Category: شوبز

ممبئی: بالی ووڈ سپر اسٹار سلمان خان نے مبینہ طور پر اپنی متنازع فلمی پیشکش ’’کالا ہرن: دی بیٹل فار لیگیسی‘‘ کے بنانے والوں کو قانونی نوٹس ارسال کر دیا ہے۔

بھارتی میڈیا رپورٹس کے مطابق مذکورہ فلم کالے ہرن کے اس مشہور مقدمے پر مبنی ہے جس کا سامنا سلمان خان گزشتہ کئی برسوں سے کرتے آ رہے ہیں۔ اداکار کی قانونی ٹیم نے فلم کے پروڈیوسرز اور ہدایت کار کو نوٹس بھیجتے ہوئے فلم کی ریلیز فوری طور پر روکنے اور اس سے متعلق تمام تشہیری مواد ہٹانے کا مطالبہ کیا ہے۔رپورٹس کے مطابق قانونی نوٹس میں خبردار کیا گیا ہے کہ اگر مطالبات پر عمل درآمد نہ کیا گیا تو فلم سازوں کے خلاف سخت قانونی کارروائی عمل میں لائی جائے گی۔

دوسری جانب فلم کے پروڈیوسر امت جانی نے سلمان خان کی جانب سے موصول ہونے والے قانونی نوٹس پر ردعمل دیتے ہوئے کہا ہے کہ اس اقدام کا مقصد فلم کی ٹیم پر اداکار کی شہرت اور اثر و رسوخ کے ذریعے دباؤ ڈالنا ہے تاکہ وہ اپنے منصوبے سے دستبردار ہو جائیں۔سلمان خان کی قانونی کارروائی کے بعد فلم ’’کالا ہرن: دی بیٹل فار لیگیسی‘‘ کی ریلیز غیر یقینی صورتحال سے دوچار ہو گئی ہے، جبکہ فلمی حلقوں میں اس معاملے پر بحث جاری ہے۔

چندی گڑھ: بھارتی گلوکار اور ریپر بادشاہ (آدتیہ پرتیک سنگھ سسودیا) کے نائٹ کلب ’’ساگو بائے بادشاہ‘‘ کو مبینہ طور پر تعمیراتی قوانین کی خلاف ورزیوں کے باعث سیل کر دیا گیا ہے۔

بھارتی میڈیا رپورٹس کے مطابق چندی گڑھ انتظامیہ کے انفورسمنٹ ونگ نے کارروائی کرتے ہوئے نائٹ کلب کو سیل کیا۔ حکام کا کہنا ہے کہ کلب کی نچلی اور دوسری منزل پر بڑے پیمانے پر غیر مجاز تعمیرات کی گئی تھیں، جن کی وجہ سے یہ اقدام اٹھایا گیا۔رپورٹس کے مطابق غیر قانونی تعمیرات میں مختلف کیبنز اور پارٹیشنز کی تعمیر، اضافی واش رومز اور کچن بنانا شامل تھا۔ اس کے علاوہ ٹن شیڈز کی تنصیب، اضافی اسٹوریج ایریاز کی تعمیر اور منظور شدہ بلڈنگ پلان میں تبدیلیاں بھی کی گئی تھیں۔

انتظامیہ کی جانب سے کی گئی انسپیکشن کے دوران عمارت کی پچھلی جانب کی گئی غیر منظور شدہ تبدیلیوں کو بھی خلاف ورزیوں کی فہرست میں شامل کیا گیا۔حکام کے مطابق تعمیراتی ضوابط کی خلاف ورزیوں کے باعث نائٹ کلب کے خلاف کارروائی عمل میں لائی گئی، جبکہ مزید قانونی اقدامات بھی زیر غور ہیں۔

پاکستانی شوبز انڈسٹری کی معروف اداکارہ صاحبہ افضل نے اپنی ہونے والی بہو کے حوالے سے دل کی بات کرتے ہوئے کہا ہے کہ انہیں کسی مکمل انسان کی تلاش نہیں، بلکہ صرف ایک ایسی لڑکی چاہیے جو ان کے بیٹے سے سچی محبت کرے اور اچھے دل کی مالک ہو۔

حال ہی میں ایک یوٹیوب شو میں گفتگو کرتے ہوئے صاحبہ نے اپنے بڑے بیٹے احسن افضل خان کی شادی اور مستقبل کی بہو سے متعلق کھل کر اظہارِ خیال کیا۔ انہوں نے کہا کہ دنیا میں کوئی بھی مکمل نہیں، صرف اللّٰہ تعالیٰ کی ذات کامل ہے، اس لیے ان کی خواہش ہے کہ ان کی بہو محبت کرنے والی اور نرم دل ہو۔اداکارہ کا کہنا تھا کہ اگر ایک لڑکی ان کے بیٹے سے خلوص اور سچی محبت کرے گی تو وہ ان کی غیر موجودگی میں بھی اس کا خیال رکھے گی، اور یہی سوچ انہیں اطمینان اور سکون فراہم کرتی ہے۔صاحبہ نے مزید کہا کہ اگر مستقبل میں ان کا بیٹا اپنی اہلیہ کو والدین سے زیادہ اہمیت دے تو انہیں اس پر کوئی اعتراض نہیں ہوگا۔ ان کے مطابق وہ ذہنی طور پر اس حقیقت کو قبول کر چکی ہیں کہ شادی کے بعد ایک وقت ایسا آتا ہے جب انسان کی زندگی میں اس کی شریکِ حیات سب سے اہم شخصیت بن جاتی ہے۔

