پاکستان کی سینئر اداکارہ نائلہ جعفری گزشتہ کئی برس سے کینسر جیسے موذی مرض سے جنگ لڑ رہی ہیں انہوں نے حکومت اورڈراما پروڈیوسرز سے درخواست کی ہے کہ بیمار اور سینئراداکاروں کی مالی معاونت کی جائے۔

باغی ٹی وی : نائلہ جعفری کی ایک ویڈیو گزشتہ روزسے سوشل میڈیا پر وائرل ہورہی ہے جس میں وہ اسپتال کے بستر پر موجود حکومت اور مختلف ڈراما پروڈیوسرز سے درخواست کرتی نظر آئیں کہ بیمار اور سینئر فنکاروں کی مالی معاونت کی جائے۔

نائلہ جعفری نے کہا کہ وہ پچھلے 6 برسوں سے کینسر جیسے موذی مرض سے لڑرہی ہیں۔ پہلی کیموتھراپی کے بعد انہیں انفیکشن ہوگیا تھا اور انہیں اسپتال میں داخل کیا گیا جس کی وجہ سے ان کی کیموتھراپی کا دوسرا سیشن نہیں ہوسکا۔

نائلہ جعفری نے کہا ایک بات جو میں اس دوران سوچتی رہی ہوں کتنا بہتر ہو کہ ہماری گورنمنٹ اور فن و اسپورٹس کے شعبے سے تعلق رکھنے والے پالیسی میکرز ان شعبوں سے تعلق رکھنے والے افراد کے بارے میں سوچیں۔

اداکارہ نے کہا میں نے جب پی ٹی وی جوائن کیا تھا تو اس وقت جب ہمارے ڈرامے دوبارہ ٹی وی پر نشر کیے جاتے تھے تو ہمیں ان ڈراموں کی رائلٹی ملتی تھی گو کہ وہ پیسے بہت کم ہوتے تھے لیکن ہمیں اچھا لگتاتھا اور وہ پیسے برے نہیں لگتے تھے۔

انہوں نے کہا کہ میں گزشتہ 6 برسوں سے بیمار ہوکر پڑی ہوئی ہوں سب نے بڑا سپورٹ کیا ہے بہت مدد کی ہے، پیار دیا ہے، میں اکیلی تھی سب نے مل کر مجھے سنبھالا ہے لیکن میں سوچتی ہوں کہ کاش ایسا کوئی سلسلہ ہوتا کہ ہمارے وہ ڈرامے جو ٹی وی پر ایک بار دکھائے جاچکے ہیں اور جب انہیں دوبارہ دکھایا جاتاہے اس کے معاوضے کے طور پر ہمیں دوبارہ کچھ پیسے ملیں۔

نائلہ جعفری نے بتایا کہ ان کا ایک ڈراما جو گزشتہ 6 برسوں میں 4 سے 5 بارٹی وی دکھایا جاچکا ہے اور بھی ایسے ڈرامے ہیں جو دوبارہ دکھائے جارہے ہیں اگر ان ڈراموں سے ہونے والی آمدنی میں سے کچھ معاوضہ ہم جیسے لوگوں کو ملتا رہتا تو ہمیں بڑی سہولت اور آسانی ہوجاتی۔ ہوسکتا ہے کچھ لوگوں کو نہ ہوتی ہو لیکن جب آپ بہت عرصے سے کام نہیں کررہے ہوتے تو یہ پیسے بہت ضروری ہوجاتے ہیں۔

نائلہ جعفری نے حکومت سے اپیل کرتے ہوئے کہا میں درخواست اور مطالبہ کروں گی کہ اس سلسلے میں کچھ کیا جائے تاکہ آنے والے وقت میں مجھ جیسے سینئر اور بیمار اداکاروں کی مدد ہوسکے کیونکہ ہمارے لیے چیزیں مینیج کرنا بہت مشکل ہوتا ہے۔

واضح رہے کہ 1990 کی مقبول ٹی وی اداکارہ، ماڈل و فیشن ڈیزائنر نائلہ جعفری 2016 سے بیمار ہیں ابتدائی طور پر ان میں اوورین کینسر کی تشخیص ہوئی تھی، بعد ازاں ان میں معدے کے کینسر کی بھی تشخیص ہوئی تھی۔

اداکارہ نائلہ جعفری نے 2017 میں اس وقت کی مرکزی پاکستان مسلم لیگ (ن) کی حکومت کی مالی مدد لینے سے انکار کردیا تھا۔ تاہم بعد میں انہوں نے اس وقت کے صدر مملکت ممنون حسین کی معاونت قبول کی تھی، ساتھ ہی انہوں نے حکومت سندھ کی مالی مدد بھی قبول کی تھی۔

آسٹریلوی بلاگر عظیم خان نے اداکارہ صبا قمر کے ساتھ شادی ٹوٹنے کا ذمہ دار خود کو قرار دے دیا –

