Author: Baaghi TV

کزن یار, یہ الفاظ کبھی مجھے سخت ناپسند تھے۔اور کہنے والا بھی ۔ مگراب یہی الفاظ میرا سرمایہ حیات ہیں۔میری سماعتوں میں آج بھی یہ الفاظ گونجتے رہتے ہیں۔میرا نام نوشین ہے گھر والے سب نوشی کہتے ہیں۔مگروہ مجھے ہمیشہ کزن یاپھر کزن یار، ہی کہتا تھا۔وقت وقت کی بات ہے کبھی وہ مجھے سخت ناپسند تھا اور اس کے یہ الفاظ بھی۔بلکہ یوں کہہ لیں کہ مجھے اس سے نفرت ہی تھی۔اس کے کزن یار کہنے سے میں چڑجاتی تھی۔اور اسے خوب بےعزت کرتی تھی۔اسے بات بےبات بےعزت کرنا اور اس کی عزت نفس مجروح کرنا میرا پسندیدہ مشغلہ تھا۔اوریہی مشغلہ اب میرا عمر بھرکاپچھتاوا۔ بلکہ روگ بن گیا ہے۔وہ جو محبت پہ ہنستا تھاپھر اسے آ لیا محبت نے۔یہ شعر مجھے اسی نے سنایا تھا۔وہ اکثر مجھے شعر سنادیتا تھا۔اسے شاعری سے لگاؤ تھا ۔اور مجھے شاعری سخت ناپسند تھی۔مگراب مجھے بہت سی غزلیں اور شعر یاد ہیں وہ سب شعر بھی یاد ہیں جو اس نے مجھے اکثر بیشتر سناۓ تھے۔وہ میرے ماموں کا بیٹا تھا۔نام تو اس کا عدنان تھا۔مگرسب اسے عادی کہتے تھے۔سواۓ میرے۔میں نے اسے کبھی نام سے بلایا ہی نہیں تھا۔اور نہ کبھی اسے انسان سمجھا تھا۔میں ہمیشہ اسے اوۓ یا اوۓ پینڈو کہہ کر ہی بلاتی تھی۔وہ ہماری گاڑی چلاتا تھا جس کی وجہ سے میں اسے اکثر ڈرائیور بھی کہہ دیتی تھی۔اس سے میرا مقصد فقط اس کو ذلیل کرنا ہوتا تھا۔مگراس نے کبھی مجھ سے شکوه نہیں کیاتھا۔اور نہ ہی کبھی ناراض ہوا تھا۔وہ نویں کلاس میں تھا جب ماموں فوت ہوۓ۔گھر میں سب سے بڑا ہونے کے ناطے ساری ذمہ داری عادی کے کندھوں پر آپڑی تھی۔اس نے سکول کو خیرآبادکہا اور محنت مزدوری کرنے لگا۔ہمارے سمعیت عادی کے باقی رشتےدار بھی اچھے بھلے کھاتے پیتے تھے۔مگرکسی کو بھی اتنی توفیق ہی نہیں ہوئی کہ کوئی ان کے سر پہ ہاتھ رکھ دیتا۔سب اپنی اپنی دنیامیں مست تھے۔وقت گزرتارہا عادی نے اپنے بہن بھائیوں کو پڑھایا اور جیسے تیسے گھر کا خرچ بھی چلایا۔پتہ نہیں اس نے کب اور کہاں سے ڈرائیوری سیکھی۔؟؟؟وہ لوگ کبھی کبھی ہمارے گھر ہم سے ملنے آجاتے تھے۔مگرہم لوگ کبھی ان کے گھر نہیں گئے تھے۔امی ایک دوبار گئی تھیں باقی کوئی نہیں جاتا تھا۔اب کی بار عادی اپنی امی کے ساتھ آیا تو ابونے اسے گھر ڈرائیور کی آفر کی جس کو اس نے قبول کرلیا۔ابو نے گھر میں کوئی ڈرائیور نہیں رکھا تھا۔وہ خود ہی مجھے اور میری چھوٹی بہن ثمرین کو کالج یونیورسٹی چھوڑنے جاتے تھے۔عادی کے آنے سے ابو بےفکر ہوگئے تھے۔میں جانتی تھی عادی مجھے پسند کرتا ہے ۔مگرمیں نے کبھی اس پر توجہ ہی نہیں دی تھی۔یوں کہہ لیں کہ میں اسے توجہ کے قابل ہی نہیں سمجھتی تھی۔پھر ایک دن اس نے ہمت کرکے اپنی پسند کا اظہار کرہی دیا۔اس نے کہا تھا نوشی میں تمہیں بچپن سے پسند کرتا ہوں۔میں جانتا ہوں کہ میں تمہارے قابل نہیں ہوں

