Category: شوبز

حیدرآباد: تیلگو فلم انڈسٹری کی معروف اداکارہ آشو ریڈی ایک بڑے مالیاتی اسکینڈل میں گھرتی نظر آ رہی ہیں، جہاں ایک غیر مقیم بھارتی (این آر آئی) شخص نے ان پر تقریباً 9.35 کروڑ روپے کی دھوکہ دہی کا الزام عائد کیا ہے۔ پولیس کے مطابق کیس درج کر کے تحقیقات کا آغاز کر دیا گیا ہے۔

متاثرہ شخص، جو لندن میں مقیم اور طلاق یافتہ ہے، کا کہنا ہے کہ اداکارہ نے اسے شادی کا جھانسہ دے کر برسوں تک مالی طور پر استحصال کیا۔ شکایت کے مطابق یہ سلسلہ 2018 میں شروع ہوا جب وہ شخص حیدرآباد آیا اور ایک مشترکہ دوست کے ذریعے اداکارہ سے اس کی ملاقات ہوئی۔ابتدائی دوستی جلد ہی قریبی تعلق میں بدل گئی، اور اداکارہ نے مبینہ طور پر اپنی تعلیم، ویزا مسائل اور فلمی کیریئر کے نام پر مالی مدد طلب کرنا شروع کر دی۔شکایت میں کہا گیا ہے کہ متاثرہ شخص نے اداکارہ کا ایجوکیشن لون ادا کیا،ایک فلیٹ (گھر) خریدا،کار اور سونا بھی فراہم کیا،یہ تمام اخراجات اس امید پر کیے گئے کہ اداکارہ اس سے شادی کریں گی۔متاثرہ شخص کے مطابق جب بھی وہ شادی کی تاریخ طے کرنے کی بات کرتا، اداکارہ کوئی نہ کوئی بہانہ بنا کر معاملہ ٹال دیتیں،آخرکار جولائی 2020 میں اداکارہ نے شادی سے صاف انکار کر دیا، جس کے بعد متاثرہ شخص نے اپنی رقم واپس مانگی۔

رپورٹس کے مطابق ایک تیلگو اداکار کی مداخلت پر اداکارہ نے 70 لاکھ روپے واپس کرنے کا وعدہ کیا اور چیک بھی دیے، لیکن وہ چیک بھی کیش نہ ہو سکے۔شکایت میں مزید کہا گیا ہے کہ بعد میں اداکارہ کے خاندان نے دعویٰ کیا کہ وہ ڈپریشن کا شکار ہیں اور دوبارہ رشتہ بحال کرنا چاہتی ہیں۔ متاثرہ شخص ایک بار پھر راضی ہو گیا اور 2023 میں اداکارہ کے والد سے ملاقات بھی کی۔تاہم، 2025 میں ایک بار پھر شادی سے انکار کر دیا گیا اور بعد ازاں اداکارہ نے مکمل طور پر رابطہ ختم کر لیا۔متاثرہ شخص نے الزام لگایا ہے کہ اداکارہ پہلے سے کسی اور کے ساتھ تعلق میں تھیں اور یہ پورا معاملہ ایک سوچی سمجھی سازش تھی، جس کا مقصد صرف مالی فائدہ اٹھانا تھا۔

حیدرآباد پولیس نے اداکارہ اور ان کے خاندان کے چند افراد کے خلاف مقدمہ درج کر لیا ہے اور معاملے کی تحقیقات جاری ہیں۔ حکام کا کہنا ہے کہ تمام شواہد کا بغور جائزہ لیا جا رہا ہے۔

بھارتی فلم انڈسٹری کی معروف اداکارہ کرینہ کپور نے اپنی بہن کرشمہ کپور کے بچوں کو مرحوم تاجر سنجے کپور کی وراثت سے متعلق جاری تنازع میں عبوری ریلیف ملنے پر اپنے جذبات کا اظہار کیا ہے۔

