Author: ممتاز حیدر

پاکستان کے دارالحکومت اسلام آباد میں امریکا اور ایران کے درمیان مجوزہ امن مذاکرات سے قبل سکیورٹی کو ہائی الرٹ کر دیا گیا ہے۔ وزارتِ داخلہ کے مطابق یہ اقدامات ایران اور امریکا ،اسرائیل جنگ میں دو ہفتوں کی جنگ بندی کے بعد کیے گئے ہیں، جس کا اعلان بدھ کے روز سامنے آیا تھا۔

ایران کی جانب سے جنگ کے ممکنہ حل کے لیے 10 نکاتی تجویز بھی جاری کی گئی ہے، جس میں آبنائے ہرمز پر کنٹرول برقرار رکھنے، جوہری افزودگی کے حق کو تسلیم کرنے، اقتصادی پابندیاں ختم کرنے اور خطے میں جنگ کے خاتمے جیسے نکات شامل ہیں۔ ایران نے لبنان میں حزب اللہ کے خلاف جاری کارروائیوں کو بھی معاہدے کا حصہ قرار دیا ہے، جبکہ امریکا اور اسرائیل کا مؤقف ہے کہ حالیہ جنگ بندی میں لبنان شامل نہیں۔

پاکستان، جس نے اس بحران میں ثالث کا کردار ادا کیا، کے مطابق لبنان بھی اس معاہدے کا حصہ ہے۔ حکام کے مطابق مذاکرات کا پہلا دور ہفتہ کے روز اسلام آباد میں متوقع ہے، جس کے لیے شہر بھر میں سکیورٹی کے سخت انتظامات کیے گئے ہیں اور حساس مقامات پر اضافی نفری تعینات کر دی گئی ہے۔وفاقی وزیر داخلہ محسن نقوی نے سکیورٹی انتظامات کا جائزہ لینے کے بعد کہا کہ اسلام آباد میں ان اہم مذاکرات کا انعقاد پاکستان کے لیے اعزاز ہے۔ ان کے مطابق ریڈ زون، جہاں اہم سرکاری اور سفارتی دفاتر واقع ہیں، کو مکمل طور پر سیل کر دیا جائے گا اور صرف متعلقہ افراد کو داخلے کی اجازت ہوگی، جبکہ وزارت داخلہ میں ایک خصوصی کنٹرول روم بھی قائم کر دیا گیا ہے۔

سرکاری میڈیا کے مطابق امریکی وفد کی قیادت نائب صدر جے ڈی وینس کریں گے، جبکہ وفد میں سینئر شخصیات اسٹیو وٹکوف اور جیراڈ کشنر بھی شامل ہوں گے۔ایرانی وفد کی قیادت اسپیکر پارلیمنٹ محمد باقر قالیباف اور وزیر خارجہ عباس عراقچی کریں گے۔پاکستانی قیادت، جس میں وزیر اعظم شہباز شریف، وزیر خارجہ اسحاق ڈار اور فیلڈ مارشل،چیف آف آرمی اسٹاف عاصم منیر شامل ہیں، کی سفارتی کوششوں کے باعث پاکستان اس بحران میں اہم ثالث کے طور پر ابھرا ہے۔

امریکا اور ایران کے درمیان جنگ بندی کے اعلان کے باوجود آبنائے ہرمز میں بحری آمد و رفت تاحال انتہائی محدود ہے، جس کے باعث عالمی سطح پر توانائی بحران کے خدشات کم ہونے کے بجائے برقرار ہیں۔

