اپنے لباس اور بے باک انداز کے باعث کافی مشہور پاکستان کی متنازع میزبان و وی جے متھیرا نے وزیراعظم پاکستان عمران خان کو ان کے مشہور ڈائیلاگ گھبرانا نہیں ہے پر مشورہ دیا ہے۔

باغی ٹی وی : حال ہی میں متھیرا آن لائن شو ٹو بی آنیسٹ 2.0 میں شریک ہوئیں جہاں انہوں نے اپنے بارے اور پاکستان کی سیاست کے باتے میں بات کی -پروگرام کے میزبان نے ان سے پوچھا سکون کس چیز میں ہے؟ تو متھیرا نے جواب دیا سکون صرف رب کو یاد کرنے میں ہے۔ میری زندگی کا ایک مقصد ہے رب راضی تو سب راضی۔ رب کو راضی کرنے سے دنیا آپ کے قدموں میں ہوتی ہے۔

میزبان نے پوچھا رب کو کیسے راضی کیا جائے جس کے جواب میں متھیرا نے کہا ہم بہت سی چیزوں پر غور کرتے ہیں لیکن انسانیت پر کوئی فوکس نہیں کرتا، اللہ سب کے دل میں بستا ہے اس لیے کسی کا دل نہیں دکھانا چاہئے۔

میزبان نے متھیرا کو موجودہ حکومت اور وزیراعظم عمران خان کو ایک مشورہ دینےکے لیے کہا تو متھیرا نے خان صاحب کو مشورہ دیتے ہوئے کہا ’’خان صاحب گھبرانا ہے‘‘ ہم تو گھبرا رہے ہیں آپ بھی گھبرالیں۔

متھیرا نے پاکستانی سیاست پر بات کرتے ہوئے کہا کہ مجھے ایسا لگتا ہے پاکستان میں مشرف کا دور اور ان کے بعد آصف زرداری کا دور بہت بہتر تھا۔اپنے پسندیدہ سیاستدان کے بارے میں بتاتے ہوئے متھیرا نے کہا کہ مجھے بلاول بھٹو پسند ہیں وہ ایک اچھے لیڈر بن سکتے ہیں اس کا ٹائم آئے گا۔

متھیرا نے اپنی متنازع شخصیت کے بارے میں بات کرتے ہوئے کہا کہ میں نے اپنے کیریئر کی شروعات بہت چھوٹے چینل سے کی تھی اور میری پہچان بنی ہی اس وقت جب شو پر ایک شخص نے میری بے عزتی کی لہذا بے عزتی( بدنامی) نے ہی میرا نام بنایا ہے۔

پاکستان شوبز انڈسٹری کی خوبرو اداکارہ و ماڈل عائزہ خان کی جانب سے سوشل میڈیا پر شیئر کیا گیا نیا فوٹو شوٹ خوب وائرل ہو رہا ہے-

باغی ٹی وی : پاکستان کی صف اول کی اداکاراؤں میں شمار کی جانے والی اداکارہ و ماڈل عائزہ خان بے شمار ڈراموں میں اپنی اداکاری کے جوہر دکھا چکی ہیں اور متعدد کامیاب برانڈز کے لئے فوٹو شوٹ کروا چکی ہیں جبکہ ان کی فین فالوونگ میں بھی دن بہ دن اضافہ ہوتا جا رہا ہے۔

سماجی رابطے کی ویب سائٹ انسٹا گرام اکاؤنٹ پر 8.2 ملین فالوورز رکھنے والی اداکارہ نے اپنے ایک نئے فوٹو شوٹ کی چند تصاویر اپنے مداحوں کے ساتھ بھی سوشل میڈیا پر شیئر کی ہیں جسے صارفین کی جانب سے خوب پسند کیا جا رہا ہے۔

عائزہ خان کی جانب سےشئیر کی گئیں تصاویرپر اُن کے مداحوں سمیت پاکستان شوبز انڈسٹری کی معروف شخصیات کی جانب سے بھی خوب تعریفی کمنٹس کیے جا رہے ہیں۔

پاکستان ڈرامہ انڈسٹری کی نامور اداکارہ صبا بخاری نے پاکستان شوبز انڈسٹری میں دشواریوں اور کام دینے کے بہانے خواتین اور لڑکیوں کے ساتھ نازیبا گفتگو کرنے کا اپنا تجربہ بیان کیا ہے۔

باغی ٹی وی : دل نا امید تو نہیں کی سعدیہ اداکارہ صبا بخاری نے سوشل میڈیا ایپ انسٹاگرام پر شوبز میں کام ملنے سے قبل پیش آنے والی دشواریوں اور کام دینے کے بہانے خواتین اور لڑکیوں کے ساتھ نازیبا گفتگو کرنے کا اپنا تجربہ بیان کیا ہے۔

صبا بخاری نے گزشتہ روز ایک طویل پوسٹ انسٹاگرام پر شیئر کی اور لکھا کہ جب وہ شوبز میں کام مانگنے جاتی تھیں تو ان سے یہ کہہ کر ان کی حوصلہ شکنی کی جاتی تھی کہ’تم میں اتنا کانفیڈنس تو ہے نہیں کہ تم اس میڈیا میں آگے جا سکو۔‘

کسی نے کہا کہ’مسئلہ یہ ہے کہ تم ایک اچھی لڑکی ہو اور اس فیلڈ میں اچھی لڑکیاں نہیں چلتیں۔‘

کسی نے کہا کہ’ایسا کیسے ہوسکتا ہے کسی نے تمہارے ساتھ کچھ غلط کرنے کی کوشش نہ کی ہو۔‘

