Author: Aqsa Younas Rana

‎سائنسدانوں نے زمین کے حجم کے قریب ایک ایسے سیارے کی دریافت کا اعلان کیا ہے جس پر انسانی رہائش کے امکانات موجود ہو سکتے ہیں۔ یہ سیارہ زمین سے تقریباً 146 نوری برس کے فاصلے پر واقع ہے اور اس کا ماحول مریخ سے ملتا جلتا بتایا جا رہا ہے۔
‎اس سیارے کو ایچ ڈی 137010 بی کا نام دیا گیا ہے جو ایک سورج جیسے ستارے کے گرد گردش کر رہا ہے۔ محققین کے مطابق یہ سیارہ زمین کے مقابلے میں تقریباً 6 فیصد بڑا ہے، جبکہ اپنے ستارے کے گرد اس کی گردش کا دورانیہ 355 دن ہے، جو زمین کے سال سے خاصا مشابہ ہے۔
‎یہ دریافت آسٹریلیا، برطانیہ، امریکا اور ڈنمارک کے سائنسدانوں پر مشتمل ایک بین الاقوامی تحقیقی ٹیم نے کی۔ تحقیق کے لیے ناسا کی کیپلر اسپیس ٹیلی اسکوپ سے حاصل کردہ ڈیٹا استعمال کیا گیا، جو 2017 میں جمع کیا گیا تھا۔
‎سائنسدانوں کا کہنا ہے کہ یہ سیارہ اپنے ستارے کے گرد ایسے خطے میں موجود ہے جسے قابلِ رہائش زون قرار دیا جاتا ہے۔ محققین کے مطابق تقریباً 50 فیصد امکان ہے کہ وہاں انسانی زندگی کے لیے سازگار ماحول موجود ہو سکتا ہے۔
‎تحقیق میں بتایا گیا کہ یہ سیارہ اس وقت سامنے آیا جب وہ مختصر مدت کے لیے اپنے ستارے کے سامنے سے گزرا، جس کے باعث روشنی میں معمولی اضافہ ریکارڈ کیا گیا۔ ابتدائی طور پر یہ سگنل نو آموز سائنسدانوں نے نوٹ کیا، جس کے بعد اس پر تفصیلی سائنسی تحقیق کی گئی۔
‎ماہرین کے مطابق یہ ستارہ ہمارے سورج کے مقابلے میں نسبتاً ٹھنڈا اور کم روشن ہے، جس کے باعث ایچ ڈی 137010 بی کی سطح کا درجہ حرارت مریخ سے مشابہ ہو سکتا ہے اور بعض اوقات منفی 70 ڈگری سینٹی گریڈ تک گرنے کا امکان ہے۔
‎سائنسدانوں کا کہنا ہے کہ اگرچہ یہ سیارہ فلکیاتی پیمانے پر نسبتاً قریب ہے، تاہم موجودہ ٹیکنالوجی کے ساتھ وہاں تک پہنچنے میں ہزاروں سال لگ سکتے ہیں۔

‎ٹی 20 ورلڈ کپ سے باہر کیے جانے کے بعد بنگلہ دیش کرکٹ بورڈ (بی سی بی) نے انٹرنیشنل کرکٹ کونسل (آئی سی سی) پر ایک اور سنگین الزام عائد کر دیا ہے۔ بی سی بی کا کہنا ہے کہ سیکیورٹی خدشات کے باعث ٹیم کو بھارت نہ بھیجنے کے فیصلے پر آئی سی سی نے مسائل حل کرنے کے بجائے بنگلہ دیش کو میگا ایونٹ سے ہی باہر کر دیا۔
‎اب بنگلہ دیش کرکٹ بورڈ نے انکشاف کیا ہے کہ آئی سی سی نے انڈر 19 ورلڈ کپ کے دوران بھی بنگلہ دیشی ٹیم کے ساتھ غیر منصفانہ رویہ اختیار کیا۔ بنگلہ دیشی میڈیا کے مطابق بی سی بی نے اپنی جونیئر ٹیم کو ذاتی اخراجات پر انڈر 19 ورلڈ کپ کے لیے زمبابوے بھیجا، جبکہ ٹیم کی کارکردگی متاثر ہونے کی ایک بڑی وجہ ٹورنامنٹ کا پیچیدہ اور بار بار تبدیل ہونے والا شیڈول قرار دیا گیا ہے۔
‎بی سی بی کے گیم ڈیولپمنٹ کوآرڈینیٹر حبیب البشر نے بتایا کہ آئی سی سی نے اچانک بنگلہ دیش کے دو میچز کا شیڈول تبدیل کر دیا۔ ان کے مطابق اس حوالے سے باضابطہ شکایت بھی کی گئی، مگر اس پر کوئی توجہ نہیں دی گئی۔
‎انہوں نے مزید کہا کہ ورلڈ کپ کے دوران آئی سی سی کی جانب سے ڈومیسٹک فلائٹس کے استعمال پر پابندی عائد کی گئی تھی، جس کے باعث ٹیم کو بس کے ذریعے طویل سفر کرنا پڑا۔ تاہم بھارت اور نیوزی لینڈ کے خلاف اہم میچز کو دیکھتے ہوئے بنگلہ دیش کرکٹ بورڈ نے اپنے خرچ پر ٹیم کے لیے ہوائی سفر کا انتظام کیا۔