رپورٹس کے مطابق دہلی ہائی کورٹ کے حالیہ فیصلے کے بعد، کرینہ کپور نے سوشل میڈیا پلیٹ فارم انسٹاگرام پر ایک اسٹوری شیئر کی، جس میں انہوں نے لکھا “اور روشنی آگئی۔ انصاف اور سچائی ہمیشہ غالب رہتی ہے… چڑھدی کلا۔”

اگرچہ اداکارہ نے اپنی پوسٹ میں براہِ راست کیس یا عدالتی فیصلے کا ذکر نہیں کیا، تاہم مبصرین کے مطابق یہ پیغام واضح طور پر ان کی بھانجی اور بھانجے کی حمایت میں دیا گیا ہے، جو اس وقت وراثتی تنازع میں فریق ہیں۔
یاد رہے کہ سنجے کپور کے انتقال کے بعد ان کی جائیداد سے متعلق خاندانی تنازع شدت اختیار کر گیا تھا، جس میں مختلف فریقین کی جانب سے قانونی دعوے دائر کیے گئے۔ عدالت کی جانب سے حالیہ عبوری حکم کو اس کیس میں اہم پیش رفت قرار دیا جا رہا ہے۔شوبز حلقوں اور سوشل میڈیا صارفین کی جانب سے کرینہ کپور کے اس بیان کو خاندان کے ساتھ یکجہتی اور انصاف کی حمایت کے طور پر دیکھا جا رہا ہے۔

دہلی ہائیکورٹ نے معروف تاجرسنجے کپور کی تقریباً 30 ہزار کروڑ روپے مالیت کی جائیداد کے معاملے میں اہم فیصلہ سناتے ہوئے تمام اثاثوں کو محفوظ رکھنے کا حکم دے دیا ہے۔

یہ حکم سنجے کپور کی تیسری اہلیہ پریا سچدیوا کپور اور انکی دوسری شادی سے ہونے والے بچوں کیان اور سمیرا کپور اور کے درمیان شدید خاندانی تنازع کے پس منظر میں جاری کیا گیا ہے۔بچوں نے عدالت میں مؤقف اختیار کیا ہے کہ پریا کپور نے سنجے کپور کی وصیت میں جعلسازی کی اور عدالت میں جمع کروائی گئی اثاثوں کی فہرست نامکمل ہے۔ الزام ہے کہ اس فہرست میں مہنگے پولو گھوڑے، قیمتی گھڑیاں (جیسے رولیکس) اور دیگر بیش قیمت اشیاء شامل نہیں کی گئیں۔مزید برآں، بچوں کا کہنا ہے کہ کئی غیر منقولہ جائیدادیں اور قیمتی فن پارے بھی چھپائے گئے ہیں، جو دراصل کپور خاندان کے بڑے اثاثوں کا حصہ ہیں۔

عدالت نے اپنے حکم میں کہا کہ سنجے کپور کے اثاثے “محفوظ رکھنا ضروری ہے اور انہیں فروخت یا ضائع نہیں کیا جا سکتا”۔ اس کے ساتھ ہی عدالت نے پریا کپور کو اثاثے فروخت کرنے سے روک دیا اور ان کے بینک اکاؤنٹس کے استعمال پر بھی پابندی عائد کر دی۔عدالت نے مزید کہا کہ وصیت سے متعلق شکوک و شبہات دور کرنے کی ذمہ داری پریا کپور پر عائد ہوتی ہے۔ اگر بعد میں وصیت جعلی ثابت ہوئی تو کارروائی نہ کرنا “ناانصافی” ہوگا۔

یہ معاملہ صرف بیوی اور بچوں تک محدود نہیں بلکہ سنجے کپور کی والدہ رانی کپور اور بہن بھی اس تنازع کا حصہ ہیں، جس کے دوران سخت بیانات اور الزامات سامنے آ چکے ہیں۔گزشتہ سال نومبر میں بچوں کو تنقید کا نشانہ بناتے ہوئے انہیں “امیر اولیور ٹوئسٹ” قرار دیا گیا تھا، جو مزید دولت چاہتے ہیں۔

