بالی وڈ اداکارہ دپیکا پڈوکون کا کہنا ہے کہ کریئر کے آغاز میں اداکاری سے متعلق بہت سے لوگوں نے تنقید کا نشانہ بنایا تھا۔
باغی ٹی وی :بھارتی اخبار انڈیا ٹوڈے کی رپورٹ کے مطابق دپیکا پڈوکون کا کہنا تھا کہ با لی وڈ کنگ خان، شاہ رخ کے ساتھ ڈیبیو کا خواب پورا ہونے کے باوجود انہیں فلم انڈسٹری میں انٹری کے بعد ٹرولنگ اور تنقید کا سامنا رہا۔
دپیکا پڈوکون نے کہا کہ ‘اوم شانتی اوم’ میں ڈیبیو کے وقت میری عمر 19 سال تھی میری فلم، بڑے ناموں کے ساتھ ایک بڑا پروجیکٹ تھی۔
اداکارہ نے کہا کہ 2007 میں جب بالآخر میری فلم ریلیز ہوئی تو بہت سے لوگوں نے مجھے سراہا اور محبت دی لیکن لوگوں کا ایک ایسا حلقہ بھی موجود تھا جنہوں نے میرے کام پر سخت تنقید کی کہا تھا کہ یہ تو ماڈل ہے اداکاری نہیں کرسکتی۔
دپیکا پڈوکون نے کہا کہ میرے لب و لہجے کا مذاق اڑایا گیا اس حوالے سے بہت کچھ کہا اور لکھا گیا اور سچ یہ ہے کہ وہ سب کچھ انتہائی تکلیف دہ تھا۔
اداکارہ کا کہنا تھا کہ شروع میں کسی بھی نئے اداکارکی طرح انڈسٹری سے متعلق انہیں اتنا علم نہیں تھا بالی وڈ کنگ شاہ رخ خان اور پروڈیوسرفرح خان نے ہر معاملے میں ان کا بہت ساتھ دیا۔
اداکارہ کا کہنا تھا کہ جب آپ 21 برس کے ہوں اس قسم کی تنقید آپ کو خاص طور پر متاثر کرتی ہے-
اداکارہ نے کہا ان ساری باتوں سے میں بہت اثرانداز ہوئی تھی، مجھے ناکامیوں اورتجربات نے بہت کچھ سکھایا ہے جو میں کبھی نہیں بھولوں گی۔
دپیکا پڈوکون نے کہا کہ میرے والدین نے ہماری مثالی رہنمائی کی انہوں نے ہمارے لیے عزت، وقار، ایمانداری اور صداقت کے ساتھ زندگی گزارنے کے اصول مرتب کیے-
اداکارہ کا مزید کہنا تھا والدین نے ہمیں اپنے وسائل کے مطابق رہنا سکھایا ہمیں نہ صرف اپنی پیشہ ورانہ کامیابیوں پر توجہ دینے بلکہ اچھے انسانوں کے طور پر یاد رکھے جانے کی ترغیب دی انہی اصولوں کی وجہ سے مجھے ذاتی اور پیشہ ورانہ راستوں کے طوفان کا سامنا کرنے میں مدد ملی۔
خیال رہے کہ دپیکا پڈوکون نے اپنے کیریئر کا آغاز 2007 کی فلم ’اوم شانتی اوم‘ کے ساتھ کیا اس فلم میں ان کے ہمراہ شاہ رخ خان نے مرکزی کردار ادا کیا تھا۔
