Category: شوبز

ممبئی: بالی ووڈ کے دبنگ اسٹار سلمان خان کو قتل کی دھمکیاں موصول ہونے کے بعد ان کی سیکیورٹی مزید سخت کر دی گئی ہے، جبکہ بھارتی رئیلٹی شو بگ باس 19 میں لائیو آڈینس کے داخلے پر بھی پابندی عائد کر دی گئی ہے۔

بھارتی میڈیا کے مطابق شو کے پروڈیوسر رشی نیگی نے ایک انٹرویو میں انکشاف کیا کہ سلمان خان کو گزشتہ ڈھائی برس سے متعدد مرتبہ جان سے مارنے کی دھمکیاں مل رہی ہیں۔ اس صورتحال کے باعث پروڈکشن ٹیم نے شو کے سیٹ پر سیکیورٹی بڑھانے کے ساتھ ساتھ کئی نئے اقدامات بھی کیے ہیں۔رشی نیگی نے بتایا کہ اب شو میں جب بھی سلمان خان موجود ہوتے ہیں تو کسی بھی ناظر کو اندر آنے کی اجازت نہیں دی جاتی۔ اس کے علاوہ شو تک رسائی کو مزید سخت بنا دیا گیا ہے، چاہے کوئی مستقل بنیادوں پر جڑا ہو، عارضی طور پر یا پھر کسی وینڈر کے ذریعے، سب کے بیک گراؤنڈ کی باریک بینی سے جانچ پڑتال کی جاتی ہے۔

انہوں نے کہا کہ پروڈکشن ٹیم نے نہ صرف حفاظتی اقدامات میں اضافہ کیا ہے بلکہ لاجسٹک آپریشنز کو بھی وسعت دی ہے۔ تقریباً 600 افراد پر مشتمل عملہ تین شفٹوں میں چوبیس گھنٹے کام کرتا ہے۔ اس عملے میں خواتین کی نمائندگی بھی نمایاں ہے، جبکہ کانٹینٹ سیکیورٹی اور گراؤنڈ لاجسٹکس پر کوئی سمجھوتہ نہیں کیا جاتا۔

بالی ووڈ کی معروف اداکارہ کرشمہ کپور کے بچے اپنے آنجہانی والد سنجے کپور کی جائیداد میں حصہ لینے کے لیے عدالت پہنچ گئے۔

بھارتی میڈیا رپورٹس کے مطابق کرشمہ کپور کے بچوں نے گزشتہ روز دہلی ہائی کورٹ سے رجوع کیا تاکہ انہیں اپنے والد سنجے کپور کی 30 ہزار کروڑ بھارتی روپے کی جائیداد سے حصہ مل سکے۔ کرشمہ کپور کے بچوں کی جانب سے دائر درخواست پر آج اس وقت سماعت ہوئی جب آنجہانی صنعت کار کی بیوہ پریا کپور نے اسے عدالت میں چیلنج کیا، کرشمہ کپور نے اپنے دونوں بچوں کی جانب سے درخواست دائر کی تھی، جس میں انہوں نے سنجے کپور کی 21 مارچ کی مبینہ وصیت کو چیلنج کیا گیا تھا، جس میں کہا گیا تھا کہ سنجے کپور نے اپنی پوری جائیداد ان کی سوتیلی ماں پریا کپور کے نام کردی۔

دائر درخواست میں بیٹی سمائرا اور بیٹے کیان کی جانب سے مؤقف اختیار کیا گیا تھا کہ مذکورہ وصیت جعلی ہے کیونکہ سنجے کپور نے کبھی اس وصیت کا ذکر کیا اور نہ ہی پریا یا کسی اور نے اس کے بارے میں بتایا،درخواست میں یہ الزام بھی عائد کیا گیا کہ سنجے کپور کی موت کے بعد پریا کا رویہ اس بات کا واضح ثبوت ہے کہ یہ وصیت غیرقانونی ہے،سنجے کپور کے بچوں نے اپنے والد کی جائیداد میں پانچواں حصہ مانگا ہے۔

