روس نے یوکرین کے شہر خارکیف پر ایک بڑا ڈرون حملہ کیا، جس کے نتیجے میں 2 افراد ہلاک اور متعدد زخمی ہو گئے۔ اس حملے میں یوکرین کے توانائی کے نظام کو بھی شدید نقصان پہنچا۔ صدر ولودیمیر زیلنسکی نے تصدیق کی کہ رات کے وقت ہونے والے اس حملے میں 200 سے زائد ڈرونز استعمال کیے گئے اور روس کی سفارتکاری میں سنجیدگی نظر نہیں آتی۔
زیلنسکی نے بتایا کہ اس ہفتے روس کی جانب سے یوکرین پر 1,300 سے زیادہ ڈرونز اور تقریباً 1,050 گائیڈڈ بم استعمال کیے گئے، جبکہ مختلف اقسام کے 29 میزائل فائر کیے گئے۔
ان حملوں کا تعلق ایسے وقت میں ہے جب یوکرینی حکام اور بین الاقوامی ثالث امن مذاکرات کے نئے مرحلے پر بات کر رہے ہیں۔ زیلنسکی نے عالمی رہنماؤں سے اپیل کی کہ یوکرین کو مزید فضائی دفاع اور میزائلوں کی فراہمی کی جائے تاکہ روس کے جارحانہ اقدامات کا مؤثر جواب دیا جا سکے۔
Author: Aqsa Younas Rana
روس کا یوکرین پر ڈرون حملہ، 2 افراد ہلاک، درجنوں زخمی
غیر ملکی سفارتخانوں کا گل پلازہ سانحے پر اظہار افسوس
اسلام آباد میں غیر ملکی سفارتخانوں نے کراچی کے گل پلازہ میں ہونے والی آتشزدگی کے افسوسناک واقعے پر اپنے رنج و غم کا اظہار کیا ہے۔
ترک سفارتخانے نے جاں بحق افراد کے اہل خانہ کے ساتھ تعزیت کا اظہار کیا اور واقعے پر گہرے دکھ کا اظہار کیا۔ روسی سفارتخانے نے اس واقعے کو المناک قرار دیتے ہوئے زخمیوں کی جلد صحتیابی کے لیے نیک تمناؤں کا اظہار کیا۔
فرانسیسی سفارتخانہ نے کہا کہ دکھ کی اس گھڑی میں وہ پاکستانی عوام کے ساتھ ہیں۔ برطانوی ہائی کمشنر جین میریٹ نے سوشل میڈیا پر جاری پیغام میں کہا کہ گل پلازہ میں ہونے والی المناک آگ نے دل توڑ دیا ہے اور وہ اپنے پیاروں کو کھونے والے متاثرین کے ساتھ ہمدردیاں رکھتی ہیں۔
یہ اظہار افسوس بین الاقوامی برادری کی جانب سے سانحہ گل پلازہ کے متاثرین کے لیے ہمدردی اور حمایت کا عندیہ ہے۔
مستونگ میں بڑی کارروائی، کالعدم بی ایل اے کے 5 دہشتگرد ہلاک
سی ٹی ڈی بلوچستان نے مستونگ کے علاقے دشت میں ایک بڑی کارروائی کے دوران کالعدم بی ایل اے کے 5 دہشتگرد ہلاک کرنے کا دعویٰ کیا ہے۔
ترجمان سی ٹی ڈی بلوچستان کے مطابق فورسز نے کوئٹہ-سبی شاہراہ بلاک کرنے کے دہشتگردانہ منصوبے کو ناکام بنایا۔ ہلاک دہشتگردوں سے اسلحہ، دستی بم اور موٹر سائیکلیں بھی برآمد ہوئی ہیں۔
ترجمان نے مزید بتایا کہ فرار دہشتگردوں کی تلاش کے لیے علاقے میں سرچ آپریشن جاری ہے۔
خلع کے بعد جہیز تنازع: جسٹس محسن اختر کیانی کے خواتین کے حقوق پر اہم ریمارکس
