Tag: اسلام آباد

وفاقی وزیر قانون اور انسانی حقوق سینیٹر اعظم نذیر تارڑ نے کہا ہے کہ پاکستان کو او آئی سی وزارتی کانفرنس برائے خواتین کی میزبانی پر فخر ہے ۔

او آئی سی خواتین کانفرنس سے خطاب کرتے ہوئے اعظم نذیر تارڑ کا کہنا تھا کہ او آئی سی وزارتی کانفرنس کے شرکا کو اسلام آباد آمد پر خوش آمدید کہتا ہوں، او آئی سی کی چیئرمین شپ اتفاق رائے اور تعاون کے جذبے سے نبھائیں گے خواتین کی ترقی درحقیقت پوری مسلم دنیا کی ترقی اور خوشحالی کی ضمانت ہے –

موجودہ چیلنجز کا ذکر کرتے ہوئے انہوں نے کہا کہ آج بھی لاکھوں خواتین اور بچیاں ترقی کی راہ میں مختلف رکاوٹوں کا سامنا کر رہی ہیں، اس لیے ضروری ہے کہ ہر خاتون اور بچی کو تعلیم، ترقی اور قیادت کے یکساں مواقع فراہم کیے جائیں۔

وفاقی وزیر نے کہا کہ خواتین کا معاشی اور سیاسی بااختیار ہونا پائیدار ترقی کیلئے ناگزیر ہے ، مسلم خواتین نے علم، قیادت، کاروبار اورعوامی خدمت میں نمایاں کردار ادا کیا،اسلام نے 1400 سال قبل خواتین کو عزت، حقوق اور قانونی شناخت عطا کی، ہر خاتون اور بچی کو تعلیم، ترقی اور قیادت کے برابر مواقع ملنے چاہئیں۔

انہوں نے کہا کہ قومی صنفی پالیسی 2025 اور وزیراعظم ویمن ایمپاورمنٹ پیکج پر عمل جاری ہے ، او آئی سی ایکشن پلان اور ویمن ڈویلپمنٹ آرگنائزیشن اہم پلیٹ فارم ہیں، پاکستان او آئی سی کی چیئرمین شپ کو اعزاز نہیں بلکہ ذمہ داری سمجھتا ہے کانفرنس کی کامیابی کا معیار خواتین کیلئے پیدا ہونیوالے عملی مواقع ہوں گے، پاکستان میں خواتین کیلئے محفوظ اور مساوی مواقع حکومتی ترجیح ہے۔

دو روزہ کانفرنس میں او آئی سی کے 57 رکن ممالک سے تقریباً 190 مندوبین شرکت کر رہے ہیں، جن میں ممتاز خواتین، حکومتی نمائندے، او آئی سی کے مبصرین اور تنظیم کے عہدے دار شامل ہیں۔

اسلام آباد میں مقررہ نرخوں سے زائد قیمت پر ایل پی جی فروخت کرنے والوں کے خلاف ضلعی انتظامیہ نے کارروائی کرتے ہوئے 25 دکانیں سیل کر دیں، جبکہ ہمک کے علاقے میں ایک ایل پی جی پلانٹ بھی بند کر کے منیجر کو گرفتار کر لیا گیا۔

ضلعی انتظامیہ کے مطابق کارروائیاں شہر کے مختلف علاقوں میں کی گئیں، جہاں مقررہ نرخوں سے زائد قیمت وصول کرنے والی ایل پی جی شاپس کے خلاف کارروائی عمل میں لائی گئی ایچ 13 کے علاقے میں 3، جبکہ پی ڈبلیو ڈی اور جناح گارڈن میں 8 ایل پی جی دکانیں سیل کی گئیں،اسی طرح شاہ اللہ دتہ میں زائد قیمت وصول کرنے والی 4 دکانوں کو بند کر دیا گیا، جبکہ روات کے علاقے میں مجموعی طور پر 10 ایل پی جی شاپس سیل کی گئیں جنگی سیداں میں بھی کارروائی کرتے ہوئے 3 دکانیں بند کر دیں ، ہمک کی حدود میں ایک ایل پی جی پلانٹ سیل کیا گیا، جبکہ پلانٹ کے منیجر کو گرفتار کر لیا گیا۔

ڈپٹی کمشنر اسلام آباد نے متعلقہ افسران کو ہدایت کی ہے کہ عوام سے مقررہ قیمت سے زائد وصول کرنے والوں کے خلاف کارروائیوں کا سلسلہ جاری رکھا جائے اور صارفین کو ریلیف فراہم کرنے کے لیے مؤثر اقدامات کیے جائیں۔

