سابق انگلش کرکٹر مارک بچر نے پاکستان کے ٹی ٹوئنٹی ورلڈکپ میں بھارت کے خلاف میچ کے بائیکاٹ پر تبصرہ کرتے ہوئے کہا ہے کہ ماننا پڑے گا کہ پاکستان نے اس بار بڑا زبردست کام کیا ہے۔
مارک بچر نے کہا کہ پاک–بھارت میچ کرکٹ کی دنیا کا سب سے زیادہ منافع بخش مقابلہ ہے اور آئی سی سی کو یقینی بنانا پڑتا ہے کہ دونوں ٹیمیں ایک ہی گروپ میں ہوں۔
انہوں نے کہا کہ پاکستان اور بھارت کا ایک گروپ میں ہونا طے شدہ فارمولا ہے، جبکہ دیگر ٹیموں کے شیڈول ضابطے کے تحت ترتیب پاتے ہیں۔ چیمپئنز ٹرافی میں بھارت کے لیے خصوصی انتظام کیا گیا تھا، جس کی وجہ سے دیگر ٹیموں کے شیڈول متاثر ہوئے، لیکن بنگلا دیش کو وہ رعایت نہیں ملی۔
مارک بچر نے کہا کہ کرکٹ کے معاملے میں بھارت ہمیشہ اپنی مرضی چلاتا رہا اور پاکستان کو اسے برداشت کرنا پڑتا رہا، لیکن اس بار پاکستان کا اقدام آئی سی سی اور بی سی سی آئی کے لیے دھچکا ہے۔ انہوں نے کہا کہ پاکستان نے دباو ڈالنے کے لیے یہ واحد طریقہ اختیار کیا۔
واضح رہے کہ حکومت پاکستان نے 15 فروری کو بھارت کے خلاف ٹی ٹوئنٹی ورلڈکپ کا میچ نہ کھیلنے کا اعلان کیا تھا، جس کے بعد آئی سی سی پریشان ہوگئی ہے۔
Category: کھیل
پاکستان کا بھارت کے خلاف میچ نہ کھیلنا بڑا زبردست اقدام ہے،سابق انگلش کرکٹر مارک بچر
آئی سی سی پلیئرز رینکنگ ،صائم ایوب نے تمام آل راؤنڈر کو پیچھے چھوڑ دیا
آئی سی سی نے نئی پلیئرز رینکنگ جاری کردی ہے-
قومی کرکٹر صائم ایوب ایک بار پھر نمبر ون آل راؤنڈر بن گئے ان کے 290 پوائنٹس ہیں، سکندر رضا ایک درجہ تنزلی کے بعد دوسرے نمبر پر پہنچ گئے ہیں، آل راؤنڈر میں بھارت کے ہاردک پانڈیا تیسرے نمبر پر ہیں، پاکستان کے محمد نواز آل راؤنڈرز رینکنگ میں چوتھے نمبر پر آگئے ہیں۔
ٹی ٹوئنٹی بالرز میں بھارت کے ورون چکرورتی پہلے نمبر پر ہیں، پاکستان کے ابرار احمد دو درجے ترقی پا کر دوسری پوزیشن پر آ گئے ہیں، افغانستان کے راشد خان ایک درجہ تنزلی کے بعد تیسری پوزیشن پر آ گئے ہیں۔
ٹی ٹوئنٹی بیٹرز میں ابھیشک شرما پہلے نمبر پر ہیں، انگلینڈ کے فل سالٹ دوسرے جبکہ انگلینڈ کے ہی جوز بٹلر تیسری پوزیشن پر ہیں، پاکستان کے صاحبزادہ فرحان دو درجے تنزلی کے بعد ساتویں پوزیشن پر ہیں۔ سلمان علی آغا 12 درجہ ترقی کے بعد 29 ویں نمبرپر پہنچ گئے ہیں۔
پی ایس ایل پاکستان کا سب سے بڑا اسپورٹس برانڈ بن گیا
پاکستان سپر لیگ (پی ایس ایل) اب ملک کا سب سے بڑا اسپورٹس برانڈ بن چکی ہے، جس کی مقبولیت اور عالمی برانڈ ویلیو میں غیر معمولی اضافہ ہوا ہے۔
رپورٹس کے مطابق پی ایس ایل کے انٹرنیشنل میڈیا رائٹس کی مالیت میں گزشتہ سال کے مقابلے میں 145 فیصد اضافہ ہوا ہے، جو لیگ کی بڑھتی ہوئی شہرت اور عالمی سطح پر اعتماد کا واضح ثبوت ہے۔
