Author: Aqsa Younas Rana

‎گوگل نے اپنی سالانہ آئی او ڈویلپر کانفرنس کے دوران مصنوعی ذہانت پر مبنی متعدد نئے ٹولز، ماڈلز اور اسمارٹ گلاسز متعارف کرا دیے ہیں۔
‎19 مئی سے شروع ہونے والی اس کانفرنس میں کمپنی نے واضح کیا کہ اس کا بنیادی مقصد اے آئی ٹیکنالوجی کو ہر صارف کیلئے زیادہ مفید، تیز اور قابل رسائی بنانا ہے۔
گوگل کی جانب سے پیش کیے گئے اہم اعلانات میں نئے جیمنائی ماڈلز، اے آئی سرچ انجن، اسمارٹ گلاسز اور ڈیجیٹل اسسٹنٹس شامل ہیں۔
‎گوگل نے “جیمنائی اومنی” نامی نیا ماڈل متعارف کرایا ہے جو ٹیکسٹ، تصاویر اور ویڈیوز کو ملا کر ہائی کوالٹی میڈیا مواد تیار کر سکتا ہے۔
کمپنی کے مطابق یہ ماڈل سب سے پہلے جیمنائی ایپ، فلو اور یوٹیوب میں شامل کیا جائے گا۔
‎گوگل نے دعویٰ کیا ہے کہ “جیمنائی 3.5 فلیش” اب تک کا سب سے طاقتور اور تیز رفتار کوڈنگ اور اے آئی ایجنٹک ماڈل ہے۔
کمپنی کے مطابق یہ وہ کام چند لمحوں میں مکمل کر سکتا ہے جن کیلئے پہلے کئی دن یا ہفتے درکار ہوتے تھے۔
‎گوگل نے اپنے سرچ انجن کو گزشتہ 25 برس کی سب سے بڑی اپ ڈیٹ قرار دیا ہے۔
نئے اے آئی سرچ باکس کے ذریعے صارفین ٹیکسٹ، تصاویر، ویڈیوز، فائلز اور یہاں تک کہ کروم ٹیبز کے ذریعے بھی زیادہ ذہین انداز میں معلومات حاصل کر سکیں گے۔
‎گوگل نے نئے اے آئی اسمارٹ گلاسز بھی متعارف کرائے ہیں جو اینڈرائیڈ ایکس آر ٹیکنالوجی پر مبنی ہوں گے۔
یہ گلاسز صارف کے کان میں خاموشی سے معلومات فراہم کریں گے جبکہ موسیقی سننے، تصاویر لینے، کالز کرنے اور فون ایپس استعمال کرنے میں مدد دیں گے۔
‎گوگل نے “ڈیلی بریف” اور “جیمنائی اسپارک” نامی نئے اے آئی اسسٹنٹس بھی متعارف کرائے ہیں۔
یہ ٹولز صارفین کی ڈیجیٹل زندگی کو منظم کرنے، مشورے دینے اور آن لائن مختلف کام خودکار طریقے سے انجام دینے میں مدد فراہم کریں گے۔
‎جیمنائی ایپ کے انٹرفیس کو بھی اپ ڈیٹ کیا گیا ہے جس میں نئی اینیمیشنز، بہتر رنگ، جدید ٹائپوگرافی اور مزید فیچرز شامل کیے گئے ہیں۔
‎گوگل کے مطابق یہ تمام نئے فیچرز اور ٹولز مرحلہ وار دنیا بھر کے صارفین کیلئے متعارف کرائے جائیں گے۔

‎ایرانی پاسداران انقلاب کی بحریہ نے کہا ہے کہ گزشتہ 24 گھنٹوں کے دوران 26 جہاز آبنائے ہرمز سے گزرے ہیں۔
‎ایرانی میڈیا کے مطابق ان جہازوں میں آئل ٹینکرز، کنٹینر شپ اور دیگر تجارتی بحری جہاز شامل تھے۔
‎پاسداران انقلاب بحریہ کا کہنا ہے کہ آبنائے ہرمز سے جہازوں کی آمد و رفت اجازت ناموں اور متعلقہ حکام کے تعاون سے معمول کے مطابق جاری ہے۔
‎بیان میں کہا گیا کہ ایران اس اہم عالمی بحری گزرگاہ میں بحری ٹریفک کی نگرانی کر رہا ہے تاکہ تجارتی سرگرمیوں کو محفوظ اور منظم رکھا جا سکے۔
‎آبنائے ہرمز دنیا کی اہم ترین سمندری گزرگاہوں میں شمار ہوتی ہے جہاں سے روزانہ بڑی مقدار میں تیل اور تجارتی سامان دنیا بھر میں منتقل کیا جاتا ہے۔
‎حالیہ ہفتوں میں خطے میں بڑھتی ہوئی کشیدگی کے باعث عالمی سطح پر آبنائے ہرمز کی صورتحال پر گہری نظر رکھی جا رہی ہے۔

