Author: Aqsa Younas Rana


عرب میڈیا کے مطابق اسرائیل نے لبنان کے دارالحکومت بیروت کے مرکزی علاقوں پر شدید فضائی حملے کیے، جن کے نتیجے میں ایک 14 منزلہ عمارت مکمل طور پر زمین بوس ہو گئی۔
رپورٹس کے مطابق آج ہونے والے حملوں میں اب تک 12 افراد جاں بحق جبکہ 41 زخمی ہو چکے ہیں، جنہیں قریبی اسپتالوں میں منتقل کیا گیا ہے۔
‎میڈیا ذرائع کا کہنا ہے کہ بشورا کے علاقے میں ایک بڑا فضائی حملہ کیا گیا، جبکہ زقاق البلاط کے گنجان آباد علاقے کو بھی نشانہ بنایا گیا جہاں بغیر کسی پیشگی انتباہ کے بمباری کی گئی، جس سے شہریوں میں خوف و ہراس پھیل گیا۔
‎واضح رہے کہ لبنان پر جاری اسرائیلی حملوں کے نتیجے میں اب تک 800 سے زائد افراد جاں بحق ہو چکے ہیں جبکہ لاکھوں افراد اپنے گھروں سے بے دخل ہو کر نقل مکانی پر مجبور ہیں۔


وزیر اعظم آفس سے جاری اعلامیے کے مطابق 23 مارچ کو یومِ پاکستان کی مرکزی پریڈ اور اس سے متعلق تمام بڑی تقریبات منعقد نہیں کی جائیں گی۔
‎اعلامیے میں بتایا گیا ہے کہ یہ فیصلہ کفایت شعاری اقدامات کے تحت کیا گیا ہے، جس کے پیش نظر یومِ پاکستان کو سادگی اور وقار کے ساتھ منانے کی ہدایت دی گئی ہے۔
‎حکومتی ہدایات کے مطابق اس موقع پر صرف محدود اور سادہ نوعیت کی تقریبات منعقد کی جائیں گی، جن میں پرچم کشائی کی تقاریب شامل ہوں گی۔
‎اعلامیے میں مزید کہا گیا ہے کہ تمام وزارتوں، ڈویژنز اور سرکاری محکموں کو ہدایت کی گئی ہے کہ وہ یومِ پاکستان کو سادہ مگر باوقار انداز میں منائیں اور اس دن کے نظریات اور پیغام کو بھرپور طریقے سے اجاگر کریں۔
‎وزیر اعظم آفس کے مطابق محدود تقریبات کے باوجود اس دن کی اہمیت کو برقرار رکھا جائے گا اور قوم کو اس کے حقیقی مقصد سے روشناس کرایا جائے گا۔


ایرانی میڈیا کے مطابق ایران میں اسرائیل کے لیے جاسوسی کرنے کے الزام میں ایک شخص کو سزائے موت دے دی گئی ہے۔
رپورٹس کے مطابق حالیہ کشیدگی کے تناظر میں ایران نے جاسوسی کے مقدمات میں عدالتی کارروائیاں تیز کر دی ہیں اور سکیورٹی سے متعلق کیسز میں سخت اقدامات کیے جا رہے ہیں۔
‎حکام کا کہنا ہے کہ ملک کی سلامتی کے خلاف سرگرمیوں میں ملوث عناصر کے خلاف بلاامتیاز کارروائی جاری رکھی جائے گی۔
‎یہ پیش رفت ایسے وقت میں سامنے آئی ہے جب ایران اور اسرائیل کے درمیان تناؤ میں اضافہ دیکھنے میں آ رہا ہے۔


امریکی محکمہ دفاع پینٹاگون نے عراق میں پیش آنے والے طیارہ حادثے میں ہلاک ہونے والے 6 فضائیہ اہلکاروں کی شناخت ظاہر کر دی ہے، جبکہ حادثے کی تحقیقات تاحال جاری ہیں۔
پینٹاگون کے مطابق جاں بحق ہونے والوں میں 33 سالہ میجر جان اے کلنر، 31 سالہ کیپٹن آریانا جی ساوینو، 34 سالہ ٹیک سارجنٹ ایشلے بی پروئٹ، 38 سالہ کیپٹن سیٹھ آر کوول، 30 سالہ کیپٹن کرٹس جے اینگسٹ اور 28 سالہ ٹیک سارجنٹ ٹائلر ایچ سمنز شامل ہیں۔
‎حکام کے مطابق یہ حادثہ حالیہ دنوں میں پیش آیا، تاہم اس کی وجوہات کے تعین کے لیے تحقیقات جاری ہیں اور تاحال کوئی حتمی نتیجہ سامنے نہیں آیا۔
‎امریکی حکام نے واقعے پر افسوس کا اظہار کرتے ہوئے ہلاک ہونے والے اہلکاروں کی خدمات کو خراجِ عقیدت پیش کیا ہے۔


