بھارتی اداکارہ سونم کپور نے فلم انڈسٹری پر گزشتہ چند ماہ سے ہونے والی تنقید سے متعلق کہا ہے کہ وہ خوفزدہ ہوتی ہیں جب وہ دیکھتی ہیں کہ عورتوں کو اتنی آسانی سے نشانہ بنایا جاتا ہے جبکہ فلم انڈسٹری میں موجود مردوں کے حوالے سے کبھی اس طریقے سے بات نہیں کی جاتی۔
باغی ٹی وی : ہندوستان ٹائمز کی رپورٹ کے مطابق کاسموپولیٹن انڈیا کو دیے گئے انٹرویو میں سونم کپور نے کہا کہ مجھے اس تنقید کا سامنا نہیں ہوا لیکن انہیں اپنے ساتھ کام کرنے والی خواتین کے ساتھ ایسا ہوتا دیکھ کر صدمہ ہوا۔
سونم کپور سے گزشتہ چند ماہ سے شروع کی جانے والی تنقید ایک طرح سے 14 جون کو اداکار سوشانت سنگھ راجپوت کی موت کے بعد پیدا ہونے والے حالات ہیں پر سوال کئے گئےجس کی تحقیقات کے دوران اداکارہ ریا چکر بورتی کو گرفتار کیا گیا تھا جبکہ دپیکا پڈوکون، شردھا کپور اور سارہ خان کو پوچھ گچھ کے لیے طلب کیا گیا تھا۔
سونم کپور کا کہنا تھا کہ وہ خوفزدہ ہوتی ہیں جب وہ دیکھتی ہیں کہ عورتوں کو اتنی آسانی سے نشانہ بنایا جاتا ہے کسی نے کبھی کسی مرد کے بارے میں اس طرح بات نہیں کی جیسے خواتین کے بارے میں کرتے ہیں یہ ایسا ہے کہ ہم جیسے دہائیوں پیچھے چلے گئے ہیں۔
سونم کپور نے کہا کہ اگر آپ فیشن اور فلم انڈسٹری سے وابستہ خاتون ہیں آپ کو آرٹسٹ یا تخلیقی شخص نہیں مانا جاتا اس کے بجائے ان کے کردار پر سوال اٹھائے جاتے ہیں۔
اداکارہ کا مزید کہنا ہے کہ فلم انڈسٹری میں تمام مرد اور خواتین ایک جیسے ہیں لیکن مردوں کو ہیرو بنایا جاتا ہے جبکہ خواتین کو سازشی چڑیلیں۔
انہوں نے کہا کہ ہم آرٹسٹس ہیں ہم میں اور مرد اداکار یا ڈائریکٹر میں کیا فرق ہے؟ انہیں ہیرو اور خواتین کو سازشی چڑیلیں بنایا جاتا ہے اور یہ مجھے بہت برا لگتا ہے یہ مزید عجیب ہے کہ کچھ خواتین اس بیانیے کو آگے بڑھا رہی ہیں، یہاں بہت ساری چیزیں ایسی ہیں جو نہیں ہونا چاہیے تھیں۔
خیال رہے کہ سوشانت سنگھ راجپوت کی موت کے ایک روز بعد سونم کپور نے اپنے قریبی افراد اور ساتھیوں کو نشانہ بنانے والوں پر تنقید کی تھی سوشانت سنگھ راجپوت کی موت کے بعد فلمی خاندانوں سے تعلق رکھنے والے اداکاروں کو اقربا پروری کے الزامات کا سامنا کرنا پڑا تھا کہ اداکار نے اس سے دلبرداشتہ ہو کر خودکشی کی تھی سونم کپور کو بھی ٹرولز کی جانب سے اس حوالے سے تنقید کا سامنا ہوا تھا۔