53 سالہ سنجے کپور گزشتہ سال 12 جون کو لندن میں پولو کھیلتے ہوئے انتقال کر گئے تھے۔ ابتدائی طور پر موت کی وجہ دل کا دورہ بتائی گئی، تاہم بعد میں برطانوی طبی حکام نے تصدیق کی کہ ان کی موت قدرتی وجوہات دل کی بیماری کے باعث ہوئی۔یہ کیس اب ایک بڑے قانونی اور خاندانی تنازع کی شکل اختیار کر چکا ہے، جس پر آئندہ سماعتوں میں مزید اہم پیش رفت متوقع ہے۔

لاہور: معروف گلوکار علی ظفر کی جانب سے دائر کردہ ہتکِ عزت کے مقدمے میں نیا موڑ آ گیا ہے، جہاں اداکارہ و گلوکارہ میشا شفیع نے سیشن کورٹ کے فیصلے کے خلاف لاہور ہائی کورٹ میں اپیل دائر کر دی ہے۔

درخواست میں مؤقف اختیار کیا گیا ہے کہ سیشن کورٹ نے کیس کے حقائق کا درست طور پر جائزہ نہیں لیا، جس کے باعث 50 لاکھ روپے ہرجانے کا فیصلہ قانونی تقاضوں کے مطابق نہیں۔ اپیل میں عدالت سے استدعا کی گئی ہے کہ ٹرائل کورٹ کے فیصلے کو کالعدم قرار دیتے ہوئے کیس کا ازسرِ نو جائزہ لیا جائے۔

یہ مقدمہ اس تنازع سے متعلق ہے جس میں میشا شفیع نے علی ظفر پر جنسی ہراسانی کے الزامات عائد کیے تھے، جبکہ علی ظفر نے ان الزامات کو مسترد کرتے ہوئے ان کے خلاف ہتکِ عزت کا دعویٰ دائر کیا تھا۔

یاد رہے کہ سیشن کورٹ نے اپنے فیصلے میں مشاہدہ کیا تھا کہ میشا شفیع پیشیوں کے دوران عدالت میں حاضر نہیں ہوئیں اور نہ ہی وہ اپنے الزامات کے حق میں خاطر خواہ شواہد پیش کر سکیں۔ اس کے برعکس علی ظفر نے اپنے گواہان عدالت میں پیش کیے، جس کے بعد عدالت نے ان کے حق میں فیصلہ سنایا۔عدالت نے اپنے فیصلے میں میشا شفیع کو علی ظفر کو 50 لاکھ روپے بطور ہرجانہ ادا کرنے کا حکم دیا تھا، جسے اب لاہور ہائی کورٹ میں چیلنج کر دیا گیا ہے۔

ممبئی: معروف بھارتی اداکارہ نیہا پینڈسے ایک بار پھر اپنی ذاتی زندگی سے متعلق بیانات کے باعث خبروں میں آگئی ہیں۔ ڈرامہ بھابی جی گھر پر ہیں سے شہرت حاصل کرنے والی اداکارہ نے اپنے شوہر شاردل سنگھ بیاس سے شادی اور ماں نہ بننے کے فیصلے پر کھل کر بات کی ہے۔

نیہا پینڈسے نے سال 2020 میں شاردل سنگھ بیاس سے شادی کی تھی، جو اس سے قبل دو بار طلاق یافتہ رہ چکے ہیں اور دو بچوں کے والد بھی ہیں۔ اس شادی پر اداکارہ کو سوشل میڈیا پر شدید تنقید اور ٹرولنگ کا سامنا کرنا پڑا تھا، تاہم اب انہوں نے ناقدین کو واضح جواب دے دیا ہے۔ایک انٹرویو میں نیہا نے کہا کہ انہیں اس بات کی کوئی پرواہ نہیں کہ لوگ کیا کہتے ہیں۔ ان کے مطابق ٹرولنگ اب عام بات بن چکی ہے اور ہر کسی کو اپنی زندگی اپنے فیصلوں کے مطابق گزارنے کا حق حاصل ہے۔ انہوں نے کہا، "مجھے معلوم ہے کہ میں نے ان سے شادی کیوں کی، یہ میری زندگی ہے اور میں اپنے فیصلے خود کرتی ہوں۔”اداکارہ کا کہنا تھا کہ وہ اپنے شوہر کو اپنے لیے بہترین انسان سمجھتی ہیں اور یہی چیز ان کے لیے سب سے زیادہ اہم ہے۔ انہوں نے معاشرے میں بڑھتی ہوئی طلاقوں پر بھی بات کرتے ہوئے کہا کہ اگر رشتہ زہریلا ہو جائے تو اسے ختم کرنا ہی بہتر ہوتا ہے۔

