Baaghi TV

Tag: تازہ ترین

  • پاکستان اور روس کے درمیان مثبت پیشرفت نے باہمی اعتماد کو مضبوط کیا ہے،اویس لغاری

    پاکستان اور روس کے درمیان مثبت پیشرفت نے باہمی اعتماد کو مضبوط کیا ہے،اویس لغاری

    وفاقی وزیر توانائی اویس لغاری نے کہا ہے کہ عالمی منظرنامے میں پاکستان اور روس کے تعلقات نئی وسعتوں کی جانب گامزن ہیں، اور گزشتہ 2 دہائیوں کے دوران ہونے والی مثبت پیشرفت نے دونوں ممالک کے درمیان باہمی اعتماد کو مزید مضبوط بنایا ہے۔

    تفصیلات کے مطابق اویس لغاری نے بدلتے ہوئے عالمی نظام کے تناظر میں پاکستان اور روس کے دوطرفہ تعلقات کے ویبینار سے خطاب میں کہا کہ پاکستان اور روس کے درمیان دو دہائیوں پر محیط مثبت پیش رفت نے باہمی اعتماد کو مضبوط کیا ہے-

    انہوں نے کہا کہ پاکستان اور روس کے درمیان تجارت، توانائی، صنعت، تعلیم اور سائنس سمیت مختلف شعبوں میں تعاون فروغ پا رہا ہے، پاکستان بین الا قوامی شمال،جنوب ٹرانسپورٹ کوریڈور میں شمولیت کا خواہاں ہے، گوادر بندرگاہ کو بین الاقوامی شمال،جنوب ٹرانسپورٹ کوریڈور سے جوڑنے کی تجویز خوش آئند ہے۔

    انہوں نے مزید کہا کہ پاکستان اور روس کے درمیان 2030 تک اقتصادی تعاون کے پروگرام پر اتفاق اہم پیش رفت ہے، دونوں ممالک ادائیگیوں کے نظام سمیت تجارتی رکاوٹوں کے خاتمے کے لیے فعال مشاورت کر رہے ہیں، روس پاکستان ری ایڈمیشن معاہدے سے ویزا سہولتوں، کاروباری روابط اور ثقافتی تبادلوں کو فروغ ملے گا، جبکہ پاکستان روس میں منعقد ہونے والے اہم اقتصادی اور بین الاقوامی فورمز میں باقاعدگی سے شرکت کر رہا ہے۔

    اویس لغاری نے کہا کہ صدر ولادیمیر پیوٹن کی جانب سے پاکستان کو اہم عالمی شراکت دار قرار دینا دونوں ممالک کے تعلقات کی بڑھتی ہوئی اہمیت کا مظہر ہےاسلام آباد اور ماسکو کے درمیان مضبوط ہوتے روابط نہ صرف دوطرفہ مفادات بلکہ وسیع تر یوریشیائی تعاون، علاقائی استحکام اور اقتصادی انضمام کے لیے بھی اہم کردار ادا کریں گے۔

  • فتنہ الخوارج، بھارت اور کالعدم عوامی ایکشن کمیٹی کا گٹھ جوڑ بے نقاب، خارجی شہزاد کی آڈیوز اور ویڈیوز وائرل

    فتنہ الخوارج، بھارت اور کالعدم عوامی ایکشن کمیٹی کا گٹھ جوڑ بے نقاب، خارجی شہزاد کی آڈیوز اور ویڈیوز وائرل

    افغانستان میں فتنہ الخوارج اور بھارتی خفیہ ایجنسی ‘را’ (RAW) کے لیے سرگرم دہشت گرد خارجی شہزاد کے کالعدم ایکشن کمیٹی (جوائنٹ عوامی ایکشن کمیٹی) کے ساتھ گہرے روابط کی مبینہ ویڈیوز اور آڈیوز منظر عام پر آ گئی ہیں-

    سامنے آنے والی ویڈیوز اور آڈیوز کے مطابق، خارجی شہزاد افغانستان میں مقیم ہے اور اسے بھارتی خفیہ ایجنسی ‘را’ کی مکمل مالی و عسکری معاونت حاصل ہےاس نیٹ ورک کے کالعدم جوائنٹ ایکشن کمیٹی کے رہنماؤں کے ساتھ رابطوں کی تصدیق ہوئی ہے جس کا بنیادی مقصد پاکستان مخالف ایجنڈے کو آگے بڑھانا تھا-