مگر یہ دل کے فیصلے ہیں اس پر کسی کا زور نہیں چلتا

تم کسی قابل نہیں ہو میں نے اسے کہا تھا

ویسے فیصلے دماغ کرتا ہے دل نہیں

بشرطیکہ کسی کے پاس دماغ نام کی کوئی چیز ہو میں نے اسے آڑے ہاتھوں لیا

محبت کے فیصلے دل کے ہی ہوتے ہیں کزن

عادی نے دھیمے سے لہجے میں کہا

محبت میں اگر فیصلے دماغ کرنے لگے تو محبت، محبت نہیں رہتی مفاد پرستی بن جاتی ہے

بے خطر کود پڑا اتش نمرود میں عشق

عقل محو تماشا لب بام تھی ابھی

اس نے حسب حال اپنی بات کی دلیل میں شعر بھی سنا دیا اس کے اظہار کے بعد تو مجھے جیسے اس سے خدا واسطے کا بیر ہی ہوگیا تھا

میں نے جان بوجھ کر اسے یہاں تک بھی کہہ دیا تھا کہ وہ مجھے محبت کے چکر میں پھنسا کر امیر ہونا چاہتا ہے اس نے کہا تھا کہ شادی اور محبت دو الگ چیزیں ہیں

ضروری نہیں کہ ہم جس سے محبت کریں اس سے ہماری شادی بھی ہو جائے مگر یہ بھی کوئی نہیں کہہ سکتا کہ جس سے ہماری شادی ہو گئی اس سے ہمیں محبت بھی ہو جائے محبت کے لیے کچھ خاص دل مخصوص ہوتے ہیں اور کچھ خاص انسان بھی

میں جانتی تھی کہ عادی کسی لالچ میں مجھ سے محبت نہیں کرتا مگر کسی بھی بات پہ سہی مجھے تو اس کو ذلیل کرنا تھا

اس کے بعد جب جب مجھے موقع ملا میں نے اسے خوب بے عزت کیا میں نے زندگی میں کوئی دکھ نہیں دیکھا تھا شاید اس لیے مجھے کسی کے دکھ کا احساس بھی نہیں تھا بہت ہی بے حس تھی میں۔

دولت کی فراوانی سے مجھ میں تکبر انا اور نخرہ حد سے زیادہ تھا

پھر ایک دن میں نے اپنے دوستوں سے کہہ کر اسے یونی میں بے عزت کروایا

میری دوست اس کی محبت اور غربت پر طنز کرتی رہیں

عادی نے سب ہمت سے سنا اور فقط اتنا کہا تھا کہ کزن۔۔۔۔۔!