وفاقی دارالحکومت اسلام آباد میں پاک فضائیہ کے گروپ کیپٹن عاصم ایک خاتون کو مبینہ طور پر زبردستی لے جانے کی کوشش سے بچاتے ہوئے فائرنگ کا نشانہ بن گئے، واقعے میں وہ موقع پر ہی شہید ہوگئے، جبکہ ملزم فرار ہونے میں کامیاب ہو گیا۔

اسلام آباد کے علاقے نائنتھ ایونیو پر پیش آنے والے افسوسناک واقعے میں پاک فضائیہ کے گروپ کیپٹن عاصم نے ایک خاتون کی مدد کرتے ہوئے اپنی جان قربان کر دی پولیس کے مطابق گروپ کیپٹن عاصم وہاں سے گزر رہے تھے کہ انہوں نے ایک موٹرسائیکل سوار کو خاتون کے ساتھ مبینہ طور پر زبرد ستی کرتے دیکھا، انہوں نے اپنی گاڑی روکی اور خاتون کی مدد کے لیے آگے بڑھے۔

واقعے کے دوران خاتون بھاگ کر گروپ کیپٹن عاصم کی گاڑی کے دوسری جانب آ گئی اسی اثنا میں موٹرسائیکل سوار، جس کی شناخت سعد کے نام سے ہوئی ہے، نے مبینہ طور پر گروپ کیپٹن عاصم سے تلخ کلامی کی اور اچانک فائرنگ کر دی فائرنگ کے نتیجے میں گروپ کیپٹن عاصم شدید زخمی ہوگئے اور زخموں کی تاب نہ لاتے ہوئے موقع پر ہی شہید ہوگئے، جبکہ ملزم فرار ہونے میں کامیاب ہو گیا۔

پولیس نے مقدمہ درج کرکے واقعے کی تحقیقات شروع کر دی ہیں اور متاثرہ خاتون کا بیان بھی قلمبند کر لیا گیا ہے خاتون نے اپنے بیان میں بتایا کہ ملزم سعد اسی کے دفتر میں ملازم ہے اس کے مطابق ملزم نے صبح اسے دفتر چھوڑنے کی پیشکش کی، تاہم راستے میں اس نے راستہ تبدیل کر دیا اور مبینہ طور پر اسے کسی دوسری جگہ لے جانے کی کوشش کی، جب اس نے مزاحمت کی تو ملزم نے اس کے ساتھ زبردستی شروع کر دی، اسی دوران گروپ کیپٹن عا صم موقع پر پہنچے اور اس کی مدد کی۔

پولیس کے مطابق ملزم کی گرفتاری کے لیے مختلف علاقوں میں چھاپے مارے جا رہے ہیں اور تفتیش جاری ہےشہید گروپ کیپٹن عاصم اپنے سوگواران میں اہلیہ، ایک بیٹی اور ایک بیٹے کو چھوڑ گئے ہیں،قانون نافذ کرنے والے اداروں کا کہنا ہے کہ ملزم کو جلد گرفتار کرکے قانون کے کٹہرے میں لایا جائے گا۔

قومی اور سوشل میڈیا پر انہیں خواتین کے تحفظ کے لیے اپنی جان قربان کرنے والے بہادر افسر کے طور پر یاد کیا جا رہا ہے، گروپ کیپٹن عاصم کی قربانی اس بات کی عکاس ہے کہ پاک فوج کے سپاہی صرف سرحدوں ہی نہیں عزت کے بھی رکھوالے ہیں۔

اسلام آباد کی ضلعی انتظامیہ نے موضع سنگجانی اور شاہ اللہ دتہ میں غیر قانونی تعمیرات کے خلاف بھرپور آپریشن کرتے ہوئے سی ڈی اے کی اراضی پر قبضے کی کوشش ناکام بنا دی۔

اسلام آباد کی ضلعی انتظامیہ نے موضع سنگجانی اور شاہ اللہ دتہ میں غیر قانونی تعمیرات اور سی ڈی اے کی اراضی پر قبضے کی کوششوں کے خلاف بڑے پیما نے پر کارروائی کرتے ہوئے 14 افراد کو گرفتار کر لیا، 7 غیر قانونی ڈھانچے مسمار کر دیئے، جبکہ غفلت برتنے پر موضع سنگجانی کے نمبردار کو عہدے سے بھی فارغ کر دیا گیا۔

