Author: ممتاز حیدر

پونے، ایک حیران کن اور افسوسناک واقعے میں 25 سالہ خاتون اور اس کے 17 سالہ بھتیجے نے خاندانی مخالفت کے بعد مبینہ طور پر زہر کھا لیا، جس کے باعث دونوں کی حالت تشویشناک ہو گئی ہے۔

میڈیا رپورٹس کے مطابق خاتون کی شادی گزشتہ سال ہوئی تھی، تاہم کچھ ہی عرصے بعد اس کا شوہر ملازمت کے سلسلے میں پونے چلا گیا۔ اسی دوران خاتون اور اس کے نابالغ بھتیجے کے درمیان قربتیں بڑھتی گئیں اور دونوں ایک دوسرے کے قریب آ گئے۔ذرائع کا کہنا ہے کہ یہ تعلق کئی ماہ تک خفیہ طور پر جاری رہا، لیکن جب اہل خانہ کو اس بارے میں علم ہوا تو شدید ردعمل سامنے آیا۔ خاندان نے اس رشتے کی سخت مخالفت کی اور صورتحال کشیدہ ہو گئی۔اطلاعات کے مطابق اہل خانہ نے فوری طور پر خاتون کے شوہر کو واپس بلا لیا، جس کے بعد گھر میں تنازع مزید بڑھ گیا۔ مبینہ طور پر سماجی دباؤ اور بدنامی کے خوف سے خاتون نے چوہے مار دوا کھا کر خودکشی کی کوشش کی۔ جب بھتیجے کو اس کی اطلاع ملی تو اس نے بھی وہی قدم اٹھایا۔

دونوں کی حالت بگڑنے پر انہیں فوری طور پر اسپتال منتقل کیا گیا، جہاں ایمرجنسی وارڈ میں ان کا علاج جاری ہے۔ ڈاکٹروں کے مطابق دونوں کی حالت نازک بتائی جا رہی ہے۔پولیس نے واقعے کا نوٹس لیتے ہوئے تحقیقات شروع کر دی ہیں اور اہل خانہ سے پوچھ گچھ جاری ہے۔ دوسری جانب مقامی افراد اس واقعے پر شدید حیرت اور افسوس کا اظہار کر رہے ہیں، جبکہ معاشرتی سطح پر بھی اس معاملے پر مختلف آراء سامنے آ رہی ہیں۔

بھارتی ریاست اتر پردیش کے ضلع اٹاوہ میں ایک شادی کی خوشیاں اس وقت ختم ہو گئیں جب دلہن نے عین اسٹیج پر شادی سے انکار کر دیا۔ واقعہ ویہوا علاقے کے ایک گیسٹ ہاؤس میں پیش آیا جہاں ہر طرف جشن کا سماں تھا، مگر چند لمحوں میں صورتحال یکسر بدل گئی۔

تفصیلات کے مطابق شادی کی تقریب پورے جوش و خروش سے جاری تھی۔ دولہا اور دلہن اسٹیج پر موجود تھے اور ایک دوسرے کو ورمالا پہنانے ہی والے تھے کہ اسی دوران دلہن کی نوئیڈا سے آئی ایک سہیلی اس کے قریب پہنچی اور اس کے کان میں کچھ کہا۔ سہیلی کی بات سنتے ہی دلہن کے چہرے کے تاثرات بدل گئے اور اس نے سب کے سامنے شادی سے انکار کر دیا۔عینی شاہدین کے مطابق دلہن نے نہ صرف ورمالا اسٹیج پر چھوڑ دی بلکہ فوراً نیچے اتر کر وہاں سے چلی گئی۔ دولہا اور اس کے اہلخانہ اس اچانک فیصلے پر حیران رہ گئے۔ دولہا بار بار وجہ پوچھتا رہا اور یہاں تک کہا کہ اس نے جہیز کا کوئی مطالبہ بھی نہیں کیا، مگر دلہن نے خاموشی اختیار کیے رکھی۔

دلہن کے والد اور دیگر رشتہ داروں نے اسے کافی دیر تک منانے کی کوشش کی، تاہم وہ اپنے فیصلے پر قائم رہی۔ دلہن کے والد نے الزام عائد کیا کہ نوئیڈا سے آئی سہیلی نے ان کی بیٹی کو ورغلا کر یہ قدم اٹھانے پر مجبور کیا۔واقعے کے بعد شادی کا ماحول بدل گیا اور آخرکار دولہا کو بغیر دلہن کے ہی بارات واپس لے جانی پڑی۔ بڑھتے ہوئے ہنگامے کے باعث معاملہ پولیس تک جا پہنچا، جہاں دلہن نے واضح مؤقف اختیار کیا کہ وہ نہ صرف شادی نہیں کرے گی بلکہ اپنے والدین کے ساتھ بھی رہنا نہیں چاہتی اور اپنی سہیلی کے ساتھ جانے پر بضد ہے۔