تہران کے مختلف علاقوں میں امریکی اور اسرائیلی افواج کی جانب سے فضائی حملوں کی اطلاعات سامنے آئی ہیں، جس کے نتیجے میں متعدد مقامات پر دھماکوں کی آوازیں سنی گئیں۔
اطلاعات کے مطابق یہ حملے دارالحکومت کے مختلف حصوں کو نشانہ بناتے ہوئے کیے گئے، جبکہ بعض علاقوں میں نقصان کی بھی خبریں موصول ہوئی ہیں۔
‎حالیہ کشیدگی کے تناظر میں یہ حملے ایک اہم پیش رفت قرار دیے جا رہے ہیں، جس سے خطے میں صورتحال مزید سنگین ہونے کا خدشہ ظاہر کیا جا رہا ہے۔
‎ذرائع کے مطابق متعلقہ حکام صورتحال کا جائزہ لے رہے ہیں، جبکہ مزید تفصیلات سامنے آنے کا انتظار کیا جا رہا ہے۔


ایران کی جانب سے ممکنہ میزائل حملوں کے خدشے کے پیشِ نظر اسرائیل نے ملک بھر میں ہائی ملٹری الرٹ جاری کر دیا ہے۔
اسرائیلی فوج کے مطابق ایران سے مزید میزائل فائر کیے جانے کی نشاندہی ہو چکی ہے، جنہیں روکنے کے لیے دفاعی نظام مکمل طور پر فعال کر دیا گیا ہے، جبکہ ممکنہ متاثرہ علاقوں میں شہریوں کو موبائل الرٹس کے ذریعے خبردار بھی کیا جا رہا ہے۔
‎دوسری جانب پاسدارانِ انقلاب نے خطے میں امریکا سے منسلک صنعتوں اور فیکٹریوں کو نشانہ بنانے کا اعلان کر دیا ہے۔ ایرانی بیان کے مطابق آئندہ چند گھنٹوں کے دوران ایسے تمام صنعتی مقامات کو ہدف بنایا جا سکتا ہے جہاں امریکی مفادات یا سرمایہ کاری موجود ہے۔
‎ایرانی فورسز نے شہریوں کو سختی سے ہدایت کی ہے کہ وہ اپنی حفاظت کے لیے فوری طور پر ان صنعتی علاقوں اور تنصیبات سے دور ہو جائیں، تاکہ کسی ممکنہ نقصان سے بچا جا سکے۔
‎مشرقِ وسطیٰ میں جاری کشیدگی اس وقت انتہائی خطرناک مرحلے میں داخل ہو چکی ہے، جہاں کسی بھی وقت صورتحال مزید بگڑنے کا خدشہ ظاہر کیا جا رہا ہے۔


ایران سے متعلق جنگی پالیسی پر اختلافات کے باعث ٹرمپ انتظامیہ کو بڑا دھچکا لگا ہے، جہاں نیشنل کاؤنٹر ٹیررازم سینٹر کے ڈائریکٹر جو کینٹ نے اپنے عہدے سے استعفیٰ دے دیا ہے۔
‎غیر ملکی خبررساں ادارے کے مطابق جو کینٹ نے احتجاجاً استعفیٰ دیتے ہوئے مؤقف اختیار کیا کہ ایران سے امریکا کو فوری طور پر کوئی براہ راست خطرہ لاحق نہیں تھا، جبکہ جنگ کا آغاز اسرائیل اور اس سے منسلک اثر و رسوخ رکھنے والے حلقوں کے دباؤ پر کیا گیا۔
‎ان کے استعفے پر وائٹ ہاؤس کی جانب سے فوری طور پر کوئی باضابطہ ردعمل سامنے نہیں آیا۔
‎جو کینٹ بطور سربراہ نیشنل کاؤنٹر ٹیررازم سینٹر دہشت گردی کے خطرات کی نگرانی، تجزیہ اور انسداد کی حکمت عملی کے ذمہ دار تھے۔
‎سرکاری ذمہ داریوں سے قبل وہ ریاست واشنگٹن سے کانگریس کے لیے انتخابی مہم بھی چلا چکے ہیں، تاہم کامیاب نہیں ہو سکے۔ اس کے علاوہ انہوں نے امریکی فوج میں گرین بیریٹ کے طور پر متعدد تعیناتیاں کیں اور بعد ازاں سی آئی اے میں بھی خدمات انجام دیں۔
‎یاد رہے کہ ان کی اہلیہ شینن کینٹ 2019 میں شام میں ایک خودکش حملے میں ہلاک ہو گئی تھیں۔


عالمی بحری تنظیم انٹرنیشنل میری ٹائم آرگنائزیشن کے سربراہ ارسینیو ڈومنگیز نے خبردار کیا ہے کہ آبنائے ہرمز سے گزرنے والے جہازوں کی حفاظت کو سو فیصد یقینی نہیں بنایا جا سکتا۔
ان کا کہنا تھا کہ موجودہ نگرانی کے نظام کے باوجود اس اہم سمندری گزرگاہ سے گزرنے والے جہاز مکمل طور پر محفوظ نہیں کہے جا سکتے، کیونکہ خطے میں جاری کشیدگی صورتحال کو غیر یقینی بنائے ہوئے ہے۔
‎ارسینیو ڈومنگیز نے مزید کہا کہ آبنائے ہرمز کو کھلا رکھنے کے لیے فوجی طاقت کا استعمال کوئی دیرپا یا پائیدار حل نہیں ہے، بلکہ اس کے لیے سفارتی اور مستقل اقدامات کی ضرورت ہے۔
‎انہوں نے اس بات پر زور دیا کہ عالمی تجارت کے لیے اس اہم راستے کی سلامتی یقینی بنانے کے لیے مشترکہ حکمت عملی اپنانا ناگزیر ہے۔