    ان روابط کا مقصد پاکستان، بالخصوص آزاد کشمیر اور دیگر علاقوں میں بدامنی، انتشار اور پرتشدد احتجاج کی آڑ میں ریاستی اداروں کو نقصان پہنچانا تھا۔ملک میں امن و امان کی صورتحال کو برقرار رکھنے اور ریاست مخالف عناصر کو بے نقاب کرنے کے لیے قانون نافذ کرنے والے ادارے متحرک ہیں-

    خارجی شہزاد نے تحریر شدہ بیان پڑھتے ہوئے کہا کہ کالعدم جوائنٹ عوامی ایکشن کمیٹی احتجاج کرکے آپ سے آزادی لینا چاہتی تھی جو ان کا حق ہے، پاکستان کی ریاست کے حوالے سے آئندہ پیشرفت اور اس کے اثرات بہت جلد سب کے سامنے آ جائیں گے۔

    خارجی شہزاد اور کالعدم جوائنٹ ایکشن کمیٹی کے راہنما کی آڈیو لیک کے مطابق ’ہم انتخابات کے انعقاد کی ہر طرح سے مخالفت کریں گے اور انہیں کسی صورت منعقد نہیں ہونے دیں گے، ہمیں عسکریت اور طاقت کے ذریعے کشمیر کی فوج بحال کرکے آزادی اور دیگر معاملات میں سب کشمیروں کو شامل کرناچاہیے۔

    ماہرین کے مطابق لڑکھڑاتی آواز میں بھارتی تحریر کردہ بیان سے واضح ہےکہ بدامنی اور انتشار کے مذموم عزائم بھارتی پشت پناہی پر کیےجا رہے ہیں
    خا ر جی شہزاد کی بھارتی ایما پر پرتشددکارروائیوں کی حمایت عکاس ہے کہ جوائنٹ عوامی ایکشن کمیٹی پر پابندی کا فیصلہ درست ہے فتنہ الخوارج ایک دہشتگرد گروہ ہے جسے بھارت کی مکمل پشت پناہی حاصل ہے اور اس کی کالعدم جوائنٹ ایکشن کمیٹی کی حمایت سے بھارت کا مکروہ چہرہ کھل کرسامنے آگیا ہے۔

    کالعدم جوائنٹ ایکشن کمیٹی کی حمایت میں فتنہ الخوارج کی اعلانیہ صف بندی، آزاد کشمیر میں بھارتی عزائم کی ناکامی پر اس کی بے چینی کا واضح ثبوت ہے-

  • کیٹی پیری اور جسٹن ٹروڈو کا ریڈ کارپٹ ڈیبیو، سوشل میڈیا پر دھوم

    کیٹی پیری اور جسٹن ٹروڈو کا ریڈ کارپٹ ڈیبیو، سوشل میڈیا پر دھوم

    امریکی پاپ اسٹار کیٹی پیری اور کینیڈا کے سابق وزیر اعظم جسٹن ٹروڈو نے نیویارک میں ہونے والے ٹریبیکا فیسٹیول میں پہلی بار ایک ساتھ ریڈ کارپٹ پرآمد سےاپنے افیئر کی افواہوں کو حقیقت کا روپ دے دیا ہے-

    دونوں ایک دوسرے کا ہاتھ تھامے 8 جون کو کیٹی پیری کی نئی دستاویزی فلم کیٹی پیری دی لائف ٹائمز ٹور، لائیو فرام پیرس کے پریمیئر کے لیے پہنچے تھے، یہ تقریب بنیادی طور پر کیٹی پیری کے نئے پروجیکٹ کے جشن کے لیے سجائی گئی تھی لیکن جیسے ہی یہ دونوں ایک ساتھ نمودار ہوئے، سب کی نظریں ان پر ٹک گئیں۔