لیگ کے چیف ایگزیکٹو آفیسر سلمان نصیر نے کہا کہ یہ ریکارڈ اضافہ پی ایس ایل پر دنیا بھر کے شائقین اور میڈیا کے اعتماد کو ظاہر کرتا ہے۔ انہوں نے مزید کہا کہ پی ایس ایل نہ صرف پاکستان میں بلکہ دنیا کی صفِ اوّل کی کرکٹ لیگز میں بھی اپنی مضبوط پہچان بنا رہی ہے۔
پی ایس ایل کے بڑھتے ہوئے عالمی اثر و رسوخ نے نہ صرف اس کی مقبولیت میں اضافہ کیا ہے بلکہ پاکستان کرکٹ کے برانڈ ویلیو کو بھی نئی بلندیوں تک پہنچایا ہے۔
سیالکوٹ اسٹالینز نے آسٹریلوی کرکٹر کو سائن کر لیا
پی ایس ایل فرنچائز سیالکوٹ اسٹالینز نے اسٹیو اسمتھ کو ڈائریکٹ سائن کرلیا۔
ذرائع کا کہنا ہے کہ آسٹریلوی کرکٹر نے بہتر آفراورمینجمنٹ دیکھ کرسیالکوٹ کیساتھ ڈائریکٹ سائن کیا ،اسٹیو اسمتھ نے حال ہی میں بگ بیش لیگ میں عمدہ کارکردگی کا مظاہرہ کیا تھا۔
واضح رہے کہ سابق آسٹریلین کپتان ٹم پین کو سیالکوٹ اسٹالینز کا ہیڈ کوچ مقررکیا گیا ہے ،انتظامیہ نے سوشل میڈیا پر نئے ہیڈ کوچ کا اعلان کیا پاکستان سپر لیگ (پی ایس ایل) سیزن 11 کے لیے تاریخ کی مہنگی ترین ٹیم خریدنے کا اعزاز او زیڈ گروپ نے اپنے نام کیا، جس نے سیالکوٹ کی فرنچائز کے مالکانہ حقوق 185 کروڑ روپے میں 10 سال کے لیے حاصل کیے۔
ملتان سلطانز کی نیلامی کے لئے پی سی بی کو 6 درخواستیں موصول
ملتان سلطانز کی نیلامی کے لئے پی سی بی کو 6 درخواستیں موصول ہوگئیں، پی سی بی نے 14 جنوری کو ملتان سلطانز کی نیلامی کا اشتہار دیا تھا۔
پی ایس ایل مینجمنٹ نے 6 بڈز کی وصولی کی تصدیق کر دی،موصول ہونے والی تمام درخواستوں کے تکنیکی جائزے کا عمل جاری ہے،پی سی بی جلد ملتان سلطانز کی نیلامی کے بارے میں حتمی تاریخ کا اعلان کرے گا۔
دوسری جانب ملتان سلطانز کی دوبارہ فروخت کے اعلان کے بعد سابق مالک علی ترین کا ردِعمل سوشل میڈیا پر وائرل ہے،علی ترین نے سوشل میڈیا پلیٹ فارم ایکس پر ایک پوسٹ شیئر کی، جس میں انہوں نے اپنی تصویر کے ساتھ کیپشن تحریر کیا،علی ترین نے لکھا کہ ’’جب آپ کو پتہ چلے کہ آپ کی ایکس دوبارہ شادی کر رہی ہے‘‘ ان کے اس کیپشن کو صارفین نے ملتان سلطانز کی دوبارہ فروخت سے جوڑتے ہوئے مزاحیہ اورعلامتی قرار دیا۔
یاد رہےکہ گزشتہ سال پی سی بی نے معاہدے کی خلاف ورزی اور پی ایس ایل کی شہرت کو نقصان پہنچانے کی مہم چلانے پر ملتان سلطانز کےمالک علی ترین کو نوٹس جاری کیا تھا تاہم علی ترین نے پاکستان کرکٹ بورڈکا لیگل نوٹس پھاڑ دیا تھا اور پھر ٹیم کی اونر شپ سے علیحدگی کا اعلان کیا تھا۔
لاہور قلندرز کے غیر ملکی کھلاڑی پی ایس ایل 11 سے دستبردار
