لورالائی میں فرنٹیئر کور بلوچستان (نارتھ) کے 68 ویں بیچ (فیز ٹو) کی پاسنگ آؤٹ پریڈ منعقد ہوئی، جس میں 1104 ریکروٹس نے کامیابی کے ساتھ تربیت مکمل کی۔ تقریب میں انسپکٹر جنرل ایف سی بلوچستان (نارتھ) میجر جنرل محمد عاطف مجتبیٰ نے پریڈ کا معائنہ کیا اور جوانوں و ان کے اہلِ خانہ کو مبارکباد دی۔
میجر جنرل محمد عاطف مجتبیٰ نے کہا کہ تمام ریکروٹس کو فخر ہونا چاہیے کہ وہ ایف سی بلوچستان (نارتھ) جیسے باوقار ادارے کا حصہ بن رہے ہیں، جو اپنی قربانی، بہادری اور شاندار روایات کے لیے جانا جاتا ہے۔
پریڈ میں نوشکی میں شہید خطیب امشد علی کے والد محترم نواب خان کو مہمان خصوصی کے طور پر مدعو کیا گیا اور اُن کی فیملی کی قربانی کو خراجِ عقیدت پیش کیا گیا۔
تقریب میں قبائلی عمائدین، مقامی شخصیات، معزز مہمانوں اور سول سوسائٹی کے نمائندگان کی شرکت نے ایف سی اور عوام کے درمیان تعلقات اور باہمی اعتماد کو مزید مستحکم کیا۔
پریڈ کے اختتام پر نمایاں کارکردگی دکھانے والے ریکروٹس میں خصوصی انعامات بھی تقسیم کیے گئے۔
Author: Aqsa Younas Rana
لورالائی میں ایف سی بلوچستان (نارتھ) کے 68 ویں بیچ کی شاندار پاسنگ آؤٹ پریڈ
بیویاں بھی شوہروں پر تشدد کرتی ہیں، بل میں صرف عورتوں کا ذکر کیوں؟ خواجہ اظہار الحسن
خواجہ اظہار الحسن نے گھریلو تشدد سے متعلق ترمیمی بل پر تبصرہ کرتے ہوئے کہا کہ بل میں صرف شوہروں کی جانب سے بیویوں پر تشدد کا ذکر کیوں کیا گیا ہے، جبکہ بیویاں بھی شوہروں پر تشدد کرتی ہیں۔
تفصیلات کے مطابق اسلام آباد میں قومی اسمبلی قائمہ کمیٹی برائے داخلہ کا اہم اجلاس منعقد ہوا، جس میں گھریلو تشدد کے خلاف پیش کیے گئے ترمیمی بل پر تفصیلی بحث کی گئی۔
اجلاس کے دوران شازیہ مری نے گھریلو تشدد کی روک تھام سے متعلق ترمیمی بل کمیٹی میں پیش کیا۔ بل کا مقصد موجودہ قوانین کو مزید مؤثر بنانا اور سزاؤں کے نظام کو مضبوط کرنا بتایا گیا۔
وزارت قانون و انصاف پاکستان کے حکام نے بریفنگ دیتے ہوئے کہا کہ ملک میں گھریلو تشدد سے متعلق قانون پہلے سے موجود ہے، اس لیے یہ جائزہ لینا ضروری ہے کہ نئی تجاویز پہلے سے نافذ قوانین کا حصہ ہیں یا نہیں۔ حکام کے مطابق خصوصی قوانین اس وقت صرف اسلام آباد کی حدود تک نافذ ہیں۔
اجلاس کے دوران خواجہ اظہار الحسن نے بل کے مندرجات پر سوال اٹھاتے ہوئے کہا کہ قانون سازی میں دونوں فریقوں کو مدنظر رکھا جانا چاہیے۔ انہوں نے مزید ریمارکس دیے کہ بعض اوقات گھریلو تنازعات میں شوہر بھی متاثرہ فریق ہوتے ہیں۔
پاکستان اسٹاک ایکسچینج میں شدید مندی
