پاکستان شوبز انڈسٹری کے نامور اداکار عثمان مختار شادی کے بندھن میں بندھ گئے۔

باغی ٹی وی : ڈراما سیریل ’’انا‘‘، ’’ثبات‘‘ اور فلم ’’جانان‘‘ میں اپنی جاندار اداکاری سے لوگوں کے دلوں میں گھر کرنے والے اداکار عثمان مختار شادی کے بندھن میں بندھ گئے۔

سوشل میڈیا ویب سائٹ انسٹاگرام پر عثمان مختار نے اپنے نکاح کی دلکش تصویریں شیئر کیں جن میں اداکار کے ہمراہ اُن کی اہلیہ بھی موجود ہیں۔

تصاویر میں عثمان مختار سفید کرتے پاجامے میں ملبوس نظر آئے جب کہ ان کی اہلیہ زنیرہ انعام خان ٹی پنک کلر کے لہنگے میں نہایت حسین لگ رہی تھیں جبکہ شادی میں کورونا ایس او پیز کا بھی خیال رکھا گیا تھا۔ دلہا اور دلہن سمیت نکاح خواں اور دیگر مہمان ماسک پہنے ہوئے نظر آئے۔

عثمان مختار نے اپنی پوسٹ کے کیپشن میں اہلیہ سے مخاطب ہوتے پوئے لکھا کہ زنیرا انعام خان! مجھے دُنیا کا سب سے خوش قسمت انسان بنانے کے لیے آپ کا شکریہ۔

اداکار نے لکھا کہ میں ایک طویل عرصے سے اس طرح کی خوشی محسوس نہیں کی، آپ میرے ہر اچھے برے لمحوں میں میرے ساتھ تھیں اور میرا سہارا بنیں۔

اُنہوں نے لکھا کہ آپ کو اپنی زندگی میں پاکر خود کو ایک خوش نصیب انسان سمجھتا ہوں۔

عثمان مختار نے دُنیا سے مخاطب ہوتے ہوئے لکھا کہ ’ڈئیر ورلڈ! میں نے ایک چھوٹی سے تقریب میں شادی کی جبکہ ہماری شادی کے لیے بڑی تقریب کا انعقاد کیا گیا تھا جو کہ 2 اپریل کو ہونی تھی۔

اداکار نے لکھا کہ چونکہ یکم اپریل سے لاک ڈاؤن لگ رہا ہے تو ہم نے ایک چھوٹی سے تقریب میں شادی کرنے کا فیصلہ کیا اور تمام کورونا ایس او پیز کا بھی خیال رکھا۔

اُنہوں نے دُعاؤں کی اپیل کرتے ہوئے لکھا کہ ہماری اس نئی زندگی کی شروعات کے لیے آپ سب کی دعاؤں کی بہت ضرورت ہے۔

دوسری جانب داکار عثمان مختار کی تصاویر سوشل میڈیا پر اپ لوڈ کرتے ہی تیزی سے وائرل ہوگئیں ساتھی فنکاروں اور مداحوں کی جانب سے مبارکباد اور نیک تمناؤں کا سلسلہ جاری ہے-

جبکہ دلچسپ بات یہ ہے کہ لوگ ان کی بیوی زنیرہ انعام خان کو معروف اداکارہ کبریٰ خان سے مشابہت کی وجہ سے کبریٰ خان کی بہن قرار دے رہے ہیں۔

واضح رہے کہ عثمان مختار کی اہلیہ زنیرہ انعام خان نے یونیورسٹی آف ویسٹرن سڈنی سے انٹرنیشنل قانون اور انٹرنیشنل ریلیشنز میں ڈبل ماسٹرز کیا ہوا ہے۔ اس کے علاوہ وہ انسٹی ٹیوٹ آف ریجنل اسٹڈیز میں ایسوسی ایٹ ریسرچ اینالسٹ ہیں۔

پاکستان شوبز انڈسٹری کے معروف اداکار یاسر حسین کا کہنا ہے کہ ہمارے پروڈکشنز ہاؤسز کا ماحول بالکل فیکٹری والا ہے۔