انتظامیہ کا کہنا ہے کہ کارروائی کا مقصد سرکاری اراضی کا تحفظ اور غیر قانونی تعمیرات کی روک تھام یقینی بنانا ہے، جبکہ گرفتار افراد کے خلاف متعلقہ قوانین کے تحت مقدمات درج کیے جا رہے ہیں ڈپٹی کمشنر اسلام آباد نے سرکاری فرائض میں غفلت برتنے پر موضع سنگجانی کے نمبردار کو فوری طور پر عہدے سے فارغ کرنے کے احکامات جاری کر دیے انہوں نے خبردار کیا کہ علاقے میں غیر قانونی تعمیرات کی روک تھام میں ناکام رہنے والے تمام متعلقہ افسرا ن کے خلاف بھی سخت محکمانہ کارروائی عمل میں لائی جائے گی۔

ضلعی انتظامیہ نے واضح کیا کہ غیر قانونی تعمیرات میں ملوث افراد کے خلاف بلاامتیاز قانونی کارروائیاں جاری رہیں گی اور کسی کو بھی سرکاری اراضی پر قبضہ یا بغیر این او سی تعمیرات کی اجازت نہیں دی جائے گی،انتظامیہ نے شہریوں سے اپیل کی ہے کہ کسی بھی قسم کی تعمیر شروع کرنے سے قبل متعلقہ اداروں سے این او سی اور قانونی اجازت نامے ضرور حاصل کریں تاکہ قانونی کارروائی سے بچا جا سکے۔

ضلعی انتظامیہ نے عوام سے یہ بھی درخواست کی ہے کہ اگر کسی علاقے میں غیر قانونی تعمیرات یا سرکاری اراضی پر قبضے کی کوشش نظر آئے تو فوری طور پر انتظامیہ کو اطلاع دیں تاکہ بروقت کارروائی کرکے قانون کی عملداری یقینی بنائی جا سکے۔

وفاقی دارالحکومت اسلام آباد سمیت ملک کے مختلف علاقوں میں زلزلے کے جھٹکے محسوس کیے گئے ہیں،زلزلے کے شدید جھٹکوں کے باعث شہریوں میں خوف و ہراس پھیل گیا اور متعدد مقامات پر لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

راولپنڈی، اسلام آباد، لاہور، میانوالی، شیخوپورہ، سرگودھا، سیالکوٹ سمیت پنجاب کے مختلف علاقوں میں بھی زلزلے کے جھٹکے ریکارڈ کیے گئےلاہور، میانوالی اور اس کے نواحی علاقوں کے علاوہ چکوال اور گردونواح میں بھی لوگوں نے زلزلے کی شدت محسوس کی خیبرپختونخوا میں زلزلے سے متاثر ہونے والے علاقوں میں شانگلہ، بونیر، مردان، چارسدہ، سوات، صوابی، کوہاٹ، کرک، ملاکنڈ، باجوڑ، ہنگو، لوئر دیر اور جنوبی وزیرستان لوئر سمیت متعدد علاقے شامل ہیں۔

آزاد کشمیر میں بھی زلزلے کے جھٹکے محسوس کیے گئے وادی نیلم، مظفرآباد اور اس سے ملحقہ علاقوں میں زمین لرزنے سے لوگ خوفزدہ ہو کر کھلے مقامات پر جمع ہوگئے گلگت بلتستا ن کے ضلع دیامر اور اس کے گردونواح میں بھی زلزلے کے شدید جھٹکے محسوس کیے گئے۔ فوری طور پر کسی جانی یا مالی نقصان کی اطلاع سامنے نہیں آئی، تاہم متعلقہ ادارے صورتحال کا جائزہ لے رہے ہیں۔

زلزلہ پیما مرکز کے مطابق زلزلے کی شدت 5.8 ریکارڈ کی گئی ہے، جس کا مرکز افغانستان کا کوہ ہندو کش ریجن تھا-

واضح رہے کہ گزشتہ روز بلوچستان میں بھی زلزلے کے جھٹکے محسوس کیے گئے تھے، جس کے بعد ڈپٹی کمشنر موسیٰ خیل نے بتایا کہ زلزلے سے راڑا شم کے علاقے چاپ میں 90 سے زیادہ مکانات کو نقصان پہنچا، اور دیوار یں گرنے سے 20 سے زیادہ افراد زخمی بھی ہوئے۔

