Category: کھیل

دورہ پاکستان کے دوسرے مرحلے میں آئی سی سی ٹی ٹوینٹی ورلڈکپ ٹرافی کی رونمائی کل لاہورمیں ہوگی۔ ٹرافی کو سہ پہر میں میڈیا سیشن کے لیے نیشنل کرکٹ اکیڈمی میں رکھا جائے گا۔ پاک نیوزی لینڈ کے آخری ٹی ٹوینٹی کےدوران میگا ایونٹ کی اس ٹرافی کا قذافی سٹیڈیم کا چکر بھی پروگرام کا حصہ ہے ۔ کل صبح لاہور کے تاریخی مقامات کا ٹور بھی پروگرام میں شامل کیا گیا ہے۔پہلے مرحلے میں اسلام آباد کے بعد ایبٹ آباد میں ٹرافی کا ٹور شامل تھا۔
اسلام آباد کے تفریح مقامات پر ٹرافی کے ساتھ فینزنے تصاویر اور سیلفیاں بھی بناکر ان لمحات کو یادگار بنایا۔آئی سی سی ورلڈکپ کا میلہ دو جون سے امریکہ اور ویسٹ انڈیز میں شروع ہورہا ہے۔ کرکٹ فینز نو جون کو نیو یارک میں شیڈول پاک بھارت کا میچ کا بے تابی سے انتظار کررہے ہیں۔
دوسری جانب پاک نیوزی لینڈ ٹی ٹونٹی سیریز کا پانچواں اور آخری میچ کل قذافی سٹیڈیم لاہور میں کھیلا جائیگا، مہمان ٹیم کو سیریز میں دو ایک سے برتری حاصل ہے جبکہ ٹیم پاکستان سیریز بچانے کی جنگ لڑے گی۔چوتھے میچ میں شکست کے بعد شاہینوں نے ٹریننگ کرنے کے بجائے ہوٹل میں آرام کا فیصلہ کیا تھا جبکہ لاہور میں جمعے کی شام ہونے والی بارش سے بلیک کیپس کا آپشنل ٹریننگ سیشن بھی منسوخ کردیا گیا۔

اولمپیئن جیولین تھرور ارشد ندیم کی جنوبی افریقا میں ٹریننگ جاری ہے اور سخت مرحلے میں داخل ہو گئی ہے

اولمپیئن جیولین تھرور ارشد ندیم نے پہلے جم ٹریننگ کی پھر تھرو کرنا شروع کیا جس کے بعد اب ارشد ندیم بھرپور انداز سے ہر طرح کی ٹریننگ کررہے ہیں،ارشد ندیم کا کہنا ہے کہ ماشاءاللہ ٹریننگ اچھی چل رہی ہے، ساؤتھ افریقہ میں مزید 15 سے 20 دنوں تک ٹریننگ کروں گا،ساؤتھ افریقہ میں ٹریننگ کے بعد واپس پاکستان آؤں گا، میں کوچ ٹرسیوس لیبنبرگ کی نگرانی میں ٹریننگ کر رہا ہوں اور ٹریننگ کے نئے طریقے و ٹیکنیکس سیکھ رہا ہوں،ٹریننگ سے میری صلاحیت اور اسکلز پر مثبت اثر پڑے گا، میں جنوبی افریقا میں بڑی محنت کر رہا ہوں تاکہ اپنا ٹارگٹ حاصل کر سکوں،اولمپکس سے پہلے ایک دو ایونٹ میں شرکت کروں گا ،میرا گول پیرس اولمپکس میں اچھا پرفارم کرنا اور پاکستان کے لیے اعزاز لانا ہے، مجھے امید ہے کہ میں اپنے مقصد میں کامیاب ہوں گا۔

وزیر اعظم شہباز شریف کی جیولن تھرو ارشد ندیم سے ملاقات

گزشتہ سال ہنگری میں ہونے والی عالمی چیمپیئن شپ میں، ندیم نے 87.82 میٹر کے تھرو کے ساتھ چاندی کا تمغہ جیتنے والے پہلے ایتھلیٹ بن کر ملک کے لیے تاریخ رقم کی، ہندوستان کے نیرج چوپڑا سے بالکل نیچے جنہوں نے 88.17 میٹر کے تھرو کے ساتھ طلائی تمغہ جیتا تھا۔ایونٹ کے دوران انہوں نے پیرس اولمپکس کے لیے کوالیفائی بھی کیا۔ تاہم گزشتہ سال وہ فٹنس مسائل کی وجہ سے ایشین چیمپئن شپ، ایشین گیمز اور ایشین تھرونگ چیمپئن شپ سے باہر ہو گئے تھے۔ارشد کا ذاتی بہترین تھرو 90.18 میٹر ہے جسے اس نے 2022 میں برمنگھم میں ہونے والے کامن ویلتھ گیمز میں سنبھالا تھا۔پیرس اولمپکس میں جیولین تھرو کا ایونٹ فرانس کے سب سے بڑے مقام اسٹیڈ ڈی فرانس میں منعقد ہوگا۔ کوالیفائنگ راؤنڈ 6 اگست کو ہوگا جس کا فائنل 8 اگست کو ہوگا۔

