پاکستان نے سکھر، فیصل آباد، ڈیرہ اسماعیل خان اور میرپور آزاد کشمیر کے ایئرپورٹس کو نئے انداز میں تعمیر کرنے کا فیصلہ کیا ہے۔ اس کے علاوہ خضدار میں غیر فعال ایئرپورٹ کو بحال کرنے کا منصوبہ بھی زیر غور ہے۔
ڈی جی پاکستان ایئرپورٹ اتھارٹی (پی اے اے) ایئر وائس مارشل ذیشان سعید کے مطابق کراچی ایئرپورٹ کی توسیع کا منصوبہ تیار ہو چکا ہے، جبکہ کراچی، لاہور اور اسلام آباد ایئرپورٹس کی آؤٹ سورسنگ بھی کی جائے گی۔
پروازوں کی حفاظت اور پرندوں سے محفوظ رکھنے کے لیے کراچی، لاہور، اسلام آباد اور ملتان سمیت دیگر ایئرپورٹس پر برڈ ریپلنٹ سسٹم نصب کیا جائے گا۔ پہلے مرحلے میں لاہور ایئرپورٹ پر یہ نظام فعال ہوگا، جبکہ اسلام آباد انٹرنیشنل ایئرپورٹ پر جلد ای گیٹس نصب کیے جائیں گے۔ بعد ازاں کراچی، لاہور اور باچا خان ایئرپورٹس پر بھی ای گیٹس لگائی جائیں گی۔
Author: Aqsa Younas Rana
پاکستان کے چار ایئرپورٹس کو جدید انداز میں اپ گریڈ کرنے کا فیصلہ
ایران کے سپریم لیڈر کا امریکی بحری بیڑے کے لیے سخت انتباہ
ایران کے سپریم لیڈر آیت اللہ علی خامنہ ای نے تہران میں ایک تقریب کے دوران کہا کہ امریکی بحری بیڑے پلک جھپکتے میں سمندر کی تہہ میں ڈبوے جا سکتے ہیں۔ انہوں نے واشنگٹن کو سخت انتباہ دیتے ہوئے کہا کہ خلیجِ عرب میں تعینات امریکی جنگی جہاز خطرناک ہونے کے باوجود بھی ایسے ہتھیاروں کے سامنے بے بس ہیں جو انہیں تباہ کر سکتے ہیں۔
یہ بیان جنیوا میں عمانی ثالثی کے تحت ایران اور امریکا کے درمیان جاری بالواسطہ جوہری مذاکرات کے دوران سامنے آیا، جس میں کچھ پیش رفت بھی دکھائی دے رہی ہے۔ خامنہ ای نے امریکی صدر ڈونلڈ ٹرمپ کے حالیہ بیانات کا حوالہ دیتے ہوئے کہا کہ دنیا کی سب سے طاقتور فوج کو بھی ایسی ضرب دی جا سکتی ہے کہ وہ دوبارہ سنبھل نہ سکے۔
سپریم لیڈر نے یہ بھی کہا کہ امریکا ایران کا تختہ الٹنے میں 47 سال سے ناکام رہا ہے اور آئندہ بھی ایسا کرنے میں کامیاب نہیں ہو سکے گا۔ انہوں نے اعلان کیا کہ ایران اختلافات کے حل کے لیے امریکا کو آئندہ 14 روز میں ٹھوس فارمولہ پیش کرے گا۔
اقوام متحدہ: جیفری ایپسٹن نیٹ ورک عالمی جرائم پیشہ تنظیم کے زمرے میں شامل
اقوام متحدہ کے ماہرین نے جیفری ایپسٹن کے نیٹ ورک کو عالمی جرائم پیشہ تنظیم قرار دیتے ہوئے اس کے خلاف آزادانہ عالمی تحقیقات کا مطالبہ کیا ہے۔ پینل کے بیان کے مطابق ایپسٹن کے جرائم انسانی حقوق کے سنگین خلاف ورزیوں اور انسانیت کے خلاف جرائم میں شامل ہیں۔
