Baaghi TV

Tag: تازہ ترین

  • آپریشن غضب للحق کے تحت کارروائیاں:جماعت الاحرار کے اہم کمانڈر سمیت 29 دہشتگرد ہلاک

    آپریشن غضب للحق کے تحت کارروائیاں:جماعت الاحرار کے اہم کمانڈر سمیت 29 دہشتگرد ہلاک

    پاکستانی سیکیورٹی فورسز نے خیبر پختونخوا، بلوچستان اور کراچی میں حالیہ دہشتگرد حملوں کے بعد پاک افغان سرحد کے ساتھ بڑے پیمانے پر انٹیلی جنس کی بنیاد پر کارروائیاں کرتے ہوئے جماعت الاحرار اور فتنہ الخوارج سے تعلق رکھنے والے 29 دہشتگردوں کو ہلاک کردیا ہے۔

    پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا، بلوچستان اور پاکستان رینجرز (سندھ) کے کراچی کیمپ پر حالیہ دہشتگرد حملوں کے بعد سیکیورٹی فورسز نے پاک افغان سرحد کے ساتھ انٹیلی جنس کی بنیاد پر منظم زمینی آپریشن کیا، جس کے بعد سرحدی علاقے میں جماعت الاحرار اور فتنہ الخوارج سے تعلق رکھنے والے دہشتگردوں کے ٹھکانوں اور محفوظ پناہ گاہوں کو نشانہ بنایا گیا، ان کارروائیوں میں مجموعی طور پر 29 خوارج ہلاک ہوئے۔

    آئی ایس پی آر کے مطابق 28 جون 2026 کو سیکیورٹی فورسز نے خیبر پختونخوا کے ضلع باجوڑ میں پاک افغان سرحد کے قریب دہشتگردوں کے ایک گروہ کے خلاف انٹیلی جنس کی بنیاد پر کارروائی کی، مؤثر اور پیشہ ورانہ کارروائی کے نتیجے میں انتہائی مطلوب کمانڈر خان فروش عرف زبال، جو بھارتی حمایت یافتہ جماعت الاحرار سے تعلق رکھتا تھا، اپنے 3 ساتھیوں سمیت مارا گیا، جبکہ متعدد دیگر دہشتگرد زخمی ہوئے۔

    آئی ایس پی آر کے مطابق آپریشن ’غضب للحق‘ کے تسلسل میں مستند انٹیلی جنس اطلاعات کی بنیاد پر 28 اور 29 جون کی درمیانی شب پاک افغان سرحدی علاقے میں جماعت الاحرار اور فتنہ الخوارج کے دہشتگرد کیمپوں اور ٹھکانوں کو بھی انتہائی درستگی کے ساتھ نشانہ بنایا گیا پکتیا، پکتیکا اور کنڑ میں قائم دہشتگردوں کے 3 مراکز کو کامیاب کارروائیوں میں تباہ کر دیا گیا، جہاں 25 دہشتگرد مارے گئے، ان مراکز میں موجود بھاری مقدار میں اسلحہ اور گولہ بارود بھی تباہ کر دیا گیا۔

    آئی ایس پی آر کے مطابق پاکستان نے ہمیشہ خطے میں امن و استحکام کے فروغ کے لیے کوششیں کی ہیں، تاہم ملک اپنے شہریوں کی جان و مال کے تحفظ پر کسی قسم کا سمجھوتہ نہیں کرے گا، کیونکہ عوام کی سلامتی ریاست کی اولین ترجیح ہے، وفاقی ایپکس کمیٹی برائے نیشنل ایکشن پلان سے منظور شدہ وژن ’عزمِ استحکام‘ کے تحت سیکیورٹی فورسز اور قانون نافذ کرنے والے اداروں کی انسدادِ دہشتگردی مہم پوری شدت سے جاری رہے گی، تاکہ بیرونی سرپرستی اور حمایت یافتہ دہشتگردی کا مکمل خاتمہ یقینی بنایا جا سکے۔

