Author: Aqsa Younas Rana


مشرقِ وسطیٰ میں جاری کشیدگی اور آبنائے ہرمز کی بندش کے باعث عالمی تیل منڈی میں بڑی تبدیلیاں دیکھنے میں آ رہی ہیں جس سے روس کو نمایاں معاشی فائدہ ہو رہا ہے۔
برطانوی جریدے کی رپورٹ کے مطابق ایران سے متعلق جنگی صورتحال اور آبنائے ہرمز میں رکاوٹوں کے بعد روسی تیل کی عالمی مانگ میں تیزی سے اضافہ ہوا ہے۔ اس صورتحال کے نتیجے میں روس کو تیل کی فروخت سے یومیہ تقریباً 150 ملین ڈالر اضافی آمدن حاصل ہو رہی ہے۔
‎رپورٹ میں بتایا گیا ہے کہ بھارت اور چین روسی تیل کے بڑے خریدار بن کر سامنے آئے ہیں۔ خاص طور پر بھارت کی روس سے تیل کی درآمدات بڑھ کر تقریباً 1.5 ملین بیرل یومیہ تک پہنچ گئی ہیں، جو ایک ماہ کے دوران تقریباً 50 فیصد اضافہ ظاہر کرتی ہیں۔
‎مزید کہا گیا ہے کہ تیل کی برآمدات پر عائد ٹیکس کی بدولت روس کو اب تک 1.3 سے 1.9 ارب ڈالر تک غیر متوقع اضافی فائدہ حاصل ہو چکا ہے۔
‎رپورٹ کے مطابق اگر عالمی منڈی میں قیمتیں اسی طرح برقرار رہیں تو مارچ کے مہینے میں روس کو مجموعی طور پر 3.3 سے 4.9 ارب ڈالر تک اضافی آمدن ہونے کا امکان ہے۔


اسرائیل کے وزیر اعظم بنیامین نیتن یاہو کی موت سے متعلق سوشل میڈیا پر ایک بار پھر مختلف دعوے گردش کر رہے ہیں۔ بعض پوسٹس میں کہا جا رہا ہے کہ وہ اپنے گھر پر ہونے والے حملے میں ہلاک ہو گئے تھے اور یہ خبر گزشتہ چار دنوں سے غیر مصدقہ طور پر پھیل رہی ہے۔
‎ان دعوؤں میں یہ بھی کہا گیا کہ اس مبینہ حملے میں نیتن یاہو کے بھائی اور اسرائیل کے قومی سلامتی کے وزیر ایتامار بن گویر بھی مارے گئے۔ تاہم ان دعوؤں کی اب تک کسی سرکاری ذریعے سے تصدیق نہیں ہو سکی۔
‎اسی دوران اسرائیلی حکومت کی جانب سے ایک ویڈیو جاری کی گئی جس میں نیتن یاہو کو براہ راست ٹی وی پر خطاب کرتے دکھایا گیا ہے۔ سوشل میڈیا پر کچھ صارفین نے اس ویڈیو پر بھی سوالات اٹھائے ہیں اور دعویٰ کیا ہے کہ یہ ویڈیو مصنوعی ذہانت کی مدد سے تیار کی گئی ہو سکتی ہے۔
‎کچھ صارفین نے ویڈیو کے ایک منظر کی نشاندہی کرتے ہوئے کہا کہ نیتن یاہو کے ہاتھ میں چھ انگلیاں نظر آ رہی ہیں جس کے بعد ویڈیو کی حقیقت پر مزید بحث شروع ہو گئی ہے۔
‎تاہم اب تک اسرائیلی حکومت یا کسی معتبر بین الاقوامی ادارے نے نیتن یاہو کی موت یا زخمی ہونے کی کوئی تصدیق نہیں کی۔ صورتحال کے حوالے سے حتمی معلومات سامنے آنے کا انتظار کیا جا رہا ہے۔


ایران کی سپریم نیشنل سکیورٹی کونسل کے سیکرٹری علی لاریجانی نے امریکی صدر ڈونلڈ ٹرمپ کی جانب سے ایران کے بجلی کے نظام کو نشانہ بنانے کی دھمکیوں پر سخت ردعمل دیا ہے۔
سوشل میڈیا پلیٹ فارم ایکس پر جاری بیان میں علی لاریجانی نے کہا کہ امریکی صدر نے دعویٰ کیا ہے کہ امریکا ایک گھنٹے کے اندر ایران کے بجلی کے بنیادی ڈھانچے کو تباہ کر سکتا ہے لیکن ابھی تک ایسا نہیں کیا گیا۔
‎انہوں نے خبردار کیا کہ اگر امریکا نے ایران کے بجلی کے نظام کو نشانہ بنایا تو اس کے نتائج پورے خطے کو بھگتنا پڑیں گے۔ ان کے مطابق ایسی صورت میں آدھے گھنٹے سے بھی کم وقت میں پورا خطہ تاریکی میں ڈوب سکتا ہے۔
‎علی لاریجانی نے کہا کہ اس طرح کی صورتحال خطے میں موجود امریکی فوجیوں کے لیے بھی خطرناک ثابت ہو سکتی ہے کیونکہ انہیں محفوظ پناہ گاہوں کی تلاش میں مشکلات کا سامنا کرنا پڑ سکتا ہے۔