ماہرین کے مطابق دستیاب دستاویزات خواتین اور بچیوں کے خلاف منظم جرائم کی شدت کو ظاہر کرتی ہیں، اور ریکارڈز میں غیر انسانی سلوک، نسل پرستی اور بدعنوانی کی واضح تصویر سامنے آئی ہے۔ رپورٹ میں بتایا گیا ہے کہ امریکی حکومت نے ایپسٹن سے متعلق 35 لاکھ صفحات پر مشتمل ریکارڈ جاری کیا، تاہم کئی طاقتور اور بااثر شخصیات کے نام چھپائے گئے ہیں۔
یو این ماہرین نے زور دیا ہے کہ تمام حقائق کو منظر عام پر لایا جائے اور ایپسٹن کے تمام بااثر ساتھیوں کے خلاف جامع تحقیقات کی جائیں تاکہ انصاف فراہم کیا جا سکے۔
پی ٹی آئی میں کوئی بھی عمران خان کی رہائی نہیں چاہتا, خواجہ آصف
وزیر دفاع خواجہ آصف نے کہا ہے کہ پاکستان تحریک انصاف (پی ٹی آئی) میں کوئی بھی بانی عمران خان کی رہائی نہیں چاہتا۔ اے آر وائی نیوز کے مطابق سابق وزیراعظم عمران خان اڈیالہ جیل میں آنکھ کے مرض کے باعث زیرِ علاج ہیں، جس پر سیاسی بحث جاری ہے۔
خواجہ آصف نے سوشل میڈیا پلیٹ فارم ایکس پر اپنے بیان میں کہا کہ پی ٹی آئی قیادت، رشتے دار اور سوشل میڈیا سرگرم کارکن نہیں چاہتے کہ بانی رہا ہوں، کیونکہ پی ٹی آئی کی وجہ سے ان کی سیاسی اور معاشی دکانداری چل رہی ہے اور وہ اسے بند نہیں ہونے دیں گے۔
وزیر دفاع نے مزید کہا کہ بانی کے پاس کوئی ووٹ نہیں، ووٹوں کا مالک اندر ہے، اور موجودہ قیادت اس کی کوئی اہمیت نہیں دیتی۔
انڈیا کیلئے ایک اور عالمی شرمندگی، مودی حکومت کی عالمی اے آئی سمٹ انتظامی ناکامی کی مثال
نئی دہلی میں منعقد ہونے والی “انڈیا اے آئی امپیکٹ سمٹ 2026” کا آغاز ہی شدید بدنظمی اور انتظامی مسائل کے باعث تنازع کا شکار ہوگیا۔ حکومت کی جانب سے اسے عالمی سطح پر ٹیکنالوجی میں پیش رفت کی علامت کے طور پر پیش کیا جا رہا تھا، تاہم پہلے ہی روز شرکا کو بدانتظامی، طویل انتظار اور ناقص سہولیات کا سامنا کرنا پڑا۔
رپورٹس کے مطابق کانفرنس کے مقام پر سخت سیکیورٹی انتظامات کے باعث نمائش کنندگان اپنے بوتھس تک بروقت رسائی حاصل نہ کرسکے۔ کئی داخلی راستے گھنٹوں بند رہے جس کے نتیجے میں مقامی اور غیرملکی شرکا کو شدید مشکلات پیش آئیں۔ متعدد مندوبین کو تپتی دھوپ میں طویل انتظار کرنا پڑا جبکہ ٹریفک جام نے صورتحال مزید خراب کردی۔
وزیراعظم نریندر مودی کی آمد سے قبل سیکیورٹی اقدامات غیرمعمولی حد تک سخت کر دیے گئے، جس کے باعث کانفرنس کی سرگرمیاں متاثر ہوئیں۔ شرکا کا کہنا تھا کہ مصنوعی ذہانت پر گفتگو کے بجائے انتظامات زیادہ تر سرکاری تشہیر اور تصویری سرگرمیوں تک محدود دکھائی دیے۔
