانے کا مطالبہ کیا گیا ہے۔

میڈیا رپورٹس کے مطابق قانونی نوٹس میں مؤقف اختیار کیا گیا ہے کہ ناصر مدنی کی جانب سے اداکارہ کے بارے میں دیے گئے بعض بیانات ان کی ساکھ، عزت اور پیشہ ورانہ زندگی کو نقصان پہنچانے کا سبب بنے ہیں۔ نوٹس میں کہا گیا ہے کہ یہ ریمارکس ہتکِ عزت کے زمرے میں آتے ہیں، لہٰذا ان کی فوری تردید اور عوامی سطح پر معذرت ضروری ہے۔نوٹس میں مزید خبردار کیا گیا ہے کہ اگر مقررہ مدت کے اندر مطالبات پورے نہ کیے گئے تو مومنہ اقبال اپنے قانونی حقوق کے تحفظ کے لیے مزید قانونی کارروائی کا حق محفوظ رکھتی ہیں۔

یہ پیش رفت ایسے وقت میں سامنے آئی ہے جب اداکارہ پہلے ہی مختلف قانونی تنازعات اور مبینہ ہراسانی کے معاملات کے باعث خبروں میں ہیں۔ حالیہ دنوں میں انہوں نے رکن پنجاب اسمبلی ثاقب چدھڑ کے خلاف سائبر ہراسانی، دھمکیوں اور بلیک میلنگ کے الزامات پر نیشنل سائبر کرائم انویسٹی گیشن ایجنسی (NCCIA) سے رجوع کیا تھا، جس کے بعد متعلقہ مقدمہ بھی درج کیا گیا۔قانونی نوٹس جاری ہونے سے قبل مومنہ اقبال نے اپنی انسٹاگرام اسٹوری میں ناصر مدنی کے بیانات پر سخت ردعمل دیتے ہوئے کہا تھا کہ ان پر لگائے گئے الزامات اور تہمتوں کو مزید ہوا دی گئی۔ انہوں نے لکھا کہ وہ دنیا اور آخرت دونوں کی عدالتوں میں سرخرو ہوں گی کیونکہ ان پر لگائے گئے الزامات کی حقیقت وہ خود اور اللہ تعالیٰ جانتے ہیں۔اداکارہ نے واضح کیا تھا کہ وہ ناصر مدنی کو معاف نہیں کریں گی اور اسلام میں بغیر ثبوت کسی پر الزام لگانے کو سنگین گناہ قرار دیتے ہوئے سورۂ نور کی آیات کا حوالہ بھی دیا تھا۔