Author: Baaghi TV

دنیا نے ایسے فاتح نہیں دیکھے ہوں گے۔ خدا کے سامنے جھکنے والی گردنوں کو دنیا کی کوئی طاقت نہیں جھکا سکی۔ ان کی فتح کا راز یہ ہے کہ وہ دنیاوی طاقتوں کے سامنے سر کو جھکانے کی بجائے ایک اللہ وحدہ لا شریک کے سامنے جھکتے ہیں۔ اور پھر رب تعالیٰ بھی اپنے بندوں کی ایسی لاج رکھتا ہے کہ وقت کے فرعون صفت متکبر سُپر طاقت اپنا سامانِ جنگ چھوڑ چھاڑ کر اور دم دبا کر بھاگ کھڑی ہوئی ہے۔ اور صرف 15 دن میں پورا ملک فتح کرنے کے باوجود عاجزی کا یہ عالم ہے کہ زمین پر بے اختیار سجدہ ریز ہو گئے ہیں۔
یہاں بات اس انٹرویو کی کرتے ہیں جو کہ ملا عمر نے وائس آف امریکہ کو دیا تھا۔ جس میں ملا عمر نے کہا تھا ” میرے سامنے دو وعدے ہیں ایک وعدہ بُش کا اور دوسرا وعدہ میرے اللہ کا۔ میرے اللہ کا وعدہ ہے کہ میری زمین بہت بڑی ہے اگر تم اس زمین پر کسی بھی جگہ جاؤ وہاں سکونت اختیار کر سکتے ہو اور تمہاری حفاظت کی جائے گی۔ دوسری جانب بُش کا یہ وعدہ ہے کہ زمین پر ایسی کوئی جگہ نہیں ہے جہاں تم چھپ سکو اورہم تلاش نہ کر سکیں۔ ہم دیکھیں گے کہ ان میں سے کون سا وعدہ پورا ہوتا ہے”۔ اور آج اللہ کا وعدہ پورا ہوا ور سُپر پاور بھی کچھ نہ کر سکی اور امارت اسلامیہ کا اعلان ہو گیا۔
ایک اور سوال کے جواب میں ملا عمر نے کہا” ہم مسلمانوں کی مدد اللہ تعالیٰ کر رہا ہے۔ کیونکہ وہ کفار سے کبھی راضی نہیں ہوگا۔ پاور کے اعتبار سے امریکہ بہت پاور فل ہے۔ اگر وہ اس سے بھی دو گنا زیادہ پاور فل ہو جائے تو بھی ہمیں شکست نہیں دے سکتا۔ اور ہمیں یقین ہے کہ ہمارا مالک ہمارے ساتھ ہے اور ہمیں کوئی بھی دنیا کی طاقت نقصان نہیں پہنچا سکتی” اور آج یہ بات بھی ملا عمر کی سچ ثابت ہوئی جب دنیا کی سُپر پاور فوج نے بھی انکے سامنے ہتھیار ڈال دیے۔

دنیا کو آخر طالبان سے ڈر کیوں ہے؟ کس وجہ سے امارت اسلامیہ سے ڈرتے ہیں؟ کیا یہ طالبان سے ڈرتے ہیں؟
نہیں بلکل نہیں کیونکہ ہم گناہ کرنے سے نہیں بلکہ اس گناہ کی سزا سے ڈرتے ہیں۔ ہم زنا سے نہیں ڈرتے بلکہ کوئی اس کی سزا اسلامی نظام کے مطابق دے اس سے ڈرتے ہیں۔ ہم چوری کرنے سے نہیں ڈرتے بلکہ چوری کی سزا ہاتھ کاٹنے سے ڈرتے ہیں۔ ہماری عورتیں کم لباس پہننے سے نہیں ڈرتی بلکہ اسلامی نظام کے مطابق لباس پہننے سے ڈرتی ہیں۔ اور برملا طور پر کہتی ہیں کے اس سے ہمارا دم گھٹتا ہے اور ہمیں آزادی دو۔ ہم کسی کا قتل کرنے سے نہیں بلکہ اسلام میں قتل کے قصاص کی بات ہوئی اور اس قصاص کو دینے سے ڈرتے ہیں۔ ہم حرام کی کمائی کے خاتمے سے ڈرتے ہیں۔ ہم سنت کے مطابق اپنے چہرے بنانے سے ڈرتے ہیں۔ ہم داڑھی رکھنے سے ڈرتے ہیں۔ ہم اوقات نماز کاروبار بند کرنے سے ڈرتے ہیں۔ ہم چھوٹے بچوں سے زیادتی سے نہیں ڈرتے بلکہ اسکی سزا اسلامی نظام سے ہو اس سے ڈرتے ہیں۔ الغرض ہم طالبان سے نہیں ڈرتے بلکہ اسلامی نظام سے ڈرتے ہیں جسمیں ہم سب کیلئے بھلائی ہے۔ اور جہاں تک بات امارت اسلامیہ کے حصول کی ہے تو یہ اسلامی نظام کے مطابق ساری سزائیں ہو گی جس وجہ دنیا پریشان ہے۔
مگر میرے اللہ جسے چاہیں عزت دیں اور جسے میرے اللہ چاہیں ذلیل و خوار کریں مگر اب کی بار اللہ نے عزت مجاہدین کو دی اسلام کی فتح ہوئی اللہُ اکبر کی صدائیں بلند ہوئی۔
جیسے ہر ملک کی اپنی پالیسی یہی ہے کہ وہ اپنے معاملات میں کسی کی دخل اندازی نہیں برداشت کرتا تو پھر طالبان چاہیے زورِ بازو سے حکومت لے چکے لیکن یہ بات یاد رکھیں جب انہوں نے کابل لیا کسی بھی انسانی حقوق کی خلاف ورزی نہیں کی اور اقتدار لینے کے بعد ذمہ واری کا ثبوت دیتے ہوئے عام معافی کا اعلان کیا۔ تو دنیا کو بھی چاہیے کہ وہ امارت اسلامیہ کو تسلیم کرے۔

