Category: شوبز

فلمسٹار شان شاہد جو سوشل میڈیا پر کافی متحرک رہتے ہیں خصوصی طور پر ٹویٹر پر۔شان عمران خان کے بہت بڑے حامی ہیں اور وہ اپنے پسندیدہ لیڈر کی تعریف کا کوئی بھی موقع ہاتھ سے نہیں جانے دیتے ۔حال ہی میں انہوں نے ایک ٹویٹ کیا اور برس پڑے حکمرانوں پر ۔ کہنے لگے ”پیٹرول مہنگا نہیں ہوا لوگ سستے ہوئے ہیں “ اور لوگ تب سستے ہوتے ہیں جب حکمرانوں کے دلوں میں ان پر ظلم کرنے کا درد اور احساس ختم ہوجائے لیکن پھر بھی قوم ہمت اور پاکستان کا ساتھ کبھی نہیں چھوڑے گی۔ یہی وہ شان شاہد ہیں جو عمران خان کے دور میں پیٹرول کی قیمتیں بڑھنے پر لوگوں کو تسلی دیا کرتے تھے

اور کہا کرتے تھے کہ عمران خان جو بھی کررہے ہیں وہ پاکستان کے مفاد میں کررہے ہیں لیکن ایکدم شان شاہد کو مہنگائی بھی محسوس ہونے لگی ہے اور حکمرانوں کی ذمہ داریاں بھی محسوس کرنے لگے ہیں ۔ شان شاہد کو بڑی تعداد میں لوگ ٹویٹر پر فالو کرتے ہیں یہی وجہ ہے کہ اِدھر وہ ٹویٹ کرتے ہیں اُدھر ان کی پوسٹ کے نیچے لوگوں کے کمنٹس آنا شروع ہوجاتے ہیںکچھ لوگ ان کا ساتھ دیتے ہیں ان کی ہاں میںہاں ملاتے ہیں اور کچھ لوگ ان پر برس پڑتے ہیں اور یوتھیا ہونے کے طعنے دیتے ہیں۔ یاد رہے کہ شان شاہد کی فلم ضرار کا ٹریلر ریلیز ہو چکا ہے اور فلم ریلیز کے لئے بھی تیار ہے لیکن ریلیز کی تاریخ تاحال سامنے نہیں آسکی اس فلم کو شان شاہد نے خود لکھا ہے ۔

اداکارہ صبور علی بھی مہنگائی سے کافی پریشان ہیں لیکن انہوں نے اس کا اظہار نہایت ہی الگ انداز میں کیا ۔انہو ں نے انسٹاگرام پر ایک پوسٹ شئیر کی جس میں دو تصاویر دیکھی جا سکتی ہیں ان کی ایک تصویر پر لکھا ہوا ہے کہ لڑکے کا رشتہ آیا ہے جبکہ دوسری تصویر میں صبور علی دلہن بنی ہوئی ہیں اس پر لکھا ہوا ہے کہ لڑکے کا پیٹرول پمپ ہے ۔صبور علی کی مہنگائی پر اس طنزیہ پوسٹ کو بہت زیاد ہ پسند کیا جا رہا ہے ۔صبور علی ہی نہیں مہنگائی سے ہر دوسرا فنکار بھی متاثر ہوا ہے ہر کسی کے دل کی آواز ہے کہ مہنگائی بہت زیادہ ہے خصوصی طور پر پیٹرول کی قیمتوں نے تو جیسے سب کی ہی کمر توڑ کر رکھ دی ہو ۔

