راول ڈیم کے سپل ویز دوبارہ کھولنے کا فیصلہ

اسلام آباد اور گردونواح میں موسلا دھار بارشوں کے باعث راول ڈیم میں پانی کی سطح بلند ہوگئی، جس کے بعد ضلعی انتظامیہ نے آج دوبارہ سپل ویز کھولنے کا فیصلہ کیا ہے۔

ضلعی انتظامیہ کے مطابق راول ڈیم میں پانی کی سطح 1751.40 فٹ تک پہنچ گئی ہے، جس کے باعث سپل ویز آج 2 ستمبر کو دوپہر اڑھائی بجے کھولے جائیں گے،ریسکیو 1122، پولیس اور متعلقہ اداروں کو سپل ویز کھولنے کے دوران الرٹ رہنے کی ہدایت کی گئی ہے، جبکہ سپل ویز کھولنے سے قبل تمام متعلقہ اداروں کو ضروری حفاظتی اقدامات یقینی بنانے کی ہدایت بھی کی گئی ہے۔

ضلعی انتظامیہ نے شہریوں سے اپیل کی ہے کہ سپل ویز کھولے جانے کے دوران ندی نالوں اور نشیبی علاقوں کے قریب جانے سے گریز کریں اور احتیاطی تدابیر اختیار کریں۔