Author: Baaghi TV

تاریخ عالم کی ورق گردانی کی جائے تو عزم و استقلال کی جتنی ولولہ انگیز داستانیں آپ کو ملیں گی ان کے پس منظر میں کوئ نہ کوئ نظریہ ہی کارفرما ہی نظر آئیگا کیونکہ نظریہ ہی وہ قوت ہے جو کسی تہزیب کو جنم دیتا ہے نظریہ ہی کسی انقلاب کے لئے تحریک کی حیثیت رکھتا ہے۔اور نظریہ ہی کسی فرد یا قوت کے فکر کے انداز ،دستور حیات اور نظام زندگی کا ترجمان ہوتا ہے۔پاکستان تحریک انصاف کا قیام بھی ایک نظریہ کا ہی مرہون منت ہے۔جو کرپشن کے خاتمے اور یکساں انصاف پر قائم ہے۔یہ پاکستان کی سب سے بڑی جماعت ہے جس کی بنیاد کسی نظریہ پر قائم ہے اور نظریہ بھی ایسا جو اسٹیٹس کو کے خاتمے میں سرکرداں نظر آئے۔تحریک انصاف کی تاریخ پچیس سالہ جدوجہد پر محیط ہے ان پچیس برسوں میں پارٹی نے بڑے اتار چڑھاو دیکھے لیکن مرد آہن جناب عمران خان کے عزم و حوصلے کو سلام ہے جو تمام تر مسائل ،منفی پروپیگنڈہ اور مبینہ سازشوں کے باوجود آہستہ آہستہ حکومت بنانے میں کامیاب ہو ہی گئے۔ایک طویل جہد مسلسل کے بعد 2018کےقومی انتخابات میں اس جماعت نے واضع کامیابی حاصل کی۔تحریک انصاف کی حکومت میں آنے کے ابتدائ ایام تو بہت ہی کٹھن رہے۔جب خان صاحب نے حکومت کی باگ دوڑ سنبھالی تو ملک معاشی طور پر ڈیفالٹ کے دہانے پر تھا، وزیر اعظم عمران خان نے بہترین سفارت کاری کے زریعہ دوست ممالک کی حمایت حاصل کی اور بگڑے ہوئےخارجہ تعلقات کو بہتربنانے میں کامیاب ہوئے۔۔ سعودی عرب، قطر اور چین کی جانب سے معاشی امداد کا حصول ممکن بنایا اور ملک کو ڑیفالٹ ہونے سے بچایا۔۔
حکومتی خارجہ پالیسی کی کامیابی کے ساتھ ساتھ فاٹا کا انضمام بھی انکی تاریخی کامیابی ہے اس کے علاوہ ان کی سادگی اور کفایت شعاری مہم نے حکومت کو ایک نئ جہت دی ، کرپشن پر کریک ڈاؤن کیا گو کہ قانونی موشگافیوں میں وہ نتائج نہیں مل پائے جس طرح کےانصاف کی توقع کی جارہی تھی،صحت انصاف کارڈ، غربت کے خاتمے کے پروگرام، ماحولیاتی تبدیلی کے حوالے سے شجر کاری مہم،ٹیکس نظام میں اصلاحات اور کئی دیگر کامیابیابیاں ہیں جو نو زائدہ حکومت کے حصے میں آئیں۔ اس کے علاوہ کرتارپور راہداری کو کھولنا اور وزیر اعظم کی جانب سے غربت کے خاتمے کے منصوبے ’احساس‘ اور بے گھر افراد کے لیے ’پناہ گاہ‘ اور کامیاب نوجوان پروگرام کے تحت بلا سود قرضوں کی تقسیم ۔یکساں تعلیمی نصاب جیسے پروگرام کے انعقاد بھی قابل ستائش رہے۔وزیراعظم عمران خان نے اپنے تین سالہ دور میں ہر ہر موقع پر اس عزم کااعادہ کیا کہ وہ پاکستان کو مدینہ جیسی اسلامی فلاحی ریاست بنائیں گےاور اس کی کوشش بھی کر رہےہیں۔