یاد رہے کہ صبور علیپچھلے برس علی انصاری کے ساتھ شادی کے بندھن میں بندھیں تھیںان کی شادی کو بھی محدود پیمانے پر ہی کیا گیا تھا شادی میں ان کے قریبی دوست اور اہلخانہ کے لوگ شامل تھے۔ شادی کے بعد وہ اب تک کسی بھی پراجیکٹ میں نظر نہیں آئیں ۔ صبور علی سجل کی چھوٹی بہن ہیں دونوں ایک ہی وقت میں ڈرامہ انڈسٹری میں آئیں لیکن سجل صبور سے کافی آگے نکل گئیں یہاں تک کہ انہوں نے بھارت میں سری دیوی کے ساتھ بھی کام کیا ۔صبور علی نے ایک انٹرویو میںکہا تھا کہمیں اور سجل کام کے حوالے سے آپس میں اتنی ہی بات کرتی ہیں کہ وہ آج کل کیا کام کر رہی ہیں اور کہاں جا رہی ہیں اور میں کیا کر رہی ہوں،ہم ایک دوسرے کے پراجیکٹس کو ڈسکس نہیں کرتیں۔

اداکار ہ زارا شیخ جو ماضی قریب میں عمران اشرف کے ساتھ ڈرامہ سیریل ”رقص بسمل “ میں دکھائی دیں تھیں زارا شیخ نےسکرین پر اینٹری کافی عرصے کے بعد دی تھی ان کے پرستاروں نے انہیں بہت زیادہ سراہا بھی تھا لیکن وہ فلموں میں دکھائی نہیں دے رہی ہیں۔حال ہی میںاپنے ایک انٹرویو میںانہوں نے کہا کہ میں فلموں میںکام کرنا چاہتی ہوں اگر اچھا کام آفر ہواتو یقینا کروں گی ۔زارا شیخ فلم انڈسٹری کی حالت پر بھی بات کرتے ہوئے کہا کہ جب تک فلم بینوں کا مزاج سمجھ کر فلم نہیں بنائی جائیگی فلم کامیاب نہیںہو گی نہ ہی شائقین سینما گھر میں آئیں گے ۔انہوں نے یہ بھی گلہ کیا کہ فلم میکرز اور ڈائریکٹر ز نے جدید ٹیکنالوجی پر توجہ نہ دی جس کی وجہ سے فلم انڈسٹری تباہی کے دہانے پر جا پہنچی نہ صرف سٹوڈیوز بلکہ سینما گھر بھی ویران پڑے ہوئے ہیں۔ آج کل جو فلمیں بن رہی ہیں اس پر بات کرتے ہوئے زارا شیخ نے کہا کہ ٹھیک ہے آج جو فلمیں بن رہی ہیںا چھی ہیں اچھی کوشش ہیں لوگ کچھ کو پسند کررہے ہیں کچھ پسند نہیں کررہے ۔فلم میکنگ یقینا بہتر ہو رہی ہے ہم بہتری کی طرف جا رہے ہیں لیکن ابھی ہماری منزل بہت زیادہ دور ہے ابھی ہمیں ہر پہلو پر غور کرکے اس پر کام کرنا ہوگا جدید تقاضوں کے مطابق خود کو ڈھالنا ہوگا ۔ یاد رہے کہ زارا شیخ نے اپنے کیرئیر کا پہلا پراجیکٹ شان شاہد کےساتھ کیا تھا اس فلم کا نام تھا” تیرے پیار میں“ زارا شیخ کو اس میں بہت زیادہ سراہا گیا تھا ۔

اداکار ہ صاحبہ اور ریمبو بھی ہوئے مہنگائی سے پریشان ،وہ اتنا پریشان ہوئے کہ انہوں نے مہنگائی اور خصوصی طور پر پیٹرول کی بڑھتی قیمتوں کے حوالے سے ایک ہلکے پھلکے انداز میں بنائی گئی وڈیو سوشل میڈیا پر جاری کی۔اس وڈیو میں خود ریمبو اور صاحبہ نظر آ رہے ہیں دونوں کی یہ وڈیو کافی وائرل بھی ہو رہی ہے ۔وڈیو میں صاحبہ ریمبو سے کہتی ہیں کہ جلدی کریں مجھے بہت دیر ہورہی ہے آپ نے پیٹرول بھروا لیا ہے تو ریمبو کہتے ہیں کہ جی جی میں نے پیٹرول بھروالیا ہے ، ٹنکی فل کروا لی ہے صاحبہ بیٹھنے کے لئے گاڑی کا دروازہ کھولتی ہیں تو ریمبو آواز لگاتے ہیں کہ ادھر آﺅ بھئی اِدھر صاحبہ جب ریمبو کی طرف بڑھتی ہیں تو ریمبو بائیک پر بیٹھے ہوتے ہیں اور صاحبہ سے کہتے ہیں کہ