  • میٹا کو بڑا دھچکا،گوگل نے جیمینائی اے آئی ماڈلز کے استعمال کی حد مقرر کردی

    میٹا کو بڑا دھچکا،گوگل نے جیمینائی اے آئی ماڈلز کے استعمال کی حد مقرر کردی

    امریکی ٹیکنالوجی کمپنی گوگل نے میٹا کی جانب سے زیادہ کمپیوٹنگ صلاحیت طلب کیے جانے کے بعد اپنے جیمینائی اے آئی ماڈلز کے استعمال پر حدود عائد کردی ہیں، کیونکہ حریف ٹیک گروپ مطلوبہ گنجائش فراہم نہیں کر سکا۔

    برطانوی اخبار فنانشل ٹائمزکے مطابق الفابیٹ کی ملکیت گوگل نے مارچ کے قریب میٹا کو بتایا کہ وہ جیمینائی کی وہ مکمل صلاحیت فراہم نہیں کر سکتا جو کمپنی خریدنا چاہتی تھی اس کمی کے باعث میٹا کے بعض اندرونی اے آئی منصوبے متاثر ہوئے اور ان میں تاخیر ہوئی، گوگل کے کئی دیگر کلائنٹس بھی متاثر ہوئے ہیں، تاہم ان پر اثر نسبتاً کم رہا، میٹا خاص طور پر متاثر ہوا کیونکہ گوگل کے ماڈلز کے لیے اس کی طلب غیر معمولی حد تک زیادہ تھی۔

    رپورٹ کے مطابق سب سے زیادہ اثر میٹا پر پڑا کیونکہ اس کی جانب سے اے آئی ماڈلز کے استعمال کی طلب غیر معمولی حد تک زیادہ تھی ان پابندیوں کے بعد میٹا نے اپنے ملازمین کو ہدایت کی ہے کہ وہ اے آئی ٹوکنز کا زیادہ محتاط اور مؤثر استعمال کریں۔ اے آئی ٹوکنز وہ یونٹس ہوتے ہیں جن کے ذریعے مصنوعی ذہانت کے ماڈلز کے استعمال کی مقدار ناپی جاتی ہے۔

    رائٹرز فوری طور پر اس رپورٹ کی تصدیق نہیں کر سکا، جس میں معاملے سے آگاہ افراد کا حوالہ دیا گیا ہے گوگل اور میٹا نے کاروباری اوقات کے بعد تبصرے کی درخواستوں کا فوری جواب نہیں دیا۔

    رپورٹ کے مطابق ان پابندیوں کے باعث میٹا نے اپنے عملے کو اے آئی ٹوکنز، یعنی اے آئی استعمال کی پیمائش کرنے والی اکائیوں کے زیادہ مؤثر استعمال کی ترغیب دی ہے کمپنیاں چپس اور ڈیٹا سینٹرز پر اربوں ڈالر خرچ کر رہی ہیں، اس کے باوجود وہ اے آئی سروسز کی بڑھتی ہوئی طلب پوری کرنے کے لیے درکار کمپیوٹنگ پاور حاصل کرنے میں مشکلات کا سامنا کررہی ہیں۔

    مارچ میں ختم ہونے والی پہلی سہ ماہی کے دوران گوگل کلاؤڈ کی آمدنی بڑھ کر 20 ارب ڈالر تک پہنچ گئی، تاہم سی ای او سندر پچائی نے کہاکہ کمپیوٹنگ پاور کی پابندیوں نے اس سے بھی زیادہ ترقی کو روک دیا اور کلاؤڈ یونٹ کے بیک لاگ میں سہ ماہی بنیاد پر قریباً دو گنا اضافے میں کردار ادا کیا۔

  • شہید سپریم لیڈر خامنہ ای کی نمازِ جنازہ اور تدفین کی مزید تفصیلات جاری

    شہید سپریم لیڈر خامنہ ای کی نمازِ جنازہ اور تدفین کی مزید تفصیلات جاری

    تہران: ایرانی حکام نے سابق سپریم لیڈر علی خامنہ ای کی آخری رسومات کے لیے وسیع پیمانے پر انتظامات شروع کر دیے ہیں-