کسی کی محبت کا مذاق نہیں اڑاتے اگر اگلا بندہ اپنی محبت میں واقعی سچا اور مخلص ہے تو محبت کی بد دعا لگ جاتی ہے مذاق اڑانے والوں کا ایک دن اپنا مذاق بن سکتا ہے

اور ہم نے اس بات  پہ بھی اس کا خوب مذاق اڑایا تھا

میرا یونی میں آخری سال تھا ابو کو میرے لیے ایک لڑکا پسند آگیا

اعلی تعلیم یافتہ اور امیر ترین گھرانہ تھا ان کی بھی ہماری طرح فیکٹریاں اور دیگر کاروبار تھا

لڑکے والے مجھے دیکھنے آئے اور پسند کر گئے ہمارے گھر والوں کو بھی لڑکا پسند آ گیا منگنی کی تاریخ مقرر کردی گئی منگنی سے ایک دن پہلے ہی عادی بہانہ بنا کر گیا شاید اس میں ہمت نہیں تھی کہ وہ مجھے کسی اور کے نام ہوتا ہے دیکھ سکتا 

وہ تین چار دن بعد واپس آیا تھا

اس کے آتے ہی میں نے اسے اپنے منگیتر سعد کی تصویر دیکھائی اور کہا کے دیکھو ایسے لوگ ہوتے ہیں جن سے محبت کی جاتی ہے اور جو کسی قابل بھی ہوتے ہیں

اسے تڑپانے کا ایک نیا طریقہ میرے ہاتھ آ گیا تھا میں جان بوجھ کر موبائل کان سے لگا کر عادی کے قریب سے گزرتی قدرے اونچی آواز میں نہیں جانو جان وغیرہ کہتے ہاں یار میں جانتی ہوں تم میرے لیے جان بھی دے سکتے ہو۔۔۔

(جاری ہے)

@BismaMalik890

زندگی میں یہ بات یاد رکھنا یہ دنیا ہمیشہ چڑھتے سورج کو سلام کرتی ہے جب تک تم کچھ بنو گے نہیں تب تک نہ تمہیں کوئی عزت دے گا اور نہ تمہاری سنے گا سب کچھ ٹھیک ہونے کا انتظار کرو گے تو بس انتظار کرتے رہ جاؤ گے انتظار کرنے والوں کو وہی ملتا ہے جو کوشش کرنے والے چھوڑ جاتے ہیں

اس لئے خود اٹھو ہمت کرو اور سب کچھ ٹھیک کر کے دکھاؤ کبھی ہار بھی جاؤں تو پھر سے کوشش کرنا کیوں کہ آپ سال یا دن ہارتے ہیں زندگی نہیں پروبلم ہارنے میں نہیں ہار ماننے میں ہے اس لیے بس تم ہار نہ مانو اور کوشش کرتے رہو پھر دیکھنا کون تم سے آگے نکل پاتا ہے زندگی چھوٹی نہیں ہوتی لوگ جینا ہی دیر سے شروع کرتے ہیں جب تک راستے کی سمجھ آتی ہے تب تک لوٹنے کا وقت ہو جاتا ہے صحیح فیصلہ بھی غلط ہو جاتا ہے اگر وہ دیر سے لیا جائے

مشکل نہیں ہے اس دنیا میں تو زرا ہمت تو کر خواب بدلیں گے حقیقت میں تو ذرا کوشش تو کر آندھیاں سدا چلتی نہیں مشکل سدا رہتی نہیں ملے گی تجھے منزل تیری تو ذرا کوشش تو کر

اگر کوئی آپ کے بغیر خوش ہے تو اسے خوش ہی رہنے دو جو جا رہا ہے اسے جانے دو وہ آج رک بھی گیا تو کل چلا ہی جائے گا آپ رشتے بنا کر بھی کیا کرو گے جب سامنے والے کا ارادہ نہ ہو نبھانے کا تو آپ قدم برھا کر بھی کیا کر لوگے چھوڑنے والے چھوڑ ہی جاتے ہیں مقام کوئی بھی ہو نبھانے والے نبھا جاتے ہیں حالات کیسے بھی ہوں

اس لئے زندگی میں اس بات کا خیال رکھنا جہاں قدر نہیں وہاں جانا نہیں جو سنتا نہیں اسے سنانا نہیں جو سمجھتا نہیں اسے سمجھانا نہیں موسم کی طرح جو بدلے اسے دوست بنانا نہیں جو دل توڑ کر چلا جائے اسے واپس بلانا نہیں جو نظروں سے گر جائے اسے اٹھانا نہیں جو سچ بولنے پر بھی روٹھ جائے اسے منانا نہیں زندگی جینے کا سلیقہ پرندوں سے سیکھو جو کورے میں پڑا ہوا گندم کا دانہ بھی ڈھونڈ نکالتا ہے