آج کل ٹنکی صرف اس کی فل ہوسکتی ہے (یعنی موٹر بائیک )۔ صاحبہ ریمبو اس وڈیو کے زریعے بنے لوگوں کی آواز ہر دل کی اس وقت یہی آواز ہے کہ مہنگائی بہت زیادہ ہے اتنی زیادہ کہ نہ بل افورڈ کئے جا سکتے ہیں اور نہ ہی گاڑی کا پیٹرول ۔دونوں کی اس وڈیو کو سوشل میڈیا پر کافی پسند کیا جا رہا ہے اور لوگ اس وڈیو پر طرح طرح کے تبصرے بھی کررہے ہیں اور اس وڈیو کو خود کے حالات کے کافی قریب تر محسوس کررہے ہیں۔یاد رہے کہ ریمبو کی حال ہی میں گھبرانا نہیں ہے فلم ریلیز ہوئی جبکہ صاحبہ آج کل اپنا بیوٹی پارلر اور یوٹیوب چینل چلا رہی ہیں کہا جا سکتا ہے کہ دونوں سوشل میڈیا پر کافی متحرک ہیں ۔

آمنہ الیاس نے فلم انڈسٹری کی کامیابی کا فارمولا بتا دیا
ماڈل و اداکار ہ آمنہ الیاس کہتی ہیں کہ فلم انڈسٹری کی کامیابی یا ترقی کے لئے سب کو مل کر سوچنا ہوگا ایسی حکمت عملی بنانی ہو گی جو فلم انڈسٹری کے ساتھ ساتھ اس سے جڑے لوگوں کو بھی فائدہ دے ۔زیادہ سے زیادہ فلمیں بنانا خوش آئند ہے لیکن صرف فلموں کی تعدا د سے فلم انڈسٹری ترقی نہیں کریگی بلکہ جتنی سرمایہ کاری آئیگی اتنی ہی اچھی اور بہتر فلم بنے گی۔اس طرح تو ایک ہزار بھی فلمیں بنا لی جائیں لیکن اگر وہ غیر معیاری ہیں تو پھر تو فلم انڈسٹری کو ان سے کوئی فائدہ نہ ہوا نا ۔اس لئے کوشش کی جانی چاہیے کہ زیادہ سے زیادہ سرمایہ کاری کی جائے جب تک زیادہ سرمایہ کاری نہیں کی جائیگی بہتری ممکن نہیں ہے ۔ آمنہ الیاس نے کہا کہ تمام فنکار اور ہدایتکار مشترکہ حکمت عملی کے ساتھ چلیں تو مسائل کو سالوں میں نہیں بلکہ مہینوں میں حل کیا جا سکتا ہے ۔انہوں نے بجٹ میں کئے گئے فلم کے لئے اعلانات کو سراہا لیکن اس چیز کی بھی امید کی کہ ان اعلانات پر عمل درآمدبھی کیا جائیگا ۔

یاد رہے کہ آمنہ الیاس ماڈلنگ کی دنیا سے آنے والی ایسی فنکارہ ہیں جن کا کام دیکھنے والوں کو بے حد متاثر کرتا ہے آمنہ ایک مکمل پیکج ہیں سنجیدہ ہو یا مزاحیہ ،ڈانس ہو یا ڈرامہ وہ ہر چیز پرفیکٹ انداز میں کرتی ہیں ۔آمنہ الیاس سوشل میڈیا پر کافی متحرک رہتی ہیں کورونا کے دنوں میںانہوں نے بہت ساری سبق آموز وڈیوز شئیر کیں ان سب وڈیوز میں آمنہ خود نظر آتی رہی ہیں ۔آمنہ بنیادی طور پر تخلیقی ذہن کی مالک ہیں اور ان کو تخلیقی کام ہی اچھا لگتا ہے۔