محرم الحرام کا نام آئے اور نواسہ رسول (ﷺ)،جگر گوشہ بتول، لختِ جگر حیدرِ کرار سید الشھداء امام حسین ؓ کی لازوال قربانی کا تصور قلوب و اذہان کو چُھو کر نہ گزرے؛ مسلمان سے اس بات کا تصور ممکن نہیں-آپ ؓ اللہ تعالیٰ کی وہ برگزیدہ ہستی ہیں جن کا اسم مبارک آسمانوں پہ (اللہ تعالیٰ کی بارگاہ اقدس سے منظورہوکر)رکھاگیا،آپ ؓ کی نہ صرف قبل از ولادت و قبل از شہادت خبریں مشہور ہوئیں بلکہ دنیا میں ہی جنتیوں کا سردار ہونے کا لازوال شرف حاصل ہوا- حضور نبی کریم (ﷺ) آپ سے بے پناہ محبت فرماتے تھے اور اپنی امّت کو بھی اپنے اہلِ بیت سے محبت کرنے کی تلقین فرمائی اور محبتِ اہلِ بیت کو اپنی محبت کے حصول کا ذریعہ بھی قرار دیا۔

حضرت اُم الفضل بنت حارث (رضی اللہ عنہ)، رسول اللہ (ﷺ) کی بارگاہِ اقدس میں حاضر ہوئیں اور عرض کی، یارسول اللہ (ﷺ)! میں نے گزشتہ رات ایک خطرناک خواب دیکھا ہے، آپ (ﷺ)نے ارشادفرمایا: مَا هُوَ؟(وہ کیاہے؟) اس نے عرض کی: وہ بہت خطرناک ہے،آپ (ﷺ)نے ارشادفرمایا: ’’مَا هُوَ؟‘‘ آپ (رضی اللہ عنہ) نے عرض کی: مَیں نے دیکھا ہے کہ آپ (ﷺ) کے جسم مبارک کا ایک ٹکڑا کاٹ کر میری گود میں رکھ دیا گیا ہے- رسول اللہ (ﷺ) نے ارشاد فرمایا: ’’رَأَيْتِ خَيْرًا‘‘’’تم نے یہ اچھاخواب دیکھاہے‘‘ (اس کی تعبیر یہ ہے کہ )ان شاءاللہ (سیدہ )فاطمہ(رضی اللہ عنہ)کے ہاں بچہ پیداہوگا اور وہ تمہاری گود میں دیا جائے گا-چنانچہ سیدہ فاطمۃ الزہراء (رضی اللہ عنہ) کے ہاں حضرت حسین (رضی اللہ عنہ) کی ولادت ہوئی اور رسول اللہ (ﷺ) کے فرمان کے مطابق وہ میری گود میں دئیے گئے- (المستدرک علی الصحیحین ،باب:اَوَّلُ فَضَائِلِ أَبِي عَبْدِ اللهِ الْحُسَيْنِ بْنِ عَلِيٍّ الشَّهِيدِ (رضی اللہ عنہ)

آپ ؓ کی ولادت با سعادت ہجرت کے چوتھے سال، 5 شعبان کو(مدینہ منورہ) میں ہوئی-( سیراعلام النبلاءباب: الحُسَيْنُ الشَّهِيْدُ أَبُو عَبْدِ اللهِ بنُ عَلِيِّ بنِ أَبِي طَالِبٍ بنِ عَبْدِ المُطَّلِبِ)

حضرت علی بن طالب ؓ سے روایت ہے کہ جب حضرت حسن ؓ کی ولادت ہوئی تو میں نے ان کا نام حمزہ رکھا اور جب حضرت حسین ؓ کی ولادت ہوئی تو میں ان کا نام ان کے چچاکے نام پہ ’’جعفر‘‘رکھا-آپ ؓ فرماتے ہیں کہ رسول اللہ (ﷺ) نے مجھے بلایا اور ارشاد فرمایا:

’’اللہ تعالیٰ نے مجھے حکم فرمایا ہے کہ میں اپنے ان دونوں بیٹوں کے نام تبدیل کروں‘‘- (حضرت علی المرتضیٰ فرماتے ہیں کہ) میں نے عرض کی: ’’اللهُ وَرَسُولُهُ أَعْلَمُ‘‘-اللہ اوراس کارسول بہتر جانتے ہیں؛ پھر آپ (ﷺ) نے ان کے نام مبارک حسن اورحسین رکھے-( مجمع الزوائد ومنبع الفوائد،كِتَابُ الْأَدَبِ)

ایک اور روایت میں ہے کہ حضور نبی کریم (ﷺ) نے ارشاد فرمایا : ’’مَیں نے ان (شہزادوں )کے نام حضرت ہارون (علیہ السلام) کی اولاد کے نام پر ’’ شَبَّر، وَشَبِير، وَمُشَبّر‘‘رکھاہے ‘‘-( باب:الحسین بن علی(رضی اللہ عنہ) أسد الغابة فی معرفة الصحابة)

حضرت امام حسین ؓ کے فضائل و مناقب احادیثِ مبارکہ کی روشنی میں :

آپ ؓ کی ذاتِ مبارک کے فضائل و مناقب انسانی بساط لکھنے سے قاصرہے ،حصول برکت کے لیے چندروایات رقم کرنے کا شرف حاصل کیاجاتاہے –

حضرت ابو ایوب انصاری (رضی اللہ عنہ)فرماتے ہیں کہ میں رسول اللہ (ﷺ) کی بارگاہِ اقدس میں حاضر ہوا اس حال میں کہ امام حسن وحسین (﷠) آپ (ﷺ)کے سینہ مبارک پہ کھیل رہے تھے،تو مَیں نے عرض کی یارسول اللہ (ﷺ)! ’’کیا آپ (ﷺ)ان دونوں سے محبت کرتے ہیں؟ توآپ (ﷺ)نے ارشادفرمایا :میں ان سے محبت کیسے نہ کروں، یہ دونوں دنیاکے میرے دوپھول ہیں‘‘- ( سیراعلام النبلاء ،الحُسَيْنُ الشَّهِيْدُ أَبُو عَبْدِ اللهِ بنُ عَلِيِّ بنِ أَبِي طَالِبٍ ؓ)

ایک اور روایت میں ہے کہ حضور نبی کریم (ﷺ) نے ارشاد فرمایا:
’’جو مجھ سے محبت کرنا چاہتا ہے وہ ان دونوں شہزادوں سیدنا امام حسن ؓ اور سیدنا امام حسین ؓ سے محبت کرے‘‘-
(مسند أبی يعلى،باب :مسند عبداللہ بن مسعود)

’’حضرت ابوجعفر ؓ سے مروی ہےکہ ایک مرتبہ رسول اللہ (ﷺ) انصار کی مجلس سے گزرے اس حال میں کہ آپ (ﷺ) دونوں شہزادوں کو (اپنے کندھوں پہ) اٹھائے ہوئے تھے،تو لوگوں نے عرض کی:کتنی اچھی سواری ہے! تو آپ (ﷺ)نے ارشادفرمایا:دونوں سوار بھی کتنے اچھے ہیں ‘‘- (مصنف ابن ابی شیبہ،باب: مَا جَاءَ فِي الْحَسَنِ وَالْحُسَيْنِ رَضِيَ اللهُ عَنْهُمَا)

حضرت یعلیٰ عامری ؓ سے مروی ہے کہ ہم حضور نبی کریم (ﷺ) کے ساتھ ایک دعوت میں شرکت کے لیے نکلے راستے میں حضرت امام حسین ؓ بچوں کے ساتھ کھیل رہے تھے،پس آپ (ﷺ)باقی لوگوں سے آگے تشریف لے گئے اور(حضرت امام حسین ؓ کو پکڑنے کے لیے )آپ (ﷺ)نے اپنادستِ اقدس بڑھایا،لیکن آپ ؓ کبھی اِدھربھاگ جاتے کبھی اُدھر اور حضور نبی کریم (ﷺ) خوش ہو رہے تھے یہاں تک حضور نبی کریم (ﷺ) نے آپ ؓ کو پکڑ لیا اور آپ (ﷺ)نے اپنا ایک ہاتھ مبارک آپ ؓ کی ٹھوڑی کے نیچے رکھا اور دوسرا گردن پہ رکھاپھرآپ (ﷺ)نے اپناسرمبارک جھکاکر اپنا دہن مبارک حضرت امام حسین ؓ کے دہن پہ رکھا اور انہیں بوسہ دیا اور پھر آپ (ﷺ)نے ارشادفرمایا:

’’حسین مجھ سے ہیں اورمیں حسین سے ہوں یااللہ تواُس سے محبت فرما جوحسین سے محبت کرے،حسین (میرے) نواسوں میں ایک نواسہ ہے‘‘ – (مصنف ابن ابی شیبہ،باب: مَا جَاءَ فِي الْحَسَنِ وَالْحُسَيْنِ رَضِيَ اللهُ عَنْهُمَا)

حضرت سلمان ؓ فرماتے ہیں کہ مَیں نے رسول اللہ (ﷺ) کو یہ فرماتے ہوئے سنا :

’’(حضرت)حسن ؓ و حسین ؓ میرے بیٹے ہیں جس نے ان دونوں سے محبت کی اس نے مجھ سے محبت کی جس نے مجھ سے محبت کی اللہ اس سے محبت فرمائے گا اور جس سے اللہ فرمائے گا اس کو جنت میں داخل کرے گا اور جس نے ان دونوں سے بغض رکھا اللہ اس سے ناراض ہوگا اور جس سے اللہ ناراض ہوگا اسے جہنم میں داخل کرےگا‘‘-یہ حدیث شیخین کی شرط پر صحیح ہےلیکن ان (شیخین) نے اس کو ذکر نہیں کیا- (المستدرك على الصحيحين،وَمِنْ مَنَاقِبِ الْحَسَنِ وَالْحُسَيْنِ ابْنِي بِنْتِ رَسُولِ اللہِ(ﷺ)

حضرت علی المرتضےٰ ؓ فرماتے ہیں کہ ’’رسول اللہ (ﷺ) نے حضرت امام حسن اور حضرت امام حسین رضوان اللّٰہ علیھم کے ہاتھ کو پکڑا اورارشاد فرمایا:

’’جس نے مجھ سے، ان دونوں سے،ان دونوں کے والد (محترم) سے اور ان کی والدہ (محترمہ) سے محبت کی تو وہ قیامت کے دن میرے ساتھ ہوگا‘‘-(سنن الترمذی، کتاب المناقب)

’’ایک مرتبہ حضورنبی کریم (ﷺ) سیدہ عائشہ صدیقہ ؓ کے گھرسے سیدہ فاطمۃ الزہراء ؓ کے گھرکی طرف تشریف لے گئے اور آپ (ﷺ)نے سیدنا امام حسین (رضی اللہ عنہ) کے رونے کی آواز سنی تو آپ (ﷺ)نے ارشاد فرمایا :
’’کیا تم کو معلوم نہیں ہے کہ ان کا رونا مجھے تکلیف دیتا ہے؟‘‘

حضرت انس ؓ سے مروی ہے کہ رسول اللہ (ﷺ) سجدہ فرما رہے تھےحضرت حسن یاحضرت حسین ؓ تشریف لائے اور حضور نبی کریم (ﷺ)کی پیٹھ مبارک پہ سوار ہو گئے تو آپ (ﷺ) نے سجدہ کو لمبا فرما دیا، عرض کی گئی یارسول اللہ (ﷺ)! أَطَلْتَ السُّجُودَ؟ آپ (ﷺ)نے سجدہ بہت لمبا کیا ہے؟ تو رسول اللہ (ﷺ)نے ارشادفرمایا :
’’میرا بیٹا مجھ پر سوار ہو گیا تو میں نے اسے جلدی سے اتارنا پسند نہ کیا‘‘-( مسند أبی يعلى الموصلی،باب: ثَابِتٌ الْبُنَانِيُّ عَنْ أَنَسٍ)

حضرت زید بن ارقم (رضی اللہ عنہ) سے مروی ہے کہ رسول اللہ (ﷺ) نے حضرت علی المرتضیٰ، سیدہ فاطمۃ الزہراء اور حسنین کریمین (رضی اللہ عنھم) سے ارشادفرمایا :جو تم سے جنگ کرے گا مَیں اس سے جنگ کروں گا اور اس سے صلح کروں گا جوتم سے صلح کرے گا‘‘- ( سنن الترمذی ، بَابُ مَا جَاءَ فِي فَضْلِ فَاطِمَةَ رَضِيَ اللهُ عَنْهَا)

صحابۂ کرام اور ادبِ حضرت امام حسین(رضی اللہ عنہ):

(جب مسلمانوں کو خوشحالی ہوگئی) حضرت عمر بن خطاب ؓ نے جب و ظائف مقرر فرمائے، غزوہ بدرمیں شریک حضرات کے لیے پانچ پانچ ہزار وظیفہ مقرر فرمایا اور بدر میں شریک صحابہ کرام ؓ کے صاحبزادوں کے لیے دو دو ہزار وظیفہ مقررفرمایا سوائے حضرت امام حسن اورحضرت امام حسین رضی اللہ عنھم کے – ’’رسول اللہ (ﷺ) کی قرابت کا لحاظ کرتے ہوئے حسنین کریمین (﷠) کاوظیفہ ان کے والد حضرت علی المرتضیٰ (رضی اللہ عنہ) جتنا (پانچ ہزار) مقررفرمایا- (حالانکہ آپ (رضی اللہ عنہ) نے اپنے بیٹے حضرت عبداللہ بن عمر کے لیے بھی تین ہزار وظیفہ مقرر فرمایا )‘‘-( الطبقات الکبرٰی لابن سعدؒ،باب: ذِكْرُ اسْتِخْلافِ عُمَرَ )