اسلام آباد ہائیکورٹ کے جج جسٹس محسن اختر کیانی نے خلع کے بعد جہیز کے تنازع سے متعلق کیس کی سماعت کے دوران اہم ریمارکس دیتے ہوئے کہا ہے کہ اگر کوئی شخص اپنی بیوی کے ساتھ اچھی زندگی گزارنا چاہتا ہے تو اسے بیوی سے سلامی نہیں لینی چاہیے۔
تفصیلات کے مطابق سماعت کے دوران جسٹس محسن اختر کیانی نے معاشرتی رویوں پر تنقید کرتے ہوئے کہا کہ ہمارے معاشرے میں ایک مخصوص ذہنیت بن چکی ہے جس کے مطابق بیوی پر ہاتھ اٹھانے کو ہی تشدد سمجھا جاتا ہے، جبکہ ذہنی تشدد کو مکمل طور پر نظر انداز کر دیا جاتا ہے، حالانکہ ذہنی اذیت سب سے زیادہ تکلیف دہ ہوتی ہے۔
جسٹس محسن کیانی نے کہا کہ عورتیں تعلق کو بچانے کے لیے جتنا سمجھوتہ کرتی ہیں، مرد اس کے مقابلے میں ایک فیصد بھی نہیں کرتے۔ انہوں نے واضح کیا کہ اگر علیحدگی ہو چکی ہے تو عورت کو عزت کے ساتھ جینے کا حق دیا جانا چاہیے۔
انہوں نے مزید ریمارکس دیے کہ شادی کے موقع پر دی جانے والی سلامی ہمیشہ بیوی کی ملکیت ہوتی ہے، اور اگر شوہر ایک خوشگوار ازدواجی زندگی چاہتا ہے تو اسے بیوی سے سلامی لینے سے گریز کرنا چاہیے۔
پشاور میں ڈانس کلب کے اعلان پر خاتون انفلوئنسر گرفتار
خیبرپختونخوا کے مرکزی شہر پشاور میں ڈانس کلب کھولنے کا اعلان کرنے والی ایک خاتون انفلوئنسر کو پولیس نے گرفتار کر لیا ہے۔
پشاور پولیس کے مطابق سوشل میڈیا کے ذریعے لوگوں کو بے راہ روی کی جانب راغب کرنے اور غیر اخلاقی مواد پھیلانے میں ملوث خاتون کو حراست میں لیا گیا ہے۔ گرفتار خاتون کی شناخت سونیا شاہ زوجہ دادو شاہ کے نام سے ہوئی ہے، جنہیں گلبہار نمبر 4، اعجاز آباد سے گرفتار کیا گیا۔
پولیس کا کہنا ہے کہ ملزمہ نے ایک وائرل ویڈیو میں پشاور میں ڈانس کلب کھولنے کا دعویٰ کیا تھا، جبکہ ویڈیو میں نازیبا زبان بھی استعمال کی گئی جو معاشرتی اقدار اور ملکی قوانین کی صریح خلاف ورزی ہے۔
پولیس نے بتایا کہ گرفتار انفلوئنسر کے خلاف مقدمہ درج کر کے تفتیش کا آغاز کر دیا گیا ہے، اور فحاشی، بدامنی اور بے راہ روی پھیلانے والوں کے خلاف کارروائی مزید تیز کی جا رہی ہے۔
پولیس حکام کے مطابق افسرانِ بالا کے نوٹس لینے کے بعد غیر اخلاقی زبان کے استعمال پر خاتون کو تھانہ گلبہار کی لیڈیز پولیس کے ہمراہ گرفتار کیا گیا۔
وزیر اعظم مودی نے صدر شیخ محمد بن زاید النہیان کا استقبال کیا
وزیر اعظم نریندر مودی نے پیر کو متحدہ عرب امارات کے صدر شیخ محمد بن زاید النہیان کا دہلی ہوائی اڈے پر استقبال کیا، جس سے یہ ظاہر ہوتا ہے کہ بھارت النہیان کے دورے کو اہمیت دیتا ہے۔