نیہا پینڈسے نے ماں بننے کے حوالے سے بھی دو ٹوک مؤقف اختیار کیا۔ انہوں نے کہا کہ وہ فی الحال بچے کی ذمہ داری اٹھانے کے لیے تیار نہیں ہیں۔ ان کے مطابق موجودہ دور میں بڑھتی ہوئی آبادی، محدود وسائل اور مہنگی ہوتی زندگی بڑے عوامل ہیں۔انہوں نے مزید کہا کہ بچے کی پرورش ایک بڑی ذمہ داری ہے جس میں وقت، توجہ اور مالی وسائل درکار ہوتے ہیں، جبکہ عملی طور پر اس کی زیادہ ذمہ داری خواتین پر ہی آتی ہے۔ نیہا کے مطابق وہ اس وقت اپنے کیریئر کو مستحکم کرنے پر توجہ دینا چاہتی ہیں اور اتنی بڑی ذمہ داری اٹھانے کے لیے خود کو تیار نہیں سمجھتیں۔اداکارہ نے یہ بھی انکشاف کیا کہ انہوں نے مستقبل کے امکان کو مدنظر رکھتے ہوئے اپنے ایگز فریز کروا رکھے ہیں، تاہم اس عمل کو انہوں نے مشکل اور تکلیف دہ قرار دیا۔

نیہا پینڈسے کے ان بیانات کے بعد سوشل میڈیا پر ایک نئی بحث چھڑ گئی ہے جہاں کچھ صارفین ان کے فیصلے کی حمایت کر رہے ہیں جبکہ کچھ اب بھی تنقید کرتے دکھائی دیتے ہیں۔

ممبئی: بھارتی اداکارہ ردھی ڈوگرا نے طلاق کے کئی سال بعد ایک بار پھر محبت اور شادی سے متعلق اپنے خیالات کا اظہار کرتے ہوئے کہا ہے کہ وہ آج بھی محبت پر یقین رکھتی ہیں اور مستقبل میں شادی کے لیے تیار ہیں۔

اداکارہ نے حال ہی میں یوویکا چودھری کے پوڈکاسٹ میں شرکت کی جہاں انہوں نے اپنی ذاتی زندگی، محبت اور رشتوں پر کھل کر گفتگو کی۔ ان کا کہنا تھا کہ "میں بہت رومانٹک ہوں اور محبت کے لیے ہمیشہ اوپن ہوں۔”
یاد رہے کہ ردھی ڈوگرا نے 2011 میں اداکار راکیش بپت سے شادی کی تھی، تاہم 2019 میں دونوں کے درمیان طلاق ہو گئی۔ دلچسپ بات یہ ہے کہ علیحدگی کے باوجود دونوں کے درمیان دوستانہ تعلقات برقرار ہیں۔

اپنے خیالات کا اظہار کرتے ہوئے اداکارہ نے کہا کہ محبت ان کے لیے بہت اہم ہے اور وہ اسے زندگی کا بنیادی جزو سمجھتی ہیں۔ "محبت صرف رومانٹک نہیں ہوتی، یہ ہر جگہ موجود ہے، حتیٰ کہ نفرت میں بھی محبت کا عنصر ہوتا ہے،” انہوں نے کہا۔