اس میں کوئی شک نہیں کہ اچانک آنے والی کورونا وبا کے نے پوری دنیا کی معیشت کو بری طرح متاثر کیا جس کے باعث دنیا کو نہ صرف بے روزگاری اور غربت میں اضافہ دیکھنے کو ملا بلکہ عوام کو مہنگائی کے طوفان کا بھی سامنا رہا اور پاکستان بھی اس مشکل وقت سے گزرا لیکن پاکستان کا شمار ان چند خوش نصیب ممالک میں ہوتا ہے جہاں بہترین حکومتی پالیسیوں نے اور اللہ کے فضل و کرم سے یہ وبا نہ صرف کم رہی بلکہ اس پر کافی حد تک قابو بھی پا لیا گیا اور حکومت کی کامیاب پالیسی کو نہ صرف پوری دنیا نےسراہا بلکہ عالمی ادارہ صحت نے تو دنیا کو مشورہ دیا کہ وہ پاکستان سے سیکھے کہ اس نے کس طرح کرونا کا مقابلہ کیا اور اپنی معیشت بھی بچائ۔
گزشتہ دنوں حکومت کی جانب سے تین سالہ کارکردگی پر ایک رنگارنگ تقریب کا انعقاد کیا گیا اس تقریب میں خان صاحب کا کہنا تھاکہ
” تبدیلی کا راستہ انتہائی کٹھن ہے، کامیابی کا کوئی شارٹ کٹ ہے نہ کوئی پرچی پکڑ کر لیڈر بن سکتا ہے، حکومت ملی تو ہماری ٹیم ناتجربہ کار تھی، ملک دیوالیہ ہونے والا تھا، آج زرمبادلہ کے ذخائر 29 ارب ڈالر کی سطح پر ہیں، 4700 ارب روپے ٹیکس اکٹھا کیا جارہا ہے، سیمنٹ کی فروخت میں 40 فیصد اضافہ ہوا، موٹر سائیکلیں، گاڑیاں اور ٹریکٹر ریکارڈ تعداد میں بیچی گئیں، اس کا مطلب یہ ہے کہ لوگ خوشحال ہو رہے ہیں‘‘۔
پاکستان تحریک انصاف کی حکومت کے تین سالہ دور کی کامیابی کے اعداد و شمار کچھ بھی ہوں لیکن وزیر اعظم عمران خان نے جس انداز میں امریکہ کو فوجی اڈہ نہ دینے کا اعلان کیا اور افغانستان سے امریکی فوجی انخلاء کے معاملہ پر جو جراءت مندانہ فیصلے کئے انہیں قوم نے بہت پسند کیا اور جس طرح آزاد کشمیر انتخابات میں حزب مخالف کے منفی پروپیگنڈہ کو اپنے ایک ہی خطاب میں سبو تاژ کیا اور بعد ازاں وہاں ایک بڑے مارجن سے کامیابی حاصل کی جس کے باعث حزب اختلاف کی جانب سے چلائ جانے والی تمام تر حکومت مخالف تحریکوں پر پانی پھر گیا۔
دوستوں تحریک انصاف کی حکومت کی تین سالہ کاکردگی کا نتیجہ کچھ بھی ہو لیکن اس حکومت نے ہمیں ایک ایسی باعزت اور قابل فخرقوم بنا دیا ہے جو کسی بھی عالمی طاقت سے نہ مرعوب ہو ر ہی ہے اور نہ ہی اپنی سالمیت پر آنچ آنے دے رہی ہے خود عمران خان کا کہنا ہے کہ جس کے پاس لَا اِلٰـہَ اِلَّا اللہ کی طاقت ہو اس قوم کو کسی سے ڈرنے کی ضرورت نہیں سوائے اللہ کے۔