نیوزی لینڈ کی جانب سے دیے گئے 179 رنز کے ہدف کے تعاقب میں پاکستان کو اننگز کے آغاز میں ہی بڑا نقصان اٹھانا پڑا اور دوسرے ہی اوور میں کپتان بابر اعظم صرف 5 رنز بنانے کے بعد پویلین لوٹ گئے۔صائم ایوب ایک مرتبہ پھر بڑی اننگز نہ کھیل سکے اور 40 کے مجموعی اسکور پر 20 رنز بنانے کے بعد چلتے بنے جبکہ عثمان بھی صرف 16 رنز ہی بنا سکے۔46 رنز پر تین وکٹیں گرنے کے بعد فخر زمان کا ساتھ دینے شاداب خان آئے اور دونوں نے مل کر اسکور کو 79 تک پہنچا دیا لیکن 8 رنز بنانے والے شاداب بریسویل کی وکٹ بن گئے۔دوسرے اینڈ سے فخر نے بہترین کھیل کا سلسلہ جاری رکھا اور افتخار کے ہمراہ 59 رنز کی ساجھے داری بنا کر اسکور کو 138 تک پہنچا دیا۔اس موقع پر میچ پاکستان کی گرفت میں نظر آ رہا تھا لیکن 23 رنز بنانے والے افتخار کے بعد 61 رنز کی باری کھیلنے والے فخر کے یکے بعد دیگرے آؤٹ ہونے سے میچ کا پانسہ یکدم نیوزی لینڈ کے حق میں پلٹ گیا۔اختتامی اوورز میں عماد وسیم نے 11 گیندوں پر 22 رنز بنا کر ٹیم کو جیت کی دہلیز تک پہنچانے کی کوشش کی لیکن ان کی یہ کاوش بھی رائیگاں گئی۔نیوزی لینڈ کی جانب سے ولیم او رورکے نے 3 وکٹیں لیں جبکہ بین سیئرس نے 2 جبکہ مائیکل بریسویل اور جمی نیشم نے ایک ایک کھلاڑی کو آؤٹ کیا۔نیوزی لینڈ نے پاکستان کو سیریز کے چوتھے ٹی20 میچ میں فتح کے لیے 179 رنز کا ہدف دیا ہے۔لاہور میں کھیلے جا رہے سیریز کے چوتھے ٹی20 میچ میں پاکستان کے کپتان بابر اعظم نے ٹاس جیت کر پہلے باؤلنگ کا فیصلہ کیا۔نیوزی لینڈ نے اننگز کا مثبت انداز میں آغاز کیا اور جارحانہ بیٹنگ کرتے ہوئے 5 اوورز میں 56 رنز بنائے لیکن اسی سکور پر زمان خان نے 15 گیندوں پر 28 رنز بنانے والے ٹام بلنڈل کو چلتاکردیا۔دوسرے اینڈ سے ٹم رابنسن نے بہترین کھیل پیش کیا اور جارحانہ بلے بازی کا مظاہرہ کرتے ہوئے صرف 35 گیندوں پر نصف سنچری مکمل کی۔نیوزی لینڈ نے 10 اوورز میں 93 رنز بنا لیے تھے لیکن 11ویں اوور میں عباس آفریدی نے رابنسن کی دو چھکوں اور 4 چوکوں سے سجی 51 رنز کی اننگز کا خاتمہ کردیا۔سکور 128 تک پہنچا تو افتخار احمد نے ٹیم کو اہم کامیابی دلاتے ہوئے مارک چیپمین کو پویلین لوٹا دیا جبکہ ڈین فاکس کرافٹ بھی 34 رنز بنانے کے بعد اسامہ میر کو وکٹ دے بیٹھے۔
مائیکل بریسویل اور جیمز نیشام نے سکور کو 169 تک پہنچایا لیکن عباس آفریدی نے 27 رنز بنانے والے کیوی کپتان بریسویل کے بعد اگلی ہی گیند پر جوش کلارکسن کا کام بھی تمام کردیا۔اننگز کی آخری گیند پر عامر نے اش سودھی کی اننگز کا خاتمہ کردیا اور اس طرح نیوزی لینڈ نے 20 اوورز میں 7 وکٹوں کے نقصان پر 178 رنز بنائے۔

ٹاس
پاکستان اور نیوزی لینڈ کے درمیان چوتھے ٹی ٹوینٹی میں پاکستان نے نیوزی لینڈ کے خلاف ٹاس جیت کر بائولنگ کا فیصلہ کیا ہے۔پاکستان اور نیوزی لینڈ کے مابین چوتھا ٹی20 میچ لاہور کے قذافی اسٹیڈیم میں کھیلا جارہا ہے۔قومی ٹیم کے کپتان بابر اعظم نے کہا کہ ڈیو فیکٹر کی وجہ سے بولنگ کا فیصلہ کیا، ہماری ٹیم میں چار تبدیلیاں کی گئی ہیں، محمد رضوان اور عرفان خان ان فٹ ہیں۔محمد عامر ، عماد وسیم ، فخر زمان اور زمان خان کو پلیئنگ الیون میں شامل کیا گیا ہےبابر اعظم نے بتایا کہ شاہین آفریدی اور نسیم شاہ کو ریسٹ دیا گیا ہے۔نیوزی لینڈ کے کپتان نے کہا کہ ٹیم میں تین تبدیلیاں کی گئی ہیں۔واضح رہے پاک نیوزی ٹی20 سیریز 1-1 سے برابر ہے جبکہ سیریز کا پہلا میچ بارش کی نذر ہوگیا تھا۔