امام زہری سے روایت ہے کہ حضرت عمر فاروق ؓ نے حضور نبی کریم (ﷺ)کے اصحاب (﷢) کو جب کپڑے دیئے (تو آپ کی سوچ کے مطابق ) ان کپڑوں میں حضرت امام حسن اورحضرت امام حسین(رضی اللہ عنھم) کی شان کے مطابق کوئی کپڑانہ تھا؛ ’’تو آپ ؓ نے ایک شخص کو یمن بھیجا وہ ان دونوں شہزادوں کے لیے لباس لے کرآیااور(جب کپڑے آگئے تو)آپ ؓ نے فرمایا :اب میرادل خوش ہوگیا‘‘- ( مسند أمير المؤمنين أبی حفص عمر بن الخطاب ؓ، (لابن کثیرؒکتاب الجھاد)

حضرت مدرک بن عمارہ ؓ سے روایت ہے کہ میں نے حضرت ابن عباس ؓ کو دیکھا وہ حضرت حسن اور حضرت حسین (رضی اللہ عنھم) کی سواری کی لگام پکڑئے ہوئے ہیں- آپ سے عرض کئی گئی :کیا آپؓ حسنین کریمین (رضی اللہ عنھم) کی سواری کی لگامیں تھامے ہوئے ہیں حالانکہ آپ (رضی اللہ عنہ) ان سے بڑے ہیں ؟توآپ (رضی اللہ عنہ) نے فرمایا:

’’بے شک یہ دونوں رسول اللہ (ﷺ)کے نواسے ہیں تو کیا یہ میرے لیے سعادت نہیں کہ میں ان کے سواری کی لگام کو تھاموں‘‘- ( تاریخ دمشق لابن عساکر،باب: الحسين بن علی بن أبی طالبؓ)

’’حضرت عمروبن العاص ؓ خانہ کعبہ کے سائے میں بیٹھے ہوئے تھے جب آپ نے حضرت حسین بن علی ؓ کو آتے ہوئے دیکھاتو آپ ؓ نے فرمایا:
’’یہ ہستی آج مجھے زمین و آسمان میں سب سے زیادہ محبوب ہے‘‘- (تہذیب التہذیب للعسقلانیؒ،باب:الحاء)

حضرت ابوالمہزم ؓ سے روایت ہے کہ حضرت ابوھریرہ ؓ اپنے کپڑے کے کنارے سے سیدناامام حسین (رضی اللہ عنہ) کے قدمین شریفین سے مٹی جھاڑ رہے تھے تو حضرت امام حسین (رضی اللہ عنہ) نے ارشاد فرمایا: اے ابوھریرہ! آپ یہ کیاکررہے ہیں؟ تو حضرت ابوھریرہ (رضی اللہ عنہ)نے فرمایا:

’’مجھے چھوڑدیجیے،اللّٰه رب العزت کی قسم !اگر لوگوں کو آپ کے بارے میں وہ علم ہوجائے جومیں جانتاہوں تو وہ آپ کو اپنے کندھوں پہ اٹھالیں ‘‘- ( الطبقات الکبرٰی کتاب:الحسين بن علیؓ)

اللّٰہ تعالیٰ ہم سب کو صحابۂ کرام اور اہلِ بیتِ اطہار بالخصوص حضرت امام حسین رضی اللّٰہ عنہ کی سچی محبت عطا فرمائیں کہ آپ کی محبت سے ہی حضور نبی کریم(ﷺ) کی محبت اور رضا حاصل ہوتی ہے۔ اور ہمیں یزید ملعون اور اس کے کے ساتھ مل کر حضرت امام حسین رضی اللّٰہ عنہ سے جنگ کرنے والوں اور بے وفائی کرنے والوں کے گمراہی والے راستے پر چلنے سے بچا کر رکھے۔ آمین۔

