Author: Aqsa Younas Rana

‎شمالی لبنان کے شہر طرابلس میں گزشتہ روز ایک پرانی رہائشی عمارت کے اچانک گرنے کے واقعے میں جاں بحق ہونے والے افراد کی تعداد 14 تک پہنچ گئی ہے۔ مقامی حکام کے مطابق یہ چند ہفتوں میں اس نوعیت کا دوسرا بڑا حادثہ ہے۔
‎حادثہ شہر کے غریب علاقے ‘باب التبانہ’ میں پیش آیا، جہاں بوسیدہ عمارت اچانک زمین بوس ہو گئی۔ سول ڈیفنس کے ڈائریکٹر نے بتایا کہ اب تک 14 لاشیں ملبے سے نکالی جا چکی ہیں، جبکہ زخمیوں کو ریسکیو کر کے اسپتال منتقل کیا گیا ہے۔
‎مقامی رہائشیوں کے مطابق حادثے کے وقت عمارت میں تقریباً 22 افراد موجود تھے، جس کے باعث ہلاکتوں میں اضافے کا خدشہ ظاہر کیا جا رہا ہے۔
‎طرابلس کے میئر نے صورتحال کی سنگینی کے پیش نظر شہر کو ”آفت زدہ“ قرار دیا اور کہا کہ برسوں کی غفلت اور لاپرواہی کی وجہ سے ہزاروں شہریوں کی زندگیاں خطرے میں ہیں۔ امدادی ٹیمیں بھاری مشینری کی مدد سے رات گئے تک ملبہ ہٹانے اور مزید نقصان سے بچاؤ کے کام میں مصروف رہیں۔

‎افغانستان کے دارالحکومت کابل میں ایک رہائشی گھر میں گیس سلنڈر پھٹنے کے نتیجے میں کم از کم 8 افراد ہلاک ہو گئے۔
‎غیر ملکی ذرائع ابلاغ کے مطابق پولیس ڈسٹرکٹ 21 میں پیش آنے والے واقعے میں ایک خاندان سرد موسم کے دوران اپنے گھر کو گرم رکھنے کے لیے گیس ہیٹر استعمال کر رہا تھا۔ لیک ہونے والی گیس کی وجہ سے سلنڈر پھٹ گیا، جس کے نتیجے میں 8 افراد لقمہ اجل بن گئے۔
‎واضح رہے کہ کابل میں گزشتہ ماہ ایک چینی ریسٹورنٹ میں ہونے والے دھماکے میں سات افراد ہلاک ہوئے تھے، جس کی ذمہ داری داعش نے قبول کی تھی۔ ہلاک ہونے والوں میں ایک چینی شہری اور 6 افغان شامل تھے، جبکہ 20 افراد زخمی ہوئے تھے۔

‎جنوبی کوریا کے صوبہ گیونگ گی میں ایک فوجی ہیلی کاپٹر گر کر تباہ ہو گیا، جس میں سوار دو افراد شدید زخمی ہوئے اور دل کا دورہ پڑنے پر انہیں اسپتال منتقل کیا گیا۔
‎غیر ملکی ذرائع کے مطابق یہ حادثہ صوبے کے کاپیونگ کاؤنٹی میں مقامی وقت کے مطابق صبح تقریباً 11 بجے پیش آیا۔ فوجی ذرائع کے مطابق یہ ہیلی کاپٹر تربیتی پرواز کے لیے روانہ ہوا تھا اور یہ اے ایچ-1 ایس کوبرا ماڈل تھا، جسے سروس سے ریٹائر کیا جانا تھا۔
‎حکام نے بتایا کہ حادثے کے بعد کسی دھماکے یا آگ لگنے کی اطلاع نہیں ملی، تاہم واقعے کی وجوہات معلوم کرنے کے لیے تحقیقات شروع کر دی گئی ہیں۔