اسلام آباد انتظامیہ نے سیکیورٹی انتظامات کے پیش نظر مارگلہ ہلز کے متعدد ٹریلز کو غیر معینہ مدت کے لیے بند کرنے کا اعلان کر دیا ہے۔

انتظامیہ کے مطابق ٹریل 2، ٹریل 3، ٹریل 4، ٹریل 5 اور سیدپور گاؤں کے عقب میں واقع ٹریل 23 جون 2026 سے آئندہ احکامات تک عوام کے لیے بند رہیں گے،ٹریلز کو بند رکھنے کا فیصلہ فوری طور پر نافذ العمل ہوگا اور عوام کو کسی بھی قسم کی زحمت سے بچنے کے لیے پیشگی ہدایات پر عمل کرنا چاہیے۔

انتظامیہ نے شہریوں سے اپیل کی ہے کہ وہ مکمل تعاون کریں اور مذکورہ علاقوں کا رخ کرنے سے گریز کریں۔

مارگلہ ہلز کے ہائیکنگ ٹریلز فطرت سے محبت کرنے والوں اور ٹریکرز کے لیے بہترین اور مقبول ترین مقامات ہیں۔ یہاں کل 6 باقاعدہ ٹریلز موجود ہیں، جو پیر صہبائی روڈ اور مارگلہ روڈ سے شروع ہوتے ہیں ٹریل 3 سب سے پرانا اور مقبول ترین ٹریک ہے۔ یہ پیر صہبائی روڈ سے شروع ہوتا ہے یہ نسبتاً مشکل اور کھڑی چڑھائی والا ہے، لیکن اوپر پہنچ کر پورے اسلام آباد کا خوبصورت نظارہ ملتا ہے، ٹریل 5 مارگلہ روڈ (ایف فائیو) کے قریب سے شروع ہوتا ہے یہ ٹریل 3 کے مقابلے میں زیادہ لمبا لیکن کم کھڑا ہے، اس لیے یہ ابتدائی ہائیکرز کے لیے بہت موزوں ہے۔

ٹریل 2 نسبتاً چھوٹا اور آسان ٹریک ہے جو دامنِ کوہ کی طرف جاتا ہے 4 اور 6 ٹریلز بھی جنگلات اور پہاڑی سلسلوں سے گزرتے ہیں، اور ٹریل 6 خاص طور پر وائلڈ لائف اور پرندوں کے مشاہدے کے لیے مشہور ہے،پی اے ٹی سی ٹریل ٹریل 3 اور 5 کے درمیان واقع ہے اور ہائیکنگ کلب کے زیرِ انتظام ہے-

بعض اوقات شدید بارشوں یا سیکیورٹی وجوہات کی بنا پر ضلعی انتظامیہ ٹریلز کو عارضی طور پر بند بھی کر دیتی ہے۔

غیر ملکی وفود کی آمد کے پیش نظر وفاقی دارالحکومت میں سیکیورٹی کے غیر معمولی انتظامات کیے گئے ہیں، جس کے تحت رات 12 بجے سے اگلے حکم تک اسلام آباد میں کسی بھی سمت سے آنے والی ہر قسم کی ہیوی ٹریفک کے داخلے پر پابندی عائد کر دی گئی ہے۔

ٹریفک پولیس کے مطابق رات 12 بجے سے اگلے حکم تک اسلام آباد میں کسی بھی جانب یا کسی بھی شاہراہ سے آنے والی ہر قسم کی ہیوی ٹریفک کا داخلہ بند رہے گا ماسوائے میریٹ اور مارگلہ روڈ ریڈ زون کے تمام داخلی راستے ہر قسم کی ٹریفک کے لیے مکمل طور پر بند رہیں گے۔

کورال سے فیض آباد تک ایکسپریس وے، مری روڈ، کلب روڈ پر ٹریفک کے لئے ڈائیورشنز ہوں گی سری نگر ہائی وے زیروپوائنٹ سے ڈھوکری چوک تک مکمل بند رہے گی اسلام آباد کے رہائشی مختلف سڑکیں بند ہونے کی صورت میں ذیل متبادل ٹریفک پلان پر عمل درآمد کریں۔ فیصل ایونیو سے زیرو پوائنٹ آنے جانے والی ٹریفک 9th ایونیو کی طرف موڑ دی جائے گی۔