باغی ٹی وی : یاسر حسین نے حال ہی میں برطانوی نشریاتی ادارے بی بی سی اردو کو انٹرویو دیا جس میں انہوں نے خود سے منسوب تنازعات اور پاکستانی شوبز انڈسٹری کے بارے میں اظہار خیال کیا۔

یاسر حسین کا شمار پاکستان شوبز انڈسٹری کے ان اداکاروں میں ہوتا ہے جو اپنے کام سے زیادہ مختلف تنازعات کی وجہ سے مشہور ہیں۔ اقراعزیز کو شادی کے لیے پرپوز کرنے سے لے کر ترک ڈرامے ارطغرل غازی کے بارے میں بیان دینے تک یاسر حسین سوشل میڈیا پراکثر تنقید کا نشانہ بن جاتے ہیں۔

یاسر حسین نے خود پر ہونے والی تنقید کے بارے میں بات کرتے ہوئے کہا ایسا نہیں ہے کہ ساری دنیا مجھ سے نفرت کرتی ہے کچھ لوگ مجھے پسند بھی کرتے ہوں گے۔ یا اگر میں کسی کو پسند نہیں تو آپ کے پاس ایک بٹن ہے ان فالو کرنے کا مجھے سوشل میڈیا پر ان فالو کردیں میرے بارے میں جاننے کے لیے فکر مند نہ ہوں کہ میں کیا کرتا ہوں کیا کہتا ہوں۔

یاسر حسین نے کہا کہ میں کیوں اپنی رائے کا اظہار نہیں کر سکتا، صرف اس لیے کیونکہ میں ایک اداکار ہوں؟ مجھے صرف ایک بناوٹی خول میں رہنا چاہیے سب کو ایسا لگنا چاہیے کہ اداکار تو ویسے ہی ہوتے ہیں جیسے ٹی وی پر دکھتے ہیں؟‘

انہوں نے کہا کہ اب راجیش کھنا اور محمد علی کا دور چلا گیا ہے جہاں امیتابھ بچن آج تک اسی ہیئرسٹائل کی وگ لگا رہے ہیں کیوںکہ شاید انھیں لگتا ہے کہ اگر ہیئر سٹائل تبدیل ہوا تو میں امیتابھ بچن نہیں لگوں گا۔‘

یا سر حسین نے پاکستانی ڈراموں اور اداکاروں کے بارے میں بات کرتے ہوئے کہا ہمارے یہاں اداکاروں کو بھی کام کرنے میں مزہ نہیں آتا انہیں بس عادت ہے ڈرامے کرنے کی۔

یاسر نے کہا کہ ہمارے یہاں کی پروڈکشنز بہت بری ہوتی ہیں، بغیر اے سی کے کام ہوتا ہے پسینہ صاف کرتے کرتے اداکار پاگل ہوجاتے ہیں صبح سے لے کر رات تک صرف کام کرتے ہیں ہمارے پروڈکشنز ہاؤسز کا ماحول بالکل فیکٹری والا ہے۔

میزبان نے سوال پوچھا کہ جو باتیں آپ سوشل میڈیا پر کررہے ہوتے ہیں وہی باتیں دوسرے اداکار بھی کررہے ہوتے ہیں لیکن وہ سوشل میڈیا پر نہیں کرتے اس لیے ان کی باتیں لوگوں کے سامنے نہیں آتیں؟ اس سوال کے جواب میں یاسر حسین نے کہا ہماری انڈسٹری بہت منافق ہے اس میں کوئی جھوٹ نہیں ہے اور یہ آج سے نہیں بلکہ شروع سے ہے۔

یاسر حسین نے کہا جب بھی میں کسی تنازع کا شکار ہوتا ہوں تو بہت سارے فنکار مجھے فون کرکے کہتے ہیں تم نے بالکل صحیح بات کی لیکن وہ تمام فنکار سوشل میڈیا پر مجھے نہیں سراہتے کیونکہ انہیں پتہ ہے کہ انہیں لوگوں سے گالیاں پڑیں گی اور وہ لوگوں کی جانب سے پڑنے والی گالیوں سے ڈرتے ہیں لیکن میں نہیں ڈرتا ان گالیوں سے۔