باغی ٹی وی : تفصیلات کے مطابق بلاگر عظیم خان نے سوشل میڈیا پر جاری پیغام میں کہا ہے کہ صبا قمر بہت ہی شاندار شخصیت کی مالک ہیں، صبا دنیا کی تمام خوشیوں کی حق دار ہیں، اللہ آپ کو ہمیشہ کامیابی اور محبت عطا فرمائے-

عظیم نے کہا کہ دشوار گزار راستے اکثر اوقات خوبصورت منزل کی جانب جاتے ہیں میں اس تعلق کے ختم ہونے کی تمام ذمہ داری خود پر لیتا ہوں۔

یاد رہے کہ گزشتہ روز انسٹا گرام پر جاری پیغام میں صبا قمر نے اعتراف کیا تھا کہ ان کی عظیم خان سے کبھی ملاقات نہیں ہوئی بلکہ بات چیت فون کے ذریعے ہی ہوتی تھی۔ صبا قمر نے پیغام جاری کرتے ہوئے شادی سے انکار کرنے کا اعلان کیا اور کہا کہ یہ میں ذاتی وجوہات کی بنیاد پر کررہی ہوں اور امید ہے کہ آپ اسے سمجھیں گے اور فیصلے میں میرا ساتھ دیں گے-

یاد رہے کہ صبا قمر کی جانب سے شادی کی تصدیق کرنے کے بعد عظیم خان کے خلاف سوشل میڈیا پر زیادتی اور قتل کی دھمکیوں کے سنگین الزامات لگائے گئے تھے جس پر بلاگر نے اپنا موقف جاری کرتے ہوئے ان افواہوں کو بے بنیاد قرار دیا اور صبا قمر بھی ان کے حق میں میدان میں آئیں تھی اور انہوں نے کہا تھاانہیں عظیم پر اعتماد ہے تاہم بعد میں اچانک سے یہ رشتہ اختتام کو پہنچ گیا۔

صبا قمر کا شادی کا فیصلہ واپس لینے پر ساتھی فنکاروں کا رد عمل

صبا قمر نے عظیم خان سے شادی کا فیصلہ منسوخ کر دیا

پاکستان کی دوسری ٹاپ ٹک ٹاک اسٹار کنول آفتاب اور ذوالقرنین سکندر کی شادی کی تقریبات کا آغاز ہوگیا ہے۔

باغی ٹی وی :کنول آفتاب نے اپنی مایوں اور مہندی کی تقریب کی تصاویر اپنے آفیشل انسٹاگرام اکاؤنٹ کی اسٹوری میں شیئر کیں۔

انسٹاگرام اسٹوری میں شیئر کی گئی تصویروں میں دیکھا جاسکتا ہے کہ کنول آفتاب پیلے رنگ کے روایتی مایوں کے لباس میں ملبوس ہیں جبکہ اُن کے دونوں ہاتھوں میں ٹک ٹاک اسٹار ذوالقرنین سکندر کے نام کی مہندی لگی ہوئی ہے۔

اس کے علاوہ کنول آفتاب نے اپنی مہندی کی تقریب کی تصویریں اور ویڈیوز بھی انسٹا اسٹوری میں شیئر کیں جن میں اُنہوں نے مہند ی کی مناسبت سے خوبصورت لباس زیب تن کیا ہوا ہے۔

دوسری جانب ذوالقرنین سکندر نے بھی اپنی انسٹا گرام اسٹوری میں اپنی مایوں کی تقریب کی تصویریں شیئر کیں۔

تصویروں میں دیکھا جاسکتا ہے کہ ذوالقرنین سکندر نے سفید لباس زیب تن کیا ہوا ہے اور اُن کے چہرے پر اُبٹن بھی لگا ہوا ہے۔

واضح رہے کہ کنول آفتاب اور ذوالقرنین سکندر قریبی دوست ہونے کے ساتھ ہی مختصر ویڈیو شیئرنگ ایپ ٹک ٹاک کے مقبول ترین ٹک ٹاکرز بھی ہیں۔

لاہور سے تعلق رکھنے والی ٹک ٹاک ماڈل کنول آفتاب کے مختصر ویڈیو شیئرنگ ایپ ٹک ٹاک پر 12 اعشاریہ 1 ملین فالوورز ہیں کنول آفتاب ناصرف ایک ٹک ٹاک اسٹار ہیں بلکہ وہ گزشتہ کچھ سالوں سے ایک نجی ویب چینل پر میزبانی کے فرائض بھی سرانجام دے رہی ہیں۔

جبکہ ذوالقرنین سکندر کے ٹک ٹاک فالوورز کی تعداد 11 اعشایہ 6 ملین ہے ذوالقرنین سکندر نے 2018 میں اپنے دوستوں کے ہمراہ ٹک ٹاک پر ویڈیوز بنانے کے ذریعے اپنے کیریئر کا آغاز کیا اور پھر تھوڑے ہی عرصے اپنی جاندار اداکاری کی بدولت مقبول ہو گئے۔