شادی کے حوالے سے بات کرتے ہوئے ردھی ڈوگرا نے اسے ایک "کمٹمنٹ” قرار دیا اور کہا کہ شادی ایک طرح کا معاہدہ ہے جسے نبھانا ضروری ہوتا ہے، تاہم کمپینین شپ بغیر شادی کے بھی ممکن ہے۔اپنے ممکنہ جیون ساتھی سے متعلق سوال پر اداکارہ کا کہنا تھا کہ ان کے پاس کوئی مخصوص چیک لسٹ نہیں، لیکن وہ ایک خودمختار، بااعتماد اور دوسروں کی عزت کرنے والے شخص کو ترجیح دیں گی۔ "میں چاہتی ہوں کہ میرا پارٹنر سیلف میڈ ہو، اپنی شناخت رکھتا ہو اور میرے مضبوط ہونے کو قبول کرے،”

اداکارہ کے مطابق وہ اپنی زندگی میں مکمل طور پر خودمختار ہیں اور کسی ایسے شخص کو ترجیح نہیں دیں گی جو ان کی کامیابی سے عدم تحفظ کا شکار ہو۔ردھی ڈوگرا کے اس بیان کے بعد سوشل میڈیا پر ان کی ممکنہ دوسری شادی سے متعلق چہ مگوئیاں شروع ہو گئی ہیں، جبکہ مداح ان کے لیے نیک خواہشات کا اظہار کر رہے ہیں۔

پاکستان شوبز انڈسٹری کی معروف اداکارہ ہانیہ عامر اور گلوکار عاصم اظہر ایک بار پھر خبروں کی زینت بن گئے ہیں، جہاں حالیہ واقعے نے مداحوں کو حیران اور متجسس کر دیا ہے۔

رپورٹس کے مطابق ہانیہ عامر کو حال ہی میں عاصم اظہر کے امریکا میں ہونے والے کنسرٹس کے دوران دیکھا گیا، جہاں انہوں نے ایک بینڈانا کے ذریعے اپنا چہرہ چھپایا ہوا تھا۔ اس بینڈانا پر "عاصم علی” درج تھا، جو نہ صرف عاصم اظہر کا اصل نام ہے بلکہ ان کے نئے البم کا عنوان بھی بتایا جا رہا ہے۔

یاد رہے کہ ہانیہ عامر اور عاصم اظہر ماضی میں ایک دوسرے کے ساتھ تعلقات میں رہے ہیں اور اکثر ایک ساتھ تقریبات میں نظر آتے تھے، تاہم بعد ازاں دونوں کے درمیان علیحدگی ہو گئی تھی۔ بعد میں عاصم اظہر کی منگنی میرب علی سے ہوئی، جو اب ختم ہو چکی ہے۔حالیہ پیش رفت کے بعد سوشل میڈیا پر دونوں کے درمیان دوبارہ قربت کی قیاس آرائیاں زور پکڑ رہی ہیں۔ بعض مداحوں کا خیال ہے کہ یہ عمل دونوں کے تعلق کو باضابطہ بنانے کا اشارہ ہو سکتا ہے، جبکہ دیگر صارفین اس پر تنقید بھی کر رہے ہیں۔سوشل میڈیا پر ملے جلے ردِعمل کا اظہار سامنے آیا ہے، جہاں کچھ صارفین نے اس اقدام کو غیر سنجیدہ قرار دیا، وہیں کئی افراد نے اسے محبت کا کھلا اظہار بھی قرار دیا ہے۔

پاکستان کی معروف ماڈل و اداکارہ صحیفہ جبار خٹک نے حالیہ سوشل میڈیا تنقید کے بعد اپنے مخصوص اور منفرد انداز میں ناقدین کو جواب دیتے ہوئے منی اسکرٹ میں اپنی نئی تصاویر شیئر کر دی ہیں، جس پر ایک نئی بحث چھڑ گئی ہے۔

