Author: Aqsa Younas Rana

‎منی لانڈرنگ، فراڈ اور اسمگلنگ کے ایک بڑے مقدمے میں مطلوب پاکستانی نژاد ملزم عبداللّٰہ انور کو قطر سے گرفتار کرنے کے بعد امریکا منتقل کر دیا گیا، جہاں اسے وفاقی تحقیقاتی ادارے ایف بی آئی کی تحویل میں ٹیکساس کی جیل منتقل کر دیا گیا ہے۔
‎امریکی حکام کے مطابق 28 سالہ عبداللّٰہ انور کا تعلق کراچی سے ہے اور اس پر الزام ہے کہ وہ ایک ایسے بین الاقوامی نیٹ ورک کا حصہ تھا جو چوری شدہ الیکٹرانک آلات کی خرید و فروخت، منی لانڈرنگ اور مالی فراڈ میں ملوث تھا۔ مقدمے میں موبائل فون، ٹیبلٹس، لیپ ٹاپس، اسمارٹ واچز اور دیگر قیمتی الیکٹرانک آلات کی غیر قانونی ترسیل اور فروخت کے الزامات شامل ہیں۔
‎امریکی اٹارنی آفس برائے ایسٹرن ڈسٹرکٹ آف ٹیکساس کے مطابق وفاقی گرینڈ جیوری نے عبداللّٰہ انور پر چوری شدہ املاک کو بین الاقوامی تجارت کے ذریعے منتقل کرنے کی سازش، میل فراڈ، وائر فراڈ اور منی لانڈرنگ کی سازش کے الزامات عائد کیے تھے۔
‎حکام کا کہنا ہے کہ ملزم ضمانت پر رہائی کے بعد امریکا سے پاکستان اور بعد ازاں قطر چلا گیا تھا۔ امریکی محکمہ انصاف کے آفس آف انٹرنیشنل افیئر نے قطری حکام کے تعاون سے اسے گرفتار کیا، جس کے بعد 10 جولائی 2026 کو امریکا منتقل کر دیا گیا۔ اس وقت عبداللّٰہ انور کولن کاؤنٹی جیل میں زیر حراست ہے اور اس کے خلاف قانونی کارروائی جاری ہے۔
‎ایف بی آئی کے مطابق یہ مبینہ مجرمانہ نیٹ ورک گزشتہ پانچ برسوں کے دوران ایک ارب ڈالر سے زائد مالی نقصان سے منسلک رہا ہے۔ تحقیقات کے مطابق نیٹ ورک نے تقریباً 100 ملین امریکی ڈالر مالیت کے 70 ہزار سے زائد چوری شدہ موبائل فون، لیپ ٹاپ، ٹیبلٹس اور اسمارٹ واچز بیرون ملک فروخت کیے، جبکہ شناختی چوری کے ذریعے مزید تقریباً 20 ہزار الیکٹرانک ڈیوائسز بھی حاصل کی گئیں۔
‎امریکی حکام نے ملزم کی گرفتاری اور حوالگی میں تعاون پر قطر کی وزارت داخلہ اور پبلک پراسیکیوشن کا شکریہ ادا کرتے ہوئے کہا کہ بین الاقوامی جرائم کے خلاف مشترکہ کارروائیاں آئندہ بھی جاری رکھی جائیں گی۔

‎شنگھائی تعاون تنظیم (ایس سی او) کے وزرائے خارجہ کا اہم اجلاس اگلے ہفتے کرغزستان کے دارالحکومت بشکک میں منعقد ہوگا، جس میں پاکستان، چین، ایران اور روس سمیت رکن ممالک کے وزرائے خارجہ شرکت کریں گے۔ اجلاس میں آئندہ ہونے والے سربراہی اجلاس کی تیاریوں اور خطے سے متعلق اہم امور پر مشاورت کی جائے گی۔
‎ذرائع کے مطابق نائب وزیراعظم اور وزیر خارجہ اسحاق ڈار 24 جولائی کو ہونے والے ایس سی او وزرائے خارجہ اجلاس میں شرکت کے لیے بشکک جائیں گے۔ اجلاس میں رکن ممالک کے درمیان علاقائی تعاون، سلامتی، تجارت، رابطہ کاری اور دیگر باہمی دلچسپی کے معاملات پر تبادلہ خیال متوقع ہے۔