لاہور قلندرز کے غیر ملکی اسٹار کرکٹر ڈیوڈ ویسا پی ایس ایل 11 سے دستبردار ہو گئے۔
لاہور قلندرز کے مالک ثمین رانا نے کہا ہے کہ ڈیوڈ ویسا نجی مصروفیات کے باعث پی ایس ایل 11 سے دستبردار ہوئے، وہ لاہور قلندرز فیملی کا ایک لازمی حصہ رہے ہیں جبکہ ڈیوڈ ویسا کا کہنا ہے کہ لاہور قلندرز کا حصہ بننا کرکٹ نہیں بلکہ ایک فیملی کا حصہ بننا ہے ، میں مستقبل میں دوبارہ لاہور قلندرز کا حصہ بننے اور کامیابی میں حصہ ڈالنے کا منتظر ہوں۔
فرنچائز کے مطابق ڈیوڈ ویسا نے لاہور قلندرز کے سفر اور کامیابی میں میدان کے اندر اور باہر کلیدی کردار ادا کیا۔ وہ بیٹنگ اور باؤلنگ دونوں شعبوں میں مسلسل کارکردگی دکھاتے رہے۔
پاکستان سپر لیگ (PSL) کی ایک مقبول ترین فرنچائز ہے، جس نے مسلسل دو بار (PSL 7 اور 8) چیمپئن بننے کا اعزاز حاصل کیا۔ یہ ٹیم شاہین آفریدی کی کپتانی اور عاقب جاوید کی کوچنگ میں کھیلتی ہے، اور اپنے تیز رفتار باولرز کی وجہ سے جانی جاتی ہے
پاکستان کا میچ کھیلنے سے انکار،بھارتی کرکٹ بورڈ کے نائب صدر کا بیان
بھارتی کرکٹ بورڈ نے پاکستان کے ٹی ٹوئنٹی ورلڈکپ میں بھارت کے خلاف میچ سے دستبرداری پر آئی سی سی کی حمایت کردی ہے۔
بی سی سی آئی کے نائب صدر راجیو شکلا نے لوک سبھا میں دیے گئے بیان میں کہا ہے کہ بورڈ آئی سی سی کے مؤقف سے مکمل اتفاق کرتا ہے، تاہم اس معاملے پر کوئی حتمی ردِعمل اس وقت تک نہیں دیا جائے گا جب تک آئی سی سی سے براہِ راست بات چیت نہیں ہو جاتی۔
کرکٹ حلقوں کے مطابق آئندہ دنوں میں آئی سی سی اور مختلف رکن ممالک کے درمیان ہونے والی بات چیت اس معاملے کی سمت کا تعین کرے گی توقع کی جا رہی ہے کہ مشاورت کے بعد کوئی ایسا فیصلہ سامنے آئے گا جو عالمی کرکٹ کے استحکام اور وقار کو برقرار رکھ سکے۔
دوسری جانب کانگریس کے رکن پارلیمنٹ ششی تھرور کا کہنا ہے کہ پاکستان کا بھارت کے میچ سے بائیکاٹ ویک اپ کال ہونی چاہیے پاکستان نے بنگلا دیش کے ساتھ یکجہتی کا اظہار کیا،بنگلا دیش کے کھلاڑی مستفیض الرحمٰن کو کولکتہ ٹیم سے نہیں نکالنا چاہیے تھا،سیاست کی نظر سے کھیل کو دیکھنا افسوسناک عمل ہے۔
واضح رہے کہ پاکستان نے ٹیم کو ٹی ٹوئنٹی ورلڈ کپ میں شرکت کی اجازت دے دی ہے لیکن بھارت کے خلاف 15 فروری کو شیڈول میچ نہیں کھیلا جائے گا۔
ٹی ٹوئنٹی ورلڈ کپ:قومی ٹیم لاہور سے سری لنکا کیلئے روانہ
آئی سی سی ٹی ٹوئنٹی ورلڈ کپ میں شرکت کے لئے قومی ٹیم لاہور سے سری لنکا کیلئے روانہ ہو گئی۔
پاکستانی ٹیم سری لنکا پہنچ کر آج اور کل مکمل آرام کرے گی، پاکستان ٹیم 4 فروری کو آئرلینڈ کے خلاف وارم اپ میچ کھیلے گی،15 کھلاڑیوں پر مشتمل قومی اسکوا ڈ میں کپتان سلمان علی آغا،ابرار احمد اور بابر اعظم شامل ہیں،فہیم اشرف، فخر زمان، خواجہ نافع، سلمان مرزا، نسیم شاہ اور صاحبزادہ فرحان بھی اسکواڈ کا حصہ ہیں ،قومی اسکواڈ میں محمد نواز، صائم ایوب، شاداب خان، شاہین آفریدی، عثمان خان اور عثمان طارق بھی شامل ہیں۔