کانفرنس ہال کے اندر بھی حالات تسلی بخش نہ رہے۔ شرکا نے ناقص وینٹیلیشن، بجلی کی بندش اور پانی کی کمی کی شکایات کیں۔ فضائی آلودگی اور شدید حبس نے ماحول کو مزید مشکل بنا دیا، جس پر سوشل میڈیا پر بھی سخت ردعمل سامنے آیا۔ کئی صارفین نے اسے عالمی معیار کی کانفرنس کے برعکس قرار دیا۔
اسٹارٹ اپ بانیوں اور ٹیکنالوجی ماہرین نے احتجاج کرتے ہوئے انتظامیہ کی کارکردگی پر سوالات اٹھائے۔ ان کا کہنا تھا کہ سیکیورٹی کے نام پر کاروباری ملاقاتیں اور نیٹ ورکنگ سیشن متاثر ہوئے، جس سے ایونٹ کے بنیادی مقاصد ہی متاثر ہوگئے۔
پانچ روزہ اس سمٹ میں بھارت سمیت 20 سے زائد ممالک کے سربراہانِ مملکت و حکومت اور تقریباً 40 سے 45 سینئر وزرا کی شرکت متوقع ہے، تاہم افتتاحی دن کی بدنظمی نے عالمی سطح پر کانفرنس کی ساکھ پر سوالیہ نشان کھڑا کردیا ہے۔ شرکا کا کہنا ہے کہ اگر انتظامی مسائل فوری حل نہ کیے گئے تو آئندہ سیشنز بھی متاثر ہوسکتے ہیں۔
ایبٹ آباد میں جعلی چیک اسکینڈل، 5 کروڑ روپے سے زائد رقم سرکاری خزانے سے نکالی گئی
ایبٹ آباد میں ایک بڑے مالی اسکینڈل کا انکشاف ہوا ہے، جس میں جعلی کمپنیوں اور چیک کے ذریعے سرکاری خزانے سے 5 کروڑ روپے سے زائد رقم نکالی گئی۔ واقعے کی چھان بین کے دوران معلوم ہوا کہ اس اسکینڈل میں بینک عملہ اور اکاؤنٹ آفس کے اہلکار بھی ملوث ہیں۔
محکمہ سی این ڈبلیو نے بروقت کارروائی کرتے ہوئے اسکینڈل میں شامل مزید 3 کروڑ روپے کی منتقلی کو روک دیا، جس سے بڑے نقصان سے بچا جا سکا۔ سی این ڈبلیو حکام نے متعلقہ بینکوں اور اکاؤنٹس آفس سے مکمل ریکارڈ طلب کر لیا ہے تاکہ اسکینڈل کی تمام تفصیلات سامنے آئیں اور ذمہ دار افراد کو قانون کے مطابق سزائیں دی جا سکیں۔
ذرائع کے مطابق، جعلی چیک اسکینڈل میں متعدد افسران نے جعلسازی اور سرکاری فنڈز کی غیر قانونی منتقلی میں حصہ لیا۔ اس سلسلے میں محکمہ سی این ڈبلیو نے تحقیقات کے لیے مراسلہ جاری کر دیا ہے اور معاملے کی مکمل انکوائری کی جا رہی ہے۔
مالی سال کے 7 ماہ میں پاکستان کی درآمدات 40 ارب ڈالر سے تجاوز
مالی سال کے پہلے سات ماہ کے دوران پاکستان کی برآمدات صرف 18 ارب ڈالر رہیں، جبکہ درآمدات 40 ارب ڈالر سے تجاوز کر گئیں، جس سے تجارتی خسارہ مزید بڑھ گیا۔ رپورٹ کے مطابق اس مدت میں پاکستانی صارفین نے 106 ارب روپے کی چائے پی، اور آئی ایم ایف کے قرض کی ایک قسط سے زیادہ رقم صرف اسمارٹ فون کی درآمد پر خرچ کی گئی۔
دستاویز کے مطابق 7 ماہ میں 2.5 ارب ڈالر مالیت کی گاڑیاں اور اسمارٹ موبائل فونز درآمد کیے گئے۔ اسمارٹ فونز کی امپورٹ 1.13 ارب ڈالر سے زیادہ رہی، جو مجموعی طور پر 33 فیصد اضافے کے بعد 321 ارب روپے تک پہنچ گئی۔
