Author: Aqsa Younas Rana

‎
امریکی ثالثی سے طے پانے والی جنگ بندی کے باوجود اسرائیل نے جنوبی غزہ میں فضائی اور ہیلی کاپٹر حملے تیز کر دیے ہیں، جن میں بے گھر فلسطینیوں کے خیموں کو بھی نشانہ بنایا گیا۔
‎حالیہ حملوں میں مزید دو فلسطینی جان سے گئے، جن میں ایک پانچ سالہ بچی بھی شامل ہے۔ مقامی حکام کے مطابق پیر کے روز ہونے والی ان ہلاکتوں کے بعد اکتوبر میں جنگ بندی کے نفاذ سے اب تک اسرائیلی فورسز کے ہاتھوں مارے جانے والے فلسطینیوں کی تعداد کم از کم 422 ہو چکی ہے۔
‎جنوبی خان یونس میں واقع ناصر میڈیکل کمپلیکس کا کہنا ہے کہ تازہ حملہ ساحلی علاقے المواسی میں ایک خیمے پر کیا گیا، جہاں بچوں سمیت چار افراد زخمی بھی ہوئے۔ زخمیوں کو قریبی اسپتال منتقل کیا گیا، جہاں بعض کی حالت تشویشناک بتائی جا رہی ہے۔
‎دوسری جانب اسرائیلی فوج نے دعویٰ کیا ہے کہ اس نے ایک ایسے حماس جنگجو کو نشانہ بنایا جو مبینہ طور پر اسرائیلی فورسز پر فوری حملے کی منصوبہ بندی کر رہا تھا۔ تاہم فوج کی جانب سے اس دعوے کے حق میں کوئی شواہد پیش نہیں کیے گئے اور یہ بھی واضح نہیں کیا گیا کہ آیا یہ بیان خیمے پر کیے گئے حملے سے متعلق ہے یا کسی اور کارروائی کا۔


اقوام متحدہ کے سیکرٹری جنرل انتونیو گوتریس نے وینزویلا میں امریکی فوجی کارروائی پر گہری تشویش کا اظہار کرتے ہوئے کہا ہے کہ 3 جنوری کو کی گئی یہ کارروائی بین الاقوامی قوانین کے مطابق نہیں تھی۔
‎وینزویلا کی صورتحال پر غور کے لیے اقوام متحدہ کی سلامتی کونسل کا ہنگامی اجلاس منعقد ہو رہا ہے، جس کے ایجنڈے میں عالمی امن و سلامتی کو لاحق خطرات پر بات چیت شامل ہے۔ اجلاس کے دوران سیکرٹری جنرل انتونیو گوتریس کا تحریری بیان پڑھ کر سنایا گیا۔
‎اپنے بیان میں انتونیو گوتریس نے کہا کہ وینزویلا میں امریکی فوجی کارروائی کے دوران عالمی قوانین کی پاسداری نہیں کی گئی۔ انہوں نے بتایا کہ وینزویلا کے صدر اور ان کی اہلیہ اس وقت امریکی تحویل میں ہیں، جس سے ملک میں عدم استحکام بڑھنے اور پورے خطے پر منفی اثرات پڑنے کا خدشہ ہے۔
‎یو این سیکرٹری جنرل نے تمام فریقوں پر زور دیا کہ وہ اقوام متحدہ کے چارٹر کی مکمل پابندی کریں اور ایک جامع، جمہوری مکالمہ شروع کریں تاکہ وینزویلا کے تمام طبقات اپنے مستقبل کا فیصلہ خود کر سکیں۔
‎انہوں نے کہا کہ عالمی امن اور سلامتی کے تحفظ کے لیے اقوام متحدہ کے چارٹر اور متعلقہ قانونی اصولوں کا احترام ناگزیر ہے۔ ریاستوں کی خودمختاری، سیاسی آزادی اور علاقائی سالمیت کا احترام ہر حال میں ہونا چاہیے۔
‎انتونیو گوتریس نے مزید کہا کہ دھمکی یا طاقت کے استعمال پر پابندی ضروری ہے اور قانون کی بالادستی کو ہر صورت یقینی بنایا جانا چاہیے۔