زیروپوائنٹ سے کورال چوک بند ہونے کی صورت میں سری نگر ہائی وے سے 9th ایونیو استعمال کرتے ہوئے اسٹیڈیم روڈ کے ذریعے مری روڈ چاندنی چوک سے راول روڈ استعمال کرتے ہوئے کورال جاسکتے ہیں، پارک روڈ سے کلب روڈ بند ہونے کی صورت میں ٹریفک ترامڑی چوک کی طرف موڑ دی جائے گی بھارہ کہو سے راولپنڈی آنے جانے والے شہر ی کورنگ روڈ،بنی گالہ،لہتراڑ روڈ استعمال کریں۔

راولپنڈی صدر سے اسلام آباد آنے جانے والے شہری کرنل شیرخان روڈسے فقیر ایپی روڈ یا 9th ایونیو میں سے کوئی بھی شاہراہ استعمال کریں جی ٹی روڈ پشاور سے لاہور جانے والی ہیوی ٹریفک ٹیکسلا سے موٹروے، چکری انٹرچینج ، چک بیلی روڈ سے روات جی ٹی روڈ استعمال کریں، جی ٹی روڈ لاہور سے پشاور جانے والی ہیوی ٹریفک جی ٹی روڈ روات سے چک بیلی روڈسے چکری انٹر چینج استعمال کرتے ہوئے براستہ موٹروے ،ٹیکسلا کی جانب سفر کریں۔

وفاقی دارالحکومت اسلام آباد، پشاور اور خیبرپختونخوا کے مختلف اضلاع میں زلزلے کے جھٹکے محسوس کیے گئے،جبکہ پی ڈی ایم اے پنجاب کے مطابق پنجاب میں زلزلے کے باعث کوئی جانی یا مالی نقصان رپورٹ نہیں ہوا۔

زلزلے کے جھٹکے پشاور سمیت خیبرپختونخوا کے مختلف اضلاع اور اسلام آباد میں محسوس کیے گئے، جس کے بعد شہریوں میں خوف و ہراس پھیل گیاشیری کلمہ طیبہ پڑھتے ہوئے گھروں اور دفاتر سے باہر نکل آئے، تاہم فوری طور پر کسی جانی یا مالی نقصان کی اطلاع موصول نہیں ہوئی۔

پاکستان محکمہ موسمیات کے مطابق زلزلہ 22 جون 2026 کو پاکستانی وقت کے مطابق سہ پہر 3 بج کر 22 منٹ پر ریکارڈ کیا گیا زلزلے کی شدت ریکٹر اسکیل پر 5.4 جبکہ اس کی گہرائی 215 کلو میٹر تھی،زلزلے کا مرکز افغانستان کے ہندوکش ریجن میں تھا، جس کے نقاط شمالی عرض البلد 36.44 ڈگری اور مشرقی طول البلد 70.70 ڈگری ریکارڈ کیے گئے-

ریسکیو 1122 خیبرپختونخوا نے زلزلے کے بعد الرٹ جاری کرتے ہوئے شہریوں سے احتیاطی تدابیر اختیار کرنے کی اپیل کی ہے ریسکیو 1122 خیبرپختونخوا کے ترجمان بلال احمد فیضی نے کہا ہے کہ عوام کسی بھی ہنگامی صورتحال یا ناخوشگوار واقعے کی صورت میں فوری طور پر ریسکیو ہیلپ لائن 1122 پر رابطہ کریں تاکہ بروقت امدادی کارروائیاں یقینی بنائی جا سکیں۔

دوسری جانب پی ڈی ایم اے پنجاب نے زلزلے بارے رپورٹ جاری کردی،ترجمان پی ڈی ایم اے کے مطابق لاہور، راولپنڈی، اٹک، چکوال, میانوالی، ملتان، پوٹھوہار ریجن اور پنجاب کے دیگر اضلاع میں زلزلے کے جھٹکے محسوس کیے گئے ریکٹر سکیل پر زلزلے کی شدت 5.4 ریکارڈ کی گئی زلزلے کا مرکز ہندوکش ریجن تھا زلزلے کی گہرائی 215 کلومیٹر ریکارڈ کی گئی متعلقہ انتظامیہ انتظامیہ عمارتوں کی چیکنگ میں مصروف ہے۔

ڈی جی پی ڈی ایم اے کے مطابق پی ڈی ایم اے کے صوبائی کنٹرول روم سمیت پنجاب بھر کے ضلعی ایمرجنسی آپریشن سنٹرز 24/7 فعال ہیں زلزلہ سے نقصانات کی اطلاع پی ڈی ایم اے کی ہیلپ لائن 1129 پر دی جا سکتی ہے۔