    ریڈ کارپٹ پر ان کی محبت بھری گفتگو اور ایک دوسرے کے ساتھ کھچوائی گئی تصاویر نے سوشل میڈیا پر دھوم مچا دی اور یہ رشتہ اس شام کا سب سے بڑا موضوع بن گیا جس نے سال 2025 سے چلنے والی تمام افواہوں پر مہر لگا دی،کیمروں کی چمک اور مداحوں کے شور کے درمیان دونوں ایک دوسرے کے ساتھ نہایت خوش اور مطمئن نظر آئے، فوٹوگرافروں کو پوز دیتے رہے اور مداحوں سے بھی خوشگوار انداز میں ملتے رہے۔

    پریمیئر کے موقع پر جب کیٹی پیری اپنے مداحوں سے مل رہی تھیں، آٹو گراف دے رہی تھیں اور سیلفیاں بنا رہی تھیں، تو ٹروڈو مسلسل ان کے ساتھ ساتھ رہے۔ اگرچہ یہ کیٹی پیری کی فلم کا شو تھا، لیکن اس جوڑے کی آمد نے تمام توجہ اپنی طرف مبذول کر لی، یہ تقریب کیٹی پیری کے لیے ویسے بھی بہت ا ہم تھی کیونکہ ان کی دستاویزی فلم، جس کی ہدایت کاری پال ڈگڈیل نے کی ہے، نومبر2025 کے پیرس کنسرٹس کی یادوں پر مبنی ہے اور اسے ساٹھ کیمر و ں کی مدد سے فلمایا گیا ہے۔

    ان دونوں کے درمیان تعلق کی افواہیں 2025 میں اس وقت شروع ہوئیں جب انہیں مونٹریال اور دیگر مقامات پر ایک ساتھ دیکھا گیا یہ تجسس اس وقت اور بڑھ گیا جب ایک ویڈیو سامنے آئی جس میں جسٹن ٹروڈو کو شہر میں کیٹی پیری کے ایک کنسرٹ میں شرکت کرتے دیکھا گیااس کے بعد دسمبر میں کیٹی پیری نے ٹوکیو سے کچھ تصاویر اور ویڈیوز شیئر کیں جن میں کینیڈا کے سابق وزیر اعظم بھی موجود تھے۔ تب سے اب تک دونوں کو کئی بار ایک ساتھ دیکھا گیا، لیکن دونوں میں سے کسی نے بھی اپنے رشتے پر کھل کر بات نہیں کی۔

  • پاکستان اور چین کے تعلقا ت وقت کی ہر آزمائش پر پورا اترے ہیں،عطا اللہ تارڑ

    پاکستان اور چین کے تعلقا ت وقت کی ہر آزمائش پر پورا اترے ہیں،عطا اللہ تارڑ

    وزیر اطلاعات عطا اللہ تارڑ نے کہا ہے کہ پاکستان اور چین کے درمیان 75 سالہ دوستی کا سفر باہمی اعتماد، تعاون اور آزمودہ شراکت داری کی روشن مثال ہے-

    سی پیک کی تعمیر، پاک چین دوستی کے 75 برس مکمل ہونے اور گلوبل گورننس اقدامات سے متعلق تقریب سے خطاب کرتے ہوئے انہوں نے کہا کہ پاکستان اور چین دوستی کے 75 سال مکمل ہونے کا جشن منا رہے ہیں، جو دونوں ممالک کے لیے انتہائی مسرت کا موقع ہے پاکستان اور چین کے تعلقا ت وقت کی ہر آزمائش پر پورا اترے ہیں –

    انہوں نے کہا کہ پاکستان اور چین نہ صرف جغرافیائی طور پر ہمسایہ ممالک ہیں بلکہ دونوں ملکوں کے عوام کے درمیان بھی گہرے اور مضبوط روابط موجود ہیں صدر شی جن پنگ کے دورہ پاکستان نے دوطرفہ تعلقات کے فروغ میں اہم کردار ادا کیا اور تعاون کے نئے راستے کھولے سی پیک چین کے ’ایک خطہ، ایک سڑک‘ وژن کا ایک اہم جزو ہے اور یہ منصوبہ پاکستان میں ترقی، خوشحالی اور اقتصادی استحکام کی بنیاد بن رہا ہے۔

