Category: شوبز

نبیل قریشی کی ڈائریکشن میں بننے والی فلم قائداعظم زندہ باد کا گزشتہ روز کراچی میں ٹریلر ریلیز کیا گیا ،اس موقع پر ماہرہ خان ،فہد مصطفی ، جاوید شیخ و دیگرموجود تھے ان کی حوصلہ افزائی کےلئے وہاں شوبز انڈسٹری کے بہت سارے ستارے پہنچے جن میں ہمایوں سعید اور ندیم بیگ کا نام قابل زکر ہے۔ ماہرہ خان اور فہد مصطفی کافی خوش دکھائی دے رہے تھے ۔ماہرہ خان اور فہد مصطفی دونوں پہلی بار کسی فلم میں دکھائی دے رہے ہیں ۔اس سے قبل دونوں نے کسی کمرشل تک میںکام نہیں کیا ۔یہ پہلا موقع ہے کہ ان دونوں کو ان کے پرستار ایک ساتھ دیکھیں گے ۔

فلم کی کہانی فضا علی مرزا اور نبیل قریشی نے لکھی ہے ۔فلم کی کاسٹ میں ماہرہ خان اور فہد مصطفی کے ساتھ جاوید شیخ، سلیم معروج ،قوی خان ،نئیر اعجاز ،محمود اسلم اور اسد علی پلیجو و دیگر کے نام شامل ہیں ۔فلم عید الاضحی پر ریلیز کی جا رہی ہے۔ کہا جا رہا ہے کہ فلم اپنی منفرد کہانی کی وجہ سے نہ صرف شائقین کی توجہ حاصل کریگی بلکہ تازہ ہوا کا جھونکا بھی ثابت ہو گی ۔فلم کا ٹریلر دیکھ کر شائقین کافی پرجوش ہیں ان کا کہنا کہ ہم بے چینی سے فلم کی ریلیز کا انتظار کررہے ہیں۔فہد اور ماہرہ کی جوڑی کیا رنگ لاتی ہے یہ تو ریلیز کے بعد ہی پتہ چلے گا لیکن فلم کا ٹریلر بتا رہا ہے کہ سٹوری روٹین سے ہٹ کر ہے۔فلم کی ساری کاسٹ کا کہنا ہے کہ قائداعظم زندہ باد کی ساری ٹیم نے نہایت ہی محنت سے کام کیا ہے ۔

کامیڈی ہارر فلم ”پیچھے تو دیکھو “جسے سید عاطف نے لکھا اورڈائریکٹ کیا ہے 17جون کو ریلیز ہونے جا رہی ہے۔ کاسٹ میں یاسر حسین ،عامر قریشی ،عادی،نوال ،سعید اور جنید اکبر شامل ہیں۔فلم کی ریلیز چونکہ قریب ہے اس لئے اسکی پرموشنز کا زور و شور سے آغاز کر دیا گیا ہے۔پیچھے تو دیکھو کی ٹیم نے گزشہ رو ز لاہور میں میڈیا میٹ اپ کیا، یاسرحسین ،نوال سعید ،سارا ،جنید ،وقار اور سید عاطف موجود تھے ۔ یاسر حسین نے کہا کہ پیچھے تو دیکھو پاکستان کی پہلی فلم ہے جو ہارر کامیڈی ہے ،اس میں ایسی چیزیں دیکھنے کو ملیں گے جو باقی دنیا کی فلموں میں دیکھنے کو ملتی ہیں ۔فلم ٹیکنیکلی بہت زیادہ مضبوط ہے ،سٹوری بہت اچھی ہے ایسی سٹوریا ں بہت کم کم بنتی ہیں.

بہت عرصے کے بعد ایسی فلم پاکستانی سینما کی زینت بننے جا رہی ہے ۔فلم کا میوزک صرف ہٹ ہونے کے لئے نہیں بنایا گیا بلکہ سیچوایشن کے حساب سے بنایا گیا ہے،میڈیم نور جہاں کا گانا بھی اس میں شامل کیا گیا ہے ۔یاسر نے مزید کہا کہ یہ فلم بڑوں کے ساتھ ساتھ بچوں کے لئے بھی ہے،یہ پاکستان کی ایسی پہلی فلم ہے جس سے ایک ہی وقت میں بڑے بچے بزرگ ایک ساتھ لطف اندوز ہوں گے۔فلم کی باقی کاسٹ نے کہا کہ یہ فلم ہارر اینڈ کامیڈی کا مکسچر ہے اس فلم کے کسی پارٹ پر بچے خوش ہوں گے،کسی پارٹ پہ بزرگ ،کسی پہ وہ لوگ جن کی منگنی ہوئی ہے یا جن کی نئی نئی شادی ہوئی ہے ۔فلم دیکھ کر لوگ جب سینما گھر سے نکلیں گے تو محسوس کریں گے کہ انہوں نے واقعتا کچھ روٹین سے ہٹ کر دیکھا ہے۔