باصلاحیت اداکارہ فضیلہ قاضی نے حال ہی میں ایک انٹرویو دیا ہے اس میں انہوں نے کہا کہ ڈراموں میں نئے چہروں کی ضرورت ہے ایک ہی طرح کے چہرے اور یکسانیت کا شکار کہانیاں ڈراموں کا معیار گرا رہی ہیں ۔انہوں نے کہا کہ فنکاروں کے ساتھ ناانصافیاں ہو رہی ہیں اس کا نقصان براہ راست ڈرامے کو پہنچ رہا ہے ۔چند ایک لوگوں کو ہر ڈرامے میںکاسٹ کر لیا جاتا ہے بار بار انہی کو کام ملتا ہے شاید انہی لوگوں کو کامیابی کی ضمانت سمجھ لیا گیا ہے ایسا نہیں ہونا چاہیے سب کو کام ملنا چاہیے ۔ فضیلہ قاضی نے یہ بات حال ہی میں نہیں کہی ہے بلکہ وہ ایک عرصے سے کہہ رہی ہیں کہ فنکاروں میں ہونے والی تخصیص کو ختم کیا جائے فنکار فنکار ہوتا ہے نہ چھوٹا ہوتا ہے نہ بڑا ۔فضیلہ قاضی نے تو یہاں تک کہہ دیا تھا کہ ایوارڈ ز بھی اپنے پسندیدہ لوگوں کو ہی دئیے جاتے ہیں ۔

یاد رہے کہ فضیلہ قاضی لگی لپٹی نہیں رکھتیں ان کے دل میں جو ہوتا ہے وہ بول دیتی ہیں،فضیلہ قاضی نامور اداکار قیصر خان کی اہلیہ ہیں اور قیصر خان بھی ٹی وی کا ایک بڑا نام ہے وہ آج کل اداکاری سے زیادہ وکالت پر توجہ دئیے ہوئے ہیں جبکہ فضیلہ قاضی فل ٹائم اداکاری ہی کررہی ہیںلیکن ان کو انڈسٹری سے کچھ گلے شکوے ہیںجن کا اظہار وہ وقتا فوقتا کرتی بھی رہتی ہیں۔فضیلہ قاضی ہی نہیں بہت سارے دوسرے ایسے سینئر فنکار ہیں جنہیں اس قسم کے گلے شکوے ہیں۔

کرن جوہر کی فلم جُگ جُگ جیوجس کے ہر طرف چرچے ہیں چوبیس جون کو ریلیز ہو نے جا رہی ہے لیکن اس کی ریلیز کے دن پرڈیوسر کرن جوہر ممبئی کیا ملک میںہی موجود نہیں ہوں گے کیونکہ اپنی فیملی کے ساتھ انہیں لندن جانا پڑا ۔کرن جوہر اس وقت لندن میں موجود ہیں ۔ہیتھرو ائیرپورٹ پر جب ان سے ریلیز کے روز ان کی عدم شرکت کے حوالے سے سوال ہوا تو انہوں نے کہا کہ ایسا نہیں ہے کہ میں بے خبر رہوں گا بلکہ میںلندن میں بیٹھ کر اپنی مارکیٹنگ ٹیم کی ایک ایک مُوو پر نظر رکھوں گا ۔فلم کی ایڈوانس بکنگ پر شائقین کا جو ریسپانس ملا ہے اس کو دیکھتے ہوئے بِہار کے نامور ایگزیبیٹر ثمن سنہا کہتے ہیں کہ جس طرح سے فلم کی ٹکٹیں فروخت ہوئیں یا ایڈوانس بکنگ ہوئی ہے