کولمبیا کے صدر گستاوو پیٹرو نے امریکی صدر ڈونلڈ ٹرمپ کی دھمکیوں کے جواب میں سخت موقف اختیار کرتے ہوئے ہتھیار اٹھانے کا اعلان کیا ہے۔
صدر گستاوو پیٹرو نے سوشل میڈیا پلیٹ فارم ایکس پر جاری بیان میں کہا کہ اگر امریکی صدر کی جانب سے دھمکیوں کا سامنا کرنا پڑا تو وہ وطن کے دفاع کے لیے ہتھیار اٹھانے پر مجبور ہوں گے۔ ان کا کہنا تھا کہ انہوں نے ماضی میں ہتھیار نہ اٹھانے کی قسم کھائی تھی، لیکن اگر ملک کی سلامتی کو خطرہ ہوا تو وہ اس فیصلے پر نظرِ ثانی کرنے کے لیے تیار ہیں۔
‎یہ بیان ایسے وقت میں سامنے آیا ہے جب امریکا نے ہفتے کے اختتام پر فوجی کارروائی کے ذریعے پڑوسی ملک وینزویلا کے صدر نکولس مادورو کو حراست میں لینے کا دعویٰ کیا ہے، جس کے بعد خطے میں کشیدگی میں اضافہ دیکھا جا رہا ہے۔
‎واضح رہے کہ امریکی صدر ڈونلڈ ٹرمپ نے حال ہی میں کولمبیا کے صدر کو خبردار کرتے ہوئے سخت زبان استعمال کی تھی اور انہیں توہین آمیز انداز میں ایک “بیمار آدمی” قرار دیا تھا۔ صدر ٹرمپ کا کہنا تھا کہ کولمبیا کی قیادت منشیات کی تیاری اور امریکا کو کوکین کی فراہمی میں دلچسپی رکھتی ہے، لیکن یہ سلسلہ زیادہ دیر تک جاری نہیں رہ سکے گا۔
‎ایک موقع پر صدر ٹرمپ سے سوال کیا گیا کہ کیا وہ کولمبیا کے خلاف امریکی فوجی کارروائی کی بات کر رہے ہیں، جس پر انہوں نے کہا کہ موجودہ کولمبیائی حکومت کے خلاف فوجی آپریشن کے امکان کا سن کر انہیں اچھا لگا۔
‎صدر پیٹرو نے اپنے بیان میں کہا کہ کولمبیا کی انسدادِ منشیات پالیسی مضبوط ہے، تاہم انہوں نے اس بات پر زور دیا کہ فوجی طاقت کے استعمال کی بھی ایک حد ہوتی ہے اور مسائل کا حل طاقت کے بجائے سمجھداری سے نکالا جانا چاہیے۔


غزہ میں تباہ شدہ عمارتیں شہریوں کے لیے جان لیوا خطرہ بنتی جا رہی ہیں۔ بارش کے بعد ایک کمزور اور لرزتی عمارت گر گئی، جس کے نتیجے میں دو فلسطینی جان سے ہاتھ دھو بیٹھے۔ علاقے میں پہلے ہی درجنوں عمارتیں شدید بمباری کے باعث غیر محفوظ ہو چکی ہیں۔
رپورٹس کے مطابق سردی میں اضافے نے خیموں میں رہنے والے خاندانوں کی مشکلات مزید بڑھا دی ہیں۔ بارش اور کم درجۂ حرارت کے باعث بچوں، بزرگوں اور بیمار افراد کے لیے حالات نہایت سخت ہو گئے ہیں۔
‎ادھر مغربی کنارے میں اسرائیلی فورسز نے مختلف علاقوں میں چھاپے مارے، جن کے دوران خاتون صحافی سمیت درجنوں فلسطینیوں کو حراست میں لے لیا گیا۔ اس دوران اتوار کو اسرائیلی فائرنگ سے شہید ہونے والے نوجوان کی تدفین میں ہزاروں افراد نے شرکت کی، جہاں فضا سوگ اور غصے سے بھری رہی۔
‎اسرائیلی میڈیا کے مطابق وزیراعظم نیتن یاہو کی حکومت نے غیرقانونی یہودی آباد کاروں کو بھاری ہتھیار فراہم کرنے کا فیصلہ کیا ہے، جس سے علاقے میں کشیدگی مزید بڑھنے کا خدشہ ظاہر کیا جا رہا ہے۔