Category: کھیل

قائداعظم ٹرافی کے ابتدائی راؤنڈ میں پہلے روز کا کھیل مکمل خاص خاص باتیں پہلے دن کے میچ کیں باغی ٹی وی کی زبانی

• سدرن پنجاب کی جانب سے سمیع اسلم اور عدنان اکمل کی سنچریاں

• سندھ کی اوپننگ جوڑی کے درمیان 212 رنز کی شراکت

• خیبرپختوانخوا کرکٹ ٹیم کے اشفاق احمد کی سنچری

• ایونٹ کے آغاز کے موقع پر جادوگر اسپنر عبدالقادر کو خراج عقیدت

لاہو ر:قائداعظم ٹرافی کے ابتدائی راؤنڈ میں قذافی اسٹیڈیم لاہور میں کھیلے جانے والے میچ میں سدرن پنجاب نے ٹاس جیت کر پہلے بیٹنگ کا فیصلہ کیا۔ کپتان شان مسعود 26 کے مجموعی اسکور پر آؤٹ ہوگئے۔ سدرن پنجاب کی دوسری وکٹ 50، تیسری 70 اور چوتھی 74 رنز پر گری۔ تاہم اوپنر سمیع اسلم کی دوسرے اینڈ سے مزاحمت جاری رہی۔ سمیع اسلم نے پانچویں وکٹ کی شراکت میں عدنان اکمل کے ساتھ مل کر 217 رنز جوڑے۔

باغی ٹی وی کے ذرائع کے مطابق آج پہلے دن کے اختتام پر سمیع اسلم نے 19 چوکوں کی مدد سے 151اور عدنان اکمل نے 14 چوکوں کی مدد سے 106 رنز بنائے ۔ دونوں کھلاڑی میچ کے دوسرے روز سدرن پنجاب کی جانب سے 291 رنز 4 کھلاڑی آؤٹ سے کھیل کا دوبارہ آغاز کریں گے۔ شان مسعود 12، عمران رفیق 5، صہیب مقصود 6 اور عمر صدیق 4 اسکور بنا کر آؤٹ ہوئے۔ سنٹرل پنجاب کی جانب سے وقاص مقصود نے 3 اور حسن علی نے 1 کھلاڑی کو آؤٹ کیا۔

باغی ٹی وی کے مطابق یو بی ایل اسپورٹس کمپلیکس کراچی میں کھیلے جانے والے میچ میں نو ٹاس قانون کا استعمال کیا گیا۔ بلوچستان کرکٹ ٹیم کے کپتان حارث سہیل نے ٹاس کیے بغیر بطور مہمان ٹیم پہلے فیلڈنگ کا انتخاب کیا۔ سندھ کی اوپننگ جوڑی نے سست رفتار بیٹنگ سے اننگ کا آغاز کیا تاہم خرم منظور 105رنز بنا کر آؤٹ ہوگئے جبکہ عابد علی 120رنز بنا کر ناٹ آؤٹ ہیں۔ دونوں کھلاڑیوں کے درمیان 212رنز کی شراکت قائم ہوئی۔ سعد علی 2 رنز بنا کر آؤٹ ہوئے۔ اسد شفیق اور عابد علی سندھ کی جانب سے کل اننگ کا دوبارہ آغاز کریں گے۔ بلوچستان کی جانب سے یاسر شاہ نے 2 کھلاڑیوں کو آؤٹ کیا۔ پہلے روز کے اختتام پر سندھ کا اسکور237 رنز رہا اور اس کے 2 کھلاڑی آؤٹ ہوئے۔

ناردرن اور خیبرپختوانخوا کرکٹ ٹیموں کے درمیان میچ ایبٹ آباد کرکٹ اسٹیڈیم میں کھیلا گیا۔ میچ میں ناردرن کرکٹ ٹیم نے بطور مہمان ٹیم ٹاس کرنے کی بجائے پہلے فیلڈنگ کرنے کا فیصلہ کیا۔ میزبان ٹیم نے دن کے اختتام تک 4 کھلاڑیوں کے نقصان پر 343 رنز بنائے۔ خیبرپختوانخوا کی جانب سے فخر زمان اور صاحبزادہ فرحان نے اننگ کا آغاز کیا۔ فخرزمان نے 33 رنز بنائے جبکہ صاحبزادہ فرحان 29 رنز بنا کر آؤٹ ہوئے۔

ذرائع کے مطابق اشفاق احمد اور افتخار احمد کے درمیان 117 رنز کی شراکت قائم ہوئی۔ اشفاق احمد نے 106 رنز کی شاندار اننگ کھیلی۔ ان کی اننگ میں 14 چوکے اور 1 چھکا شامل تھا۔ مڈل آرڈر بیٹسمین افتخار احمد 35رنز بنا کر رن آؤٹ ہوگئے۔ خیبرپختوانخوا کی جانب سے میچ کے دوسرے روز کپتان محمد رضوان 84 اور عادل امین 49 رنز سے اپنی اننگز کا آغاز کریں گے۔ ناردرن کی جانب سے عماد وسیم، صدف حسین اور موسیٰ خان نے ایک ایک کھلاڑی کو آؤٹ کیا۔