    ایرانی میڈیا کے مطابق سوگ کی مرکزی تقریبات 4 جولائی سے تہران اور مقدس شہر قم میں شروع ہوں گی، جبکہ آیت اللہ علی خامنہ ای کی تدفین 9 جولائی کو ان کے آبائی شہر مشہد میں کی جائے گی، ایرانی حکومت، پولیس اور پاسدارانِ انقلاب مشترکہ طور پر سیکیورٹی اور انتظامی معاملات کی نگرانی کر رہے ہیں تاکہ لاکھوں زائرین اور شرکاء کی آمدورفت کو محفوظ اور منظم بنایا جا سکے،حکام کے مطابق نمازِ جنازہ اور سوگ کی تقریبات میں تقریباً دو کروڑ افراد کی شرکت متوقع ہے، عراق کے مقدس شہر کربلا میں بھی ایک تعزیتی تقریب منعقد کرنے کی تجویز زیر غور ہے، تاہم اس کی سرکاری طور پر ابھی تک تصدیق نہیں کی گئی۔

    واضح رہے کہ علی خامنہ ای فروری کے آخر میں تہران میں اپنی سرکاری رہائش گاہ پر امریکی اور اسرائیلی فضائی حملے میں شہید ہوگئے تھے اس وقت ان کی عمر 86 برس تھی، سیکیور ٹی خدشات اور اعلیٰ سیاسی قیادت کی ممکنہ شرکت کے باعث ان کی آخری رسومات کئی مرتبہ مؤخر کی جاتی رہیں، جس کے بعد اب ان کی نمازِ جنازہ اور تدفین کا باضابطہ شیڈول جار ی کیا گیا ہے۔

  • مذہبی و عوامی حلقوں کی جانب سے شدید ردعمل کا خدشہ،جیو نیوز نےخود اپنی نشریات معطل کرنے کی درخواست کی

    مذہبی و عوامی حلقوں کی جانب سے شدید ردعمل کا خدشہ،جیو نیوز نےخود اپنی نشریات معطل کرنے کی درخواست کی

    جیو نیوز کے پروگرام "سفرِ عشق” سے متعلق تنازع کے بعد سوشل میڈیا پر مختلف دعوے سامنے آ رہے ہیں بعض حلقوں کا مؤقف ہے کہ اگر پروگرام میں نشر ہونے والا مواد قانون، پیمرا ضابطۂ اخلاق یا مذہبی حساسیت کے منافی تھا تو پہلے شوکاز نوٹس جاری کیا جانا چاہیے تھا، پھر مکمل تحقیقات اور متعلقہ فریق کا مؤقف سننے کے بعد کارروائی عمل میں لائی جاتی۔

    باغی ٹی وی کے ذرائع کا کہنا ہے کہ جیو نیوز نے خود ہی اپنی نشریات 15 روز کے لیے معطل کرنے کی درخواست کی، ذرائع کے مطابق خدشہ تھا کہ اگر معاملہ معمول کے قانونی طریقہ کار کے تحت چلتا تو تحقیقات میں وقت لگ سکتا تھا، جبکہ اس دوران مذہبی و عوامی حلقوں کی جانب سے ملک بھر میں احتجاج اور جیو نیوز کے دفاتر کے باہر کشیدگی پیدا ہونے کا امکان موجود تھا، اسی تناظر میں مبینہ طور پر چینل نے رضاکارانہ طور پر 15 روزہ معطلی کی درخواست دی۔

    ادھر سوشل میڈیا پر متعدد صارفین کا کہنا ہے کہ پروگرام میں نشر کیے گئے مواد سے عوامی و مذہبی جذبات شدید مجروح ہوئے، اسی لیے عوامی ردعمل سامنے آیا ان حلقوں کا کہنا ہے کہ جیو نیوز کو 15 روز کے لیے بند کرنا اس کی گستاخی یا غلطی کی نوعیت کے مقابلے میں سزا بہت ہلکی ہے۔

  • اسحاق ڈار سے بحرینی وزیر خارجہ کا رابطہ،دورہ پاکستان کا عندیہ

    اسحاق ڈار سے بحرینی وزیر خارجہ کا رابطہ،دورہ پاکستان کا عندیہ

    نائب وزیراعظم اور وزیر خارجہ سینیٹر محمد اسحاق ڈار نے بحرین کے وزیر خارجہ ڈاکٹر عبداللطیف بن راشد الزیانی سے ٹیلی فونک رابطہ کیا-

    ترجمان دفتر خارجہ کے مطابق نائب وزیراعظم اور وزیر خارجہ سینیٹر محمد اسحاق ڈار نے بحرین کے وزیر خارجہ ڈاکٹر عبداللطیف بن راشد الزیانی سے ٹیلی فون پر گفتگو کی، دونوں رہنماؤں نے اسلام آباد مفاہمتی یادداشت پر دستخط کے بعد خطے میں ہونے والی پیشرفت اور موجودہ صورتحال کا جائزہ لیا۔