اسٹیٹس کو کے اس نظام میں جہاں ہر سطح پر کرپٹ اورماہر ترین دھندے باز سیاست دان ہوں۔اور تیس سال سے بٹھائے گئےان کے آلہ کار خواہ وہ ببیوروکریسی میں ہوں یا کسی اور ادارے میں اور اس کے علاوہ محلاتی سازشیں بھی عروج پر ہوں تو ایسی صورتحال میں حکومت کاتین سال پورے کر لینا بھی کسی معجزے سے کم نہی۔

@Azizsiddiqui100

پاکستان اپنے محل وقوع کی بنیاد پر دنیا میں منفرد مقام رکھتا ہے۔ بحرہند پر موجود، گلف کے دہانے پر، گرم پانیوں سے جڑا تمام شمالی ممالک کیلئے حسرت بنا کم سے کم فاصلہ، آسان تجارتی راستہ جہاں سے تمام دنیا کیساتھ رابطہ ممکن ہو سکتا ہے۔ اس سرزمین کی طرف دنیا کی اقوام اپنے نکتہ نظر سے رویہ بھی اپنائے ہوئے نظر آتی ہیں۔ یاد رہے کہ شاہراہ ریشم جو مشرق میں ممالک کیساتھ تجارت کا اہم ترین راستہ صدیوں سے مانا جاتا ہے اور تمام مغربی اقوام استعمال کرتی رہی ہیں، اب سی پیک کے ذریعہ جوڑ کر سمندری تجارت کو مزید آسان کرے گا۔ یوں دوطرفہ تجارت اپنے عروج پر پہنچ سکتی ہے۔ بھارت اب تک اپنی منڈی یعنی اپنی آبادی کی وجہ سے تاجروں کیلئے دلچسپی کا مرکز تھا، لیکن شمال مشرق میں چین کی آبادی جو بھارت سے کہیں زیادہ ہے، بہت دشوارگزار راستہ کی وجہ سے کسی ملک کی دسترس میں نہ رہ سکا۔ البتہ سی پیک اسی سلک روٹ کو آسان ترین راستہ بنا کر سمندری راستہ سے جوڑ کر عالمی منڈیوں تک رسائی دینے کی صلاحیت بناتا ہے۔
سی پیک بنتے ہی، گوادر پورٹ کی اہمیت کے پیش نظر یقین ہے کہ یہ دنیا کی تمام بندرگاہوں کے مقابلہ میں اول مقام حاصل کر لے گا۔ اس طرح دبئی کی بندرگاہ جو اس وقت بین الاقوامی سطح پر مقبول ہے تمام سمندری جہازوں کیلئے، اپنی مقبولیت کھو دیگا یا کم از کم موجودہ اہمیت قائم نہ رکھ سکے۔ یہ چیز عرب ممالک کیلئے سوحان روح ہے۔ تجارت ہی دنیا میں سب کیلئے سیاست، معیشت، جنگوں اور تعلقات کی بنیاد رہی ہے۔
جہاں ایک طرف سی پیک پاکستان کی معیشیت کو مضبوط کرنے کی صلاحیت رکھتا ہے وہیں بھارت کا سکون برباد کرنے کیلئے کافی ہے۔ یہی وجہ ہے کہ پچھلی دہائیوں میں بھارت کی ہر ممکنہ کوشش رہی ہے کہ ایک طرف عربوں کو پاکستان کے خلاف ابھارے، دوسری جانب ایران میں سرمایہ کاری کے ذریعہ ایران کو پاکستان سے دور رکھے، تیسری جانب افغانستان کے راستے بلوچستان، خیبر پختونخواہ اور قریبا” تمام پاکستان میں ابتری پھیلاتے ہوئے پاکستانی عزائم کو خاک میں ملانے کی ہر ممکنہ کوشش کر چکا ہے۔ اس کے مقابلہ میں پاکستانی کردار نہ صرف قابل ستائش بلکہ بہت مدبرانہ اور صبر آزما رہا ہے۔ دوسری طرف افغانستان کی بدلتی صورتحال نے تو سونے پر سہاگہ والی کیفیت پیدا کر دی کہ بھارت کی تمام سرمایہ کاری جو افغانستان میں پچھلی دو دہائیوں میں ہوئی تھی وہ یک لخت طالبان کے قبضہ میں چلی گئی۔ طالبان کے طاقت حاصل کرتے ہی وہاں سے بھارت کو اپنا بوریا بستر سمیٹنا پڑ رہا ہے۔ پنجشیر کی وادی واحد بھارت کی امید رہ گئی ہے جسے اس وقت طالبان نہ تو وقعت دے رہے ہیں اور نہ ہی اس طرف توجہ کر رہے ہیں۔ لیکن ایک بات طے ہے، پنجشیر میں قابض جتنی دیر کریں گے طالبان سے آن ملنے میں، اتنا نقصان کا اندیشہ قوی تر ہوتا جائے گا۔
حالیہ کابل کے ائرپورٹ پر دھماکوں کی ذمہ داری گرچہ داعش نے قبول کرلی ہے لیکن اب تو دنیا میں شور مچ گیا ہے کہ داعش کی اس کاروائی کی پشت پر بھارت کا ہاتھ ہے۔ اگر نظر عمیق ڈالی جائے تو سوائے بھارت کے ایسی کاروائی کوئی نہیں کر سکتا۔ پاکستان کو پر امن افغانستان درکار ہے، امریکہ اپنے معاہدے کا پابند ہے اور انخلاء کو وقت پر مکمل کرنا چاہتا ہے۔ بلکہ اگر یہ کہا جائے کہ امریکہ نے اپنی گرتی ہوئی معیشت کو بچانے کیلئے عجلت میں افغانستان کو چھوڑنے کا فیصلہ کر لیا ہے تو وہ بھی غلط نہیں کیونکہ امریکہ ماضی قریب میں روس کا مشاہدہ کر چکا ہے۔ رہ گئے طالبان جو ہر لمحہ اس کوشش میں ہیں کہ امریکہ اور تمام غیرملکی افواج انکی سرزمین چھوڑ دیں۔ واحد بھارت رہ جاتا ہے جسے افغانستان اس وقت ہاتھ سے نکلتا دیکھ کر غشی کے دورے پڑ سکتے ہیں۔ اس صورتحال سے بھارت کی بچھائی بساط مکمل طور پر لپیٹ نہیں دی گئی بلکہ تباہ ہو چکی ہے اور ساتھ ہی معیشت کو ایک ناقابل برداشت نقصان پہنچ چکا ہے۔
یہ سی پیک پاکستان کو مستقبل میں بہت کچھ دے سکتا ہے۔ یہ تو ابتدا ہے ابھی منصوبہ کی، کہ دنیا پوری طرح سے پاکستان کی جانب متوجہ ہے، جب مکمل ہو گیا تو پاکستان دنیا میں منفرد مقام کا حامل ہوگا۔
اس تمام صورتحال میں پاکستانی افواج اور اداروں کی کارکردگی بہت اہم ہو جاتی ہے۔ ہمارے ادارے عام حالات سے زیادہ چوکنْا اور چاق و چوبند ہیں۔ افواج کے سالار ہمہ وقت افواج پاکستان کو تیار رکھے ہوئے ہیں کہ کسی بھی غیر یقینی اور ناپسندیدہ حالات کا مقابلہ کیا جا سکے۔ ان تمام حالات کے پیش نظر عوام کو ایک متحد قوم کے طور پر ابھرنے کی بھی اشد ضرورت ہے۔ سوشل میڈیا پر ملنے والی ہر بات سچ نہیں ہو سکتی۔ بعض چھوٹ واقعات جو عموما” تمام ممالک میں پیش آتے ہیں انہیں ضرورت سے زیادہ یہاں پذیرائی نہیں دینا چاہئیے کہ اس سے عوام میں بےچینی اور خوف پھیلنے کا ڈر ہوتا ہے۔ اس سے قوم میں اختلافات اور تناؤ پیدا ہونے کا خدشہ بھی رہتا ہے جو پاکستان کیلئے اچھا نہیں۔
آئیے مل کر پاکستان کو خوبصورت اور قوم کو باوقار بنائیں۔
پاکستان زندہ باد

لاہور
٢٩ اگست ٢٠٢١ء