Author: Ayesha Rehmani

امریکی انٹیلیجنس کے اعلیٰ ترین ادارے آفس آف دی ڈائریکٹر آف نیشنل انٹیلیجنس میں بڑے پیمانے پر ملازمین کی برطرفیوں کا سلسلہ شروع ہو گیا ہے-

سی این این کے مطابق ٹرمپ انتظامیہ نے پیر کے روز اس ادارے میں بڑے پیمانے پر کٹوتیوں کا آغاز کیا، اور اطلاعات ہیں کہ ممکنہ طور پر سینکڑوں ملازمین کو برطرفی کے نوٹس دیے جا رہے ہیں،یہ کارروائی صدر ڈونلڈ ٹرمپ کی جانب سے نامزد کیے گئے قائم مقام ڈائریکٹر بل پلٹ کی نگرانی میں کی جا رہی ہے، جن کی تقرری پر کانگریس میں پہلے ہی تنازع موجود رہا ہے کیونکہ ان کا انٹیلیجنس کے شعبے میں کوئی تجربہ نہیں ہے۔

ایک اہلکار نے سی این این کو بتایا کہ ڈیپ اسٹیٹ کی برطرفیاں شروع ہو گئی ہیں”، تاہم ابھی تک برطرف کیے جانے والے افراد کی حتمی تعداد جاری نہیں کی گئی، بل پلٹ نے گزشتہ ہفتے اپنی نئی ذمہ داریاں ایک دن پہلے ہی سنبھال لیں اور مبینہ طور پر دفتر کے تمام ملازمین کی فہرست طلب کی، جس سے سبکدوش ہونے والی ڈائریکٹر تلسی گبارڈ بھی حیران رہ گئیں،ایک اور ذریعے کے مطابق نیشنل کاؤنٹر ٹیررازم سینٹر میں تقریباً 400 ملازمین کی برطرفی کی فہرست تیار کرنے کی ہدایت دی گئی ہے-

ذرائع کے مطابق سب سے زیادہ متاثر ہونے والے ادارے نیشنل کاؤنٹر ٹیررازم سینٹر اور نیشنل کاؤنٹر انٹیلی جنس اینڈ سیکیورٹی سینٹر ہوں گے، سینیٹ اور ایوان نمائندگان کی انٹیلی جنس کمیٹیوں کے ڈیموکریٹ ارکان نے سخت خدشات ظاہر کیے تھے۔ سینیٹر مارک وارنر اور رکن کانگریس جم ہائمز نے خط میں خبردار کیا تھا کہ بڑے پیمانے پر کٹوتیاں قومی سلامتی کے لیے خطرہ بن سکتی ہیں اگرچہ ادارے میں محدود اصلاحات کی گنجائش موجود ہے، لیکن پہلے ہی 2025 میں بڑی کمی کے بعد مزید بڑے پیمانے پر برطرفیاں 9/11 کے بعد قائم کیے گئے اس ادارے کے بنیادی مشن یعنی دہشتگردی کی روک تھام کو متاثر کر سکتی ہیں۔

وائٹ ہاؤس نے اس معاملے پر تبصرہ کرتے ہوئے صدر ڈونلڈ ٹرمپ کے ایک سوشل میڈیا بیان کا حوالہ دیا، جس میں انہوں نے بل پلٹ کو دفتر کی فوری تنظیم نو اور عملے میں کمی کی ہدایت دی تھی جبکہ سابق انٹیلیجنس حکام اور قانون سازوں نے خبردار کیا ہے کہ اس نوعیت کی بڑی کٹوتیاں حکومت کی دہشتگردی کے خطرات کو بروقت شناخت کرنے اور روکنے کی صلاحیت کو متاثر کر سکتی ہیں۔

شدید گرمی کی لہر نے یورپ کے مختلف ممالک کو اپنی لپیٹ میں لے لیا ہے جس کے باعث فرانس میں کم از کم 18 افراد جان کی بازی ہار گئے جن میں ایک گرم گاڑی میں چھوڑے جانے والے 2 کم سن بچے بھی شامل ہیں، جبکہ اسپین، اٹلی اور برطانیہ میں بھی غیر معمولی گرمی کے باعث حکام نے الرٹ جاری کر دیے ہیں۔