تہران: ایران نے دعویٰ کیا ہے کہ وہ مقامی سطح پر ایک ہزار سے زائد اقسام کے جدید ہتھیار تیار کر رہا ہے، جن میں میزائل، ڈرونز اور دیگر جدید عسکری نظام شامل ہیں، جبکہ اس کی میزائل صلاحیت کا ایک بڑا حصہ تاحال استعمال میں نہیں لایا گیا۔

ایرانی میڈیا رپورٹس کے مطابق وزارتِ دفاع کے ترجمان بریگیڈیئر جنرل رضا طلائی نِک کا کہنا ہےکہ ملک کی دفاعی اور جوابی صلاحیتیں انتہائی بلند سطح پر موجود ہیں۔ انہوں نے بتایا کہ 7 اپریل تک امریکا اور اسرائیل کے ساتھ کشیدگی کے دوران بھی ایرانی مسلح افواج نے اپنی طاقت کا بھرپور مظاہرہ کیا۔ترجمان کے مطابق کارروائیوں کے دوران ایرانی افواج نے مقبوضہ علاقوں کی فضائی حدود میں برتری برقرار رکھی، جو ان کے بقول دفاعی حکمت عملی کی کامیابی کا ثبوت ہے۔بریگیڈیئر جنرل رضا طلائی نِک نے اس بات پر زور دیا کہ ایران میں تیار ہونے والے تمام ہتھیار مکمل طور پر مقامی سطح پر تیار کیے جاتے ہیں، جو ملک کی دفاعی خود کفالت کی عکاسی کرتے ہیں۔ انہوں نے کہا کہ اس وقت ایک ہزار سے زائد اقسام کے ہتھیار ملک کے اندر تیار کیے جا رہے ہیں، جو گزشتہ 25 سال سے جاری سرمایہ کاری کا نتیجہ ہیں۔

انہوں نے مزید بتایا کہ دفاعی پیداوار کو ملک کے مختلف علاقوں میں پھیلایا گیا ہے تاکہ کسی بھی ممکنہ حملے یا نقصان کی صورت میں پیداوار کا عمل متاثر نہ ہو۔ترجمان کے مطابق تقریباً 9 ہزار کمپنیاں دفاعی صنعت کے ساتھ منسلک ہیں، جو اس شعبے کی وسعت اور خود انحصاری کو ظاہر کرتی ہیں۔آبنائے ہرمز کے حوالے سے گفتگو کرتے ہوئے انہوں نے کہا کہ ایران کے اقدامات خطے میں اسٹریٹجک کنٹرول کو مضبوط بنانے کا ذریعہ ہیں، جبکہ خلیج عمان میں متعدد مواقع پر مخالف قوتوں کو پسپائی اختیار کرنا پڑی۔انہوں نے ملک بھر میں ہونے والے عوامی اجتماعات کو سراہتے ہوئے اسے “سماجی معجزہ” قرار دیا اور دعویٰ کیا کہ 3 کروڑ سے زائد افراد قومی دفاعی مہم میں شمولیت کے لیے رجسٹر ہو چکے ہیں، جو ان کے مطابق عالمی سطح پر ایک غیر معمولی مثال ہے۔

امریکی فوج نے آبنائے ہرمز میں ایک اور ایرانی پرچم بردار بحری جہاز کو روک لیا۔

امریکی سینٹرل کمان کے مطابق ایرانی پرچم والے ایک اور بحری جہاز کو روک لیا ہے۔رپورٹ کے مطابق امریکی فوج نے ایرانی جہاز کو ناکہ بندی کی خلاف ورزی پر روکا ہے۔مشرقِ وسطیٰ میں جاری کشیدگی کے دوران سوشل میڈیا پلیٹ فارم X پر ایک تصویر سامنے آئی ہے جس میں ایک امریکی جنگی جہاز کو آبنائے ہرمز کے قریب ایک بحری جہاز کو روکنے کی کوشش کرتے ہوئے دکھایا گیا ہے۔امریکی سینٹرل کمانڈ نے اس تصویر کو شیئر کرتے ہوئے دعویٰ کیا ہے کہ مذکورہ جہاز ایرانی پرچم بردار تھا اور اسے امریکی ناکہ بندی کے تحت روکا جا رہا تھا۔

رپورٹس کے مطابق جنگ کے آغاز کو آٹھ ہفتے گزر چکے ہیں اور ایران نے اپنی حدود میں تقریباً تمام غیر ملکی جہازوں کی آمدورفت روک رکھی ہے، جبکہ صرف ایرانی جہازوں کو گزرنے کی اجازت دی جا رہی ہے۔ایران کا مؤقف ہے کہ جب تک امریکہ اپنی عائد کردہ ناکہ بندی ختم نہیں کرتا، تب تک آبنائے ہرمز کو دوبارہ کھولنے کا کوئی امکان نہیں۔ دوسری جانب ماہرین خبردار کر رہے ہیں کہ اس صورتحال سے عالمی توانائی منڈی اور تیل کی قیمتوں پر سنگین اثرات مرتب ہو سکتے ہیں۔