    بحرینی وزیر خارجہ نے اسلام آباد مفاہمتی یادداشت پر پاکستان کو مبارکباد دیتے ہوئے علاقائی امن کے لیے پاکستان کے مثبت اور تعمیری کردار کو سراہا، انہوں نے امید ظاہر کی کہ یہ پیشرفت خطے میں دیرپا امن اور استحکام کے قیام میں معاون ثابت ہوگی۔

    ڈاکٹر عبداللطیف بن راشد الزیانی نے کہا کہ وہ مستقبل قریب میں پاکستان کا دورہ کریں گے تاکہ وزیراعظم، نائب وزیراعظم و وزیر خارجہ اور چیف آف ڈیفنس فورسز کی جانب سے جنگ بندی اور امن کے لیے کی جانے والی کوششوں پر ذاتی طور پر اظہار تشکر کر سکیں۔

    اسحاق ڈار نے بحرینی ہم منصب کے خیرسگالی جذبات پر شکریہ ادا کرتے ہوئے کہا کہ پاکستان خطے اور دنیا میں امن و استحکام کے فروغ کے لیے بات چیت اور سفارت کاری کے راستے پر ثابت قدم رہے گا۔

  • خلا سے طوفانی بادلوں کی دنگ کر دینے والی انتہائی شاندار تصاویروائرل

    خلا سے طوفانی بادلوں کی دنگ کر دینے والی انتہائی شاندار تصاویروائرل

    امریکی خلائی تحقیقاتی ادارے (ناسا) کی خلاباز جیسیکا میئر نے بین الاقوامی خلائی اسٹیشن سے زمین کے مدار میں موجود طوفانی بادلوں کی دنگ کر دینے والی انتہائی شاندار تصاویر شیئر کی ہیں،خلانوردوں کے مطابق مدار سے بادلوں کی مختلف اشکال، بناوٹ اور سائز کا لامحدود اور مسحور کن نظارہ دیکھنے کو ملتا ہے-

    اگر زمین سے بادلوں کی طرف دیکھا جائے تو یہ ایک خوبصورت نظارہ پیش کرتے ہیں لیکن خلا سے وہ بالکل ہی مختلف منظر پیش کرتے ہیں،یہ تصاویر بحر الکاہل کے شمال مغرب (Pacific Northwest) کے اوپر گرج چمک والے بادلوں کی ہیں۔

    ناسا کی خلا باز جیسیکا میئر نے بین الاقوامی خلائی اسٹیشن سے بادلوں کی دلکش لیکن طاقت کو ظاہر کرنے والی تصاویر شیئر کی ہیں جیسیکا میئر نے تصاویر سوشل میڈیا پلیٹ فارم ایکس پر شیئر کی ہیں، جس میں بحر الکاہل کے شمال مغرب میں گرج چمک کے بادل دکھائی دے رہے ہیں۔

    اپنی پوسٹ میں انہوں نے لکھا کہ خلائی اسٹیشن سے بادلوں کو دیکھنا بھی دلکش ہے، جس میں شکلیں، بناوٹ اور سائز کی بے شمار ورائٹی ملتی ہےاکثر بادل پر سکون دکھائی دیتے ہیں لیکن بعض اوقات یہ ناگوار بھی ہوجاتے ہیں، جیسے اس ہفتے بحر الکاہل کے شمال مغرب میں گرج چمک کے بادل ہوئے۔

  • سرکاری نرخ نظرانداز،ایل پی جی کی قیمتوں میں من مانا اضافہ،شہری پریشان

    سرکاری نرخ نظرانداز،ایل پی جی کی قیمتوں میں من مانا اضافہ،شہری پریشان

    حکومت کی جانب سے قیمت مقرر کرنے کے باوجود پنجاب بھر میں ایل پی جی کی قیمتوں میں اضافے کا سلسلہ جاری ہے، جس کے باعث شہریوں کو شدید مشکلات کا سامنا ہے۔