وزارت خارجہ کے جاری کردہ شیڈول کے مطابق شیخ محمد بن زاید النہیان قومی دارالحکومت میں دو گھنٹے سے بھی کم وقت کے لیے قیام کریں گے۔ ان کا دورہ مغربی ایشیا کی موجودہ صورت حال کے درمیان آیا ہے، جس میں ایران اور امریکہ کے تعلقات میں بگاڑ، یمن پر سعودی عرب اور یو اے ای کے درمیان بڑھتی ہوئی کشیدگی اور غزہ میں غیر مستحکم سیاسی صورتحال شامل ہیں۔
صدر النہیان کے ہمراہ اماراتی وزیر خارجہ، دبئی کے ولی عہد، نائب وزیراعظم اور وزیر دفاع بھی موجود ہیں۔ وزیر اعظم مودی نے ان کا دہلی ایئرپورٹ پر خوش آمدید کہا۔
آئل ٹینکر سے نو کروڑ روپے مالیت کی منشیات برآمد، ملزم گرفتار
لاہور میں آئل ٹینکر کے خفیہ خانوں سے نو کروڑ روپے مالیت کی منشیات برآمد کر لی گئی، جن میں ویڈ اور افیون شامل ہیں۔
تفصیلات کے مطابق پنجاب کاؤنٹر نارکوٹکس فورس نے خفیہ اطلاعات پر موٹروے ایم ون پر کارروائی کرتے ہوئے برہان ریسٹ ایریا کے قریب ایک آئل ٹینکر کو روکا اور تلاشی کے دوران بھاری مقدار میں منشیات برآمد کی۔
ترجمان پنجاب کاؤنٹر نارکوٹکس فورس کے مطابق آئل ٹینکر کے خفیہ خانوں سے مجموعی طور پر ایک ہزار ایک سو چالیس کلو گرام ویڈ اور افیون برآمد ہوئی، جس کی مالیت تقریباً نو کروڑ روپے بتائی جا رہی ہے۔
ابتدائی تحقیقات کے مطابق یہ منشیات لاہور، شیخوپورہ، ملتان اور فیصل آباد سمیت پنجاب کے مختلف شہروں میں اسمگل کی جا رہی تھیں۔
کارروائی کے دوران اسمگلنگ میں ملوث ایک ملزم کو موقع پر گرفتار کر لیا گیا، جس کے خلاف پنجاب کنٹرول آف نارکوٹکس سبسٹنسز ایکٹ کے تحت مقدمہ درج کر کے مزید تفتیش شروع کر دی گئی ہے۔
دورہ پاکستان سے قبل آسٹریلیا کو دھچکا، پیٹ کمنز اور کئی اہم کھلاڑی باہر
پاکستان اور آسٹریلیا کے درمیان ہونے والی ٹی 20 سیریز سوشل میڈیا پر ٹرینڈ کر رہی ہے، تاہم سیریز شروع ہونے سے قبل ہی آسٹریلیا کو بڑا دھچکا لگا ہے۔
آسٹریلیا کے کپتان اور فاسٹ بولر پیٹ کمنز کو کمر کی انجری کے باعث پاکستان کے خلاف وارم اپ ٹی ٹوئنٹی میچز سے باہر رکھنے کا فیصلہ کیا گیا ہے۔ آسٹریلوی سلیکٹرز نے کہا کہ کمنز کی صحت کے معاملے میں کوئی رسک نہیں لیا جائے گا۔
پیٹ کمنز ایشز سیریز کے دوران واپسی کر چکے تھے، مگر انگلینڈ کے خلاف آخری دو میچز نہیں کھیل سکے اور اب وہ پاکستان کے خلاف ٹی ٹوئنٹی وارم اپ میچز بھی نہیں کھیلیں گے۔
آسٹریلیا کے چیف سلیکٹر جارج بیلی کے مطابق صرف کمنز ہی نہیں بلکہ جوش ہیزل ووڈ، نیتھن ایلس، گلین میکسویل اور ٹم ڈیوڈ کو بھی لاہور میں ہونے والی تین میچوں کی سیریز سے آرام دیا گیا ہے، جو 29 جنوری سے شروع ہو رہی ہے۔