ایرانی میڈیا نے واضح کیا ہے کہ ایران کے سابق سپریم لیڈر آیت اللہ خامنہ ای کی اہلیہ کے انتقال سے متعلق خبریں درست نہیں ہیں۔
رپورٹس کے مطابق سوشل میڈیا اور بعض ذرائع میں چند روز قبل یہ خبر گردش کر رہی تھی کہ آیت اللہ خامنہ ای کی اہلیہ شہید ہو گئی ہیں۔
‎تاہم ایرانی میڈیا کا کہنا ہے کہ یہ اطلاعات بے بنیاد ہیں اور آیت اللہ خامنہ ای کی اہلیہ زندہ ہیں۔
‎اس وضاحت کے بعد سوشل میڈیا پر پھیلنے والی افواہوں کی تردید کی گئی ہے اور عوام سے غیر مصدقہ خبروں پر یقین نہ کرنے کی اپیل بھی کی گئی ہے۔


عراق نے سیکیورٹی خدشات کے پیش نظر ملک بھر میں آئل ٹرمینلز کے تمام آپریشنز عارضی طور پر معطل کرنے کا اعلان کر دیا ہے۔
عرب میڈیا کے مطابق عراقی وزیر تیل نے بتایا کہ موجودہ صورتحال کے باعث تمام آئل ٹرمینلز کی سرگرمیاں روک دی گئی ہیں تاکہ کسی بھی ممکنہ خطرے سے بچا جا سکے۔
‎وزیر تیل کے مطابق آئل ٹرمینلز کے آپریشنز بند کیے گئے ہیں تاہم عراق کی تجارتی بندرگاہیں بدستور معمول کے مطابق کام کر رہی ہیں اور تجارتی سرگرمیاں جاری ہیں۔
‎یہ فیصلہ بصرہ کی ام قصر بندرگاہ کے قریب دو آئل ٹینکروں پر حملے کے بعد سامنے آیا ہے جس کے بعد سیکیورٹی صورتحال کے باعث فوری اقدامات کیے گئے۔


سابق گورنر سندھ کامران ٹیسوری نے اپنے الوداعی خطاب میں کہا ہے کہ کراچی کے مسائل اور سانحہ گل پلازہ پر آواز اٹھانے کی انہیں سزا دی گئی۔
‎انہوں نے کہا کہ جب تک عوامی مسائل حل نہیں ہوں گے وہ خاموش نہیں رہیں گے۔ کامران ٹیسوری کا کہنا تھا کہ ڈر ان لوگوں کو ہونا چاہیے جن کے تمام راز وہ جانتے ہیں۔
‎انہوں نے مزید کہا کہ کوئی بھی شخص پوری زندگی کسی منصب پر نہیں رہتا اور وہ کبھی گونگا، بہرا یا ڈمی گورنر نہیں رہے۔ ان کے مطابق وہ آئندہ بھی سیاست میں فعال کردار ادا کرتے رہیں گے۔
‎دوسری جانب نئے گورنر سندھ کی تعیناتی پر ایم کیو ایم نے حکومت سے علیحدگی کا عندیہ دے دیا ہے۔
‎ایم کیو ایم کے رہنما فاروق ستار نے ردعمل دیتے ہوئے کہا کہ اس فیصلے پر انہیں اعتماد میں نہیں لیا گیا۔ ان کا کہنا تھا کہ اب ایک لمحے کی تاخیر کے بغیر حکومت کو خیرباد کہہ دینا چاہیے اور موجودہ حالات میں حکومت کا حصہ رہنے کا کوئی جواز نہیں بنتا۔
‎فاروق ستار نے الزام لگایا کہ وفاقی حکومت سندھ کے جاگیرداروں کی بلیک میلنگ میں آ گئی ہے۔
‎کامران ٹیسوری نے اپنے خطاب کے دوران نامزد گورنر کو مبارکباد بھی دی۔