منگل کے روز یورپ کے مختلف شہروں میں درجہ حرارت نے گزشتہ ریکارڈ توڑ دیے جبکہ کئی ممالک میں معمولاتِ زندگی متاثر ہوئے فرانس میں شدید گرمی کے باعث متعدد اسکول بند کر دیے گئے یا ان کے اوقاتِ کار میں تبدیلی کر دی گئی، جبکہ برطانیہ کے محکمہ موسمیات نے خبردار کیا ہے کہ رواں ہفتے جون کے مہینے کا تاریخی درجہ حرارت ریکارڈ ٹوٹ سکتا ہے۔

فرانس کے علاقے بورڈو میں درجہ حرارت 41.9 ڈگری سینٹی گریڈ تک پہنچ گیا، جو گزشتہ سال اگست میں قائم ہونے والے ریکارڈ سے زیادہ ہے 80 سے 95 سال عمر کے 3 بزرگ افراد بھی ہفتے کے اختتام پر جان کی بازی ہار گئے، وسطی فرانس کے شہر پوئتیے میں درجہ حرارت 41.2 ڈگری سینٹی گریڈ ریکارڈ کیا گیا، جو 1947 کے بعد سب سے زیادہ ہے فرانس کے دارالحکومت پیرس میں بھی جون کے مہینے کا بلند ترین درجہ حرارت ریکارڈ ہونے کی توقع ہے، جہاں پارہ 38.4 ڈگری سینٹی گریڈ تک پہنچ سکتا ہے-

عالمی موسمیاتی تنظیم (WMO) کی اپریل میں جاری ہونے والی رپورٹ کے مطابق یورپ دنیا کے دیگر خطوں کے مقابلے میں دو گنا سے زیادہ تیزی سے گرم ہو رہا ہے جنوب مشرقی فرانس کے شہر کارپانٹرا کے پراسیکیوٹر کے مطابق 2 اور 4 سال عمر کے 2 بچے اپنے گھر کے باہر کھڑی خاندانی گاڑی میں بے ہوش حالت میں پائے گئے، امدادی اہلکار انہیں بچانے میں ناکام رہے اور دونوں بچوں کی موت واقع ہو گئی۔

فرانسیسی سول سیکیورٹی سروس کے ترجمان جیروم بولانژر نے شہریوں کو خبردار کیا ہے کہ صرف نگرانی والے مقامات پر ہی تیراکی کریں ان کے مطابق اتوار اور پیر کے دوران 13 افراد ڈوب کر ہلاک ہوئے گزشتہ سال بھی گرمی کی شدید لہر کے دوران فرانس میں ڈوبنے سے ہونے والی اموات میں 172 فیصد اضافہ ریکارڈ کیا گیا تھا۔

برطانوی محکمہ موسمیات کے مطابق ملک میں جاری 4 روزہ ہیٹ ویو بعض علاقوں میں درجہ حرارت کو 39 ڈگری سینٹی گریڈ سے بھی اوپر لے جا سکتی ہے، جس سے جون کے مہینے کا 35.6 ڈگری سینٹی گریڈ کا ریکارڈ ٹوٹنے کا امکان ہے، یہ ریکارڈ 1957 اور 1976 میں قائم ہوا تھا۔

ادھر اسپین کے شمالی اور نسبتاً ٹھنڈے شہر سان سیباسٹین میں درجہ حرار ت 40 ڈگری سینٹی گریڈ تک پہنچنے کی پیش گوئی کی گئی، جو اس تاریخ کے تاریخی اوسط درجہ حرارت سے دوگنا سے بھی زیادہ ہے اسپین کے محکمہ موسمیات کے ترجمان روبین ڈیل کامپو کے مطابق ملک کے بیشتر حصوں میں درجہ حرارت معمول سے 5 سے 10 ڈگری سینٹی گریڈ زیادہ ہے، جبکہ بعض شمالی علاقوں میں یہ فرق 10 ڈگری سے بھی تجاوز کر چکا ہے۔