ہیزل ووڈ ہیمسٹرنگ اور ایچیلس انجری سے نبٹ رہے ہیں، جبکہ ٹم ڈیوڈ بھی ہیمسٹرنگ انجری کا شکار ہیں۔ بیلی کا کہنا ہے کہ یہ کھلاڑی ورلڈ کپ کے آغاز تک فٹ ہو جائیں گے۔
بیلی نے مزید بتایا کہ پیٹ کمنز ورلڈ کپ سکواڈ کو بعد میں جوائن کریں گے اور ممکنہ طور پر تیسرے یا چوتھے میچ کے آس پاس ٹیم کا حصہ بنیں گے۔
ای ٹیگ کے بغیر گاڑیوں کے خلاف کارروائی شروع
اسلام آباد کی انتظامیہ نے اتوار کو بتایا کہ دارالحکومت میں الیکٹرانک ٹیگز (ای ٹیگ) کے بغیر چلنے والی گاڑیوں کے خلاف کارروائی شروع ہو چکی ہے۔
اس اقدام کا مقصد شہر میں ٹریفک کو منظم کرنا اور داخلی و خارجی مقامات پر نگرانی کو بہتر بنانا ہے۔
اسلام آباد انتظامیہ نے گذشتہ نومبر میں شہر میں سکیورٹی بڑھانے کے لیے تمام گاڑیوں پر ای ٹیگ لازمی قرار دیا تھا۔ جن گاڑیوں پر پہلے سے موٹروے ٹیگ موجود ہے، انہیں ای ٹیگ کی ضرورت نہیں۔
حکام کے مطابق ای ٹیگ کا مقصد ٹریفک کے بہاؤ کو منظم کرنا، ریکارڈ کو بہتر بنانا اور یہ یقینی بنانا ہے کہ دارالحکومت میں داخل ہونے والی گاڑیاں باقاعدہ نظام میں رجسٹرڈ ہوں۔
ای ٹیگ کے نفاذ کے لیے شہر کے داخلی مقامات اور چیک پوسٹس پر نصب ریڈرز خودکار طور پر ان گاڑیوں کی نشاندہی کرتے ہیں جن پر ای ٹیگ موجود نہیں ہوتا، جس سے بغیر دستی چیکنگ کے کارروائی ممکن ہو جاتی ہے۔ہائی اسپیڈ ٹرین کا ٹکراؤ، 39 ہلاک , 100 سے زائد زخمی
اسپین میں ایک ہائی اسپیڈ ٹرین پٹری سے اترنے کے بعد مخالف سمت سے آنے والی ٹرین سے ٹکرا گئی، جس کے نتیجے میں 39 افراد ہلاک اور 100 سے زائد زخمی ہو گئے۔
ایسوسی ایٹڈ پریس کے مطابق حادثہ اسپین کے جنوبی علاقے کے قریب پیش آیا۔ ایک تیز رفتار ٹرین پٹری سے اتر گئی اور مخالف سمت سے آنے والی ٹرین سے ٹکرانے کے بعد دوسری ٹرین بھی پٹری سے اتر گئی۔ حادثے میں دونوں ٹرینوں کو شدید نقصان پہنچا۔
حادثے میں ٹرین کے ڈرائیور سمیت متعدد مسافر ہلاک ہوئے۔ بدقسمت ٹرین میڈرڈ سے ہیولوا جا رہی تھی، اور حادثے کے وقت ایک ٹرین میں 300 سے زائد جبکہ دوسری میں تقریباً 100 مسافر سوار تھے۔
حادثہ اتوار کی سہ پہر پیش آیا اور ہسپانوی پولیس کے مطابق کم از کم 39 افراد جان کی بازی ہار گئے۔ امدادی کارروائیاں پیر کی صبح بھی جاری رہیں، اور ہسپانوی ریڈ کراس نے اداموز قصبے میں امدادی مرکز قائم کیا تاکہ متاثرہ افراد اور ان کے اہلِ خانہ کو فوری مدد فراہم کی جا سکے۔
اسپین کے سول گارڈ اور سول ڈیفنس کے اہلکار رات بھر امدادی کاموں میں مصروف رہے۔ ہسپانوی ریلوے انفراسٹرکچر آپریٹر نے میڈرڈ اور اندلس کے درمیان تمام ٹرین سروسز کو اگلے نوٹس تک معطل کر دیا ہے۔
