Category: کھیل

کرکٹ کونسل (آئی سی سی) نے مینز ون ڈے ٹیم رینکنگ کی سالانہ اپ ڈیٹ جاری کردی ہے-

انٹرنیشنل کرکٹ کونسل کی جانب سے جاری کردہ تازہ ترین سالانہ اپ ڈیٹ میں بھارتی ٹیم 118 پوائنٹس کے ساتھ پہلی پوزیشن پر برقرار ہے تاہم بھارت کی ریٹنگ میں ایک پوائنٹ کی معمولی کمی ہوئی ہے، رینکنگ میں نیوزی لینڈ 113 پوائنٹس کے ساتھ دوسرے جب کہ آسٹریلیا 109 پوائنٹس کے ساتھ تیسر ے نمبر پر موجود ہے۔

جنوبی افریقا نے 102 پوائنٹس کے ساتھ پاکستان کو پیچھے چھوڑ کر چوتھی پوزیشن حاصل کرلی ہے جب کہ پاکستان 98 پوائنٹس کے ساتھ پانچویں نمبر پر چلا گیا ہے دیگر ٹیموں میں سری لنکا 96 پوائنٹس کے ساتھ چھٹے، افغانستان 93 پوائنٹس کے ساتھ ساتویں اور انگلینڈ 89 پوائنٹس کے ساتھ آٹھویں نمبر پر موجود ہے، اسی طرح بنگلہ دیش 84 پوائنٹس کے ساتھ نویں نمبر پر ہے جب کہ ویسٹ انڈیز 74 پوائنٹس کے ساتھ دسویں پوزیشن پر موجود ہے،بنگلہ دیش اور ویسٹ انڈیز کے درمیان پوائنٹس کا فرق 10 ہوگیا ہے، جو اس سے قبل 6 تھا۔

آئی سی سی کے مطابق یہ رینکنگ 2027 ورلڈ کپ کی براہِ راست کوالیفکیشن کے حوالے سے بھی اہمیت رکھتی ہے۔ 31 مارچ 2027 تک آئی سی سی رینکنگ میں ٹاپ 8 ٹیمیں میزبان جنوبی افریقا اور زمبابوے کے ساتھ براہِ راست ورلڈ کپ کے لیے کوالیفائی کریں گی رینکنگ اپ ڈیٹ میں آئرلینڈ نے 54 پوائنٹس کے ساتھ زمبابوے کو پیچھے چھوڑ کر 11ویں پوزیشن حاصل کرلی ہے جب کہ امریکا 46 پوائنٹس کے ساتھ اسکاٹ لینڈ کو پیچھے چھوڑتے ہوئے 13ویں نمبر پر آگیا ہے متحدہ عرب امارات نے بھی کینیڈا کو پیچھے چھوڑ کر 19 ویں پوزیشن حاصل کرلی ہے۔

آئرلینڈ کے سابق اور موجودہ فٹبالرز سمیت متعدد معروف شخصیات نے اسرائیل کے خلاف فٹبال میچز کے بائیکاٹ کا مطالبہ کر دیا۔

رپورٹس کے مطابق “آئرش اسپورٹ فار فلسطین” نامی مہم کے تحت فٹبالرز، موسیقاروں اور سماجی شخصیات نے فٹبال ایسوسی ایشن آف آئرلینڈ پر زور دیا ہے کہ وہ اسرائیل کے خلاف یوئیفا نیشنز لیگ میچز کھیلنے سے انکار کرےمہم میں شامل شخصیات کا مؤقف ہے کہ غزہ میں جاری جنگ اور انسانی حقوق کی صورتحال کے باعث اسرائیل کے ساتھ کھیلوں کے تعلقات ختم کیے جائیں۔

اس مہم کی حمایت کرنے والوں میں سابق آئرش فٹبال کوچبریان کیئر، سابق انٹرنیشنل فٹبالر لوئس قوئن اور متعدد لیگز کے کھلاڑی شامل ہیں جبکہ آئرش موسیقاروں اور مشہور بینڈز نے بھی اس مطالبے کی تائید کی ہے۔

دوسری جانب آئرش فٹبال ایسوسی ایشن نے واضح کیا ہے کہ وہ یوئیفا قوانین اور بین الاقوامی ذمہ داریوں کے تحت میچز کھیلنے کی پابند ہے۔

یاد رہے کہ غزہ جنگ کے بعد اسرائیل کے خلاف کھیلوں کے بائیکاٹ کی آوازیں دنیا کے مختلف ممالک میں شدت اختیار کر چکی ہیں اور متعدد تنظیمیں اسرائیل کے خلاف میچز کی معطلی کا مطالبہ کر رہی ہیں،قبل ازیں آئر لینڈ فٹبال ایسوسی ایشن نے بھی اسرائیل کے خلاف قرارداد منظور کرتے ہوئے یوئیفا سے اسرائیلی ٹیم پر پابندی کا مطالبہ کیا تھا