شو کے دوران جب ان سے سوال کیا گیا کہ کیا ان کے شوہر ریمبو سخت سسر ثابت ہوں گے تو صاحبہ نے مسکراتے ہوئے جواب دیا کہ ریمبو سخت مزاج نہیں بلکہ خاندان کا خیال رکھنے والے انسان ہیں۔ انہوں نے کہا کہ ریمبو اپنی بہو کو صرف صحت مند غذا کھانے، فزی ڈرنکس سے گریز کرنے اور گھر کو اچھے انداز میں سنبھالنے کے مشورے دے سکتے ہیں۔گفتگو کے دوران صاحبہ نے مزاحیہ انداز میں یہ بھی بتایا کہ احسن کے موبائل فون میں کئی لڑکیوں کے نام محفوظ ہیں، تاہم اس وقت ان کے دونوں بیٹے اپنی تعلیم اور کیریئر پر مکمل توجہ دے رہے ہیں، اس لیے شادی فی الحال ان کی ترجیحات میں شامل نہیں۔اداکارہ نے ہنستے ہوئے کہا کہ موجودہ صورتحال کو دیکھتے ہوئے ایسا لگتا ہے کہ شاید خاندان میں پہلے چھوٹے بیٹے کی شادی ہو جائے۔

لاہور: پاکستانی شوبز انڈسٹری کی معروف اداکارہ مومنہ اقبال کے شوہر حمزہ حبیب کے بارے میں مزید تفصیلات منظر عام پر آگئی ہیں۔

مومنہ اقبال، جو متعدد مقبول ڈراموں میں اپنی شاندار اداکاری کے باعث شہرت رکھتی ہیں، حال ہی میں رشتۂ ازدواج میں منسلک ہوئی ہیں۔ ان کی دعائے خیر، مہندی، مایوں اور نکاح کی تقریبات لاہور میں منعقد ہوئیں، جن کی تصاویر اور ویڈیوز سوشل میڈیا پر تیزی سے وائرل ہو رہی ہیں۔میڈیا رپورٹس کے مطابق حمزہ حبیب کا تعلق لاہور سے ہے اور وہ ایک کامیاب کاروباری شخصیت ہیں۔ اگرچہ وہ مالی طور پر مستحکم اور کاروباری حلقوں میں معروف سمجھے جاتے ہیں، تاہم انہوں نے ہمیشہ خود کو میڈیا کی توجہ سے دور رکھا ہے۔

حالیہ دنوں میں مومنہ اقبال کو مبینہ طور پر مسلم لیگ (ن) کے رکنِ صوبائی اسمبلی ثاقب چدھڑ کی جانب سے ہراسانی اور دھمکیوں کا سامنا کرنے کے معاملے پر حمزہ حبیب اپنی اہلیہ کی حمایت میں سامنے آئے، جس کے بعد وہ خبروں کا مرکز بن گئے۔حمزہ حبیب کا کہنا ہے کہ ان کی اور مومنہ اقبال کی منگنی خاندانوں کی باہمی رضامندی سے طے پائی تھی جبکہ دونوں خاندانوں کے درمیان دیرینہ دوستانہ تعلقات بھی موجود ہیں۔ انہوں نے بتایا کہ دونوں نے مئی 2026 کے آخری ہفتے میں ایک نجی تقریب کے دوران نکاح کیا۔

واضح رہے کہ مومنہ اقبال نے چند روز قبل اپنی سوشل میڈیا اسٹوری میں انکشاف کیا تھا کہ ایک بااثر سیاسی شخصیت کی جانب سے انہیں اور ان کے اہل خانہ کو جان سے مارنے کی دھمکیاں دی جا رہی ہیں۔ اس معاملے کی تحقیقات نیشنل سائبر کرائم انویسٹی گیشن ایجنسی (این سی سی آئی اے) کر رہی ہے۔اداکارہ کی شادی اور مبینہ دھمکیوں کے معاملے نے سوشل میڈیا پر خاصی توجہ حاصل کر لی ہے، جبکہ مداح مومنہ اقبال کی نئی زندگی کے لیے نیک تمناؤں کا اظہار کر رہے ہیں۔

بالی ووڈ فلم ’’دھریندر‘‘ کے پروڈکشن ڈیزائنر سینی ایس جوہرے کے خلاف جنسی ہراسانی کیس میں نئی پیش رفت سامنے آئی ہے، جہاں داخلی تحقیقاتی کمیٹی نے انہیں الزامات میں قصوروار قرار دے دیا، جس کے بعد مختلف فلمی اور ویب پروجیکٹس سے ان کا نام ہٹایا جا رہا ہے۔