    مارکیٹ ذرائع کے مطابق حکومت کی جانب سے ایل پی جی کی سرکاری قیمت 308 روپے فی کلو مقرر ہے تاہم لاہور میں مختلف دکاندار ایل پی جی 480 سے 500 روپے فی کلو تک فروخت کر رہے ہیں دکاندار اپنی مرضی سے روز 10 سے20 روپے فی کلو تک اضافہ کرتے ہیں،جس کی وجہ سے گھریلو صارفین پر مالی بوجھ بڑھ گیا ہے اور عام استعمال کی گیس مہنگی ہوتی جا رہی ہے اور گھریلو صارفین کو شدید مشکلات کا سامنا ہے۔

    دوسری جانب ایل پی جی سے چلنے والے رکشوں کے ڈرائیوروں کوبھی قیمتوں میں مسلسل اضافے سے شدید مشکلات کا سامنا ہے، ان کا کہنا ہے کہ ایندھن کی بڑھتی لاگت سے روزگار متاثر ہو رہا ہے اور آمدن میں نمایاں کمی آ گئی ہے شہریوں اور رکشہ ڈرائیوروں نے حکومت اور متعلقہ اداروں سے مطالبہ کیا ہے کہ سرکاری نرخ نامے پر سختی سے عمل درآمد یقینی بنایا جائے، ذخیرہ اندوزی اور ناجائز منافع خوری کے خلاف مؤثر کارروائی کی جائے تاکہ عوام کو ریلیف فراہم کیا جا سکے۔

    اس حوالے سے وفاقی وزیر پٹرولیم علی پرویز ملک کا کہنا ہے کہ ایل پی جی کی بلیک قیمت پر ذمہ داران کے خلاف کارروائی ہوگی، مارکیٹنگ کمپنیوں کو بھی نوٹس بھجوائے رہے ہیں، متعلقہ ادارے سرکاری نرخ نامے پر سختی سے عملدرآمد یقینی بنائیں، ذخیرہ اندوزی اور ناجائز منافع خوری کے خلاف مؤثر کارروائی کی جائے گی۔

  • عالمی سطح پر پاکستان کی تاریخی پذیرائی دشمن سے ہضم نہیں ہورہی،بلاول بھٹو

    عالمی سطح پر پاکستان کی تاریخی پذیرائی دشمن سے ہضم نہیں ہورہی،بلاول بھٹو

    چیئرمین پیپلزپارٹی بلاول بھٹو زرداری نے کراچی میں رینجرز کے کیمپ پر حملے کی مذمت کرتے ہوئے 3 اہلکاروں کی شہادت پر اظہار افسوس کیا ہے-

    چیئرمین پیپلز پارٹی بلاول بھٹو زرداری نے کراچی میں رینجرز کیمپ پر دہشت گرد حملے کی شدید مذمت کی ہے انہوں نے اس بزدلانہ کارروائی میں رینجرز کے 3 اہلکاروں کی شہادت پر گہرے رنج و غم کا اظہار کیا اور جام شہادت نوش کرنے والے جوانوں کو خراج عقیدت پیش کیا اپنے بیان میں بلاول بھٹو نے سیکیورٹی فورسز کی بروقت اور پیشہ ورانہ کارروائی کی تعر یف کی، جس کے نتیجے میں حملہ آور دہشت گردوں کو جہنم واصل کر کے کیمپ پر قبضہ کرنے کی مذموم کوشش ناکام بنا دی گئی۔ انہوں نے دہشت گردوں اور ان کے سہولت کاروں کو کیفرِ کردار تک پہنچانے کے عزم کا اعادہ کیا –

    ترجمان بلاول ہاؤس کے مطابق چیئرمین پیپلزپارٹی نے شہید اہلکاروں کو خراج عقیدت پیش کیا اور شہداء کےلواحقین سے دلی تعزیت کا اظہار کیابلاول بھٹو نے اپنے بیان میں کہا کہ بزدلانہ فعل سےواضح ہوا کہ عالمی سطح کےسفارتی محاذ پر پاکستان کی تاریخی پذیرائی دشمن سے ہضم نہیں ہورہی، پاکستانی قوم اپنے وطن کی حفاظت اور دشمن کے مذموم عزائم کو خاک میں ملانے کے لیے پُرعزم ہے۔