ایرانی فوج کے عسکری ڈھانچے میں ایک ہزار اسٹریٹجک ڈرونز شامل کر لیے گئے ہیں، جس سے بری فوج کی عملی اور دفاعی صلاحیت میں نمایاں اضافہ ہوا ہے۔ ایرانی خبر رساں ایجنسی تسنیم کے مطابق یہ اقدام فوج کے کمانڈر میجر جنرل امیر حاتمی کے حکم پر کیا گیا۔
‎رپورٹ کے مطابق یہ ڈرونز ایرانی ماہرین نے وزارتِ دفاع کے تعاون سے تیار کیے ہیں۔ ان کی تیاری ابھرتے ہوئے سیکیورٹی خدشات اور جون 2025 میں ہونے والی 12 روزہ جنگ سے حاصل ہونے والے تجربات کی بنیاد پر کی گئی۔
‎یہ بغیر پائلٹ طیارے حملہ آور کارروائیوں، نگرانی اور الیکٹرانک وارفیئر کی صلاحیت رکھتے ہیں اور زمینی، بحری اور فضائی حدود میں موجود متحرک اور غیر متحرک اہداف کو نشانہ بنا سکتے ہیں۔
‎اس موقع پر میجر جنرل امیر حاتمی نے کہا کہ مستقبل کے ممکنہ خطرات کے پیش نظر اسٹریٹجک برتری کو برقرار رکھنا اور مزید مضبوط بنانا فوج کی مستقل ترجیح ہے۔ ان کا کہنا تھا کہ ان اقدامات کا مقصد تیز رفتار جنگی تیاری اور کسی بھی جارحیت کی صورت میں مؤثر اور بھرپور جواب دینا ہے۔

‎سابق وزیرِ تجارت گوہر اعجاز نے یورپی یونین اور بھارت کے درمیان ہونے والے تجارتی معاہدے کو پاکستان کی صنعتوں، خصوصاً ٹیکسٹائل سیکٹر کے لیے بڑا خطرہ قرار دیا ہے اور خبردار کیا ہے کہ اس معاہدے سے ملک بھر میں ایک کروڑ سے زائد افراد کا روزگار متاثر ہو سکتا ہے۔
‎لاہور میں گفتگو کرتے ہوئے گوہر اعجاز نے کہا کہ اس معاہدے کی وجہ سے پاکستان کی تقریباً 9 ارب ڈالر مالیت کی ٹیکسٹائل برآمدات شدید دباؤ میں آ سکتی ہیں۔ انہوں نے بتایا کہ یورپی یونین کی جانب سے پاکستان کو دی جانے والی خصوصی تجارتی سہولتوں کا ہنی مون پیریڈ ختم ہو چکا ہے اور اب تمام علاقائی ممالک کے لیے زیرو ٹیرف کا اطلاق ہوگا، جس سے پاکستان کی صنعتوں کی مسابقت کمزور ہو جائے گی۔
‎گوہر اعجاز نے حکومت پر زور دیا کہ ٹیکسٹائل سیکٹر کو بچانے کے لیے فوری اقدامات کیے جائیں، بشمول بجلی اور گیس کی فراہمی علاقائی نرخوں پر یقینی بنانا۔ انہوں نے مزید کہا کہ صنعتوں پر ٹیکس کی شرح اور مجموعی کاروباری لاگت ہمسایہ ممالک کے برابر لانا ناگزیر ہے، کیونکہ ملکی صنعتیں مزید بوجھ برداشت نہیں کر سکتیں۔

ماہرین نے خبردار کیا ہے کہ نیپاہ وائرس کی موجودگی میں ٹی ٹوئنٹی ورلڈ کپ کا آغاز مختلف ممالک سے آنے والے کھلاڑیوں کی جان کو شدید خطرے میں ڈال سکتا ہے۔ نیپاہ وائرس کو دنیا کے خطرناک ترین وائرسز میں شمار کیا جاتا ہے، جس میں اموات کی شرح 40 سے 70 فیصد تک بتائی جا رہی ہے۔
بھارت میں نیپاہ وائرس کے کیسز سامنے آنے کے بعد ایشیائی ممالک نے سرحدوں پر نگرانی سخت کر دی ہے جبکہ متعدد ہوائی اڈوں پر ہائی الرٹ جاری کر دیا گیا ہے۔ امریکی سینٹر فار ڈیزیز کنٹرول کے مطابق نیپاہ وائرس انتہائی مہلک ہے، جبکہ تائیوان کے سینٹر فار ڈیزیز کنٹرول نے اسے کیٹیگری 5 کا خطرہ قرار دیا ہے۔
‎عالمی ادارہ صحت نے بھی نیپاہ وائرس کو ترجیحی خطرناک وائرس قرار دیتے ہوئے فوری اور جامع تحقیق پر زور دیا ہے۔ مغربی میڈیا کے مطابق برطانیہ، نیپال، تھائی لینڈ، تائیوان، میانمار اور سری لنکا نے بھارتی مسافروں کے لیے ہوائی اڈوں پر اسکریننگ کا آغاز کر دیا ہے۔
‎ماہرین کا کہنا ہے کہ ایسے حالات میں عالمی کرکٹ ایونٹ کا انعقاد نہ صرف غیر ذمہ دارانہ ہوگا بلکہ یہ کھلاڑیوں، آفیشلز اور شائقین صحت کے لیے بھی سنگین خطرات کا باعث بن سکتا ہے۔