صحیفہ جبار خٹک، جو مختلف کامیاب ڈراموں میں اپنی جاندار اداکاری کے باعث شہرت رکھتی ہیں، سوشل میڈیا پر بھی کافی متحرک رہتی ہیں اور اکثر سماجی مسائل پر بے باک رائے دینے کے حوالے سے پہچانی جاتی ہیں۔
حال ہی میں ایک نجی ایونٹ میں بولڈ لباس پہننے پر انہیں سوشل میڈیا صارفین کی جانب سے شدید تنقید کا سامنا کرنا پڑا۔ تاہم اداکارہ نے روایتی خاموشی اختیار کرنے کے بجائے ناقدین کو اپنے انداز میں جواب دیتے ہوئے مختلف مواقع پر لی گئی منی اسکرٹ میں تصاویر شیئر کر دیں۔شیئر کی گئی تصاویر میں اداکارہ کو سیاہ اور سفید اسکرٹس کے ساتھ کیژول شرٹس پہنے دیکھا جا سکتا ہے، جبکہ ایک تصویر جم کے دوران لی گئی ہے، جو ان کی فٹنس روٹین کی عکاسی کرتی ہے۔

صحیفہ نے تصاویر کے ساتھ طنزیہ کیپشن بھی تحریر کیا "میرا لیگ ڈے برباد نہ کرو”،جس نے سوشل میڈیا صارفین کی خاصی توجہ حاصل کی اور تیزی سے وائرل ہو گیا۔اداکارہ کے مداحوں اور شوبز شخصیات نے ان کے اعتماد، فٹنس اور جرات مندانہ انداز کو سراہا، جبکہ کچھ صارفین نے بدستور تنقید جاری رکھی۔ ایک صارف نے تبصرہ کیا کہ صحیفہ جبار نے ٹرولنگ کو ضرورت سے زیادہ سنجیدہ لے لیا ہے۔

ممبئی: معروف بھارتی اداکار اکشے کمار کی 13 سالہ بیٹی کو آن لائن گیم کھیلنے کے دوران ہراساں کرنے کے کیس میں پولیس نے بڑی پیش رفت کرتے ہوئے ایک ملزم کو گرفتار کر لیا ہے۔

بھارتی میڈیا کے مطابق یہ واقعہ گزشتہ سال اکتوبر میں سامنے آیا تھا، جب اکشے کمار نے ایک تقریب کے دوران انکشاف کیا تھا کہ آن لائن گیم کھیلتے ہوئے ایک نامعلوم صارف نے ان کی بیٹی سے نازیبا تصاویر بھیجنے کا مطالبہ کیا۔ اداکار کے مطابق ان کی بیٹی نے فوری طور پر گیم بند کر کے اپنی والدہ کو اس واقعے سے آگاہ کیا۔
اکشے کمار نے اس موقع پر کہا تھا کہ اس طرح کے واقعات بچوں کو بلیک میلنگ اور سنگین جرائم کی طرف دھکیل سکتے ہیں، اس لیے والدین اور معاشرے کو ڈیجیٹل دنیا کے خطرات کے بارے میں زیادہ آگاہ ہونے کی ضرورت ہے۔واقعے کے بعد بھارتی سائبر سیل نے فوری طور پر تحقیقات کا آغاز کیا اور جدید تکنیکی ذرائع کی مدد سے ملزم کی شناخت کرتے ہوئے اسے گرفتار کر لیا۔

حکام کے مطابق گرفتار ملزم سے مزید تفتیش جاری ہے تاکہ یہ معلوم کیا جا سکے کہ آیا وہ دیگر بچوں کو بھی آن لائن ہراسانی کا نشانہ بناتا رہا ہے یا نہیں۔بھارتی میڈیا کا کہنا ہے کہ اکشے کمار کے اس انکشاف کے بعد یہ کیس تعلیمی اداروں میں سائبر سیکیورٹی اور آن لائن حفاظت سے متعلق آگاہی مہمات میں بھی شامل کیا جا رہا ہے، تاکہ طلبہ کو انٹرنیٹ کے محفوظ استعمال اور ممکنہ خطرات سے آگاہ کیا جا سکے۔