    عطا اللہ تارڑ نے کہا کہ دونوں ممالک کے درمیان عوامی روابط، میڈیا تعاون، ثقافتی تبادلوں اور مختلف شعبوں میں اشتراک مسلسل فروغ پا رہا ہے، جبکہ وفود کے تبادلے دوطرفہ تعلقات کو مزید مستحکم بنانے میں اہم کردار ادا کر سکتے ہیں،پاکستان گلوبل ڈویلپمنٹ انیشی ایٹو سمیت مختلف بین الاقوامی ترقیاتی اقدامات کو آگے بڑھانے میں بھرپور کردار ادا کرتا رہے گا اور دونوں ممالک کی دوستی آنے والے برسوں میں مزید مضبوط ہوگی۔

  • عالمی منڈی میں تیل کی قیمتوں میں کمی

    عالمی منڈی میں تیل کی قیمتوں میں کمی

    عالمی منڈی میں تیل کی قیمتوں میں کمی دیکھنے میں آئی ہے-

    منگل کے روز برینٹ کروڈ کی قیمت 91 سینٹ کمی کے ساتھ 93.34 ڈالر فی بیرل ہو گئی، جبکہ امریکی ویسٹ ٹیکساس انٹرمیڈیٹ (WTI) کی قیمت 1.13 ڈالر کمی کے بعد 90.17 ڈالر فی بیرل ریکارڈ کی گئی۔

    یہ کمی اس وقت سامنے آئی جب ایران اور اسرائیل نے امریکی صدر ڈونلڈ ٹرمپ کی اپیل پر حملے روکنے کا اعلان کیا، اگرچہ دونوں ممالک نے خبردار کیا ہے کہ ضرورت پڑنے پر کارروائیاں دوبارہ شروع کی جا سکتی ہیں۔

    اس سے قبل قیمتوں میں 5 فیصد تک اضافہ دیکھا گیا تھا جب اسرائیل کے ایران اور لبنان میں حملوں نے جنگ کے خاتمے کی امیدوں کو کمزور کر دیا تھا، تاہم بعد ازاں ایران کی جانب سے فوجی کارروائیاں روکنے کے اعلان پر قیمتیں نیچے آ گئیں۔

    تجزیہ کاروں کے مطابق وقتی طور پر کشیدگی میں کمی سے مارکیٹ کو کچھ ریلیف ملا ہے؛ یہ صورتحال دیرپا ثابت ہوئی تو ملک میں پیٹرولیم مصنوعات کی قیمتوں میں واضح کمی کا امکان ہے۔

    اسرائیلی وزیر اعظم بنیامین نیتن یاہو نے بھی خبردار کیا ہے کہ اگر ایران نے دوبارہ حملہ کیا تو بھرپور جواب دیا جائے گا، جبکہ ایران نے کہا ہے کہ اگر لبنان میں حزب اللہ کو نشانہ بنایا گیا تو وہ کارروائی دوبارہ شروع کرے گاادھر امریکا ایران سے مذاکرات میں آبنائے آبنائے ہرمز کھولنے پر زور دے رہا ہے، جہاں سے دنیا کی تقریباً پانچویں حصے کی تیل سپلائی گزرتی ہے۔

  • 12 جون تک گرمی کی شدت برقرار، پنجاب اور خیبرپختونخوا میں بارش کی بھی پیشگوئی

    12 جون تک گرمی کی شدت برقرار، پنجاب اور خیبرپختونخوا میں بارش کی بھی پیشگوئی

    محکمہ موسمیات کے مطابق آج سے 12 جون تک ملک کے بیشتر میدانی علاقوں میں درجہ حرارت میں اضافے کا امکان ہے۔

    محکمہ موسمیات کا کہنا ہے کہ بالائی علاقوں میں دن کے وقت درجہ حرارت معمول سے 4 سے 6 ڈگری سینٹی گریڈ جبکہ زیریں علاقوں میں 5 سے 7 ڈگری سینٹی گریڈ زیادہ رہنے کی توقع ہے، اسلام آباد، شمالی پنجاب اور بالائی خیبرپختونخوا کے مختلف اضلاع میں کل تک شدید گرمی برقرار رہے گی، تاہم اسلام آباد میں 11 اور 12 جون کو بارش کا امکان ہے۔