صبا قمر اپنی شاندار پرفارمنس کی وجہ سے کافی خبروں میں رہتی ہیں ہر کوئی ان کی فنکارانہ صلاحیتوں کا معترف نظر آتا ہے ۔حال ہی میںان کی فلم ”کملی‘ ‘ ریلیز ہوئی ہے اس میںان کی اداکاری کو ان کے کیرئیر کی بہترین اداکاری قرار دیا جا رہا ہے۔ حال ہی میں صبا ایک ٹی وی شو میں شریک تھیں وہاں انٹرویو کے دوران ان کی شادی کے متعلق سوال ہوا تو انہوں نے کہا کہ مجھے میرا جیون ساتھی مل چکا ہے میں اسکے ساتھ ایک اچھی زندگی دیکھ رہی ہوں،لیکن ہماری شادی کب ہو گی اسکے بارے میں ابھی کچھ طے نہیں ہوا۔انہوں نے مزید کہا کہ میں بتانا چاہتی ہوں کہ میرا ہونے والا جیون ساتھی بیرون ملک رہتا ہے اور مسلمان ہے میں ان کو پا کر کافی خوش ہوں ۔

اس انٹرویو میں صبا نے ایک خواہش کااظہار بھی کیا اور وہ خواہش ہے حج کرنے کی ،انہوں نے کہا کہ ان کی خواہش ہے کہ اپنے ہونے والے شوہر کے ساتھ حج کی ادائیگی کریں ۔انہوں نے مزید یہ بھی کہا کہ اگر مجھے اپنی بہتر زندگی کے لئے اداکاری کو چھوڑنا پڑا تو چھوڑ دوں گی اور اس کیرئیر سے الگ ہو جاﺅں گی ۔
یاد رہے کہ صبا قمر کافی عرصے سے انسٹاگرام پر روزانہ ایک پھول کی تصویر شئیر کررہی ہیں لوگوں کو بہت تجسس تھا کہ وہ پھول بھیجنے والا آخر کون ہے ایک ٹی وی پروگرام میں جب صبا قمر سے سوال ہوا کہ وہ پھول بھیجنے والا کون ہے تو انہوں نے کہا کہ وہ میرا قریبی دوست ہے اور مجھ سے پیار کرتا ہے ۔

آج کل سوشل میڈیا کا دور ہے اور اپنے پسندیدہ فنکاروں سے بات کرنا اتنا مشکل نہیں رہا ایک پوسٹ میں اپنے پسندیدہ فنکار کو ٹیگ کریں تو آپ کی آواز اور پسند اس فنکار تک پہنچ جاتی ہے ایسا ہی ہوا ورون دھون کی پرستار کے ساتھ ۔گزشتہ دنوں ورون دھون کو ان کی مداح نے ایک ٹویٹ کیا جس میںانہوں نے اپنے حالات بیان کئے اور لکھا کہ مجھے اور میری والدہ کو میرے والد بہت زیادہ مارتے پیٹتے ہیں ۔گالیاں دیتے ہیں کھانا تک نہیں دیتے اور دھمکیاں بھی دیتے ہیں میں اور میری والدہ نہایت ہی مشکل حالات میں ہیں ۔میرے والد مجھے اور میری والدہ کو تواتر سے مارتے ہیں ۔

اس پر ورون دھون نے ٹویٹ کا جواب لکھا اور اپنی پرستار کو حوصلہ دیتے ہوئے کہا کہ اگر آپ کی بات میں سچائی ہے تو میں جس حد تک ہو سکے آپ کی مدد کروں گا اور اس سلسلے میں اعلی حکام کو بھی انوالو کروں گا ۔ورون دھون نے اس معاملے کو حل کرنے کے لئے لڑکی اور اس کی والدہ کو انصاف دلانے ان کی زندگی کو آسان بنانے کےلئے متعلقہ حکام سے بات چیت کی اور کہا کہ لڑکی اور اسکی والدہ کو انصاف دیا جائے اور جو ان پر ظلم ڈھا رہا ہے اسکو کٹہرے میں کھڑا کیا جائے۔ورون دھون کے اس روپ کو لوگوں نے بےحد سراہا اور کہا کہ کسی بھی اداکار کی طرف سے اتنی سنجیدگی دکھائے جانا یقینا اس کی عاجزی اور مخلوق خدا کی محبت کو ظاہر کرتی ہے ۔