واضح رہے کہ ٹی ٹوئنٹی ورلڈکپ کا آغاز 7 فروری سے ہوگا پاکستان ٹیم اپنا پہلا میچ 7 فروری کو نیدرلینڈز کے خلاف کھیلے گی۔ دوسرا میچ 10 فروری کو امریکا اور چوتھا میچ 18 فروری کو نمیبیا کے خلاف کھیلے گی،پاکستان ٹیم حکومت کے فیصلے کے مطابق 15 فروری کو شیڈول بھارت کے خلاف میچ نہیں کھیلے گی۔
پاکستان کا بھارت کیخلاف میچ بائیکاٹ کے فیصلہ پربھارتی میڈیا کا شدید ردعمل
پاکستان کی جانب سے بھارت کے خلاف میچ کے بائیکاٹ کے اعلان نے عالمی کرکٹ حلقوں میں ہلچل مچا دی ہے۔ اس فیصلے کے بعد بھارتی میڈیا اور نام نہاد گودی میڈیا میں شدید ردِعمل دیکھنے میں آ رہا ہے، جہاں بعض تجزیہ کاروں اور چینلز نے نہ صرف پاکستان کے فیصلے کو تنقید کا نشانہ بنایا بلکہ پورا ٹوئنٹی 20 ورلڈکپ منسوخ کرنے کے مطالبات بھی شروع کر دیے ہیں۔
ذرائع کے مطابق وزیراعظم پاکستان اور چیئرمین پاکستان کرکٹ بورڈ (پی سی بی) کے درمیان ہونے والی اہم ملاقات میں یہ فیصلہ کیا گیا کہ پاکستان بھارت کے خلاف میچ نہیں کھیلے گا، تاہم ٹی 20 ورلڈکپ میں شرکت برقرار رکھی جائے گی۔ اجلاس میں اس امر پر اتفاق کیا گیا کہ انٹرنیشنل کرکٹ کونسل (آئی سی سی) کا جانبدارانہ اور غیر منصفانہ رویہ اس فیصلے کی بنیادی وجہ بنا ہے، جس پر پاکستان نے شدید تحفظات کا اظہار کیا تھا۔پاکستان کے اچانک اور دوٹوک فیصلے نے آئی سی سی کو بیک فٹ پر دھکیل دیا ہے۔ عالمی کرکٹ ادارے نے خدشہ ظاہر کیا ہے کہ اس اقدام سے بین الاقوامی کرکٹ اور ٹورنامنٹ کے مجموعی انتظامات متاثر ہو سکتے ہیں۔ آئی سی سی حکام کی جانب سے پی سی بی سے اپیل کی گئی ہے کہ قابلِ قبول اور باہمی حل تلاش کیا جائے
دوسری جانب پاکستان کے فیصلے پر بھارتی میڈیا میں کھلبلی مچ گئی ہے۔ گودی میڈیا کے اینکرز اور تجزیہ کاروں نے سخت لب و لہجہ اختیار کرتے ہوئے پاکستان پر الزامات کی بوچھاڑ کر دی اور یہاں تک مطالبہ کر دیا کہ اگر پاکستان بھارت کے خلاف میچ نہیں کھیلتا تو پورا ورلڈکپ ہی منسوخ کر دیا جائے۔ بعض رپورٹس میں یہ بھی کہا جا رہا ہے کہ بھارت نواز حلقوں کو اس فیصلے کی توقع نہیں تھی، جسے انہوں نے آئی سی سی کے لیے “بڑا سرپرائز” قرار دیا ہے۔کرکٹ مبصرین کا کہنا ہے کہ پاکستان کا یہ فیصلہ اصولی مؤقف کی عکاسی کرتا ہے اور اس سے آئی سی سی پر دباؤ بڑھے گا کہ وہ تمام رکن ممالک کے ساتھ یکساں اور غیر جانبدارانہ سلوک کرے۔ مبصرین کے مطابق آنے والے دنوں میں اس معاملے پر مزید پیش رفت متوقع ہے، جبکہ عالمی کرکٹ شائقین کی نظریں اب آئی سی سی اور متعلقہ بورڈز کے اگلے اقدامات پر مرکوز ہیں۔