اس لیے ہمیشہ اپنی نظر لوگوں کی اچھائیوں پر رکھو برائیوں پر نہیں عمر ضائع کر دیں لوگوں نے دوسروں کے وجود میں نقص نکالتے نکالتے اگر اتنا ہی خود کو تراشا ہوتا تو آج فرشتے ہوتے جن کا وقت خراب ہے ان کا ساتھ ضرور دو لیکن جن کی نیت خراب ہے ان سے دور رہنا ہی بہتر ہے

بھروسہ اور پیار بہت ہی مہنگے تحفے ہیں اس لیے سستے لوگوں سے کبھی ان کی امید مت رکھنا جب کوئی ہاتھ اور ساتھ دونوں چھوڑ جائے تو خدا کسی نہ کسی کو آپ کا ہاتھ تھامنے کے لیے ضرور بھیج دیتا ہے

@MalikZamad_

چودہ اگست کے روز مینار پاکستان میں ہونے والے افسوسناک واقعہ کی ابھی دُھول بھی نہیں بیٹھی تھی کہ چنگ چی رکشے والا شرمناک واقعہ رونما ہوگیا۔بد قسمتی سے یہ واقعہ بھی اسی روز ہوا۔جب
بظاہر انسان نُما ایک شخص نے کُتے کی طرح لپک کر رکشے پر بیٹھی لڑکی کے ساتھ وہ حرکت کی،جس نے پوری قوم کا سر شرم سے جھکا دیا۔
اس جانور کی حرکت دیکھنے والے کچھ بزدل وڈیو بناتے رہے،کچھ بے شرموں کی طرح دانت نکالتے رہے اور کچھ بے غیرتی میں حصہ ڈالتے ہوۓ ہنس ہنس کر محظوظ ہوتے رہے۔
ان میں سے کوئ مائ کا لعل ایسا نہیں تھا جو اس لعنتی کو پکڑ کر دو چار لگا سکتا؟
اگر اتنا نہیں کر سکتے تھے تو کم ازکم اسے پکڑ کر پولیس کے حوالے ہی کر دیتے۔
یہ بےحسی کی انتہا ہے۔
جب ہم ایسے معاملات پر خاموش تماشائ بن جائیں گے تو ایسے زلیل لوگوں کے حوصلے بڑھیں گے۔
ان معا شرتی ناسوروں کے ہاتھوں کسی کی بہن بیٹی کی عزت محفوظ نہیں رہے گی۔
ایسے لوگوں کو پٹہ ڈال کر زنجیر سے باندھنا ضروری ہے۔
جہاں ایسے واہیات اور ننگ انسانیت لوگوں کی سرکوبی حکومت کی زمہ داری ہے،
وہیں ہمارے بھی کچھ فرائض ہیں۔ہماری آنکھوں کے سامنے ایک مردود ہماری ایک بیٹی کے ساتھ اس قسم کی گھناؤنی حرکت کرے اور ہم خاموش تماشائ بنے رہیں،
کہاں کی مردانگی ہے یہ؟
کہاں ہے ہماری غیرت؟
اس واقعہ میں نظر آنے والی لڑکی ہم سب کی بیٹیوں یا بہنوں جیسی تھی تو پھر لوگ محض تماشا کیوں دیکھتے رہے؟
کیوں سب نے خاموش تماشائ کا کردار ادا کیا؟
بیٹیاں ،مائیں اور بہنیں تو سب کی سانجھی ہوتی ہیں۔
آج اس قسم کا واقعہ ایک لڑکی کے ساتھ ہوا ہے،جس سے ہمارا خونی رشتہ نہ سہی،مگر انسانیت کا رشتہ تو ہے !
کل کلاں اس قسم کا واقعہ کسی ایسی بچی کے ساتھ ہو سکتا ہے،جو ہماری اپنی ہو،ہوسکتا ہے ہماری رشتہ دار ہو۔