وہ بہت ہی زیادہ حوصلہ افزاءہے ، جگ جگ جیو ریفریشنگ فلم ہے اور اس وقت لوگ ایسی ہی فلمیں دیکھنا چاہتے ہیں وہ بالکل بھی اس سے ہٹ کر فلمیں دیکھنے کےلئے تیار نہیں ہیں یہی وجہ ہے کہ شائقین اس فلم کو دیکھنے کےلئے بےتاب کیونکہ کافی عرصے کے بعد کرن جوہر کے سٹائل کی فلم ان کو دیکھنے کو مل رہی ہے۔اُدھر فلم کی کاسٹ بھی کافی پرجوش ہے وہ بھی بھرپور انداز میں فلم کی پرموشن کررہی ہے ۔نیتو سنگھ اور انیل کپور کافی عرصے کے بعد سکرین پر جلوہ گر ہورہے ہیں۔فلم کی کاسٹ میں ان کے علاوہ کیارا ایڈوانی اور ورون دھون نظر آئیں گے فلم کا میوزک پہلے ہی سپر ہٹ ہو چکا ہے ۔

نوے کی دہائی کے سٹار بوبی دیول نے حال ہی میںایک انٹرویو دیا ہے اس میں انہوں نے بتایا ہے کہ ان کو کھانے میں کیا کیا پسند ہے ۔بوبی دیول نے بتایا کہ وہ جب وزن کنٹرول کررہے ہوں تو اس وقت ان کی ڈائیٹ کچھ اور ہوتی ہے اور جب وزن کنٹرول نہ کررہے ہوں تو اس وقت انہیں جو ملتا ہے وہ کھا لیتے ہیں۔بوبی نے یہ بھی کہا کہ میں کھانے کا بہت زیادہ شوقین نہیں ہوں اور مجھے نیند بہت کم آتی ہے اتنی کم کے مشکل سے چار پانچ گھنٹے ہی سو پاتا ہوں بہت کوشش کرتا ہوں لیکن سات آٹھ گھنٹے کی نیند نہیں لے پاتا حالانکہ سات آٹھ گھنٹے کی نیند لینا بہت ضروری ہے۔

بوبی دیول نے بتایا کہ وہ ناشتے میں انڈہ سلائس کھاتے ہیں دوپہر میں گرل چکن اور رات کو بھی گرل چکن اور اس دوران اگر بھوک لگے تو بادام کھا لیتا ہوں ۔ جب وزن کنٹرول نہ کررہا ہوں تو گھی ،مکھن دہی ہر چیز کھاتا ہوں ۔مجھے لوکی کی سبزی بہت زیادہ پسند ہے اور یہ میری فیورٹ انڈین ڈش بھی ہے اور ویسٹرن فیورٹ ڈش پوچھیں تو مجھے پاستا بہت پسند ہے۔میٹھے میں ہمارے گھر گاجر کا حلوہ اور کھیر بنتی ہے وہ شوق سے کھاتا ہوں ۔بوبی دیول نے یہ بھی بتایا کہ جب وہ جوان تھے اس وقت دن میں چار پانچ بار اورنج جوس پی لیا کرتے تھے لیکن اب ایسا نہیں ہے۔انہوں نے مزید کہا کہ ہم خوش قسمت ہیں کہ ہمارے گھر میں گائے اور بھینسیں ہیں ان ہی کا دودھ دہی اور مکھن کھاتے یں ۔مجموعی طور پر بوبی دیول نے بتایا کہ انہیں پراٹھا ،گاجر ،پیزا ہر چیز اچھی لگتی ہے۔

کافی عرصے سے لوگ منتظر تھے کہ شاہ رخ خان کے بچے فلموں میں آئیں لیکن لگتا ہے اب انتظار کی گھڑیاں ختم ہو رہی ہیں کیونکہ شاہ رخ خان کی بیٹی سہانا خان جو کہ ذویا اختر کی فلم ”دا آرچی“ سے اپنا ڈیبیو کر رہی ہیں اس کی شوٹنگ کا پہلا شیڈیول مکمل ہو گیا ہے ،پہلا شیڈیو ل اوٹی میںتھا خبریں ہیں کہ اوٹی میں ہونے والا کام اب ختم ہو چکا ہے۔نیٹ فلیکس پر ریلیز ہونے والی اس فلم میں سہانا خان کے ساتھ سری دیوی اور بونی کپور کی بیٹی خوشی کپور کے ساتھ امیتابھ بچن کا گرینڈ بیٹا آگستیا نندہ بھی ڈیبیوکررہے ہیں ۔ فلم میوزیکل ڈرامہ ہے جس کا ٹیزر بھی ریلیز کیا جا چکا ہے جس میں بتایا گیا ہے کہ اس فلم میں کون کون کام کررہا ہے ۔