یاسر نے کہا کہ یہ سب آسان اس طرح ہے کہ آپ ایک پراجیکٹ کرتے ہیں اور سپرسٹار بن جاتے ہیں لیکن مشکل اس لیے کیونکہ میری طرح عوام بھی ایک رائے رکھتی ہے جو آپ کو برداشت کرنی پڑتی ہے تاہم یہ سب انھیں اپنی رائے کا اظہار کرنے سے روکتا نہیں۔ وہ کہتے ہیں کہ ’ہم انسان ہیں، زندہ ہیں بولیں گے، بات کریں گے جو بات میں کر رہا ہوں وہ بھی تو معاشرے میں ہو رہی ہے، میں سچ بول رہا ہوں جھوٹ تو نہیں بول رہا۔‘

یاسر حسین نے کہا آج ہر چینل تنازع پر زندہ ہے۔ انہوں نے واسع چوہدری کے شو کے ’’گھبرانا نہیں ہے‘‘ کے بارے میں کہا مجھ سے پہلے اس شو میں ہمایوں سعید اور ماہرہ خان آئے تھے لیکن اس وقت تک اس شو کا نام کوئی نہیں جانتا تھا اور پھر شو کی تیسری قسط میں میں گیا اور آج اس شو کا نام سب کو پتہ ہے۔

یاسر حسین نے کہا وہ حقیقی دنیا میں رہنا پسند کرتے ہیں وہ اپنی جھوٹی امیج دنیا کے سامنے نہیں لاتے۔ یاسر حسین نے ترک ڈرامے ’’ارطغرل‘‘ کی مثال دیتے ہوئے کہا میں نے پہلے بھی کہا تھا کہ ہمیں دوسروں کے چلے ہوئے ڈرامے اپنے یہاں سستے میں چلانے کے بجائے ان کے ساتھ مل کر کو پروڈکشنز کرنی چاہئیں اس میں ہمیں فائدہ ہوگا۔ آج ہمایوں سعید اور عدنان صدیقی ترک پروڈکشنز کے ساتھ مل کر کام کررہے ہیں اور یہ اچھی بات ہے۔

ایک ایوارڈ شو کے دوران اقرا عزیز کو سب سے سامنے شادی کی پیشکش اور پھر اس سے اٹھنے والے تنازع کے بارے میں یاسر حسین نے کہا میں نے ایک چیز کی، اقرا کو بہت اچھی لگی کتنے لوگ سب کے سامنے شادی کی پیشکش کرتے ہیں اور وہ بھی ایسی جسے پوری دنیا دیکھ رہی ہو۔ ہماری انڈسٹری میں کتنے ہی ایسے لوگ ہیں جو اپنے معاشقے چھپا چھپا کر مرے جارہے ہیں میں نے نہیں چھپایا۔ سب کے سامنے محبت کا اظہار کیا اور مردانہ کام کیا۔ یاسر حسین نے کہا ہر کسی کو اپنی بیوی کی عزت کرنی چاہئے اور پیار کرنا چاہئے سامنے بھی اور پیچھے بھی۔

یاسر کا کہنا ہے کہ جب کوئی ایسا کردار ملتا ہے جو الگ ہو تو کرنا پڑتا ہے جیسے باندی میں میرا کردار ہےان اداکاروں کو بھی مزا نہیں آتا جو ڈرامے کرتے ہیں، انھیں عادت ہے بس ڈرامہ کرنے کی۔ اور شاید انھیں نہیں پتا کہ کسی اور ٹیلنٹ کے ذریعے پیسے کما سکتے ہیں۔

دوسری بات جو یاسر حسین کو کھٹکتی ہے وہ یہ کہ مردوں کے لیے ڈراموں میں کوئی کردار نہیں یا تو وہ اچھا ہے یا برا، گرے کا کوئی مارجن نہیں ہے۔ کوئی بندہ ایسا ہے ہی نہیں جو کسی زمانے میں برا تھا اور پھر اچھا ہو گیا ہو۔‘

یاسر حسین اپنی آنے والی فلموں میں ’پیچھے تو دیکھو‘، ’چوہدری‘ اور ٹیلی فلم ’گرو چیلا‘ کے بارے میں خاصے پر جوش ہیں کیونکہ ان تمام ہی فلموں میں ان کے کردار مختلف ہیں۔