  • پاکستان کی معروف شیف راحت علی انتقال کر گئیں

    پاکستان کی معروف شیف راحت علی انتقال کر گئیں

    پاکستان کی معروف شیف راحت علی انتقال کر گئیں۔

    راحت علی کا شمار پاکستان کے معروف ترین شیفس میں ہوتا تھا، ان کی آسان تراکیب، منفرد پکوان اور سادہ انداز نے لاکھوں لوگوں خصوصاً گھریلو خواتین کے دل جیت لیے، ان کی مسکراہٹ اور دوستانہ انداز انہیں ناظرین میں بے حد مقبول بناتا تھا، انکے کوکنگ شوز نے نہ صرف کھانا پکانے کو آسان بنایا بلکہ بے شمار لوگوں کو نئے ذائقے آزمانے کی ترغیب بھی دی۔

    شیف راحت علی کی بھانجی نے سوشل میڈیا پر ان کے انتقال کی خبر شیئر کی ہے جس کے بعد مداحوں اورمختلف شعبہ ہائے زندگی سےتعلق رکھنے والی شخصیات نےگہرے دکھ اور افسوس کا اظہارکرتے ہوئے ان کی خدمات کو خراجِ عقیدت پیش کیا۔

    واضح رہے کہ مرحومہ کی صاحبزادی شیف مائدہ راحت علی بھی ایک معروف شیف ہیں جو اس وقت امریکا میں مقیم ہیں، وہاں وہ اپنے شعبے میں خدمات انجام دے رہی ہیں-

  • فیفا ورلڈکپ 2026: آسٹریا 72 سال میں پہلی بار ناک آؤٹ مرحلے میں پہنچ گیا، ایران ایونٹ سے باہر

    فیفا ورلڈکپ 2026: آسٹریا 72 سال میں پہلی بار ناک آؤٹ مرحلے میں پہنچ گیا، ایران ایونٹ سے باہر

    فٹبال ورلڈ کپ میں الجزائر اور آسٹریا کی ٹیمیں راؤنڈ آف 32 کے لیے کوالیفائی کر گئیں جبکہ ایران ایونٹ سے باہر ہو گیا۔

    الجزائز اور آسٹریا کا سنسنی خیز میچ تین تین گول سے برابر ہو گیا جس کے بعد ایران فٹبال ورلڈ کپ سے باہر ہو گیا ہے ناک آؤٹ مرحلے تک رسائی کے لیے دونوں ٹیموں میں سے کسی ایک کا جیتنا ضروری تھا،الجزائز اور آسٹریا کا میچ ابتدائی 60 منٹ تک مقابلہ دو دو گول سے برابر رہا جس کے بعد الجزائر نے دوسرے ہاف کے انجری ٹائم میں تیسرا گول کر کے برتر ی حاصل کی ، میچ کے بالکل اختتامی لمحات میں آسٹریا نے تیسرا گول کیا اور راؤنڈ آف 32 میں جگہ بنا لی۔

    اس کے علاوہ فٹ بال ورلڈ کپ کے کے گروپ کے میچ میں کانگو نے اُزبکستان کو ایک کے مقابلے میں تین گول سے شکست دے دی، جبکہ پُرتگال اور کولمبیا کا میچ دلچسپ مقا بلے کے بعد بغیر کسی گول کے برابر رہا آسٹریا کی ٹیم 72 سال میں پہلی مرتبہ میگا ایونٹ کے ناک آؤٹ راؤنڈ میں پہنچی ہے، اس کا مقابلہ اسپین سے ہو گا، ناک آؤٹ راؤنڈ میں پُرتگال کا میچ کروشیا سے ہو گا، کولمبیا کی ٹیم گھانا سے کھیلے گی، کانگو اور انگلینڈ آمنے سامنے ہوں گے۔

    میگا ایونٹ کے گروپ میچز کے آخری روز گروپ کے کے بھی دو مقابلے ہوئے جس میں کانگو نے اُزبکستان کو تین ایک سے مات دی، میچ میں پہلے اُزبکستان نے شومورودوف کے گول کی بدولت برتری حاصل کی،دوسرے ہاف میں کانگو کی ٹیم کا پلہ بھاری رہا جس نے حریف پر تین گول داغ دیئے، اُن کی جانب سے دو گول ویسا نے اسکور کئے، ایک گول میلیے نے بنایا، راؤنڈ آف تھرٹی ٹو میں اُس کا مقابلہ انگلینڈ سے ہو گا۔