پاکستان اسٹاک ایکسچینج میں آج کاروباری ہفتے کے پہلے روز کاروبار کے دوران منفی رجحان دیکھنے میں آیا، جہاں آغاز سے ہی فروخت کا دباؤ غالب رہا۔
کاروبار کے دوران کے ایس ای 100 انڈیکس میں ایک موقع پر 6000 سے زائد پوائنٹس کی نمایاں کمی ریکارڈ کی گئی۔ انڈیکس 6029 پوائنٹس گر کر ایک لاکھ 73 ہزار 574 پوائنٹس کی سطح پر ٹریڈ کرتا دیکھا گیا، جبکہ مجموعی طور پر 3.19 فیصد سے زائد کمی ریکارڈ کی گئی۔
یاد رہے کہ گزشتہ کاروباری ہفتے کے دوران بھی مارکیٹ دباؤ کا شکار رہی تھی، جب 100 انڈیکس 4525 پوائنٹس کی کمی کے بعد 179603 پوائنٹس پر بند ہوا تھا۔
ہفتہ وار بنیاد پر انڈیکس 7413 پوائنٹس کے بینڈ میں رہا، جبکہ مارکیٹ میں 4.31 ارب شیئرز کے سودے 212 ارب روپے میں طے پائے۔ اسی عرصے میں مارکیٹ کیپٹلائزیشن 523 ارب روپے کم ہو کر 20 ہزار 359 ارب روپے رہ گئی تھی۔
ماہرین کے مطابق سرمایہ کاروں کے محتاط رویے، منافع کی وصولی اور معاشی غیر یقینی صورتحال مارکیٹ پر دباؤ کا سبب بن رہی ہے۔
خیبرپختونخوا کے بچے ہتھیاروں کے ساتھ بڑے ہو رہے ہیں، ترقی اور تعلیم سے لاعلم ہیں، مریم نواز
وزیراعلیٰ پنجاب مریم نواز نے گجرات یونیورسٹی میں خطاب کرتے ہوئے خیبرپختونخوا کی تعلیمی اور سماجی صورتحال پر تشویش کا اظہار کیا۔ ان کا کہنا تھا کہ صوبے کے بچوں کے ہاتھ میں ہتھیار ہیں اور دماغ میں گالی ہے، اور گزشتہ 13 سال میں وہاں کے عوام کو ترقی کا شعور حاصل نہیں ہوا۔
مریم نواز نے کہا کہ بعض لوگ دعویٰ کرتے ہیں کہ بچوں کو شعور دیا جا رہا ہے، لیکن حقیقت میں یہ شعور کہاں نظر آتا ہے؟ انہوں نے زور دیا کہ انتشار اور بدتمیزی خیبرپختونخوا کے بچوں کا نصیب نہیں ہونا چاہیے۔ انہوں نے کہا کہ پنجاب کے بچے لاکھوں کی تعداد میں تکنیکی تربیت حاصل کر رہے ہیں، جبکہ خیبرپختونخوا میں ہونہار بچوں کے باوجود غیر ترقی یافتہ حالات اور انتشار دیکھنے میں آ رہا ہے۔
وزیراعلیٰ نے کہا کہ خراب سڑکیں اور انتشار بچوں کا مقدر نہیں ہونا چاہیے اور پاکستانی ہونے کے ناتے انہیں اس پر افسوس ہے۔ انہوں نے خیبرپختونخوا کے والدین اور عوام سے اپیل کی کہ وہ اپنے بچوں کی تعلیم اور ترقی کی طرف توجہ دیں اور انہیں ہتھیاروں اور بدتمیزی کی بجائے مثبت راستوں کی طرف رہنمائی کریں۔
مزید برآں، مریم نواز نے اڈیالہ جیل میں قید افراد کے حوالے سے کہا کہ جو قیدی بیمار ہے، اسے علاج اور سہولتیں فراہم کی جا رہی ہیں۔ انہوں نے واضح کیا کہ قیدیوں کے کھانے پینے یا علاج میں کوئی کمی نہیں ہے اور ان کے لیے تمام ضروری سہولیات فراہم کی جا رہی ہیں۔