مشیا شفیع جن کا علی ظفر کے خلاف ہراسانی کا کیس چل رہا ہے ابھی تک یہ الزام کسی حتمی نتیجے پر نہیں پہنچا یعنی عدالتی کاروائی ابھی تک کی جتنی بھی ہوئی ہے اس میں دونوں فریقین میں سے کسی ایک کو سچا یا جھوٹا قرار نہیں دیا گیا ۔تاہم میشا اور علی ظفر دونوں کے پرستار ان کو سوشل میڈیا پر کافی سپورٹ کرتے ہیں لیکن جب سے کیس عدالت میں چل رہا ہے ان فریقین کی طرف سے ایک دوسرے پرالزامات لگانے کا سلسلہ تھم چکا ہے ۔اب حال ہی میں میشا شفیع کے وکیل نے پیکا آرڈیننس کے سیکشن 20کے خلاف درخواست سپریم کورٹ میں دی جسے سپریم کورٹ نے سماعت کے لئے منظور کر لیا ہے ۔

جسٹس قاضی فائز عیسیٰ کی سربراہی میں دو رکنی بنچ نے کیس کی سماعت کی، سپریم کورٹ نے میشا شفیع کے خلاف فوجداری کارروائی سے روکتے ہوئے گلوکارہ کی درخواست حکم امتناع جاری کر دیا۔اس حوالے سے سپریم کورٹ کی جانب سے حکم جاری کیا گیا کہ اگلی سماعت تک ہتک عزت پر میشا شفیع کے خلاف فوجداری کارروائی روک دی جائے، گلوکارہ کے خلاف سول مقدمہ جاری رہے گا۔سپریم کورٹ نے اٹارنی جنرل اور ایڈووکیٹ جنرل پنجاب کو نوٹس جاری کرتے ہوئے کیس کی سماعت غیر معینہ مدت کے لیے ملتوی کردی
یاد رہے کہ میشا شفیع نے علی ظفر پر ہراسمنٹ کے الزمات لگائے ہیں اور کیس کا فیصلہ تاحال نہیں آسکا۔
۔۔۔۔

بی جے پی کے رہنما کی جانب سے گستاخانہ بیان دینے پر بھارتی اداکار نصیر الدین شاہ بھی برس پڑے انہوں نے اپنے ملک کے حکمران نریندر مودی سے کہہ دیا کہ آپ ان کو کچھ عقل دیں جس خاتون نے گستاخانہ بیان دیا ہے وہ کوئی عام خاتون نہیں ہیں بلکہ قومی ترجمان ہیں ۔اپنے حالیہ انٹرویو میں نصیر الدین شاہ نے کہا کہ جو لوگ نفرت پھیلا رہے ہیں ان کو نریندر مودی ٹویٹر پر خود بھی فالو کرتے ہیں ان کو نفرت پھیلانے سے روکا جائے ۔یہی نہیں نصیر الدین شاہ نے بھارتی ٹی وی چینلز اور سوشل میڈیا کو اس اس قسم کے معاملات کو ہوا دینے کا ذمہ دار ٹھہرایا ۔

یاد رہے کہ الجزیرہ نیوزکی رپورٹ کے مطابق بی جے پی کی ترجمان کی جانب سے دین اسلام اورحضرت محمد سے متعلق گستا خانہ ریمارکس پرمسلمانوں اورمسلم ممالک کے احتجاج کے بعد پارٹی رہنماﺅں کو ہدایات جاری کی گئی ہے کہ مذہبی معاملات پربات کرنے سے محتاط رہیں۔ بی جے پی کے ایک سینیئر رہنما کا کہنا ہے کہ ہم نہیں چاہتے کہ پارٹی رہنما کسی بھی طریقے سے کوئی ایسی بات کریں جو کسی کمیونٹی کے مذہبی جذبات کو ٹھیس پہنچائے۔

دبنگ سلمان خان جو کسی نہ کسی حوالے سے خبروں کی زینت بنے رہتے ہیں ان کی فلم ”کبھی عید کبھی دیوالی“ جس کی شوٹنگ بہت جلد شروع ہونے جا رہی ہے کانام تبدیل کرنے کی باتیں کی جا رہی ہیں ۔رپورٹس کے مطابق سلمان خان کی فلم کبھی عید کبھی دیوالی کا نام تبدیل کرکے ”بھائی جان“ رکھ دیا گیا ہے نام کی تبدیلی کا اعلان ابھی باضابطہ طور پر نہیں کیا لیکن خبریں یہی ہیں کہ فلم کا نام تبدیل کرنے کاپلان بن چکا ہے ۔