میڈیا رپورٹس کے مطابق نئی دہلی سے تعلق رکھنے والی متاثرہ خاتون نے الزام عائد کیا کہ سینی ایس جوہرے نے انہیں چندی گڑھ کے ایک ہوٹل میں ملاقات کے لیے بلایا، جہاں مبینہ طور پر انہیں جنسی ہراسانی، جسمانی تشدد اور زبردستی روک کر رکھنے کا سامنا کرنا پڑا۔خاتون نے اپنی شکایت میں یہ بھی دعویٰ کیا کہ ان کے مشروب میں نشہ آور شے ملائی گئی تھی، جس کے باعث ان کی طبیعت غیر ہوگئی۔متاثرہ خاتون نے 20 اپریل کو سیکٹر 17 پولیس اسٹیشن میں مقدمہ درج کروایا، جس کے بعد پولیس نے ابتدائی تحقیقات مکمل کرکے ایف آئی آر درج کی۔

رپورٹس کے مطابق خاتون نے پولیس کے ساتھ ساتھ فلم ساز ادیتیا دہر اور پروڈیوسر لوکیش دہر کی پروڈکشن کمپنی ’’بی 62 اسٹوڈیوز‘‘ میں بھی باضابطہ شکایت جمع کروائی تھی۔ذرائع کا کہنا ہے کہ کمپنی کی انسدادِ جنسی ہراسانی کمیٹی نے اکتوبر 2025 میں شکایت موصول ہونے کے بعد تحقیقات کا آغاز کیا، جو تقریباً 6 ماہ تک جاری رہیں۔ تحقیقات مارچ کے آخر یا اپریل 2026 میں مکمل ہوئیں، جن میں سینی ایس جوہرے کو دو الزامات میں قصوروار قرار دیا گیا۔کمیٹی نے اپنی تحقیقاتی رپورٹ شکایت کنندہ کو بھی فراہم کردی ہے۔

دوسری جانب چندی گڑھ پولیس نے ایف آئی آر درج ہونے کے بعد سینی ایس جوہرے کو گرفتار کیا تھا، تاہم بعد ازاں ضلعی عدالت نے انہیں ضمانت پر رہا کردیا۔معاملہ منظر عام پر آنے کے بعد فلمی صنعت میں بھی ردعمل سامنے آیا ہے۔ رپورٹس کے مطابق فلم ’’دھریندر‘‘ کے او ٹی ٹی ورژن سے سینی ایس جوہرے کا کریڈٹ ہٹا دیا گیا ہے، جبکہ یش راج فلمز نے بھی اپنی آنے والی ویب سیریز ’’اکا‘‘ سے ان کا نام نکالنے کا فیصلہ کیا ہے۔

ڈرامہ نگار خلیل الرحمان قمر نے حالیہ وائرل انمول عرف پنکی کیس پر سخت ردِعمل دیتے ہوئے معاشرے میں موجود دہرے معیار، اشرافیہ کے کردار اور سماجی منافقت پر کھل کر تنقید کی ہے۔

ایک نجی پروگرام میں گفتگو کرتے ہوئے خلیل الرحمان قمر نے طنزیہ انداز اپناتے ہوئے کہا کہ “جب انمول پنکی جیسے کام کیے جائیں گے تو رنگ بھی پنک ہی ہوں گے، ابھی کئی لوگوں کے رنگ پنک ہونے والے ہیں۔” ان کا کہنا تھا کہ اگر معاشرے کے طاقتور اور بااثر طبقات کی خفیہ سرگرمیوں اور برائیوں کو بے نقاب کر دیا جائے تو لوگ حیران رہ جائیں گے۔انہوں نے کہا کہ “اگر ہم ان بڑے لوگوں کی برائیوں کا چٹھہ کھول دیں تو خدا کی قسم ہمارے منہ سے چیخیں نکل جائیں گی۔” خلیل الرحمان قمر کے مطابق کئی معاملات ایسے ہوتے ہیں جو مکمل طور پر عوام کے سامنے نہیں آتے کیونکہ اکثر فیصلے بند کمروں میں ہی طے کر لیے جاتے ہیں۔

ڈرامہ نگار نے منشیات کے استعمال کے موضوع پر بھی گفتگو کی اور کہا کہ یہ ایک نہایت مہنگا نشہ ہے جس تک عام آدمی کی رسائی ممکن نہیں، اسی لیے ایسے معاملات میں اکثر بااثر اور صاحبِ حیثیت افراد کے نام سامنے آتے ہیں۔گفتگو کے دوران انہوں نے ماڈل ایان علی کا حوالہ دیتے ہوئے کہا کہ معاشرہ طاقتور شخصیات کے معاملات پر مختلف ردِعمل دیتا ہے، جبکہ عام افراد کے لیے الگ پیمانے اختیار کیے جاتے ہیں۔خلیل الرحمان قمر نے معاشرتی رویوں اور معاشی مشکلات پر طنز کرتے ہوئے کہا کہ “ہم دن بھر حب الوطنی کی باتیں کرتے ہیں اور رات کو دوست سے کہتے ہیں کہ پیٹرول بہت مہنگا ہو گیا ہے، ذرا ڈلوا دو۔”