لاہور میں پریس کانفرنس کرتے ہوئے بابر اعظم کا کہنا تھا کہ ہم پاکستان کے لیے اچھا کھیلنے کی کوشش کرتے ہیں۔قومی ٹی ٹوئنٹی ٹیم کے کپتان بابر اعظم نے کہا ہے کہ سیریز جیتنے کےلیے پُرعزم ہیں، مجھے اپنے کھلاڑیوں پر یقین ہے وہ اچھا کھیلیں گے۔قومی ٹیم کے کپتان نے کہا کہ انجریز کھیل کا حصہ ہوتی ہیں، فٹنس کیمپ بہت ضروری ہوتا ہے۔ ہم ہمیشہ فٹنس اور اسکلز پر توجہ دیتے ہیں۔بابر اعظم کا کہنا تھا کہ جب کوئی بھی اہم پلیئر ان فٹ ہو تو اس کو مس کرتے ہیں۔انہوں نے کہا کہ محمد رضوان فائٹر ہیں وہ آئرلینڈ کے خلاف سیریز تک فٹ ہو جائیں گے۔ محمد رضوان کی خدمات سب کے سامنے ہیں۔ایک سوال کے جواب میں بابر اعظم کا کہنا تھا کہ تمام کھلاڑیوں کو مواقع دے رہے ہیں تاکہ انہیں اعتماد ملے۔خیال رہے کہ پاکستان اور نیوزی لینڈ کے درمیان پانچ میچز کی سیریز 1-1 سے برابر ہے جبکہ سیریز کا چوتھا میچ کل لاہور کے قذافی اسٹیڈیم میں کھیلا جائے گا۔ذرائع کے مطابق ٹیم مینجمنٹ کے بیشتر ارکان رضوان کو ٹی ٹوئنٹی میں 4 نمبرپربیٹنگ کراناچاہتے ہیں تاہم کپتان بابراعظم رضوان کو نمبر 4 پر کھلانے کے حق میں نہیں ہیں، بابر اعظم محمد رضوان کو اوپنر کی حیثیت سے کھلانا چاہتے ہیں، بابر کی رائے ہے کہ اگر صائم ایوب بطور اوپنر ناکام ہوئے ہیں تو رضوان ہی اوپن کریں، رضوان ذاتی طور پربھی نمبر4 پر کھیلنے کے حق میں نہیں ہیں۔

ڈائریکٹرجنرل سپورٹس پنجاب پرویز اقبال کی زیر صدارت پہلی وزیراعلیٰ پنجاب پنک گیمز کے حوالے سے اہم اجلاس منعقد ہوا ہے،

نیشنل ہاکی سٹیڈیم میں ہونیوالے اجلاس میں پہلی وزیراعلیٰ پنجاب پنک گیمز 2024کی تیاریوں کا جائزہ لیا گیا ہے، ڈائریکٹرجنرل سپورٹس پنجا ب پرویز اقبال نے اجلاس سے خطاب کرتے ہوئے کہا ہے کہ خواتین کی پہلی وزیراعلیٰ پنجاب پنک گیمز 2سے5مئی تک لاہور میں ہوں گی، جس میں پنجاب کے تمام ڈویژنزاورپنجاب کی16 یونیورسٹیوں سے خواتین کھلاڑی شریک ہوں گی،پہلی وزیراعلیٰ پنجاب پنک گیمز میں 7کھیلوں کے مقابلے ہوں گے،جن میں اتھلیٹکس،ہاکی، باسکٹ بال، آرچری،کرکٹ ٹیپ بال، بیڈمنٹن اور ٹیبل ٹینس کے مقابلے ہوں گے،ڈائریکٹر جنرل سپورٹس پنجاب پرویز اقبال نے مزید کہا ہے کہ وزیر اعلیٰ پنجاب مریم نواز کے ویژن کے مطابق اور وزیرکھیل پنجاب فیصل ایوب کھوکھر کے سربراہی میں صوبے کی خواتین میں کھیلوں کی سرگرمیوں کو فروغ دینے کے لیے پہلی وزیراعلیٰ پنجاب پنک گیمز کا انعقاد کیا جا رہا ہے،ہماری خواتین میں کھیلوں کا بہت ٹیلنٹ موجود ہے،سپورٹس بورڈ پنجاب کھیلوں کے فروغ کے لئے ہرممکن اقدامات اٹھارہا ہے۔اجلاس میں ڈائریکٹر سپورٹس یاسمین اختر، ڈائریکٹر ایڈمن محمد کلیم،ڈپٹی ڈائریکٹر ظہور احمد اور عطاء الرحمن بھی موجود تھے۔