انہوں نے سیاست میں اختلاف کی اہمیت کو تسلیم کرتے ہوئے کہا کہ اختلاف ضرور کیا جائے، لیکن ذاتیات، گھراؤ، آگ لگانے اور انتشار کو سیاست میں نہ لایا جائے۔ ان کا کہنا تھا کہ سیاست میں پالیسی، خدمت اور کارکردگی پر تنقید کی جائے، نہ کہ ذاتیات اور انتشار کے ذریعے معاملات خراب کیے جائیں۔
سپریم کورٹ کا عمران خان کی جیل سہولیات پر اطمینان کا اظہار
سپریم کورٹ آف پاکستان نے فرینڈ آف دی کورٹ کی رپورٹ اور اٹارنی جنرل کی جانب سے بانی پی ٹی آئی، عمران خان کے بچوں سے ٹیلی فونک رابطے اور علاج کی سہولیات کی یقین دہانی کے بعد جیل میں سہولیات پر اطمینان کا اظہار کیا اور عمران خان کی جانب سے دائر تین فوجداری درخواستوں کو غیر مؤثر قرار دیتے ہوئے نمٹا دیا۔
چیف جسٹس پاکستان جسٹس یحییٰ آفریدی اور جسٹس شاہد بلال پر مشتمل دو رکنی بینچ نے 12 فروری کی سماعت کا 7 صفحات پر مشتمل تفصیلی حکم نامہ جاری کیا۔ تحریری حکم نامے کے مطابق یہ درخواستیں الیکشن کمیشن آف پاکستان کی جانب سے دائر شکایت سے جنم لینے والے فوجداری مقدمے کے عبوری اور طریقہ کار سے متعلق احکامات کے خلاف تھیں۔
حکم نامے میں کہا گیا کہ ٹرائل کورٹ نے مقدمہ مکمل کر کے 5 اگست 2023 کو حتمی فیصلہ سنا دیا ہے، لہٰذا پہلی دو درخواستیں عبوری احکامات کے خلاف غیر مؤثر ہیں۔ عدالت نے گزشتہ رپورٹس کو مدنظر رکھتے ہوئے سنٹرل جیل راولپنڈی کے سپرنٹنڈنٹ کو تازہ رپورٹ جمع کروانے کی ہدایت کی اور بیرسٹر سلمان صفدر کو فرینڈ آف کورٹ مقرر کیا تاکہ وہ ذاتی طور پر ملاقات کر کے الگ رپورٹ پیش کریں۔
رپورٹس میں عدالت کو بتایا گیا کہ عمران خان کی رہائش، خوراک، سیل کی حالت، معمول کے طبی معائنے اور سکیورٹی کے انتظامات تسلی بخش اور ہم آہنگ ہیں۔ عدالتی معاون کی رپورٹ میں عمران خان نے سہولیات اور خوراک پر اطمینان کا اظہار کیا اور قید کی فطری حدود کو تسلیم کیا، تاہم ان کی بینائی کی بگڑتی ہوئی حالت پر سنگین تشویش ظاہر کی گئی۔
عدالت نے اٹارنی جنرل کی یقین دہانی بھی ریکارڈ کی کہ قانون کے مطابق فوری اقدامات کیے جائیں گے اور ماہر امراض چشم پر مشتمل ٹیم 16 فروری 2026 سے پہلے عمران خان کا طبی معائنہ کرے گی۔
حکم نامے کے بعد سپریم کورٹ نے عمران خان کی جانب سے دائر تمام فوجداری درخواستوں کو غیر مؤثر قرار دے کر غیر معینہ مدت تک ملتوی کر دیا۔
کمپنی پارٹی میں آئی فون جیتنے والا ملازم ڈبہ کھول کر حیران، اندر سے ٹائلز نکل آئیں
تصور کریں کہ آپ کسی تقریب میں انعام کے طور پر آئی فون کا نیا ماڈل جیتیں، لیکن ڈبہ کھولنے پر فون کی جگہ ٹائلز نکل آئیں۔ چین میں ایک شخص کے ساتھ ایسا ہی حیران کن واقعہ پیش آیا۔