تو آئیے ملکر ایسے گندے انڈوں کے خلاف منظم مہم کا آغاز کریں۔
ایسی حرکت کرنے والے جہاں نظر آئیں،اُن کے ہاتھ روکیں۔ان کو نشان عبرت بنانے کے لئے اداروں سے نہ صرف تعاون کریں بلکہ اجتماعی طور پر ایسا کرنے کے لئے ان اداروں پر دباؤ بڑھائیں۔
اگرہم ایسا نہیں کریں گے تو معاشرہ تباہی کی طرف مزید کھسکتا رہے گا۔
بربادی ہمارے اور قریب آتی جاۓ گی۔
ایسے واقعات کی روک تھام کی بنیادی زمہ داری تو حکومت کی ہوتی ہے۔
مگر بدقسمتی سے کہنا پڑتا ہے کہ بزدار حکومت ان معاملات پر ستو پی کر سوئ ہوئ ہے۔
حکومت کو جاگنا ہو گا،
کیونکہ ایسے واقعات سے عمران خان اور پی ٹی آئ کے نظریے کو نقصان پہنچ رہا ہے۔
اسے حکومت کی ناکامی کے طور پر لیا جا رہا ہے،اور لیا بھی جانا چاہیے۔
ہر چیز،ہر بیماری اور ہر مسئلے کو پچھلی حکومتوں پر ڈال کر جان چھڑا لینے کی روش اب ختم ہونی چاہیے۔
کب تک آپ لوگ ن لیگ اور پیپلز پارٹی کے کرتوتوں کے پیچھے چھپتے رہیں گے۔تین سال بہت ہوتے ہیں۔اپنے بلند و بانگ دعوووں کی کوئ جھلک تو دکھائیں عوام کو۔عوام نے مہنگائ برداشت کر لی مگر آپ معاشرے کے ان بگڑے دگڑ دلوں کو تو نتھ ڈالیں،جنہوں نے بہنوں اور بیٹیوں کا گھروں سے نکلنا محال کر رکھا ہے،اور ہر جگہ دندناتے پھرتے ہیں۔
نئے پاکستان میں پرانے نقائص ختم کئے جائیں ورنہ لوگ پھر پرانے پاکستان ہی میں واپس جانے کو ترجیح دیں گے۔
پولیس ابھی تک عوام کو روایتی طور طریقوں سے ہانکنے کی کوشش کر رہی ہے۔
مگر اب عوام اس قسم کے لولی پاپ سے مطمئن ہوتی نظر نہیں آتی کہ آپ کچھ افسران کو معطل یا ٹرانسفر کر کے لوگوں کی جھوٹ موٹ اشک شوئ کر دیں۔
غفلت برتنے والے اہلکاروں کے لئے یہ کوئ سزا نہیں ہے۔اگر کسی کو اسکی نااہلی اور فرائض سے چشم پوشی کی سزا دینا ہی ہے تو انہیں نوکروں سے برطرف کر کے جیلوں میں ڈالیں۔
مینار پاکستان واقعہ میں کل کچھ افسران کو معطل اور ٹرانسفر کر کے وہی پرانا ڈرامہ دہرایا گیا۔
مگر اس ڈرامے کو پزیرائ نہیں ملی۔
ایسے ہونے والے پے در پے واقعات کا تسلسل سے ہونا،
جہاں صوبائ انتظامیہ کی نااہلی ہے،
وہیں ہماری تقسیم کا بھی نتیجہ ہے۔
اب انہیں واقعات کو لے لیں،
علامہ اقبال گریٹر پارک والے واقعہ میں کچھ لوگ ٹک ٹاک والی متاثرہ لڑکی کے پیچھے پڑ گئے،
کچھ نے اقرار الحسن کو ٹارگٹ کر لیا۔