‎امریکا کے علاقے بیورلی ہلز میں ایک ہوٹل کی جانب سے صرف کیک کاٹنے کیلئے 110 ڈالر فیس وصول کیے جانے کا واقعہ سوشل میڈیا پر بحث کا موضوع بن گیا۔
‎غیر ملکی میڈیا رپورٹس کے مطابق ایک خاتون فوڈ انفلوئنسر اپنے دوستوں کے ساتھ ایک لگژری ہوٹل کے روف ٹاپ ریسٹورنٹ میں کھانا کھانے گئی جہاں انہوں نے سالگرہ کا کیک بھی کاٹا۔
‎بعد ازاں جب بل سامنے آیا تو ہوٹل انتظامیہ نے کیک کاٹنے کے اضافی 110 ڈالر یعنی پاکستانی 30 ہزار روپے سے زائد چارج کر لیے، جس پر خاتون اور ان کے دوست حیران رہ گئے۔
‎فوڈ انفلوئنسر نے انسٹاگرام پر ویڈیو شیئر کرتے ہوئے بل بھی دکھایا اور بتایا کہ انتظامیہ نے فی فرد 10 ڈالر کیک کاٹنے کی فیس وصول کی۔
‎انہوں نے کہا کہ اگر ایسی کوئی پالیسی تھی تو مہمانوں کو پہلے آگاہ کرنا چاہیے تھا۔
‎ویڈیو وائرل ہونے کے بعد سوشل میڈیا صارفین کی جانب سے شدید ردعمل سامنے آیا۔ کئی افراد نے ہوٹل انتظامیہ کو تنقید کا نشانہ بنایا جبکہ کچھ صارفین نے اسے “امیرانہ فیس” قرار دیا۔
‎واقعہ وائرل ہونے کے بعد ہوٹل انتظامیہ نے وضاحت جاری کرتے ہوئے افسوس کا اظہار کیا۔
‎انتظامیہ کا کہنا تھا کہ مہمانوں کو کیک کاٹنے کی فیس کے بارے میں بروقت آگاہ نہ کرنا ان کے معیار کے مطابق نہیں تھا۔
‎ہوٹل نے خاتون کو مکمل رقم واپس کرنے کی پیشکش بھی کی اور اعلان کیا کہ اب فی فرد کیک کاٹنے کی فیس 10 ڈالر سے کم کر کے 5 ڈالر کر دی گئی ہے۔
‎یہ عجیب و غریب واقعہ اب سوشل میڈیا پر “مہنگی ترین کیک کٹنگ” کے نام سے وائرل ہو رہا ہے۔

‎چین کے دارالحکومت بیجنگ میں امریکی وزیر خزانہ اسکاٹ بیسنٹ کو ایک سرکاری تقریب کے دوران مختصر وقت کیلئے سیکیورٹی اہلکاروں نے روک لیا، جس کی ویڈیو سوشل میڈیا پر تیزی سے وائرل ہو رہی ہے۔
‎رپورٹس کے مطابق یہ واقعہ گریٹ ہال آف دی پیپل کے باہر پیش آیا جہاں امریکی وفد ایک سرکاری ضیافت میں شرکت کیلئے پہنچا تھا۔
‎ویڈیو میں دیکھا جا سکتا ہے کہ چینی سیکیورٹی اہلکاروں نے اسکاٹ بیسنٹ کو داخلی اجازت نامہ یا کلیئرنس بیج نہ ہونے پر دروازے پر روک لیا۔
‎بعد ازاں امریکی وزیر خزانہ کے معاونین نے مطلوبہ کارڈ فراہم کیا جس کے بعد انہیں اندر جانے کی اجازت دے دی گئی۔
‎یہ واقعہ ایسے وقت سامنے آیا ہے جب امریکا اور چین کے تعلقات تجارت، تائیوان اور عالمی سیاسی معاملات پر کشیدگی کا شکار ہیں۔
‎دوسری جانب سوشل میڈیا پر اس واقعے کو مختلف انداز میں دیکھا جا رہا ہے، جہاں بعض صارفین نے اسے چین کے بڑھتے ہوئے عالمی اعتماد اور بدلتے ہوئے عالمی طاقت کے توازن سے جوڑا۔
‎تاحال امریکی محکمہ خزانہ کی جانب سے اس واقعے پر کوئی باضابطہ ردعمل سامنے نہیں آیا۔