پاکستان میوزک انڈسٹری کے عالمی شہرت یافتہ گائیک استاد راحت فتح علی خان نے عظیم صوفی بزرگ حضرت لعل شہباز قلندر کے سالانہ عرس کے موقع پر سندھی زبان میں دھمال ریلیز کردی۔

باغی ٹی وی: راحت فتح علی خان کی جانب سے ’آیو سہون نگری میں منجھو لعل قلندر‘ دھمال نے ریلیز ہوتے ہی سوشل میڈیا پر دھوم مچادی ہے راحت فتح علی خان کی اس دھمال کو شائقین کی جانب سے خوب پذیرائی مل رہی ہے-

راحت فتح علی خان نے دھمال کی ویڈیو میں سندھ کی روایتی ٹوپی اور اجرک پہنی گلوکار کے اس انداز کو خو پسند کیا جا رہا ہے –

اس دھمال کی موسیقی خود استاد راحت فتح علی خان نے ترتیب دی ہے جبکہ صوفیانہ کلام سلامت علی کی جانب سے لکھا گیا ہے۔

واضح رہے کہ عظیم صوفی بزرگ حضرت لعل شہباز قلندر کے سالانہ عرس کی تین روزہ تقریبات 18، 19 اور 20 شعبان کو سیہون شریف میں منعقد کی جاتی ہیں۔

پاکستان شوبز انڈسٹر ی کی معروف سابق اداکار جوڑی اداکار شہروز سبزواری اور اداکارہ سائرہ یوسف کی فلم کی شوٹنگ کا آغاز ہو گیا ہے۔

باغی ٹی وی : اداکارہ سائرہ یوسف کی جانب سےاپنے انسٹا گرام اکاؤنٹ پر اپنی ایک خوبصورت تصویر شیئر کی گئی ہے سائرہ شہروز کی جانب سے شیئر کی گئی نئی تصویر میں انہوں نے سیاہ رنگ کا ایک مغربی لباس زیب تن کر رکھا ہے جس میں وہ نہایت حسین نظر آ رہی ہیں۔

سائرہ شہروز کی اس تصوہر جہاں ماہرہ خان ، انوشے اشرف اور نور ظفر خان نے ردعمل دیتے ہوئے تعریف کی وہیں مداحوں کی جانب سے بھی خوب تعریفوں کے پُل باندھے جا ر ہے ہیں –

ایک مداح نے کمنٹس سیکشن میں سائرہ کی خوبصورتی کی تعریف کرتے ہوئے شہروز سبز واری کو بدقسمت قرار دیا جبکہ ایک مداح نے سائرہ کو شادی کی پیشکش کر دی جبکہ اییک صارف بے انہیں کوئین قراد دیا-

کچھ مداح اُن کے حسن اور اداکارانہ صلاحیتوں کی تعریفیں کر رہے ہیں اور مداح نے سائرہ یوسف سے مطالبہ کیا کہ ’ وہ اب اپنے سوشل میڈیا اکاؤنٹ کا یوزر نیم تبدیل کرلیں اور اس سال شادی کر لیں۔

دوسری جانب پاکستان سوشل میڈیا پیجز پر سائرہ یوسف کی اس تصویر سے متعلق کہا جا رہا ہے کہ وہ آ ج کل سابق شوہر، معروف اداکار شہروز سبزواری کے ساتھ اپنی آنے والی فلم کی شوٹنگ میں مصروف ہیں۔

یہ جوڑا اب حقیقی زندگی میں تو ایک ساتھ نہیں ہے مگر دونوں کے مداحوں کی جانب سے انہیں ایک ساتھ اسکرین پر دیکھنے سے متعلق جہاں کافی بے تابی کا اظہار کیا جا رہا ہے وہیں کچھ صارفین کی جانب سے طلاق کے بعد ایک ساتھ کام کرنے پر تنقید کا نشانہ بنایا جا رہا ہے-

واضح رہے کہ سائرہ اور شہروز میں علیحدگی کو ایک سال سے زائد کا عرصہ بیت گیا ہے مگر اب تک سائرہ کی جانب سے اپنے سوشل میڈیا اکاؤنٹ پر اپنے یوزر نیم سے شہروز سبزواری کا نام نہیں ہٹایا گیا ہے۔