قائداعظم ٹرافی کے آغاز کے موقع پر لیجنڈری کرکٹر عبدالقادر کو خراج عقیدت پیش کیا گیا ۔ تینوں سنٹرز پر میچ سے قبل جادوگر اسپنر کے لیے فاتحہ خوانی کی گئی۔ سوگ میں تمام کھلاڑیوں نے سیاہ رنگ کی پٹیاں پہن رکھی تھیں۔

کراچی : سابق ٹیسٹ کرکٹر منصور اختر سے نیشنل اسٹیڈیم کراچی میں آئی سی سی کے اینٹی کرپشن آفیسر اسٹیورچرڈسن کی ملاقات ۔کرپشن سے متعلق سوالات کئے گئے

پاکستان کرکٹ ذرائع کے مطابق اس ملاقات میں پی سی بی کے اینٹی کرپشن یونٹ آفیسر کرنل (ر) عثمان بھی موجود تھے، اسٹیو رچرڈسن نے منصور اختر سے عمر اکمل کے الزامات پر پوچھ گچھ کی۔

پاکستان کرکٹ ذرائع کےمطابق آئی سی سی کے نمائندے نے فکسنگ کے الزام پر معلومات حاصل کیں۔ عمر اکمل نے الزام لگایا تھا کہ گلوبل لیگ میں انہیں منصور اختر نے میچ فکسنگ کی پیشکش کی تھی۔

یاد رہے کہ عمر اکمل نے کہا تھا کہ منصور اختر نے ان کو کینیڈا میں اپنے ہوٹل میں بلایا اور لابی میں ہونےو الی ملاقات میں انہیں میچ فکسنگ کی پیشکش کی تھی۔

لاہور : عمر اکمل کی قسمت جاگ سکتی ہے اور اس حوالے سے اچھی اچھی خبریں گردش کرنے لگی ہیں . اطلاعات کے مطابق سری لنکا کیخلاف ون ڈے اور ٹی ٹوئنٹی سیریز کیلئے پاکستان کرکٹ ٹیم کے ممکنہ کھلاڑیوں کا اعلان پیر کو ہوگا۔

سری لنکا کیخلاف کراچی اور لاہور میں ہونے والی ون ڈے اور ٹی ٹوئنٹی سیریز کیلئے پاکستان ٹیم کے 19 ممکنہ کھلاڑیوں کا اعلان پیر کو کیا جائے گا۔سیریز کیلئے کیمپ 18 ستمبر سے لاہور میں لگایا جائے گاجس کے بعد 23 ستمبر کو حتمی 16 رکنی ٹیم کا اعلان کردیا جائے گا۔

دوسری طرف پاکستان کرکٹ بورڈ ذرائع کا کہنا ہے کہ پاکستان ٹیم میں عمر اکمل کی شمولیت پر غور کیا جارہا ہے۔ عمر اکمل نے اس سال ورلڈ کپ سے قبل آسٹریلیا کیخلاف سیریز میں شرکت کی تھی جبکہ آخری ٹی ٹوئنٹی انہوں نے 2016 میں کھیلا تھا۔

دبئی : پاکستانی باکسر محمد وسیم نے کامیابی کے جھنڈے گاڈ دیئے ، اطلاعات کے مطابق دبئی کے مرینہ باکسنگ ایرینا میں ہونے والی فائٹ میں محمد وسیم نے فلپائنی باکسر کانراڈو کوناک آؤٹ کیا۔

ذرائع کے مطابق پاکستانی باکسر کی زبردست فائٹ سے محمد وسیم نے حریف کو ایک منٹ 20 سکینڈ میں ہی مات دے دی۔ محمد وسیم نے پروفیشنل باکسنگ کیریئر کا بارہواں مقابلہ جیتا۔محمد وسیم کا کہنا ہے کہ وہ اپنی جیت کو پاکستانی عوام اور کشمیریوں کے نام کرتے ہیں۔

پاکستان اسپورٹس بورڈ کی سستی کی وجہ سے پاکستان ٹیبل ٹینس ٹیم ایشین ٹیبل ٹینس چیمپئین شپ میں شرکت سے محروم ہوگئی ، اس کی وجہ اسپورٹس بورڈ کی جانب سے این او سی جاری نہ کیا جانا ہے۔

ذرائع کےمطابق ٹیم آفیشل صبا وارث کے مطابق فیڈریشن نے پاکستان اسپورٹس بورڈ سے ٹورنامنٹ میں شرکت کیلئے این او سی مانگ رکھا تھا لیکن بورڈ کی جانب سے کوئی جواب نہیں آیا۔

یاد رہے کہ پاکستان کی قومی ٹیبل ٹینس ٹیم نے ٹورنامنٹ میں شرکت کیلئے آج انڈونیشیا روانہ ہونا تھا، ٹیبل ٹینس ٹیم 8 کھلاڑیوں اور دو آفیشلز پر مشتمل ہے۔ ایشین ٹیبل ٹینس چیمپئین شپ 15 سے 22 ستمبر تک کھیلی جانی ہے