رپورٹ میں مزید بتایا گیا ہے کہ غذائی اشیاء کی درآمد میں 19 فیصد اضافہ ہوا اور مجموعی حجم 5.5 ارب ڈالر تک پہنچ گیا، جبکہ مشینری کی درآمد میں 13 فیصد اضافہ دیکھنے کو ملا اور حجم 6 ارب ڈالر سے تجاوز کر گیا۔ اسی دوران کاروں، بسوں اور دیگر ٹرانسپورٹ کی درآمد میں 94 فیصد اضافہ ہوا، جس سے ملکی تجارتی خسارہ مزید بڑھ گیا۔
ماہرین اقتصادیات کے مطابق یہ اعداد و شمار پاکستان کی درآمدی انحصار، کرنٹ اکاؤنٹ خسارہ اور غیر ضروری درآمدات کے بڑھتے رجحان کو واضح کرتے ہیں، اور ملکی معیشت پر دباؤ مزید بڑھانے کا باعث بن رہے ہیں۔
اسلام آباد ایئرپورٹ پر خاتون مسافر سے ساڑھے چار کلو منشیات برآمد
اینٹی نارکوٹکس فورس (اے این ایف) نے اسلام آباد ایئرپورٹ پر کارروائی کرتے ہوئے خاتون مسافر سے ساڑھے چار کلو گرام منشیات برآمد کر لی ہے۔ خاتون شارجہ سے دوحہ کے راستے اسلام آباد پہنچی تھی اور دوران تلاشی اس کے ٹرالی بیگ کے خفیہ خانوں سے منشیات برآمد ہوئی۔
ابتدائی تفتیش میں خاتون نے انکشاف کیا کہ اس نے یہ منشیات دوحہ میں ایک نائجیرین شہری سے حاصل کی تھیں۔ اے این ایف نے فوری کارروائی کرتے ہوئے ایئرپورٹ کے باہر موجود اس نیٹ ورک کے مقامی ہینڈلر کو بھی گرفتار کر لیا۔
حکام کے مطابق ملزمان کے خلاف مقدمہ درج کر کے مزید تحقیقات کا آغاز کر دیا گیا ہے تاکہ اس بین الاقوامی اسمگلنگ نیٹ ورک کے دیگر کارندوں تک پہنچا جا سکے۔
کراچی میں زخمی شخص کی کرسی پر بیٹھے بیٹھے موت، پولیس شناخت کے لیے کوشاں
شہر قائد کے علاقے یونیورسٹی روڈ کے نزدیک نصیر ٹاور کے قریب ایک شخص کی کرسی پر بیٹھے ہوئے موت واقع ہو گئی۔ پولیس کے مطابق جاں بحق شخص کے چہرے پر چوٹوں کے نشانات موجود ہیں اور ابتدائی شبہے کے مطابق وہ رات گئے کسی حادثے کا شکار ہو کر زخمی حالت میں کرسی پر بیٹھ گیا تھا، جہاں اس کی موت واقع ہوئی۔
متوفی کے پاس سے کوئی دستاویز یا شناختی چیز برآمد نہیں ہوئی، جس کی وجہ سے پولیس اس کی شناخت کے لیے تفتیش کر رہی ہے۔ لاش کو قانونی کارروائی کے لیے جناح اسپتال منتقل کر دیا گیا ہے اور واقعے کی مختلف پہلوؤں سے تحقیقات جاری ہیں۔
دنیاپور میں آوارہ کتوں کے حملے سے 3 سالہ بچی جاں بحق
پنجاب کے شہر دنیاپور میں آوارہ کتوں نے 3 سالہ بچی کنیز فاطمہ پر حملہ کیا، جس کے شدید زخموں کے باعث وہ موقع پر ہی جاں بحق ہوگئی۔ پولیس نے لاش تحصیل ہیڈ کوارٹرز اسپتال منتقل کر کے پوسٹ مارٹم کروایا۔
افسوسناک واقعے کی اطلاع ملنے پر اسسٹنٹ کمشنر فیصل ولید موقع پر پہنچے۔ ڈپٹی کمشنر لودھراں محمد اشرف نے واقعے کا نوٹس لیتے ہوئے سینٹری سپروائزر اور حلقہ پٹواری کو معطل کر دیا۔