جیانگ جیانگ نامی شخص نے اپنی کمپنی کی سالانہ تقریب میں گرینڈ پرائز کے طور پر آئی فون 17 پرو میکس جیتا۔ تقریب کے دوران کمپنی سربراہ نے انعام کا اعلان کرتے ہوئے فون کی قیمت 9988 یوآن بھی بتائی، جس کے بعد تمام ملازمین کو یقین تھا کہ جیانگ واقعی مہنگا اسمارٹ فون جیت چکا ہے۔
صوبہ گوانگ ڈونگ سے تعلق رکھنے والے جیانگ اس کامیابی پر بے حد خوش تھے۔ انہوں نے فیصلہ کیا کہ وہ ڈبہ گھر پہنچ کر کھولیں گے تاکہ اپنی اہلیہ کو سرپرائز دے سکیں۔ ڈبہ بالکل اصلی آئی فون پیکنگ جیسا تھا اور اس کے ساتھ رسید بھی موجود تھی۔
تاہم جب انہوں نے گھر پہنچ کر ڈبہ کھولا تو اندر فون کے بجائے دو چاکلیٹس، تین لالی پاپس اور چند ٹائلز رکھے ہوئے تھے۔ جیانگ کے مطابق ابتدا میں انہیں لگا کہ وہ تقریب کے سب سے خوش قسمت فرد ہیں، مگر حقیقت سامنے آنے پر انہیں احساس ہوا کہ یہ ایک مذاق تھا۔
ابتدائی طور پر لوگوں نے سمجھا کہ پارٹی منتظمین نے خفیہ طور پر اصلی فون تبدیل کر دیا، لیکن بعد میں معلوم ہوا کہ یہ ٹیم منیجر کی جانب سے کیا گیا مذاق تھا کیونکہ کمپنی مالک نے فون خریدنے کی اجازت نہیں دی تھی۔
جیانگ نے بتایا کہ تقریب میں دوسرا انعام ایک تکیہ تھا۔ ان کے بقول انہیں لگا تھا کہ 2026 کا آغاز خوش قسمتی سے ہوا ہے، مگر بعد میں احساس ہوا کہ یہ تقریب کسی اپریل فول مذاق سے کم نہیں تھی۔
انہوں نے کہا کہ اب انہیں فون کی ضرورت بھی محسوس نہیں ہوتی۔
خیبرپختونخوا میں سڑکوں کی بندش سے سبزیوں کی قیمتیں آسمان کو چھونے لگیں
خیبرپختونخوا میں مختلف شاہراہوں کی بندش کی وجہ سے دوسرے صوبوں سے آنے والی سبزیوں کی ترسیل متاثر ہو گئی ہے، جس کے نتیجے میں منڈیوں میں قیمتیں بڑھی ہیں۔
پیاز کی فی کلو قیمت 60 روپے سے بڑھ کر 80 روپے ہو گئی، ٹماٹر 80 سے بڑھ کر 100 روپے فی کلو فروخت ہو رہا ہے۔ کھیرے کی قیمت 40 روپے سے بڑھ کر 70 روپے اور شملہ مرچ 160 روپے سے بڑھ کر 240 روپے فی کلو ہو گئی ہے۔
تجارتی حلقوں کا کہنا ہے کہ شاہراہوں کی بندش اور ترسیل میں تاخیر کی وجہ سے منڈی میں رسد کم ہو گئی، جس کا براہِ راست اثر صارفین پر پڑا ہے۔
کراچی میں ڈکیتی، 15 تولہ سونا اور نقدی لوٹ کر ملزمان فرار
شہر قائد کے علاقے گڈاپ تھانے کی حدود میں سپر ہائی وے کے قریب ایک نجی ہاؤسنگ سوسائٹی میں ڈکیتی کی سنگین واردات پیش آئی، جس میں مسلح ملزمان نے شہری کے گھر سے لاکھوں روپے مالیت کا سونا اور دیگر قیمتی سامان لوٹ کر فرار ہو گئے۔