یاد رہے کہ زویا اختر نیٹ فلیکس کے لیے بین الاقوامی مزاحیہ کتاب آرچی کے ہندوستانی ورژن پر کام کر رہی ہیں۔شاہ رخا ن نے ایک انٹرویو میں کہا تھا کہ ان کی بیٹی سہانا خان اداکاری میں بہت زیادہ دلچپسی رکھتی ہے جبکہ ان کا بیٹا آریان ہدایتکاری میں دلچپسی رکھتا ہے ۔اب دیکھنا یہ ہے کہ سہانا خان کیسی اداکارہ ثابت ہوتی ہیں کیونکہ ان کے والد نے تو کنگ خان ہونے کا اعزاز حاصل کر رکھا ہے ۔اُدھر خوشی کپور کا بھی یہ پہلا پراجیکٹ ہے سری دیوی کے پرستار ان میں اپنی پسندیدہ اداکارہ کو شاید دیکھنا چاہتے ہیں ۔بالی وڈ کے نامور ستاروں کے بچے اس فلم سے اپنا ڈیبیو کررہے ہیں اس لئے اس فلم کا سب کو ہی بے چینی سے انتظار ہے ۔

کرینہ کپور دا ڈیووشن سسپیکٹ ایکس کی شوٹنگ میں مصروف تھیں جتنا ٹائم انہوں نے شوٹنگ کی وہ سیٹ کی تقریبا ہر روز ہی تصاویر سوشل میڈیا پر شئیر کیا کرتی تھیں اب ان کی فلم کی شوٹنگ مکمل ہو گئی ہے ۔کرینہ کپور نے اس حوالے سے انسٹاگرام پر ایک تصویر شئیر کرتے ہوئے لکھا کہ فلم کی شوٹنگ مکمل ہو گئی ہے۔کرینہ کپور نے اس فلم سے جڑے اہم لوگوں کو ٹیگ کرتے ہوئے لکھا کہ مجھے امید ہے فلم بہت اچھی ہو گی ۔دا ڈیووشن سسپیکٹ ایکس نیٹ فلیکس پر ریلیز ہو گی اور کرینہ کپور اس فلم کے زریعے اپنا ڈیجیٹل ڈیبیو کررہی ہیں۔فلم سسپنس تھرلر ہے جسے کی گو ہیگشینو نے لکھا ہے ،جبکہ پرڈیوس جے جے شیوا کرامانی ،آکاش پوری اور تھومس کم کے ساتھ سجے گھوش نے کیا ہے۔فلم کی کہانی ناول پر مبنی ہے اور اب تک کئی ایوارڈز بھی جیت چکی ہے ۔کرینہ کپور اپنے ڈیجیٹل ڈیبیو کو لیکر کافی پرجوش ہیں۔ان کی خوشی کا اندازہ انکی شوٹنگ کے دوران مسلسل تصاویر شئیر کرنے سے لگایا جا سکتا ہے ۔کرینہ کپور نے اس سے قبل کسی بھی ڈیجیٹل پلیٹ فارم کے لئے کام نہیں کیا ۔امید ہے کہ ان کے پرستار ان کو اس پلیٹ فارم پر بھی سراہیں گے ۔
یاد رہے کہ کرینہ کپور پچھلے کچھ عرصے سے ہندی فلموں میں زرا کم کم دکھائی دے رہی ہیں،لیکن فلمی تقریبات میں نظر آتی ہیں انٹرویوز بھی دے رہی ہیںحال ہی میںانہوں نے ایک انٹرویو میںکہا تھا کہ لوگ انہیں بوڑھی کہتے ہیں تو انہیں بہت دکھ ہوتا ہے ۔