‎ذرائع کا کہنا ہے کہ بھارتی وزیر خارجہ ایس جے شنکر کی بھی اجلاس میں شرکت کا امکان ہے، جس کے باعث مختلف علاقائی اور سفارتی معاملات پر اہم ملاقاتوں کی توقع کی جا رہی ہے۔ تاہم دوطرفہ ملاقاتوں کے شیڈول سے متعلق ابھی تک کوئی باضابطہ اعلان سامنے نہیں آیا۔
‎اجلاس کے دوران آئندہ ایس سی او سربراہی اجلاس کا ایجنڈا بھی حتمی شکل دی جائے گی۔ سربراہی اجلاس اگلے ماہ کے آخر میں بشکک میں منعقد ہوگا، جس میں وزیراعظم شہباز شریف پاکستان کی نمائندگی کریں گے۔
‎ذرائع کے مطابق ایس سی او سربراہی اجلاس میں روسی صدر ولادیمیر پیوٹن اور چینی صدر شی جن پنگ کی شرکت بھی متوقع ہے۔ اس موقع پر خطے کی بدلتی ہوئی صورتحال، اقتصادی تعاون، سیکیورٹی، دہشت گردی کے خلاف مشترکہ اقدامات اور رکن ممالک کے درمیان تعاون کو مزید فروغ دینے پر بھی غور کیا جائے گا۔
‎شنگھائی تعاون تنظیم کو خطے کی اہم علاقائی تنظیموں میں شمار کیا جاتا ہے، جہاں رکن ممالک باہمی تعاون، اقتصادی ترقی، علاقائی استحکام اور سلامتی کے فروغ کے لیے مشترکہ حکمت عملی پر کام کرتے ہیں۔ موجودہ اجلاس کو بھی اسی سلسلے کی ایک اہم کڑی قرار دیا جا رہا ہے۔

‎ایرانی مسلح افواج کے ترجمان نے واضح اعلان کیا ہے کہ ایران آبنائے ہرمز کے معاملے پر اپنے مؤقف سے کسی صورت دستبردار نہیں ہوگا اور اس حوالے سے ایک انچ بھی پیچھے ہٹنے کا سوال ہی پیدا نہیں ہوتا۔
‎ترجمان نے اپنے بیان میں کہا کہ آبنائے ہرمز کو جنگ، بیرونی جارحیت یا امریکی فوجی حملوں کے ذریعے دوبارہ کھلوانا ممکن نہیں۔ ان کا کہنا تھا کہ اس اہم عالمی آبی گزرگاہ سے متعلق کسی بھی پیش رفت کا واحد راستہ ایران کے قومی حقوق اور خودمختاری کا احترام ہے۔
‎انہوں نے زور دے کر کہا کہ ایرانی عوام کے جائز مطالبات کو تسلیم کیے بغیر خطے میں پائیدار استحکام قائم نہیں ہو سکتا۔ ان کے مطابق ایران اپنی سلامتی، خودمختاری اور قومی مفادات پر کسی قسم کا سمجھوتہ نہیں کرے گا۔
‎ترجمان نے مزید کہا کہ ایرانی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔ انہوں نے دعویٰ کیا کہ ملک کی دفاعی صلاحیت مضبوط ہے اور کسی بھی ممکنہ خطرے کا بھرپور جواب دینے کی صلاحیت رکھتی ہے۔
‎انہوں نے اپنے بیان میں کہا کہ ایرانی افواج اپنے رہبرِ انقلاب سمیت دیگر شہدا کے خون کو رائیگاں نہیں جانے دیں گی اور ان کی قربانیوں کا بدلہ لینے کے لیے ہر ممکن اقدام کیا جائے گا۔ ان کے مطابق فوج ہر وقت مکمل چوکسی کے ساتھ اپنی ذمہ داریاں انجام دے رہی ہے۔
