پاکستان تحریک انصاف (پی ٹی آئی) پارٹی چیئرمین عمران خان زمان پارک میں اپنی رہائش گاہ سے مینار پاکستان پہنچ گئے جہاں ان کا خطاب جاری ہے-
باغی ٹی وی : عمران خان کے خطاب کیلئے جلسہ گاہ میں بلٹ پروف کیبن لگادی گئی ہے جہاں سے چیئرمین تحریک انصاف جلسے کے شرکا سے خطاب کر رہے ہیں پی ٹی آئی چیئرمین عمران خان زمان پارک سے مینار پاکستان کیلیے روانہ ہوئے تو کارکنوں کی بڑی تعداد اُن کے ساتھ موجود تھی جبکہ ٹائیگر فورس کے رضاکاروں نے ان کی گاڑی کو حصار میں لیا ہوا تھا۔ اس موقع پر پولیس نے بھی چیئرمین پی ٹی آئی کی گاڑی کے لیے راستہ بنایا۔
عمران خان کا کہنا تھا کہ جلسے میں وہ نئے لائحہ عمل کا اعلان کریں گے۔ انہوں نے الزام لگایا کہ ان کی پارٹی کے 1600 کارکنوں کو گرفتار کیا گیا ہے، جلسہ گاہ پہنچنے سے روکنے کےلیے رکاوٹیں کھڑی کی گئی ہیں۔
مینار پاکستان پر جلسہ سے خطاب کرتے ہوئے سابق وزیراعظم اور پاکستان تحریک انصاف (پی ٹی آئی) کے چیئرمین عمران خان نے کہا ہے کہ ہر قسم کی رکاوٹ کے باوجود عوام اتنی بڑی تعداد میں مینار پاکستان آئے، آج میں بتاؤں گا کہ کس طرح ملک کو اس دلدل سے نکالنا ہےایک سازش کے تحت ہماری حکومت گرائی گئی، سازش کے تحت ہمارے ملک پر جرائم پیشہ کو مسلط کیا گیا۔
عمران خان نے کہا کہ جو آج طاقت میں ہیں ان کو ایک پیغام جانا چاہیے لوگوں کا جنون کنٹینرز نہیں روک سکتے، جلسہ فیل کرنے کے لیے خوف ہراس پھیلایا گیا باہر کے لوگوں کو ظلم کے سامنے کھڑے ہوتے دیکھا ہے، باہر کے لوگوں کو امر بالمعروف پر چلتے دیکھا ایک قوم میں اصل آزادی تب ملتی ہے جب انصاف ہوتا ہے، قانون کی حکمرانی سے ہمیں جو آزادی ملنی چاہیے تھی وہ نہیں ملی۔ ہماری بدقسمتی یہ ہےکہ ڈیموکریٹس نے بھی قانون کو نہیں چلنے دیا۔
عمران خان نے کہا کہ جب قانون کی حکمرانی نہیں آئی تو یہاں جنگل کا قانون رہا ہے، جس ملک میں طاقتور کمزور پر ظلم کرسکے ان کو بنانا ریپبلک کہتے ہیں لیول پیلنگ فیلڈ کا مطلب یہ نہیں کہ عمران خان کے ہاتھ باندھ دو، میرے اوپر کیسز کی سینچری تو ہوگئی ہے اب ڈیڑھ سو پر جارہا ہوں، مجھ پر دہشت گردی کے 40 کیسز ہیں۔
قبل ازیں تحریک انصاف کے جلسے سے خطاب کرتے ہوئے عوامی مسلم لیگ کے سربراہ شیخ رشید احمد نے الیکشن کی تاریخ کی تبدیلی پر کہا ہے کہ 30 اپریل کو 8 اکتوبر سے اس لیے بدلا ہے کیونکہ اس وقت عارف علوی صدر نہیں ہوں گے۔ہماری فوج سے لڑائی نہیں ہے، صحافیوں سے بھی کہنا چاہتا ہوں کہ ہماری کسی چینل سے لڑائی نہیں ہے۔
شیخ رشید احمد کا کہنا تھا کہ پولیس والوں تم نے ایک درویش ظل شاہ کو مارا ہے قوم عمران خان کے ساتھ ہے، چوروں سے نجات حاصل کرنا چاہتی ہے، چورو، لیٹرو! قوم عمران خان کی قیادت میں اکٹھی ہوچکی ہے تم اپنی سیاست نہیں اس ریاست کو تباہ کرنے آئے ہو 12 مہینے سے آئی ایم ایف سے مذاکرات کر رہے ہیں، آئی ایم ایف آپ پر تھوک نہیں رہی۔
انہوں نے کہا کہ چیف جسٹس صاحب ساری قوم سپریم کورٹ کی طرف دیکھ رہی ہے قوم کو عمران خان نے بیداری دی ہے۔ سب کو کہتا ہوں آؤ بیٹھو، الیکشن کا فیصلہ کرو پاکستان کے قومی اثاثے ہمارے دفاع کے ضامن ہیں۔
دوسری طرف پنجاب حکومت نے رکاوٹیں کھڑی کرنے کی تردید تو ضرور کی لیکن تھریٹ الرٹ بھی جاری کیا ہےجس میں لکھا گیا ہے کہ کالعدم ٹی ٹی پی نے ملک میں انتشار پھیلانے کیلیے پی ٹی آئی کو نشانہ بنانے کا منصوبہ تیار کیا ہے، جس کے لیے 25 خود کش حملہ آور لاہور بھیجے گئے ہیں پی ٹی آئی کے جلسہ گاہ مینار پاکستان گراؤنڈ جانے والے تمام راستے بند کردیئے گئے لاہور میں مینار پاکستان اور ملحقہ علاقوں میں انٹر نیٹ سروس بند کردی گئی۔
ترجمان لاہور پولیس کا کہنا تھا کہ اقدامات سیکیورٹی خدشات کے پیشِ نظر کیے گئے، حفاظتی اقدامات کو راستہ روکنے کا تاثر نہ دیا جائے نگراں وزیرِ اطلاعات عامر میر نے تمام راستے بند کرنے کی تردید کرتے ہوئے کہا کہ تھریٹ الرٹ ہے، دہشت گرد جلسے پر تعینات پولیس اہل کاروں کو نشانہ بنا سکتے ہیں ناکوں کا مقصد عوام کو تکلیف دینا نہیں بلکہ تحفظ دینا ہے۔
پنجاب پولیس نے سراغ رساں کتوں اور میٹل ڈٹیکٹر کی مدد سے جلسہ گاہ کی تلاشی لی جبکہ بم ڈسپوزل اسکواڈ نے بھی پنجاب پولیس کے ہمراہ جلسہ گاہ معائنہ کیا۔