اٹلی نے پیر کے روز ملک کے 12 شہروں میں شدید گرمی کے باعث ریڈ الرٹ جاری کر دیا اطالوی توانائی کمپنی ’ایرن‘ کے مطابق شہر ٹورین میں بجلی کے نظام پر دباؤ بڑھنے کے باعث وقفے وقفے سے بجلی کی بندش کا سامنا ہے، جس سے نمٹنے کے لیے اضافی عملہ اور جنریٹرز تعینات کیے جا رہے ہیں-

ایران کے صدر مسعود پزشکیان نےکہا ہے کہ مذاکرات کی کامیابی کا انحصار دونوں فریقوں(امریکا -ایران) کی جانب سے طے شدہ ذمہ داریوں پر مکمل عمل درآمد اور ان کی درست تکمیل پر ہے۔

صدر مسعود پزشکیان نے سوشل میڈیا پلیٹ فارم ایکس پر جاری اپنے بیان میں کہا کہ معاہدے کے تحت قبول کی گئی ذمہ داریوں پر عملی طور پر عمل کرنا ہی پیش رفت کا حقیقی معیار ہوگا،طے شدہ متن سے ہٹ کر دیے جانے والے بیانات مذاکرات کو آگے بڑھانے میں مددگار ثابت نہیں ہوتے۔

ایرانی صدر نے اگرچہ کسی مخصوص بیان کا نام نہیں لیا، تاہم مبصرین کے مطابق ان کا اشارہ امریکی صدر ڈونلڈ ٹرمپ کے حالیہ بیانات کی جانب ہو سکتا ہے جن پر ایرانی حکام نے اعتراضات اٹھائے ہیں حالیہ دنوں میں صدر ٹرمپ نے دعویٰ کیا تھا کہ ایران جوہری تنصیبات کے معائنے کی اجازت دینے پر آمادہ ہو گیا ہے، ایران کے لیے جاری کیے جانے والے منجمد فنڈز امریکی زرعی مصنوعات کی خریداری پر خرچ کیے جائیں گے۔

مصر کے سابق وزیر خارجہ نبیل فہمی عرب لیگ کے نئے سیکرٹری جنرل مقرر ہوگئے ہیں۔

میڈیا رپورٹس کے مطابق یہ تقرری اُردن کے دارالحکومت اومان میں منعقدہ عرب لیگ کے 165ویں عام اجلاس کے دوران عمل میں آئی،یکم جولائی 2026 سے باضا بطہ طور پر اپنی ذمہ داری سنبھالیں گے،75 سالہ نبیل فہمی یکم جولائی کو پانچ سالہ مدت کے لیے لیگ کے نئے سربراہ کا عہدہ سنبھالیں گے اور سبکدوش ہونے والے سیکریٹری جنرل احمد ابو الغیط کی جگہ لیں گے جنہوں نے مسلسل دو مرتبہ سربراہ کی حیثیت سے خدمات انجام دیں۔

جون 2013 سے جولائی 2014 تک مصر کی وزارت خارجہ کی قیادت کرنے والے تجربہ کار سفارت کار کو مارچ میں متفقہ طور پر 22 رکنی عرب ممالک کا سربراہ نامزد کیا گیا تھا، اس تقرری پر مصری وزارت خارجہ نے ایک بیان میں کہا کہ یہ انتخاب جناب نبیل فہمی کے پاس موجود سفارتی تجربے اور ان کے طویل پیشہ ورانہ کیرئیر کی تعریف کی عکاسی کرتا ہے، جس کے ذریعے انہوں نے علاقائی اور بین الاقوامی میدانوں میں عرب کارروائیوں کی حمایت میں اپنا کردار ادا کیا۔

یاد رہے مصر نے 30 جون کو موجودہ سیکرٹری جنرل احمد ابو الغیظ کی دوسری مدت کے اختتام کے بعد سابق وزیر خارجہ نبیل فہمی کو سیکرٹری جنرل کے عہدے کے لیے باضابطہ طور پر نامزد کیا تھا نبیل فہمی، سابق وزیر خارجہ رہے ہیں، ان کے والد اسماعیل فہمی بھی مصر کے وزیر خارجہ رہ چکے ہیں امریکہ میں مصر کے سفیر اور اقوام متحدہ میں نمائندگی کرچکے ہیں، وہ عرب دنیا کے نمایاں سفارتکاروں میں سے ایک ہیں۔