@ChAbdul_Salam

"ہمارا بچہ تو ہماری سنتا ہی نہیں”۔۔۔”بے کہنے کا ہو گیا ہے”۔۔۔”نہ تووقت پے سونا ہے نہ وقت پراٹھنا”۔۔۔” پڑھنا لکھنا ہے نہیں بس سارا دن موبائل ہے”۔۔۔”ہر ایک سے بدتمیزی اب تع محلے سے بھی شکاتیں آرہی ہیں”۔۔
یہ ہیں وہ جملے اور آوازیں جو آجکل تقریبا ہر گھر سے سنائ دی جا رہی ہیں ۔۔۔ ماں باپ بچوں کی شرارتوں اور منفی روئیے سے بے حد پریشان نظر آتے ہیں۔۔۔پرائیوٹ اسکولوں کی بھاری بھاری فیسیں دے کربھی بچہ نہ تو پڑھ پارہا ہے اور نہ ہی کوئ تربیت حاصل کر پارہا ہے۔۔۔ اس کے علاوہ ٹیوشن کا بوجھ الگ ہے لیکن بچے ویسے ہی بدتمیز_بے سلیقہ اور بد تہزیب۔۔۔ایسا کیوں ہے۔۔۔؟؟
دراصل آج کل کی مصروف زندگی میں والدین نے اپنی زمہ داریاں بھی اسکول اور ٹیوشن کی ٹیچر پر ڈال دی ہے ان کو یہ بات معلوم ہی نہیں کہ بچے والدین کا عکس ہوتے ہیں اور بچوں کی سب سے بڑی تربیت گاہ اس کا اپنا گھر ہے اور اس کے گھر کا ماحول جیسا ہو گا بچہ بھی ویسے ہی ڈھلے گا یاد رکھئے آپ کا بچہ جو آپ کو دیکھ کر سیکھ سکتا ہے وہ کوئ دوسرا سکھا ہی نہیں سکتا یہ ایک ایسا خودکار عمل ہے جس کو سمجھنے کے لئے کوئ روکٹ سائنس نہیں۔۔۔
مجھے یاد ہےجب ہم چھوٹے تھے ۔۔تو جیسے ہی ازان کی آواز آئ ابا جی نےٹیلی ویژن بند کر دینا تھا اور فورا نماز کے لئے چلا جاتےتھے جیسے جیسے ہم بڑے ہوئے تو ازان ہوتے ہی ہم بھی ٹی وی بند کر دیتے اور نماز کے لئے مسجد کی دوڑ لگا دیتے تھے مجھے یاد نہیں کہ کبھی ابا جی نے ہمیں نماز کی سختی کی ہو ہم ابا جی کے طرزعمل کو دیکھ دیکھ کر اتنے عادی ہو چکے تھے کہ نماز چھوٹتی ہی نہیں تھی۔۔۔۔۔
اس کے علاوہ میرے والد صاحب جب گھر میں داخل ہوتے تو پہلے دروازہ کھٹکھٹاتے اور داخل ہو کر باآواز سلام کرتے تھے اور امی سے مسکراتے ہوئے بات کرتے۔۔۔ آہستہ آہستہ یہ عادتیں ہم سب بہن بھائیوں میں بھی منتقل ہوئیں سب بہن بھائ بناء دستک دئے اپنے گھر میں داخل نہیں ہوتے تھے۔۔۔ اور داخل ہوتے ہی باآواز ہو کے سلام کرتے اور امی کے پاس بیٹھ کر پہلے گپ شپ۔لگاتے پھر دیگر کاموں میں لگتے تھے۔۔۔۔
مجھے یہ بھی اچھی طرح یاد ہے کہ ابا جی جب آفس سے گھر آتے۔۔۔ تو پہلےدادی جان کے پاس بیٹھتے اور ان کا ہاتھ چومتے تھے۔۔۔ابا جی کی یہی عادت ہم سب بہن بھائیوں نے بھی پائ۔۔۔ گھر آتے ہی امی کے پاس بیٹھتے کوئ ان سے لپٹ کر اپنی محبت کا اظہار کرتا توکوئ ان کے زانو پر سر رکھ کر لیٹ جاتا اور کوئ تو باقاعدہ پیار کرنا شروع کر دیتا تھا۔۔۔
اس کے علاوہ میں نے یہ بھی دیکھا کہ اکثر ابا جی گھر کے کام کاج میں امی کا ہاتھ بھی بٹاتے تھے اگر امی کپڑے دھو رہی ہوں یا کھانا پکا رہی ہوں تو وہ بھی انکی مدد کرتے تھے۔۔۔بالکل یہ ہی عادتیں کم و بیش ہم سب بھائیوں میں منتقل ہوئیں ہم سب کام کاج میں اپنی بیگمات کا ہاتھ بٹاتے ہیں۔۔۔