‎آبنائے ہرمز دنیا کی اہم ترین تجارتی گزرگاہوں میں شمار ہوتی ہے، جہاں سے عالمی سطح پر تیل کی بڑی مقدار سمندری راستے کے ذریعے مختلف ممالک تک پہنچتی ہے۔ اسی وجہ سے اس آبی راستے کی صورتحال نہ صرف مشرق وسطیٰ بلکہ عالمی معیشت اور توانائی کی منڈیوں پر بھی براہ راست اثر ڈالتی ہے۔
‎حالیہ ہفتوں میں خطے میں بڑھتی ہوئی کشیدگی، امریکا اور ایران کے درمیان بڑھتے ہوئے تناؤ اور آبنائے ہرمز سے متعلق بیانات نے عالمی برادری کی تشویش میں اضافہ کر دیا ہے۔ مبصرین کا کہنا ہے کہ اگر صورتحال مزید کشیدہ ہوئی تو اس کے اثرات عالمی تجارت، توانائی کی ترسیل اور تیل کی قیمتوں پر بھی مرتب ہو سکتے ہیں۔

‎غیر قانونی طریقے سے بیرون ملک جانے کی کوشش کرنے والے 12 پاکستانی نوجوان لاپتہ ہو گئے ہیں، جبکہ ان کے اہلخانہ کا کہنا ہے کہ اغوا کاروں کی جانب سے بھاری تاوان طلب کیا جا رہا ہے۔ متاثرہ خاندانوں نے حکومت اور وفاقی تحقیقاتی ادارے (ایف آئی اے) سے فوری مدد کی اپیل کی ہے۔
‎اطلاعات کے مطابق لاپتہ ہونے والے 12 نوجوانوں میں سے 7 کا تعلق لاہور کے علاقے جلو موڑ کے قریب واقع پسین گاؤں سے ہے۔ ان میں تین کزن، دلشاد، اسامہ اور وقاص بھی شامل ہیں۔
‎اہلخانہ کے مطابق عامر نامی ایک مبینہ ایجنٹ لاکھوں روپے وصول کرنے کے بعد نوجوانوں کو غیر قانونی راستے سے بیرون ملک لے گیا۔ خاندان کا کہنا ہے کہ ایران پہنچنے کے بعد نوجوانوں نے آخری مرتبہ اپنے گھر والوں سے رابطہ کیا، جس کے بعد ان سے تمام رابطہ منقطع ہو گیا۔
‎ورثا کے مطابق اب وقاص کے موبائل فون سے ہی مزید رقم کا مطالبہ کیا جا رہا ہے۔ ان کا کہنا ہے کہ مبینہ اغوا کاروں نے تین نوجوانوں کی ویڈیوز بھی بھیجی ہیں جن میں انہیں گلے میں لوہے کی زنجیریں ڈالے ہوئے دیکھا جا سکتا ہے۔ ویڈیوز میں نوجوان اپنے اہلخانہ سے فوری رقم کا انتظام کرنے کی اپیل کرتے نظر آتے ہیں۔
‎اہلخانہ کا کہنا ہے کہ نوجوانوں کو بیرون ملک لے جانے والا مبینہ ایجنٹ بھی ان کے ہی علاقے کا رہائشی ہے۔ ان کے مطابق ایجنٹ کو پہلے ہی فی کس 10 لاکھ روپے ادا کیے جا چکے تھے، تاہم اب مبینہ اغوا کار ہر نوجوان کے بدلے مزید 6 ہزار امریکی ڈالر، یعنی 16 لاکھ روپے سے زائد تاوان کا مطالبہ کر رہے ہیں۔ خاندانوں کا کہنا ہے کہ رقم ادا نہ کرنے کی صورت میں سنگین نتائج کی دھمکیاں بھی دی جا رہی ہیں۔
‎متاثرہ خاندانوں نے ایف آئی اے کو درخواست جمع کرا دی ہے اور حکومت سے مطالبہ کیا ہے کہ نوجوانوں کی جلد اور محفوظ بازیابی کے لیے فوری اقدامات کیے جائیں۔ اس واقعے نے ایک بار پھر غیر قانونی انسانی اسمگلنگ کے خطرناک نتائج کو اجاگر کر دیا ہے۔