    این ڈی ایم اے کے مطابق خیبرپختونخوا اور شمالی پنجاب کے مختلف علاقوں میں بھی 11 اور 12 جون کو بارش متوقع ہے، راولپنڈی، لاہور اور دیگر اضلاع میں گرج چمک کے ساتھ بارش کی پیشگوئی کی گئی ہے۔

    دوسری جانب کراچی، حیدرآباد، سکھر، لاڑکانہ اور سندھ کے بیشتر اضلاع میں گرمی کی شدت برقرار رہنے کا امکان ہے بلوچستان کے اضلاع ژوب اور موسیٰ خیل میں 11 اور 12 جون کو گرج چمک کے ساتھ بارش متوقع ہے پشاور، سوات، چترال، مانسہرہ اور ایبٹ آباد میں بھی 11 اور 12 جون کو بارش کا امکان ظاہر کیا گیا ہے، جبکہ گلگت بلتستان اور آزاد کشمیر میں 12 جون سے بارشوں کا سلسلہ شروع ہونے کی توقع ہے۔

  • وفاقی بجٹ 12 جون کو پیش کیا جائے گا

    وفاقی بجٹ 12 جون کو پیش کیا جائے گا

    قومی اسمبلی اور سینیٹ کا اجلاس کل طلب کر لیا گیا جبکہ سالانہ بجٹ 12 جون کو پیش کیا جائے گا۔

    صدر پاکستان آصف علی زرداری نے وزیراعظم شہباز شریف کی ایڈوائس پر قومی اسمبلی کے دونوں ایوانوں کا اجلاس کل طلب کر لیا ہے قومی اسمبلی کا اجلاس کل شام 5 بجے طلب کیا گیا ہے جبکہ سینیٹ کا اجلاس کل سہ پہر 4 بجے طلب کیا گیا ہے۔

    وفاقی وزیر برائے پارلیمانی امور طارق فضل چوہدری کا کہنا ہے کہ بجٹ جمعہ12 جون کو قومی اسمبلی میں پیش کیا جائےگا، وفاقی وزیر خزانہ محمد اورنگزیب قومی اسمبلی میں مالی سال 2026.27 کا وفاقی بجٹ پیش کریں گے۔

  • 9 جون کی شام آسمان پر شاندار اور نایاب منظردیکھائی دے گا

    9 جون کی شام آسمان پر شاندار اور نایاب منظردیکھائی دے گا

    ماہرین فلکیات کے مطابق 9 جون کی شام ایک شاندار اور نایاب فلکیاتی منظر دیکھنے کو ملے گا، جب سیارہ زہرہ اور سیارہ مشتری مغربی افق پر ایک دوسرے کے بے حد قریب نظر آئیں گے۔

    ناسا کے مطابق اس مظہر کو "قران” (Conjunction) کہا جاتا ہے جس میں دو سیارے زمین سے دیکھنے پر بہت قریب دکھائی دیتے ہیں حالانکہ حقیقت میں ان کے درمیان کروڑوں کلومیٹر کا فاصلہ ہوتا ہے،یہ دلکش منظر 8 اور 9 جون کو اپنے عروج پر ہوگا، جب دونوں سیارے تقریباً 1.5 سے 2 ڈگری کے فاصلے پر نظر آئیں گے جو کہ دوربین کے بغیر بھی واضح طور پر دیکھا جا سکتا ہے۔

    ماہرین کے مطابق زہرہ، جو رات کے آسمان کا سب سے روشن سیارہ ہے، اور مشتری، جو دوسرے نمبر پر روشن ہے، صاف موسم کی صورت میں آسانی سے نظر آئیں گے یہ دونوں سیارے غروب آفتاب کے بعد تقریباً دو سے ڈھائی گھنٹے تک مغربی سمت میں دکھائی دیں گے یہ نظارہ شمالی نصف کرے میں 2028 تک زہرہ اور مشتری کا سب سے قریبی ملاپ ہوگا، جس کے باعث اسے خاص اہمیت حاصل ہے ، اسی دوران سیارہ عطارد بھی ان کے نیچے نظر آ سکتا ہے، جبکہ یہ منظر برج جوزا کے قریب وقوع پذیر ہوگا، جہاں پولکس اور کاسٹر ستارے بھی دیکھے جا سکتے ہیں،یہ ایک آسانی سے نظر آنے والا فلکیاتی مظہر ہے جس کے لیے کسی خاص آلات کی ضرورت نہیں۔