علاوہ ازیں ہم نے ہمیشہ امی کو پنجگانہ نماز پڑھتے دیکھا کبھی سر سے دوپٹہ نہیں اترتا تھا ۔۔۔صبح صبح اٹھ جانا ۔۔فجر سے فارغ ہو کر تلاوت کلام ان کا معمول تھا ۔۔۔اور آپ یقین جانئے میری تمام۔بہنیں بالکل امی کی طرح ہی صبح سویرے اٹھتی ہیں اور وہی معمولات زندگی اپنائ ہوئ ہیں جو میری والدہ کے تھے۔۔۔۔
ہم نے تو کبھی اپنے والدین کو لڑتے ہوئے بھی نہیں دیکھا لڑنا تو دور کی بات ہماری امی جی ابا کے آگے اونچی آواز میں بات بھی نہیں کرتی تھیں۔۔۔ہمیشہ اہل محلہ کے دکھ درد میں شریک رہتی تھیں ۔۔۔محلے میں کسی کے گھر کوئ تقریب ہو ہمارا بیٹھک والا کمرہ شادی کی تقریب والے محلے داروں کو دے دیا جاتا تھا ۔۔۔جہاں ان کے مردمہمانوں کا انتظام ہوتا تھا۔۔۔اور امی اور ابا دونوں ان کے لئے ایسے بڑھ چڑھ کرکام کرتے تھے جیسے وہ محلے دار نہیں رشتہ دار ہوں۔۔۔اب تو سارے محلے کے گھر ہی بڑے ہو چکے ۔۔۔لیکن پھر بھی ان کے دکھ سکھ میں ہم سب ان کے ساتھ ویسے ہی کھڑے ہوتے ہیں جیسے ہمارے والدین ہوتے تھے۔۔۔
اچھا ہمارے گھر میں ایک اور اچھی بات تھی کوئ بھی بات ہو۔۔۔مسئلہ ہو۔۔۔یا کسی کے رشتے وغیرہ کی بات ہو۔۔ابا جی ہم سب سے مشاورت ضرور کرتے تھے۔۔۔ مجھے اچھی طرح یاد ہے میں کافی چھوٹا تھاجب میری بڑی بہن کا رشتہ آیا تو ابا جی نے مجھ سمیت سب بہن بھائیوں سے مشورہ کیا تھا۔۔۔ اکثر دیگر امور میں بھی وہ ہمیں مشاورت میں شامل رکھتے تھے اور شاید یہ ہی وجہ ہے کہ میں بھی اپنے گھر میں کسی بھی امور پر اپنی فیملی سے مشاورت کرتا ہوں اور ہمارے گھر میں جو بھی فیصلے ہوتے ہیں باہمی رضامندی سے ہی ہوتے ہیں۔۔۔
ایک بات اور۔۔۔میرے گھر میں صفائ کا بڑا خیال رکھا جاتا تھا والدہ بغیر ہاتھ دھوئے کچن میں بھی نہیں جاتی تھیں اور ہمیں بھی جانے کی اجازت نہیں تھی۔۔گھر ہمیشہ شیشے کی طرح دمکتا رہتا تھا۔۔۔ جھوٹ بولنے کو اور گندے الفاظ کے استعمال کو بہت معیوب سمجھا جاتا تھا۔۔۔اور اللہ تعالی کا لاکھ لاکھ شکر ہے یہ ہی عادت ہم سب بہن بھائیوں میں بھی ہے سب کے گھر صاف ستھرے روشن ۔۔اور ہمیشہ ہی سچ اور ستھرا ہی بولتے ہیں۔۔۔۔
تو دوستوں! یہ تمام عادات جو ہمیں اپنے والدین سے ملیں اور ہم نے بھی وہی طرز زندگی اپنے انفرادی گھرانے میں بھی اپنائ ہے۔۔۔اب ماشاء اللہ میری اولاد بھی اسی نقش قدم پر چل رہی ہے۔۔۔ سب بتانے کا مقصد یہ تھا کہ ہمارے والدین نے ہمیں سرکاری اسکولوں میں ہی پڑھایا اور بڑے نے چھوٹے کو پڑھائ میں رہنمائ کی اور اس نے اور نیچے والے کو ۔۔اس طرح ٹیوشن سے بھی دور رہے۔۔۔ ہماری تربیت توازخود ہی ہوتی رہی۔۔۔ نہ کوئ بھاری فیس والا اسکول ۔۔۔اور نہ کوئ قیمتی ٹیوشن۔۔۔ سب بہن بھائ ماشاءاللہ اس معاشرے میں ایک کامیاب باعزت زندگی بھی گزار رہے ہیں۔۔اور اللہ تعالی کا بڑا احسان ہے ہمارے گھر سے ایسے جملوں کی آواز بھی نہیں آتیں جن کا زکر میں نے مضمون کے شروع میں کیا ۔۔