کسی نے کہا کہ ’ہم تمہیں کام کیوں دیں اور پیسے بھی دیں جب کہ یہاں لڑکیاں کام کے لیے ساتھ سونے کو تیار ہیں۔‘

انہوں نے کہا یہ وہ تمام جملے ہیں جو مجھے اس وقت سننے کو ملے جب وہ مختلف لوگوں کے پاس کام مانگنے جاتی تھیں۔

صبا بخاری نے کسی کا نام تو نہیں لیا تاہم صرف اتنا لکھا کہ مختلف ڈائریکٹرز اور لوگوں کی جانب سے کہے گئے ان جملوں نے نہ صرف انہیں اندر سے توڑ کر رکھ دیا بلکہ ان کے خواب بھی چکنا چور کردئیے۔

پاکستان میوزک انڈسٹری کے عالمی شہرت یافتہ گلوکار راحت فتح علی خان کو آرٹس کونسل کی جانب سے موسیقی میں ان کی گراں قدر خدمات کےاعتراف میں لائف ٹائم اچیو منٹ کے ایوارڈ سے نواز دیا گیا۔

باغی ٹی وی : تفصیلات کے مطابق گلوکار راحت فتح علی خان کو لائف ٹائم اچیو منٹ ایوارڈ دینے کی تقریب گزشتہ روز آرٹس کونسل کراچی میں منعقد ہوئی۔

اس موقع پر آرٹس کونسل کے سربراہ محمد احمد شاہ نے کہا کہ ہمیں راحت فتح علی خان کو ان کی خدمات کے اعتراف میں لائف ٹائم اچیومنٹ ایوارڈ اورآرٹس کونسل کراچی کی لائف ٹائم ممبر شب دینے پر فخر محسوس ہورہا ہے۔

راحت فتح علی خان نے لائف ٹائم اچیو منٹ ایوارڈ حاصل کرنے پر خوشی کا اظہار کرتے ہوئے کہا کہ آرٹس کونسل کی جانب سے یہ ایوارڈ وصول کرنے پر مجھے فخر محسوس ہورہا ہے میرے پاس اپنی خوشی بیان کرنے کے لیے الفاظ نہیں ہیں۔

پاکستان شوبز انڈسٹری کے معروف اداکار عدنان شاہ ٹیپو نے حال ہی میں انکشاف کیا ہے کہ وہ میزبان و اداکار ندا یاسر کے بھاری ہاتھ سے 21 تھپڑ کھا چکے ہیں-

باغی ٹی وی : اداکارعدنان شاہ ٹیپو نے ایک ویب شو میں اپنے 23 سالہ فنی کیرئیر کے دوران پیش آنے والے دلچسپ واقعات سے متعلق گفتگو کی۔

عدنان ٹیپو نے بتایا کہ ایک سین تھا جس میں مجھے ندایاسر کے بھاری ہاتھ سے تھپڑ کھانا تھا اور اسی وجہ سے اس سیٹ پر ندا یاسر نے مجھے 21 تھپڑ مارے۔

انہوں نے کہا کہ ندا یاسر کے بھاری ہاتھ سے تھپڑ کھا کھا کر ایک وقت میں چکراگیا تھا۔

عدنان کے جواب پر میزبان نے ہنستے ہوئے کہا کہ اگر ندا یاسر ایسا یاسر نواز کے ساتھ کریں تو ان کا کیا ہوگا اس پر عدنان ٹیپو کا کہنا تھا کہ کہ ندایاسر ان کے ساتھ تو محبت سے پیش آتی ہوں گی۔

خیال رہے کہ اداکار عدنان شاہ ٹیپو پاکستان انٹرٹینمنٹ انڈسٹری کے علاوہ بالی وڈ میں بھی اداکاری کے جوہر دکھاچکے ہیں۔

پاکستان شوبز انڈسٹری کے نامور اداکار وماڈل شہروز سبزواری اور ان کی سابقہ اہلیہ ماڈل و اداکارہ سائرہ یوسف جلد ہی ایک فلم میں ساتھ کام کرتے نظر آئیں گے۔

باغی ٹی وی : میڈیا رپورٹس کے مطابق فلم فائنل پوسٹ پروڈکشن کے آخری مراحل میں ہے اور سنیما کے کھلنے کے بعد جلد ہی ریلیز کردی جائے گی۔

سائرہ کے ساتھ آنے والی فلم کے حوالے سے شہروز سبزواری نے میڈیا سے گفتگو کرتے ہوئے کہا کہ میں نے زندگی میں کبھی کوئی غلط انتخاب نہیں کیا، کوئی بھی کام کرنے سے پہلے بسم اللہ کہتا ہوں اور اپنے طور پر بہتر کرنے کی کوشش کرتا ہوں۔

انہوں نے کہا کہ وہ ان دنوں تین فلموں پر کام کررہے ہیں جن میں سے ایک فلم ان کی سابقہ اہلیہ سائرہ یوسف کے ہمراہ ہے اور فلم کا آخری گانا رواں ماہ کی آخری تاریخوں 26 ،27 اور 28مارچ کو فلمایا جائے گا۔

شہروز سبزواری نے بتایا کہ اگر عالمی وبا نہ آتی تو فلم کچھ عرصہ قبل ہی ریلیز کردی جاتی تاہم اب فلم کو جلد ہی ریلیز کیا جائے گا۔

میڈیا رپورٹس کے مطابق فلم کی کہانی مشروط محبت کی کہانی پر مبنی ہے جس میں بھارتی اداکار انکور راٹھی نے بھی اہم کردار ادا کیا ہے جب کہ فلم سائرہ اور شہروز کی مشترکہ طور پر دوسری فلم ہوگی۔