انٹرنیشنل کرکٹ کونسل (آئی سی سی) نے ٹی20 ٹیموں کی سالانہ رینکنگ جاری کردی ہے-

انٹرنیشنل کرکٹ کونسل کی تازہ ترین مینز ٹی 20 انٹرنیشنل ٹیم رینکنگ میں بھارت نے پہلی پوزیشن برقرار رکھی ہے جب کہ انگلینڈ اور آسٹریلیا بالترتیب دوسرے اور تیسرے نمبر پر موجود ہیں بھارت 275 پوائنٹس کے ساتھ سرفہرست ہے تاہم اس کی برتری کم ہو کر صرف 13 پوائنٹس رہ گئی ہے انگلینڈ 262 پوائنٹس کے ساتھ دوسرے جب کہ آسٹریلیا 258 پوائنٹس کے ساتھ تیسرے نمبر پر موجود ہے۔

رینکنگ اپڈیٹ میں مئی 2025 کے بعد کھیلے گئے تمام میچز کو 100 فیصد جب کہ گزشتہ 2 سال کے میچز کو 50 فیصد وزن دیا گیا ہےبھارتی ٹیم نے گزشتہ دو برسوں میں ٹی20 فارمیٹ میں نمایاں کارکردگی دکھائی ہے، جس میں 2024 اور 2026 کے ٹی20 ورلڈ کپ جیتنا بھی شامل ہے، کپتان سوریہ کمار یادو کی قیادت میں ٹیم ان دونوں ایونٹس کے درمیان تمام سیریز میں ناقابلِ شکست رہی۔

ٹاپ 7 ٹیموں کی پوزیشنز میں کوئی تبدیلی نہیں آئی، نیوزی لینڈ 247 پوائنٹس کے ساتھ چوتھے، جنوبی افریقا 244 پوائنٹس کے ساتھ پانچویں، پاکستان 240 پوائنٹس کے ساتھ چھٹے جب کہ ویسٹ انڈیز 233 پوائنٹس کے ساتھ ساتویں نمبر پر موجود ہیں دیگر ٹیموں میں بنگلہ دیش ایک پوائنٹ اضافے کے بعد 225 پوائنٹس کے ساتھ آٹھویں نمبر پر آگیا ہے جب کہ سری لنکا 6 پوائنٹس کی کمی کے باعث نویں پوزیشن پر چلا گیا جب کہ افغانستان 220 پوائنٹس کے ساتھ دسویں نمبر پر ہے۔

امریکا نے 6 پوائنٹس حاصل کرکے دو درجے ترقی کرتے ہوئے 13 ویں پوزیشن حاصل کرلی ہے جب کہ نیدرلینڈز اور اسکاٹ لینڈ بالترتیب 14ویں اور 15ویں نمبر پر موجود ہیں نیپال اور عمان نے ایک، ایک درجہ بہتری حاصل کی ہے جب کہ متحدہ عرب امارات اور کینیڈا ایک، ایک درجہ تنزلی کا شکار ہوئے ہیں۔

ٹی 20 ورلڈ کپ میں ڈیبیو کرنے والی اٹلی کی ٹیم نے 11 پوائنٹس حاصل کرکے 3 درجے ترقی کی اور 23 ویں نمبر پر آگئی اٹلی نے اپنے پہلے ہی میچ میں نیپال کو 10 وکٹوں سے شکست دے کر نمایاں کارکردگی دکھائی آئی سی سی رینکنگ میں شامل ٹیموں کی تعداد 102 سے کم ہوکر 98 رہ گئی ہے کیونکہ فجی، گیمبیا، یونان اور اسرائیل گزشتہ تین برسوں میں مطلوبہ آٹھ ٹی20 میچز نہ کھیلنے کے باعث فہرست سے باہر ہوگئے ہیں۔

دوسری جانب آئی سی سی ویمنز ٹی 20 سالانہ رینکنگ میں ٹاپ 10 ٹیموں کی پوزیشنز جوں کی توں برقرار ہیں۔ آئی سی سی کے مطابق آسٹریلیا پہلے نمبر پر براجمان ہے جب کہ انگلینڈ دوسرے اور بھارت تیسرے نمبر پر ہے،اس کے علاوہ نیوزی لینڈ چوتھے اور جنوبی افریقا پانچویں نمبر پر موجود ہیں جب کہ ویسٹ انڈیز چھٹے، سری لنکا ساتویں اور پاکستان آٹھویں نمبر پر موجود ہے۔