@Azizsiddiqui100

تمام پاکستانی جو سوشل میڈیا کی تھوڑی بہت سمجھ بوجھ رکھتے ہوں گے یا استعمال کرتے ہوں گے وہ یقیناً اس نام سے واقف ہوں گے- قاسم علی شاہ ایک معلم ، موٹیویشنل سپیکر ہیں اور پوری دنیا میں ان کو مثبت سوچ پھیلانے کا باعث بننے کی وجہ سے بہت زیادہ سراہا جاتا ہے اس وقت پاکستان میں ان کی فاؤنڈیشن بھی فعال ہے جس کا مقصد ملک کے نوجوانوں کو اس طرح تیار کرنا ہے کہ وہ ایک ایسی زمدگی بسر کریں جس کا انہوں نے خواب دیکھا ہو-اس وقت وہ بارہ کے قریب کتابوں کے مصنف ہیں اور ان کی کتاب بڑی منزل کے مسافر نے سیل کے کئی ریکارڈ بنائے ہیں سوشل میڈیا اس وقت ایسا ہتھیار بن چکا ہے جو ہر انسان کے ہاتھ میں ہے اور وہ بنا سوچے سمجھے چلا رہا ہے کئی بار تو اس کو درست استعمال کیا جاتا ہے مگر کئی دفعہ اس کو غیر مناسب انداز میں استعمال کیا جاتا ہے ایسی ایک مثال آپ قندیل بلوچ کے حوالے سے سیکھ سکتے جس کو آخر کار موت کی وادی میں سونا پڑا ایسا ہی ایک واقعہ گزشتہ دنوں پیش آیا جب کسی نے قاسم علی شاہ کی چند ایسی تصویریں سوشل میڈیا پر ڈال دیں جس میں انہوں نے قمیض نہیں پہنی ہوئی تھی اس پر ایک طوفان بدتمیزی کھڑا کر دیا گیا -لوگوں نے بغیر کچھ جانے یا سوچھے طرح طرح کی باتیں بنایا شروع کر دی غرض یہ کہ جتنے منہ اتنی باتیں-ٹویٹر پر ایک صارف واصف نے یہ لکھا کہ ابھی تو اصل کھیل شروع ہوا ہے آپ انتظار کریں تھوڑی دیر بعد قاسم علی شاہ کی ویڈیو اپلوڈ کروں گا جس میں وہ رنگرلیاں منا رہے ہیں اور کئی عورتوں کے ساتھ ناچ رہے ہیں ایک اور صارف عدنان نے لکھا کہ یہ قاسم علی شاہ ایک بہروپیہ ہے جس نے دانائی کا بھیس بدلا ہوا ہے جبکہ یہ ایک درندہ ہے جس نے کئی لڑکیوں کی زندگیاں بربا د کی ہیں اور آواز اٹھنے پر ان کو پیسے دے کر یا پھر طاقت کے زور پر دبا دیا گیا ہے اس طرح دیکھتے ہی دیکھتے یہ معاملہ ٹرینڈنگ میں چلنے لگا اور قاسم علی کو خود آ کر ان تصویروں کے معاملے کی وضاحت دینی پڑ گئی-قاسم علی شاہ نے واقعے کی تفصیل بیان کرتے ہوئے بتایا کہ ہماری فیملی یہ دیکھ کر ہنس رہی ہے کہ لوگ کیا کیا کہہ رہے ہیں انہوں نے بتایا کہ یہ تصویریں ان کے گھر کہ اندر کی ہیں اور انہوں نے خود بنائی ہیں اور تین سال پرانی ہیں انہوں نے اپنے گھر کی موجودہ تصویریں بھی شیئر کی اور دیکھایا کہ جو بیک گراؤنڈ تصویروں میں ہے وہی اب بھی ہے اور وہ اکثر کھر میں دھوتی اور بنیان میں ہوتے ہیں اس دن بھی میں ایک ایسے ہی لباس میں ملبوس تھا -اس کے علاوہ انہوں نے ان لوگوں کو مخاطب کیا جو لوگ اس بات کا انتظار کر رہے تھے کہ ابھی ویڈیوز آنے والی ہیں شائد وہ مایوس ہوں گے کیونکہ ایسی کوئی بات نہیں ہے-اس کے علاوہ انہوں نے تصویریں لیک ہونے کے بارے میں بتایا کہ موبائل میں خرابی کے باعث اسے مکینک کی پاس بھیجا گیا اور وہاں سے یہ تصویریں لیک ہوئی جن کی وجہ سے یہ سارا پراپیگنڈہ کیا جا رہا ہے آخر میں قاسم علی شاہ نے رب کی رضا کے لیے ان تمام لوگوں کو معاف کر دیا جو اس پراپیگنڈے میں شامل تھے اور ان کی ساکھ کو متاثر کرنے کا سبب بن رہے تھے -اب آتے ہیں اس طرف کہ یہ معاملہ کیوں پیش آیا یوں تو اس کی کئی وجوہات ہیں مگر جو اہم ہے وہ ہماری دوسروں کے معاملے میں ٹانگ اڑانے کی عادت ہے سب سے پہلے مکینک نے کوتاہی کرتے ہوئے تصویریں لیک کی اس کے بعدلوگوں نے بغیر کسی ثبوت کے باتیں بنائی شروع کر دی اور عزت اچھالنے کا سلسلہ شروع ہو گیا -کاش ہم ایک بہتر معاشرے کی تخلیق کے لیے اپنا کردار ادا کر سکیں-

ٹویٹر-mohsenwrites@