پاکستان کی میزبانی میں سوئٹزرلینڈ کے شہر برگن اسٹاک میں ہونے والے امریکا ایران امن مذاکرات میں اہم پیشرفت سامنے آئی ہے ایران کے منجمد 12 ارب ڈالر کے اثاثوں کی بحالی کے لیے دستخط ہوگئے ہیں جبکہ ایران اپنے یورینیم کو باہر بھیجنے کے بجائے اس کی افزودگی کی شرح کم کرنے پر راضی ہوگیا ہے جس کے بعد امریکا نے بھی ایران پر عائد پابندیا ں 60 دنوں کے لیے ہٹا دی ہیں،جس کی تصدیق ایرانی پارلیمنٹ کے اسپیکر باقر قالیباف نے بھی کر دی ہے-

باقر قالیباف نے اپنے بیان میں کہا ہے کہ آبنائے ہرمز میں جہازوں کی آمدورفت پر رابطے کا نظام قائم کرنے پر اتفاق کیا گیا ہے اقدام کا مقصد کسی بھی قسم کے تصادم یا کشیدگی سے بچنا ہے سوئٹزرلینڈ مذاکرات کی بنیاد پر لبنان کی علاقائی سالمیت و خودمختاری کی ضمانت دینے پر اتفاق کیا گیا ہے۔

واضح رہے ایرانی مذاکراتی ٹیم کے سربراہ باقر قالیباف اور وزیر خارجہ عباس عراقچی آبنائے ہرمز کے معاملے پر بات چیت کے لیے عمان پہنچ گئے ہیں دوسری جانب امریکی محکمہ خزانہ نے ایران کے لیے ایک اہم جنرل لائسنس جاری کرتے ہوئے محدود مدت کے لیے ایرانی خام تیل اور پیٹرولیم مصنوعات کی فروخت کی اجازت دے دی ہے اس فیصلے کے تحت ایران 21 اگست تک عالمی منڈی میں خام تیل اور دیگر پیٹرولیم مصنوعات کی فروخت جاری رکھ سکے گا تاہم شمالی کوریا ، کیوبا اور یوکرین پر ایرانی تیل خریداری پر پابندی تاحال برقرار ہے۔

کینیڈا میں فائرنگ سے 2 افراد ہلاک ہوگئے، یہ واقعہ دوپہر کے وقت پیش آیا جب علاقے میں مسلح شخص کی موجودگی کی اطلاع ملی اطلاع ملتے ہی پولیس کی بھاری نفری موقع پر پہنچی مشتبہ شخص اور اہلکاروں کے درمیان شدید فائرنگ کا تبادلہ ہوا، ایک شہری بھی ہلاک ہوا۔

غیر ملکی میڈیا کے مطابق کینیڈا کے شہر مانٹریال میں فائرنگ کا افسوسناک واقعہ پیش آیا جس کے نتیجے میں 2 افراد ہلاک اور ایک شخص زخمی ہوگیا،پولیس کی جوابی کارروائی میں مشتبہ حملہ آور بھی مارا گیا،ہلاک ہونے والوں میں ایک 34 سالہ پولیس اہلکار بھی شامل ہے 2021 سے فورس میں اپنی خدمات انجام دے رہا تھا جب کہ شہری کی شناخت مائیکل میزراہی کے نام سے ہوئی ہے فائرنگ کا واقعہ یہودی بستی میں پیش آیا، تاہم تاحال اس بات کے شواہد نہیں ملے کہ حملہ مذہبی بنیادوں پر کیا گیا تھا یا کسی مخصوص کمیونٹی کو نشانہ بنایا گیا تھا۔

حکام نے شہریوں سے اپیل کی ہے کہ غیر مصدقہ اطلاعات اور افواہوں سے گریز کریں کیونکہ حملے کے محرک کا تعین ابھی نہیں ہو سکا مونٹریال پولیس کے مطابق حملہ آور کی شناخت، اس کے پس منظر، اسلحے کے ذرائع اور حملے کے مقصد سمیت تمام پہلوؤں کی تفتیش جاری ہےجیسے ہی مزید مصدقہ معلومات دستیاب ہوں گی، انہیں عوام کے ساتھ شیئر کیا جائے گا۔