Author: Aqsa Younas Rana

‎ابوظہبی میں قائم بین الاقوامی فلکیاتی مرکز نے نئے اسلامی سال 1448 ہجری کے آغاز پر محرم الحرام کے چاند کی ایک نایاب تصویر جاری کی ہے، جو دن کی تیز روشنی میں محفوظ کی گئی۔
‎تفصیلات کے مطابق یہ تصویر پیر کی صبح اماراتی وقت کے مطابق 11 بجے الختم فلکیاتی رصد گاہ سے لی گئی، جہاں ماہرین نے نئے ہلال کا کامیاب مشاہدہ کیا۔ یہ تصویر نئے اسلامی مہینے کے آغاز کے چند گھنٹوں بعد حاصل کی گئی، جسے فلکیاتی لحاظ سے ایک اہم کامیابی قرار دیا جا رہا ہے۔
‎ماہرین فلکیات کے مطابق تصویر لیے جانے کے وقت چاند سورج سے صرف 5.4 ڈگری کے فاصلے پر تھا، جبکہ اس کی عمر تقریباً 5 گھنٹے 35 منٹ تھی۔
‎فلکیاتی ماہرین کا کہنا ہے کہ دن کے وقت اتنے کم عمر چاند کی تصویر لینا انتہائی مشکل اور غیر معمولی کارنامہ ہے، کیونکہ سورج کی تیز روشنی اور آسمان کی چمک کے باعث اتنا باریک ہلال عام طور پر نہ انسانی آنکھ سے دکھائی دیتا ہے اور نہ ہی عام کیمروں سے ریکارڈ کیا جا سکتا ہے۔
‎واضح رہے کہ محرم الحرام کے چاند کی رویت سے نئے ہجری سال کا آغاز ہوتا ہے۔ محرم اسلامی کیلنڈر کے چار مقدس مہینوں میں شامل ہے، اسی وجہ سے اس کے چاند کی رویت مذہبی اور ثقافتی اعتبار سے خصوصی اہمیت رکھتی ہے۔

‎وفاقی وزیر اطلاعات و نشریات عطا اللہ تارڑ نے سینئر صحافی اور معروف اینکر پرسن مبشر لقمان کی جلد اور مکمل صحت یابی کے لیے نیک تمناؤں کا اظہار کیا ہے۔
‎لندن میں زیرِ علاج مبشر لقمان کی عیادت کے لیے پاکستانی ہائی کمیشن کے پریس منسٹر علی نواز ملک اور پریس اتاشی عرفان قاضی نے سینٹرل لندن کے ایک اسپتال کا دورہ کیا۔ اس موقع پر انہوں نے وفاقی وزیر اطلاعات عطا اللہ تارڑ کی جانب سے پھولوں کا گلدستہ پیش کیا اور ان کی نیک خواہشات اور دعائیں پہنچائیں۔
‎وفاقی وزیر اطلاعات نے مبشر لقمان کی جلد صحت یابی کے لیے دعا کرتے ہوئے کہا کہ وہ جلد مکمل صحت کے ساتھ اپنے پیشہ ورانہ فرائض کی انجام دہی کی طرف واپس آئیں۔ انہوں نے مبشر لقمان کی صحافتی خدمات کو سراہتے ہوئے ان کی صحت کے حوالے سے نیک تمناؤں کا اظہار کیا۔
‎دورانِ ملاقات پاکستانی ہائی کمیشن کے نمائندوں نے مبشر لقمان کی خیریت دریافت کی اور ان کے اہل خانہ کے لیے بھی نیک خواہشات کا پیغام دیا۔ اس موقع پر اسپتال انتظامیہ سے بھی ان کی صحت سے متعلق معلومات حاصل کی گئیں۔
‎صحافتی اور سماجی حلقوں کی جانب سے بھی مبشر لقمان کی جلد صحت یابی کے لیے دعاؤں اور نیک تمناؤں کا سلسلہ جاری ہے۔