سلمان خان کو جان سے مار دینے کی دھمکی کے موقع پر ان کی فلم کا نام تبدیل کر دینے کی خبریقینا سوال اٹھا رہی ہے آخر ایسی کیا بات ہوئی کہ فلم کا نام تبدیل کرنے کی ضرورت پیش آگئی ۔بھارتی میڈیا رپورٹس یہ بھی کہہ رہی ہیں اس فلم کی کاسٹ میں کچھ لوگ شامل تھے وہ بھی اس سے علیحدگی اختیار کررہے ہیںتاہم حتمی طور پر کسی کا ایسا فیصلہ سامنے نہیں آیا ۔
یاد رہے کہ سدھو موسے والا کے قتل کے بعد سلمان خان اور ان کے والد سلیم خان کو قتل کی دھمکیاں ملیں اس کے بعد ان کی سیکیورٹی کو بڑھا دیا گیا اور سلمان خان پولیس کو یہ بیان بھی ریکارڈ کروا چکے ہیں کہ ان کی کسی سے کوئی دشمنی نہیں ہے.

اداکارہ حاجرہ امین جو ہمیں عموما سنجیدہ کرداروں میں ہی نظر آتی ہیں ان کو کافی پسند کیا جاتا ہے ۔سوشل میڈیا پراکثر سٹارزکام کے حوالے سے اپنی سرگرمیاں شئیر کرتے ہوئے دکھائی دیتے ہیں یہاں تک کہ اب تو ٹک ٹاک جیسی ایپ پر بھی فنکار وڈیو ز بنا کر شئیر کررہے ہوتے ہیں لیکن حاجرہ امین ان سب باتوں سے زرا دور ہی نظر آتی ہیں ان کا کہنا ہے کہ ٹک ٹاک سے آج ہر کوئی پیسے کما رہا ہے جو کہ ابہت اچھی بات ہے پیسے کمائیں ضرور لیکن اس ایپ کا بچوں کی طرف رخ موڑ دینا اچھی بات نہیں ہے ۔ایک انٹرویو میں حاجرہ امین نے کہا کہ آ ج کل بچے بھی ٹک ٹاک پر وڈیوز شئیر کررہے ہوتے ہیں ان پر توجہ دینے کی ضرورت ہے ان کی رہنمائی کی ضرور ت ہے اور وہ رہنمائی والدین کو کرنی چاہیے ۔

ٹک ٹاک جیسے پلیٹ فارم پر عمر کی کوئی قید یا حد مقرر نہیں ہے اس لئے جس کا جو دل چاہتا ہے وہ کررہا ہے والدین خصوصی طور پر توجہ دیں۔
یاد رہے کہ ٹک ٹاک ایک ایسی ایپ ہے جس پر ہر دوسرا انسان موجود ہے اور اس سے کوئی تو پیسے کما رہا ہے اور کوئی اس کو شغل کے طور پر لیتا ہے بہت سارے والدین کو تشویش ہے کہ ان کے بچے اس ایپ کا غیر ضروری استعمال کررے ہیں ۔اس ایپ پر پابندی لگانے کی بھی باتیں کی جاتی رہیں لیکن تاحال ایسا کچھ بھی ممکن نہیں ہو سکا

وہا ج علی کریں گے انیمیٹڈ سیریز”محافظ “ کے لئے منتخب کر لئے گئے ہیں ۔اس انیمیٹڈ سیزیز میں آٹھ رول ماڈل ہیں جن میں سے ایک کی وائس اوور وہاج علی نے کی ہے، جو ایک ملٹی ٹیلنٹ اداکار ، ورسٹائل ایکٹنگ کی صلاحیتوں اور زبردست شخصیت کے مالک ہیں۔ اس سیریزمیں انہوں نے ایک غیرملکی ڈپلومیٹ کے بیٹے رضا کے کردارکو اپنی آواز میں ریکارڈ کروایا ہے۔وہاج علی کے ساتھ دوسرے کرداروں کےلئے وائس اوورز کرنے والے فنکاروں میں سجل علی، دنانیر، احسن خان اور نمرا رفیق شامل ہیں۔

اس پراجیکٹ کے حوالے سے وہاج علی کہتے ہیں کہ یہ پروجیکٹ میرے لئے انتہائی پراثر اور بامقصد ہے کیونکہ اس میں نوجوانوں کوایک ٹھوس بیانیہ دیا گیا ہے ۔ اس میں ایسے ہیروز کی زندگیوں کو دکھایا گیا ہے جو پاکستان کے نوجوانوں کےلئے پرکشش ہے۔ ہماری آوازوں میں اس سیریز کے کرداروں نے مختلف سماجی مسائل ، جیسے اسٹریٹ کرائمز، منشیات کا استعمال، چائلڈ لیبر اور کئی موضوعات کو اجاگر کیا ہے۔یاد رہے کہ یہ پراجیکٹ ٹیم محافظ جیو اور آئی ایس پی آر کی مشترکہ کاوش ہے ۔امید کی جا رہی ہے کہ یہ اینیمیٹڈ سیریز کافی پسند کی جائیگی ۔