کرشمہ کپور کی بیٹی سمائرا نے یہ مقدمہ انہیں جنرل پاور آف اٹارنی کے اختیارات دیتے ہوئے ان کے ذریعے دائر کیا ہے، جبکہ بیٹا کیان نابالغ ہے، اس لیے اس کی نمائندگی بھی کرشمہ قانونی سرپرست کے طور پر کر رہی ہیں۔ آج ہونے والی سماعت میں پریا کپور کی طرف سے ایڈوکیٹ راجیو نیئر عدالت میں پیش ہوئے اور انہوں نے موقف اختیار کیا کہ سنجے کپور کے بچوں کو پہلے ہی 1900 کروڑ روپے کے اثاثے مل چکے ہیں جبکہ کرشمہ کپور طلاق لے چکی ہیں اس لیے سنجے کپور کی جائیداد میں ان کا حصہ نہیں بنتا اس لیے یہ مقدمہ برقرار نہیں رکھا جاسکتا۔

واضح رہے کہ راوں سال جون میں بھارتی صنعت کار سنجے کپور 53 برس کی عمر میں برطانیہ میں پولو میچ کے دوران گر کے انتقال کرگئے تھے،کرشمہ کپور نے 2003 میں کاروباری شخص سنجے کپور سے شادی کی تھی، جن سے ان کے 2 بچے بھی ہیں۔ سنجے کپور اور کرشمہ کپور کے درمیان شادی کے چند سال بعد ہی تنازعات شروع ہوگئے تھے، تاہم دونوں نے 2014 میں علیحدگی اختیار کرنے کا فیصلہ کیا اور اگلے سال یعنی 2015 میں ان کی طلاق ہوگئی تھی۔

نئی دہلی: بالی وڈ کی معروف اور خوبرو اداکارہ ایشوریہ رائے بچن نے اپنی شناخت کے غیر قانونی استعمال کے خلاف قانونی جنگ کا آغاز کرتے ہوئے مصنوعی ذہانت (اے آئی) پلیٹ فارمز کے خلاف عدالت کا دروازہ کھٹکھٹا دیا ہے۔

بھارتی میڈیا رپورٹس کے مطابق اداکارہ کے وکلا کی ٹیم نے نئی دہلی کی عدالت میں مشترکہ درخواست دائر کی ہے جس میں مؤقف اختیار کیا گیا ہے کہ متعدد آن لائن پلیٹ فارمز اور اے آئی ایپلی کیشنز ان کی تصاویر، ویڈیوز اور آواز کو ڈیپ فیک ٹیکنالوجی کے ذریعے نامناسب اور فحش مواد میں استعمال کر رہی ہیں۔ اس اقدام سے نہ صرف ان کی ساکھ متاثر ہو رہی ہے بلکہ ان کی کردار کشی بھی کی جا رہی ہے۔درخواست میں عدالت سے استدعا کی گئی ہے کہ ایسے تمام پلیٹ فارمز کو حکم دیا جائے کہ وہ اداکارہ کا نام، تصاویر اور آواز کسی بھی غیر قانونی یا غیر اخلاقی مواد کے لیے استعمال نہ کریں۔ وکلا کی ٹیم نے عدالت کو ایک فہرست بھی فراہم کی ہے جس میں جعلی اور فحش ویب سائٹس کے نام شامل ہیں جو ایشوریہ رائے کے نام سے منسوب ہیں۔ اس کے علاوہ بعض ای کامرس ویب سائٹس کا بھی ذکر کیا گیا ہے جو اداکارہ کی اجازت کے بغیر ان کے نام سے مصنوعات فروخت کر رہی ہیں۔

میڈیا رپورٹس کے مطابق اداکارہ نے اپنی درخواست میں فی الحال کسی بھی پلیٹ فارم سے ہرجانے کا مطالبہ نہیں کیا۔ تاہم عدالت نے ابتدائی سماعت کے دوران فریقین کو نومبر تک دلائل سمیت طلب کر لیا ہے، جبکہ کیس کی باضابطہ کارروائی جنوری 2026 میں شروع ہونے کا امکان ظاہر کیا جا رہا ہے۔قانونی ماہرین کا کہنا ہے کہ اس مقدمے کا فیصلہ بھارت میں ڈیجیٹل پرائیویسی اور مصنوعی ذہانت کے استعمال کے حوالے سے ایک اہم مثال قائم کر سکتا ہے، خصوصاً مشہور شخصیات کے حقوق کے تحفظ کے تناظر میں۔

پاکستانی اداکارہ و میزبان نازیہ ملک نے اپنے اور اپنی دوستوں کے ساتھ موٹروے پر پیش آنے والے دل دہلا دینے والے واقعے کا انکشاف کیا ہے۔