‎پاکستان میں چھٹیاں گزارنے کے دوران جاں بحق ہونے والی 9 سالہ آسٹریلوی نژاد بچی ہانیہ احمد کے واقعے پر آسٹریلیا کے وزیراعظم انتھونی البانیز نے مکمل، آزادانہ اور شفاف تحقیقات کا مطالبہ کر دیا ہے۔
‎برطانوی نشریاتی ادارے کے مطابق کینبرا میں صحافیوں سے گفتگو کرتے ہوئے آسٹریلوی وزیراعظم نے کہا کہ اس افسوسناک واقعے کے تمام پہلوؤں کا تفصیلی جائزہ لیا جانا چاہیے تاکہ متاثرہ خاندان اور عوام کے سامنے حقائق واضح ہو سکیں۔ انہوں نے زور دیا کہ تحقیقات غیر جانبدار، شفاف اور قابلِ اعتماد ہونی چاہئیں۔
‎انتھونی البانیز کا کہنا تھا کہ آسٹریلیا توقع کرتا ہے کہ پاکستانی حکام اس معاملے کی مکمل تحقیقات کریں گے اور واقعے کی اصل وجوہات سامنے لائی جائیں گی۔ انہوں نے متاثرہ خاندان کے ساتھ ہمدردی کا اظہار کرتے ہوئے کہا کہ آسٹریلوی حکومت ہر ممکن معاونت فراہم کر رہی ہے۔
‎آسٹریلوی وزیراعظم نے تصدیق کی کہ حکومت کی جانب سے متاثرہ خاندان کو قونصلر معاونت بھی دی جا رہی ہے تاکہ انہیں قانونی اور انتظامی امور میں سہولت فراہم کی جا سکے۔
‎یاد رہے کہ چکوال میں پیش آنے والے اس افسوسناک واقعے میں 9 سالہ ہانیہ احمد مبینہ طور پر سی سی ڈی اہلکار کی فائرنگ کا نشانہ بن کر جاں بحق ہو گئی تھیں، جبکہ ان کے والد اور بھائی بھی زخمی ہوئے تھے۔ واقعے کے بعد ملک بھر میں شدید ردعمل سامنے آیا اور شفاف تحقیقات کا مطالبہ کیا گیا۔
‎ہانیہ احمد کے والد کی مدعیت میں درج مقدمے میں ابتدا میں دفعہ 322 شامل کی گئی تھی، جو غفلت یا لاپرواہی کے نتیجے میں موت واقع ہونے سے متعلق ہے، تاہم بعد ازاں متاثرہ خاندان کے اصرار پر مقدمے میں دفعہ 302 بھی شامل کر لی گئی، جو قتل کی دفعہ ہے۔
‎دوسری جانب سی سی ڈی پنجاب کے سربراہ سہیل ظفر چٹھہ متاثرہ خاندان سے ملاقات کے لیے ان کے گھر پہنچے اور واقعے پر افسوس کا اظہار کیا۔ انہوں نے ادارے کی جانب سے غلطی کا اعتراف کرتے ہوئے یقین دہانی کرائی کہ مستقبل میں ایسے واقعات کی روک تھام کے لیے آپریشنل ایس او پیز کو مزید مؤثر اور سخت بنایا جائے گا۔
‎یہ واقعہ نہ صرف پاکستان بلکہ آسٹریلیا میں بھی توجہ کا مرکز بن گیا ہے، جبکہ دونوں ممالک میں عوام کی جانب سے انصاف اور شفاف تحقیقات کا مطالبہ کیا جا رہا ہے۔ متاثرہ خاندان کا کہنا ہے کہ انہیں امید ہے کہ تحقیقات کے ذریعے ذمہ دار عناصر کا تعین ہوگا اور حانیہ کو انصاف ملے گا۔

‎روس نے یوکرین کے مختلف شہروں پر ڈرونز اور میزائلوں کے ذریعے بڑے پیمانے پر حملے کیے ہیں، جن کے نتیجے میں کم از کم 9 افراد ہلاک اور متعدد زخمی ہو گئے۔ یوکرینی حکام کے مطابق حملوں میں رہائشی عمارتوں، بنیادی ڈھانچے اور بجلی کی تنصیبات کو بھی نقصان پہنچا ہے۔
‎یوکرین کے دارالحکومت کیف میں روسی حملوں کے نتیجے میں 4 افراد جان کی بازی ہار گئے جبکہ 23 افراد زخمی ہوئے۔ حملوں کے بعد شہر کے مختلف علاقوں میں ہنگامی امدادی کارروائیاں شروع کر دی گئیں اور زخمیوں کو اسپتالوں میں منتقل کیا گیا۔
‎شمال مشرقی شہر خارکیف میں صورتحال مزید سنگین رہی، جہاں آگ بجھانے اور امدادی کارروائیوں میں مصروف ریاستی ایمرجنسی سروس کے 5 اہلکار ہلاک ہو گئے۔ حکام کے مطابق یہ اہلکار حملوں کے بعد متاثرہ علاقوں میں شہریوں کی مدد کر رہے تھے جب وہ نشانہ بنے۔
‎یوکرینی فوج کا کہنا ہے کہ روس نے گزشتہ رات 70 میزائل اور 611 ڈرونز داغے۔ فوج کے مطابق فضائی دفاعی نظام نے 50 میزائل اور 582 ڈرونز کو تباہ کر دیا، تاہم باقی حملوں سے مختلف علاقوں میں جانی و مالی نقصان ہوا۔
‎حملوں کے نتیجے میں کئی بلند و بالا رہائشی عمارتوں کو نقصان پہنچا جبکہ متعدد علاقوں میں بجلی کی فراہمی بھی متاثر ہوئی۔ مقامی حکام نے شہریوں کو احتیاطی تدابیر اختیار کرنے اور حفاظتی مقامات پر منتقل ہونے کی ہدایت جاری کی ہے۔
‎یورپی کمیشن کی صدر اُرسولا وان ڈر لیین نے حملوں کی شدید مذمت کرتے ہوئے کہا کہ گزشتہ رات یوکرین پر ہونے والے حملوں میں مزید بے گناہ شہری ہلاک ہوئے ہیں۔ انہوں نے بتایا کہ یونیسکو کے عالمی ثقافتی ورثے میں شامل تاریخی مقام "کیف پیچرسک لاورا” کو بھی نقصان پہنچا ہے۔
‎اُرسولا وان ڈر لیین نے کہا کہ جی 7 ممالک کے رہنما موجودہ صورتحال پر تبادلہ خیال کر رہے ہیں اور روس پر مزید دباؤ بڑھانے کے اقدامات پر غور کیا جا رہا ہے۔ ان کے مطابق عالمی برادری کی کوشش ہے کہ روسی صدر ولادیمیر پیوٹن کو مذاکرات کی میز پر لایا جائے اور جاری خونریزی کا خاتمہ کیا جا سکے۔
‎روس اور یوکرین کے درمیان جاری جنگ کو تین سال سے زائد عرصہ گزر چکا ہے، تاہم حالیہ حملے اس بات کی نشاندہی کرتے ہیں کہ تنازع اب بھی شدت اختیار کیے ہوئے ہے اور امن کی کوششوں کو سنگین چیلنجز درپیش ہیں۔