‎بنگلہ دیش میں سابق وزیرِ اعظم شیخ حسینہ کے اقتدار کے خاتمے کے بعد ملکی سیاست ایک نئے موڑ پر آ گئی ہے۔ جمعرات کو ہونے والے عام انتخابات کو 2009 کے بعد ملک کے پہلے حقیقی اور مقابلے کے انتخابات قرار دیا جا رہا ہے، جہاں اس بار اپوزیشن سڑکوں پر مضبوط نظر آ رہی ہے اور حکمران جماعت عوامی لیگ پر پابندی عائد ہے۔
‎شیخ حسینہ کے 15 سالہ دور میں اپوزیشن جماعتیں یا تو انتخابات کا بائیکاٹ کرتی رہیں یا بڑے پیمانے پر گرفتاریوں کے باعث غیر مؤثر ہو گئیں۔ تاہم 2024 کی عوامی تحریک کے بعد منظرنامہ بدل چکا ہے۔ نوجوانوں کی بڑی تعداد، خاص طور پر جنرل زیڈ، اس انتخاب کو فیصلہ کن قرار دے رہی ہے۔
‎بنگلہ دیش نیشنلسٹ پارٹی (بی این پی) کو واضح برتری حاصل ہونے کی توقع ہے۔ بی این پی 300 میں سے 292 نشستوں پر انتخاب لڑ رہی ہے۔ پارٹی کے سربراہ طارق رحمان کا کہنا ہے کہ وہ حکومت بنانے کے لیے درکار اکثریت حاصل کرنے کے بارے میں پُراعتماد ہیں۔ دوسری جانب اسلامی جماعت جماعتِ اسلامی کی قیادت میں اتحاد بھی مضبوط چیلنج پیش کر رہا ہے، جبکہ نوجوان کارکنوں پر مشتمل ایک نئی جماعت نے جماعت اسلامی کے ساتھ اتحاد کر لیا ہے۔
‎ماہرین کے مطابق 12 فروری کے انتخابات میں واضح نتیجہ ملک میں سیاسی استحکام کے لیے انتہائی ضروری ہے۔ شیخ حسینہ کے جانے کے بعد کئی ماہ کی بدامنی نے معیشت کو متاثر کیا، خاص طور پر گارمنٹس سیکٹر جو عالمی سطح پر بنگلہ دیش کی شناخت ہے۔
‎انتخابات کے نتائج خطے میں چین اور بھارت کے کردار پر بھی اثر انداز ہوں گے۔ شیخ حسینہ کو بھارت نواز سمجھا جاتا تھا اور ان کی رخصتی کے بعد چین کا اثر و رسوخ بڑھا ہے۔ تجزیہ کاروں کا کہنا ہے کہ بی این پی بھارت کے ساتھ متوازن تعلقات کی حامی سمجھی جاتی ہے، جبکہ جماعتِ اسلامی کی حکومت بننے کی صورت میں پاکستان کے ساتھ قربت بڑھ سکتی ہے۔
‎سرویز کے مطابق 12 کروڑ 80 لاکھ ووٹرز کے لیے سب سے بڑا مسئلہ کرپشن ہے، اس کے بعد مہنگائی کا نمبر آتا ہے۔ دلچسپ بات یہ ہے کہ ووٹرز مذہبی نعروں کے بجائے معاشی کارکردگی اور شفاف قیادت کو ترجیح دے رہے ہیں۔ تجزیہ کاروں کے مطابق جماعت اسلامی کی صاف شبیہ اس کے حق میں ایک بڑا عنصر ہے۔
‎21 سالہ پہلی بار ووٹ دینے والے محمد راقب کا کہنا ہے کہ وہ ایسی حکومت چاہتے ہیں جو اظہارِ رائے اور آزاد ووٹنگ کی ضمانت دے۔ ان کے بقول، ’’لوگ تھک چکے تھے، نہ ووٹ کی آزادی تھی نہ آواز۔ ہمیں امید ہے کہ جو بھی حکومت آئے گی، یہ حق ضرور دے گی۔‘‘

‎اٹک کے علاقے خگوانی میں گیس لیکج کے باعث ایک گھر میں اچانک زوردار دھماکہ ہوا، جس کے نتیجے میں نو افراد زخمی ہو گئے۔ ریسکیو حکام کے مطابق دھماکہ اتنا شدید تھا کہ کمرے کی کچی چھت گر گئی اور ملبے تلے دب کر متعدد افراد زخمی ہوئے۔ زخمیوں کو فوری طور پر ملبے سے نکال کر ٹی ایچ کیو ہسپتال منتقل کیا گیا۔
‎یاد رہے کہ اس سے قبل اسلام آباد کے تھانہ شمس کالونی میں بھی گیس لیکج کے باعث ایک گھر میں دھماکہ ہوا تھا، جس میں پانچ افراد زخمی ہوئے تھے۔ کیپیٹل ایمرجنسی سروس کے مطابق زخمیوں میں مرد، خواتین اور بچے شامل تھے، اور ریسکیو ٹیمیں فوری طور پر موقع پر پہنچ کر امدادی کارروائیاں کر رہی تھیں۔

‎امریکی صدر ڈونلڈ ٹرمپ نے سابق صدر بارک اوباما اور ان کی اہلیہ مشیل اوباما کی متنازع ویڈیو شیئر کرنے کے بعد معافی مانگنے سے صاف انکار کر دیا۔ ویڈیو میں کمپیوٹر ٹیکنالوجی کے ذریعے اوباما جوڑے کے چہرے بن مانس کے جسموں پر دکھائے گئے تھے۔
‎شدید عوامی ردعمل کے بعد ویڈیو ٹرمپ کے سوشل میڈیا اکاؤنٹ سے ہٹا دی گئی، لیکن ٹرمپ نے اس پر شرمندگی ظاہر کرنے یا معافی مانگنے سے انکار کیا۔ صحافیوں سے گفتگو میں انہوں نے کہا کہ انہوں نے پوری ویڈیو نہیں دیکھی تھی اور صرف 2020 کے انتخابات سے متعلق حصہ شیئر کرنا تھا۔ انہوں نے اس غلطی کا ذمہ دار اپنے اسٹاف کو ٹھہرایا۔
‎ٹرمپ نے نسل پرستی کی مذمت کی ہے، مگر مخالفین اور حتیٰ کہ ان کی جماعت کے کچھ رہنماؤں نے اس عمل کو امریکی صدارت کے لیے نامناسب قرار دیا۔