نازیہ ملک نے حال ہی میں نجی ٹی وی چینل کے پروگرام میں گفتگو کی جس میں انہوں نے بتایا کہ کیسے ان کے اور ان کی سہیلیوں کے ساتھ خوفناک واقعہ پیش آیا جس سے وہ بال بال بچیں،کچھ عرصہ قبل میں اپنی چار دوستوں کے ساتھ سوات گھومنے گئی تھی کہ واپسی پر یہ واقعہ پیش آیا، مجھے شروع سے ہی کار ڈرائیور کی نیت پر شک تھا، وہ پورے راستے کسی دوسرے شخص سے فون پر بات کررہا تھا اور پھر موٹروے کی ایک سنسان جگہ پر آکر گاڑی روک دی،میں فرنٹ سیٹ پر ڈرائیور کے ساتھ ہی تھی، ڈرائیور نے گاڑی روک کر بتایا کہ گاڑی خراب ہوگئی ہے اور پھر وہ کسی شخص سے بات کرنے لگا، میں نے موٹروے کا جائزہ لیا، آس پاس کچھ نہیں تھا، ہم خطرناک پوائنٹ پر رکے ہوئے تھے، جس پر میں نے حاضر دماغی سے کام لیا،ڈرائیور نے چابی گاڑی میں ہی چھوڑ دی تھی، جس پر وہ ڈرائیونگ سیٹ پر بیٹھ گئیں اور ڈرائیور کو کہا کہ وہ بھلے یہیں کھڑے رہیں، وہ گاڑی چلا کر یہاں سے جا رہی ہیں۔

اداکارہ کا کہنا تھا کہ ان کی بات پر ڈرائیور پریشان ہوا اور انہوں نے گاڑی کو خود ہی ٹھیک کرکے چلانے کی حامی بھری اور پھر انہوں نے گاڑی کو تھوڑا سا چیک کرکے اسٹارٹ کیا اور گاڑی چل گئی،میری حاضر دماغی نے ہمیں بچالیا، میری سب دوستیں پریشان ہوگئی تھیں، انہیں کچھ سمجھ نہیں آ رہا تھا

پاکستان کی مقبول ترین گلوکارہ قرۃ العین بلوچ کی ٹیم نے ان کی صحت سے متعلق پہلا باضابطہ بیان جاری کردیا۔

قرۃ العین بلوچ کے انسٹاگرام پر جاری بیان میں کہا گیا ہے کہ گلوکارہ حال ہی میں بلتستان کے سیلاب متاثرین کی بحالی کے لیے کام کرنے گئی تھیں جہاں وہ جامع ڈیزاسٹر ریسپانس سروسز (سی ڈی آر ایس) کے ہمراہ متاثرہ دیہات میں امدادی سرگرمیوں میں شریک تھیں، 4 ستمبر کی رات جب گلوکارہ خیمے میں سورہی تھیں، اس وقت ان پر بھورے ریچھ نے حملہ کیا تاہم سی ڈی آر ایس ٹیم نے فوری کارروائی کرتے ہوئے ریچھ کو بھگا دیا۔

قرۃ العین بلوچ کو فوراً قریبی طبی مرکز منتقل کیا گیا جہاں ڈاکٹروں نے تصدیق کی کہ ان کی حالت خطرے سے باہر ہے اور کوئی فریکچر نہیں ہوا، وہ تیزی سے صحتیاب ہورہی ہیں،گلوکارہ کی ٹیم نے مداحوں سے دعاؤں کی اپیل کرتے ہوئے کہا کہ وہ اس وقت ان کی پرائیویسی کا خیال رکھیں کیونکہ گلوکارہ کو مکمل آرام کی ضرورت ہے جب کہ تمام عوامی سرگرمیوں کو ان کی صحت یابی تک ملتوی کردیا گیا ہے۔

واضح رہے کہ یہ واقعہ گلگت بلتستان کے دیوسائی نیشنل پارک میں پیش آیا، جو بلند و بالا سطح مرتفع پر واقع ہے اور نایاب ہمالیائی بھورے ریچھوں کا مسکن ہے،گلگت بلتستان پولیس کے مطابق قرۃ العین بلوچ اپنے دو ساتھیوں کے ساتھ دیوسائی کے کیمپنگ ایریا میں موجود تھیں، جب اچانک ایک بھورا ریچھ حملہ آور ہوا اور ان کے دونوں بازو زخمی کر دیے تاہم ان کا کیمرہ مین اور دوسرا ساتھی محفوظ رہے۔