  • اغوا برائے تاوان کا کیس،اداکار منیب بٹ کی عدالت میں پیشی

    اغوا برائے تاوان کا کیس،اداکار منیب بٹ کی عدالت میں پیشی

    عدالت نے اغوا برائے تاوان کے مقدمے میں اداکار منیب بٹ کی عبوری ضمانت میں توسیع کرتے ہوئے آئندہ سماعت تک حفاظتی ریلیف برقرار رکھا۔

    اداکار منیب بٹ انسداد دہشتگردی کی خصوصی عدالت میں اغوا برائے تاوان کے مقدمے کی سماعت کے دوران پیش ہوئےائیرپورٹ پولیس کی جانب سے درج کیے گئے مقدمے میں اداکار منیب بٹ کو نامزد کیا گیا ہے مقدمہ 23 اپریل کو متعال خان کی مدعیت میں درج کیا گیا تھا، جس میں الزام عائد کیا گیا ہے کہ منیب بٹ نے دیگر ملزمان کے ساتھ مل کر مدعی کو مبینہ طور پر اغوا کیا۔

    پولیس کے مطابق مقدمے میں یہ بھی مؤقف اختیار کیا گیا ہے کہ مبینہ طور پر ملزمان نے مغوی کو اغوا کے بعد اس کے اکاؤنٹ سے لاکھوں روپے مالیت کی کرپٹو کرنسی اپنے اکاؤنٹس میں منتقل کی کرپٹو کرنسی کی مبینہ منتقلی کے بعد متاثرہ شخص کو کورنگی کے علاقے میں چھوڑ دیا گیا،عدالت میں سماعت کے دور ان منیب بٹ نے عبوری ضمانت میں توسیع کی درخواست دائر کی، جسے منظور کرتے ہوئے عدالت نے ان کی ضمانت میں توسیع کر دی۔

    واضح رہے کہ مقدمہ ابتدائی مرحلے میں ہے اور پولیس کی جانب سے مزید تفتیش جاری ہے، جبکہ عدالت نے آئندہ سماعت پر پیش رفت رپورٹ طلب کر لی ہے-

  • نیپرا کا ملک بھر میں بجلی کی قیمت میں کمی کا اعلان

    نیپرا کا ملک بھر میں بجلی کی قیمت میں کمی کا اعلان

    ملک بھر کے بجلی صارفین کے لیے سہہ ماہی ایڈجسٹمنٹ کی مد میں بجلی کی قیمت میں کمی کی گئی ہے۔

    ذرائع کے مطابق نیشنل الیکٹرک پاور ریگولیٹری اتھارٹی (نیپرا) نے بجلی ایک روپے 99 پیسے فی یونٹ سستی کرنے کا نوٹیفکیشن جاری کر دیا ہے، یہ فیصلہ بجلی حکومتی منظوری کے بعد جاری کیا گیا ہے۔

    نیپرا کے نوٹیفکیشن کے مطابق بجلی کی قیمت میں یہ کمی جنوری تا مارچ 2026 کی سہہ ماہی ایڈجسٹمنٹ کی مد میں کی گئی ہے، جبکہ اس کا اطلاق جون سے اگست 2026 تک تین ماہ کے لیے ہوگا اس ریلیف کا اطلاق ملک بھر کے تمام صارفین پر ہوگا، جس میں کے الیکٹرک کے صارفین بھی شامل ہیں۔

    بجلی کی قیمت میں کمی کے نتیجے میں صارفین کو مجموعی طور پر 67 ارب 17 کروڑ 30 لاکھ روپے کا ریلیف ملے گا، یہ اقدام سہہ ماہی ایڈجسٹمنٹ میکانزم کے تحت کیا گیا ہے، جس کا مقصد صارفین پر بجلی کی لاگت کا بوجھ کم کرنا ہے۔