پولیس کے مطابق یہ واردات ممتاز مولائی کے گھر میں ہوئی، جہاں دو موٹر سائیکل سوار ملزمان داخل ہوئے، جن میں سے ایک کے پاس پستول اور دوسرے کے پاس چھری تھی۔ ملزمان نے گھر والوں کو یرغمال بنا کر 15 تولہ سونا، نقدی اور موبائل فونز لوٹ لیے اور باآسانی فرار ہونے میں کامیاب ہو گئے۔
واقعے کی اطلاع ملتے ہی پولیس کی نفری موقع پر پہنچ گئی اور کرائم سین سے شواہد جمع کیے گئے۔ متاثرہ شہری کے بیان کی بنیاد پر ملزمان کی تلاش شروع کر دی گئی ہے جبکہ علاقے کی سی سی ٹی وی فوٹیجز کا بھی جائزہ لیا جا رہا ہے۔
بھارت سے شکست کے بعد ٹیم مینجمنٹ مایوس، تبدیلیاں متوقع
آئی سی سی مینز ٹی ٹوئنٹی ورلڈ کپ میں بھارت کے ہاتھوں شکست کے بعد پاکستان قومی کرکٹ ٹیم کی ٹیم مینجمنٹ سینئر کھلاڑیوں کی کارکردگی پر شدید مایوسی کا شکار ہے۔
ذرائع کے مطابق اگلے میچ کے لیے کپتان بابراعظم اور فاسٹ بولر شاہین شاہ آفریدی کو پلیئنگ الیون سے باہر بٹھانے کی تجویز زیر غور ہے، کیونکہ اہم مقابلوں میں توقعات کے مطابق کارکردگی سامنے نہیں آسکی۔
پلیئنگ الیون سے متعلق ذرائع کا کہنا ہے کہ نمیبیا کے خلاف میچ میں دو سے تین تبدیلیوں کا امکان ہے، جبکہ سینئر کھلاڑیوں کی جگہ بینچ اسٹرنتھ کو موقع دینے پر سنجیدگی سے غور کیا جا رہا ہے۔
واضح رہے کہ پاکستان اپنا آخری گروپ میچ نمیبیا قومی کرکٹ ٹیم کے خلاف 18 فروری کو کھیلے گا، جو ٹیم کے لیے ڈو اینڈ ڈائی حیثیت اختیار کر چکا ہے۔ سپر ایٹ مرحلے تک رسائی کے لیے پاکستان کو یہ میچ جیتنا ضروری ہے۔
ذرائع کے مطابق اگر بارش کے باعث میچ منسوخ ہو جاتا ہے تو بھی پاکستان سپر ایٹ مرحلے میں جگہ بنا سکتا ہے۔جہلم میں مذہبی اسکالر انجینئر محمد علی مرزا پرحملہ، ملزم گرفتار
انجینئر محمد علی مرزا پر گزشتہ رات جہلم میں واقع ان کی اکیڈمی کے اندر حملہ کیا گیا، تاہم وہ اس واقعے میں محفوظ رہے جبکہ حملہ آور کو موقع پر ہی گرفتار کر لیا گیا۔
پولیس کے مطابق حملے کے وقت انجینئر محمد علی مرزا درس مکمل کرنے کے بعد شرکاء کے ساتھ فوٹو سیشن میں مصروف تھے کہ ایک نوجوان نعرہ لگاتے ہوئے خالی ہاتھ ان پر جھپٹ پڑا۔
پولیس حکام کا کہنا ہے کہ ملزم نے دونوں ہاتھوں سے ان کا گلا دبانے کی کوشش کی، تاہم وہاں موجود افراد نے فوری طور پر اسے قابو کر کے پولیس کے حوالے کر دیا۔
ابتدائی تحقیقات کے مطابق گرفتار ملزم ایبٹ آباد کا رہائشی ہے اور اس کا تعلق ایک کالعدم جماعت سے بتایا جا رہا ہے۔
واقعے کا مقدمہ تھانہ سٹی جہلم میں درج کر لیا گیا ہے، جبکہ پولیس مزید تفتیش جاری رکھے ہوئے ہے تاکہ حملے کے محرکات اور ممکنہ پس منظر کا تعین کیا جا سکے۔
