اسلام آباد: پاکستان کرکٹ بورڈ (پی سی بی) نے ملک بھر میں کرکٹ کے فروغ اور نئے ٹیلنٹ کی نشاندہی کے لیے ایک اہم قدم اٹھایا ہے۔ پی سی بی کے چیئرمین محسن نقوی کی ہدایت پر، پاکستان بھر کے تعلیمی اداروں میں کرکٹ کو فروغ دینے اور انفراسٹرکچر کو بہتر بنانے کا فیصلہ کیا گیا ہے۔اس مقصد کے لیے، پی سی بی نے انٹر بورڈز کوآرڈینیشن کمیشن (آئی بی سی سی)، ہائیر ایجوکیشن کمیشن (ایچ ای سی) اور کیپیٹل ڈویلپمنٹ اتھارٹی (سی ڈی اے) کے ساتھ مفاہمت کی یادداشتوں پر دستخط کیے ہیں۔ یہ تقریب سی ڈی اے ہیڈکوارٹر میں منعقد ہوئی، جس میں چیئرمین پی سی بی محسن نقوی اور وفاقی وزیر تعلیم خالد مقبول صدیقی خصوصی مہمان تھے۔اس معاہدے کے تحت، ملک بھر کے سکولوں، کالجوں اور یونیورسٹیوں میں لڑکوں اور لڑکیوں کے لیے کرکٹ ٹورنامنٹس اور لیگز کا انعقاد کیا جائے گا۔ یہ مقابلے ضلعی سطح سے شروع ہو کر قومی سطح تک جائیں گے۔
محسن نقوی نے کہا کہ یہ پہلی بار ہے کہ کرکٹ کے نچلی سطح پر فروغ کے لیے اتنی سنجیدہ کوشش کی گئی ہے۔ انہوں نے امید ظاہر کی کہ اس سے گراس روٹ لیول پر کرکٹ مضبوط ہوگی اور نئے ٹیلنٹ کو سامنے آنے کا موقع ملے گا۔وفاقی وزیر تعلیم خالد مقبول صدیقی نے اس اقدام کی اہمیت پر زور دیتے ہوئے کہا کہ سکول ہر ٹیلنٹ کی نرسریاں ہیں اور اچھے کھلاڑی سکولوں سے ہی اوپر آتے ہیں۔اس منصوبے کے تحت، پی سی بی کھلاڑیوں کی تربیت، کوچنگ کورسز، اور ہائی پرفارمنس سنٹرز میں تربیت کا انتظام کرے گا۔ ساتھ ہی، بہترین کھلاڑیوں کو سکالرشپس اور قومی انڈر 17 اور انڈر 19 ٹیموں میں شرکت کا موقع دیا جائے گا۔یہ اقدام پاکستان میں کرکٹ کے مستقبل کے لیے ایک اہم سنگ میل ثابت ہو سکتا ہے، جو نئی نسل کو اعلیٰ معیار کی کرکٹ کھیلنے کا موقع فراہم کرے گا۔