کچھ ان سینکڑوں افراد کو برا بھلا کہتے رہے،جنہوں نے لڑکی کو زدوکوب کیا،
اور اسے بر ہنہ کر کے اچھالتے رہے۔
جب لوگ اس طرح بٹ جائیں اور راۓ عامہ تقسیم ہو جاۓ تو انتظامی مشینری کو کُشن مل جاتا ہے۔
وہ اسی سپیس کا فائدہ اٹھا کر پتلی گلی سے نکل جاتی ہے کہ لگے رہو تم سب آپس میں،
ہم یہ گئے۔
یہی لمحہ فکریہ ہے ہمارے لئے۔
ہم غلط کو غلط تو کہتے ہیں پر اپنی مرضی کا رنگ دیکر۔
ہم تو یہاں تک سوچتے ہیں کہ کس سائیڈ پہ لکھنے کی وجہ سے ہمیں زیادہ لائیک ملیں گے۔
ضروری نہیں،
جو زیادہ لوگ کہہ رہے ہیں ،
وہی سچ ہو۔
ہمیں خصوصا” سوشل میڈیا پر ان معاشرتی برائیوں پر لائیکس اور ریٹویٹس کے لئے نہیں بلکہ معاشرے سے ان برائیوں کو خاتمے کے لئے لکھنا چاہیے۔
ہو سکتا ہے سچ لکھتے وقت آپ کی تائید میں کم لوگ ہوں۔
اس بات کی پرواہ مت کریں کہ آپ سچ لکھ کر اکیلے ہیں۔
جھوٹ خواہ کتنا بھی زیادہ ہو،مگر جیت ہمیشہ سچ ہی کی ہوتی ہے۔
گزشتہ روز چنگ چی رکشے پر بیٹھی بچیوں کے ساتھ جو کچھ ہوا،
اُس نے صرف میرا ہی نہیں بلکہ ہر زی شعور شخص کاسر شرم سے جھکا دیا۔
میرا بس نہیں چل رہا تھا کہ میں اُس نُطف نا مراد کے خلاف کچھ کر سکوں۔
اتنی غلیظ حرکت وہ بھی سر بازار اور چودہ اگست ہی والے دن۔
مگر میری افسوس اور حیرت کی انتہا اس وقت نہ رہی،جب میں نے کچھ لوگوں کو رکشے میں بیٹھی بچیوں کو اس واقعہ کا مورد الزام یہ کہہ کر ٹھہراتے دیکھا کہ جی ان لڑکیوں کا لباس بھی ٹھیک نہیں تھا؟
حد ہوتی ہے،منفی سوچ کی۔
اور اپنا وکھرا لُچ تلنے کی۔
پہلی تو بات یہ ہے کہ مجھے ان بچیوں کا لباس قطعا” نامناسب نہیں لگا۔
اور اگر اس میں کسی قسم کی کمی بیشی رہ بھی گئی ہو تو کیا ہم آوارہ نسل کے پاگل کتوں کو اجازت دے دیں گے کہ وہ لپک کر ان لڑکیوں کا بوسہ لیں؟
یہ کونسا فلسفہ ہے،
جو ہمیں اس قدر محدود سوچ کی طرف لے کر جا رہاہےکہ ہم ایک چھوٹی سی غلطی کو پکڑ کر بلنڈر کرنے والوں کو ریلیف فراہم کر رہے ہیں۔
خدا کے لئے بس کردیں اپنی پروفیسریاں،
نکلیں ان خود ساختی فتووں سے۔
اور پیچھا کریں معاشرے میں بڑھتے ہوۓ ان درندوں کا۔
ان وحشیوں کا،جو نہ صرف ہماری ماوں،بہنوں اور بیٹیوں کو بھنبوڑ رہے ہیں بلکہ
اسلام اور پاکستان کا نام بدنام کرنے پر بھی تُلے ہوۓ ہیں۔#

تحریر۔سید لعل حسین بُخاری
@lalbukhari