پاکستان کا بھارت کے خلاف میچ کے بائیکاٹ پر بھارتی بورڈ کا ردعمل آگیا
بھارت کے خلاف میچ کے بائیکاٹ کے فیصلے کے بعد بھارتی کرکٹ بورڈ (بی سی سی آئی) کا رد عمل سامنے آیا ہے۔
ٹی ٹوئنٹی ورلڈ کپ 2026 سے متعلق اتوار کے روز ایک بڑی پیش رفت ہوئی، جب پاکستان نے اعلان کیا کہ وہ بھارت کے خلاف میچ کا بائیکاٹ کرے گا، تاہم ٹیم ٹورنامنٹ میں اپنی مجموعی شرکت برقرار رکھے گی جس کے بعد بھارتی کرکٹ بورڈ (بی سی سی آئی) کا رد عمل سامنے آیا ہے۔
بھارتی نیوز ویب سائٹ این ڈی ٹی وی کی رپورٹ کے مطابق بی سی سی آئی کے ایک رکن نے بھارتی خبر ایجنسی کو بتایا کہ انڈین ٹیم آئی سی سی پروٹوکول کے مطابق سری لنکا کا سفر کرے گی ٹیم انڈیا سری لنکا جائے گی اور اٹرنیشنل کرکٹ کونسل (آئی سی سی) کے ضابطوں پر عمل کرے گی۔
ان کا کہنا تھا کہ ٹیم شیڈول کے مطابق پریکٹس کرے گی، پریس کانفرنس میں بھی شرکت کرے گی، مقررہ وقت پر اسٹیڈیم پہنچے گی اور میچ ریفری کی جانب سے میچ منسوخ کیے جانے کا انتظار کرے گی اگرچہ پاکستان نے 15 فروری کو ہونے والے گروپ اسٹیج کے ٹی ٹوئنٹی ورلڈ کپ میچ کے بائیکاٹ کا فیصلہ کیا ہے، اس کے باوجود بھارتی ٹیم آئی سی سی کے طے شدہ پروٹوکول کے مطابق سری لنکا جائے گی اور میچ ریفری کے فیصلے تک میدان میں موجود رہے گی۔
واضح رہے کہ اتوار کو پاکستان نے تمام ترتحفظات کے باوجود ٹی20 ورلڈ کپ میں شرکت کا اعلان کردیا ہے تاہم بھارت کے خلاف میچ نہ کھیلنے کا فیصلہ کیاحکومت پاکستان کی جانب سے سوشل میڈیا پر جاری بیان میں کہا گیا کہ قومی کرکٹ ٹیم ٹی 20 ورلڈ کپ میں شرکت کرے گی لیکن بھارت کے خلاف میچ نہیں کھیلے گی۔
یاد رہے کہ حکومتِ نے بنگلہ دیش کے ساتھ اظہار یکجہتی کے طور پر احتجاجاً بھارت کے خلاف میچ نہ کھیلنے کا فیصلہ کیا، بنگلہ دیش نے سیکیورٹی خدشات کی بنیاد پر بھارت میں اپنے میچز نہ کھیلنے اور انہیں کسی اور مقام پر منتقل کرنے کی درخواست کی تھی جب یہ درخواست مسترد ہوئی اور بنگلہ دیش نے کھیلنے سے انکار کر دیا تو آئی سی سی نے اسے ٹورنامنٹ سے ہٹا کر اسکاٹ لینڈ کو شامل کر لیا۔
اس معاملے پر آئی سی سی بورڈ میٹنگ میں پاکستان نے بنگلہ دیش کی حمایت کی تھی اور آئی سی سی کے ردعمل کو دوہرا معیار قرار دیا تھا۔ کیونکہ بھارت کے ساتھ تنازع کے باعث پاکستان کے تمام میچز سری لنکا میں شیڈول کیے گئے تھے لیکن بنگلہ دیش کی اسی درخواست کو رد کردیا گیاپاکستان کرکٹ بورڈ کے چیئرمین محسن نقوی نے اس وقت عوامی طور پر کہا تھا کہ بائیکاٹ ایک آپشن موجود ہے اور حتمی فیصلہ حکومت کرے گی۔
