سی ڈی اے کا سارا دن یہ کام ہوتا ہے کہ کیسے لوگوں کو تنگ کیا جائے، بیرسٹر دانیال

پارلیمانی سیکریٹری اطلاعات بیرسٹر دانیال چوہدری نے کیپٹل ڈویلپمنٹ اتھارٹی (سی ڈی اے) کو شدید تنقید کا نشانہ بناتے ہوئے کہا ہے اربوں روپے کے پلاٹ بیچ کر ریسٹورنٹس بنائے گئے تو اسپتال کیوں نہیں بن سکے۔

پارلیمانی سیکریٹری اطلاعات بیرسٹر دانیال چوہدری نے ایک پروگرام میں گفتگو کرتے ہوئے کیپیٹل ڈٰولپمنٹ اتھارٹی کو شدید تنقید کا نشانہ بنا ڈالا انہوں نے کہا کہ سی ڈی اے کا سارا دن یہ کام ہوتا ہے کہ کیسے لوگوں کو تنگ کیا جائے، عوام کی زندگی سے متعلق چیزیں ان کی ترجیحات میں نہیں ہے،سی ڈی اے کو اپنی ترجیحات طے کرنے کی ضرورت ہے وزیر داخلہ محسن نقوی نے کہا تھا کہ میں وفاقی دارلحکومت اسلام آباد کو ماڈل سٹی بناوں گا مگر صرف سڑکوں سے ماڈل سٹی نہیں بن سکتا۔

انہوں نے کہا کہ اربوں کے پلاٹ بیچ کر ریسٹورنٹس بن سکتے ہیں تو اسپتال کیوں نہیں ؟ ہم نے کہا تھا کہ پمز جیسے نئے اسپتال بنائے جائیں، پمز اپنی فل کیپسٹی پر کام کر رہا ہے یہاں اسلام آباد سمیت دیگر علاقوں سے بھی مریض آتے ہیں،انہوں نے سی ڈی اے کو تنقید کا نشانہ بناتے ہوئے مزید کہا کہ جب ان کی اپنی کیپسٹی نہیں تو لوگوں کو یہ کیا کہیں گے؟ اسکولوں میں بڑی تعدا میں بچے ہوتے ہیں، اسکولز میں بچوں کا حال دیکھیں، سی ڈٰی اے کو ان معاملا ت کو دیکھنے کی ضرورت ہےعمر رسیدہ افراد کو اداروں کا ہیڈ بنا دیا جاتا ہے، جہاں بھاگ دوڑ کی ضرورت وہاں ایسے لوگ لائیں جن میں کیپسٹی ہے اور شوق ہے۔