شپ ٹریکنگ ڈیٹا کے مطابق جنگ بندی کے بعد بھی اس اہم آبی گزرگاہ سے صرف چند جہاز ہی گزر سکے ہیں۔ بدھ کے روز 5 جہازوں نے آبنائے ہرمز عبور کی، جبکہ جمعرات کو یہ تعداد صرف 7 رہی، جو معمول سے کہیں کم ہے۔مارکیٹ انٹیلی جنس فرم کے مطابق صورتِ حال بدستور غیر یقینی ہے اور جہاز مالکان محتاط حکمت عملی اپنائے ہوئے ہیں۔ اندازہ لگایا جا رہا ہے کہ اگر جنگ بندی برقرار بھی رہتی ہے تو یومیہ صرف 10 سے 15 جہازوں کی محدود آمد و رفت ممکن ہو سکے گی۔رپورٹس کے مطابق خلیجی پانیوں میں 600 سے زائد جہاز پھنسے ہوئے ہیں، جن میں 325 آئل ٹینکرز بھی شامل ہیں، جس سے عالمی سپلائی چین پر دباؤ بڑھ رہا ہے۔

یاد رہے کہ آبنائے ہرمز دنیا بھر میں تیل اور ایل این جی کی ترسیل کے لیے انتہائی اہم گزرگاہ ہے، جہاں سے عالمی توانائی کا تقریباً پانچواں حصہ گزرتا ہے، اور عام حالات میں روزانہ 120 سے 140 جہاز اس راستے کو استعمال کرتے ہیں۔امریکی صدر نے ایران پر الزام عائد کیا ہے کہ وہ جنگ بندی معاہدے کی پاسداری نہیں کر رہا اور جہازوں کو محفوظ راستہ فراہم کرنے میں ناکام ہے۔ انہوں نے سوشل میڈیا پر جاری بیان میں کہا کہ ایران تیل کی ترسیل کی اجازت دینے میں رکاوٹ بن رہا ہے۔دوسری جانب ایرانی وزیر خارجہ نے امریکا پر معاہدے کی خلاف ورزی کا الزام لگاتے ہوئے کہا ہے کہ واشنگٹن کو جنگ بندی برقرار رکھنے یا مزید کشیدگی بڑھانے میں سے ایک راستہ اختیار کرنا ہوگا۔

ادھر متحدہ عرب امارات کی سرکاری آئل کمپنی کے سربراہ سلطان احمد الجابر نے واضح کیا ہے کہ آبنائے ہرمز مکمل طور پر کھلی نہیں بلکہ اس تک رسائی محدود اور مشروط ہے، جو آزادانہ بحری آمد و رفت کے اصولوں کے منافی ہے۔جنگ بندی کے اعلان کے بعد عالمی منڈی میں تیل کی قیمتوں میں عارضی کمی دیکھی گئی تھی، تاہم موجودہ غیر یقینی صورتحال کے باعث قیمتیں ایک بار پھر بڑھنے لگی ہیں، جس سے عالمی معیشت پر مزید دباؤ کا خدشہ پیدا ہو گیا ہے۔

شاندار سفارتکاری کے باعث عالمی سطح پر پاکستان کی پذیرائی سے ، بھارت میں صف ماتم بچھ گئی ۔ پاکستان کی ثالثی سے امن کی جیت پرانتہائی تذبذب، مایوسی اور حیرت کا شکارگودی بھارتی میڈیا سیخ پا ہے۔

سنگا پور کے جریدہ دی اسٹریٹ ٹائمز نے بھی بھارت میں مودی کی پسپائی پر جاری کڑی تنقید کو آشکار کر دیا ۔ بھارتی سیاستدان اور مصنف سنجےجاہ نے مودی حکومت کو آڑے ہاتھوں لیتے ہوئے کہاکہ مودی حکومت شدید ناکامی کا شکار ہےجبکہ پاکستان دنیا کو تباہ کن خطرات سے نکالنے میں کامیاب ہوا ہے۔بھارتی سیاستدان ششی تھرور نے کہا ہے کہ پاکستان مرکزی حیثیت اختیار کر کے دنیا کیلئے نیٹ سیکیورٹی پرووائیڈر بن چکا ہے۔بھارتی دفاعی تجزیہ کار یشپال سنگھ کا کہنا ہے کہ امریکہ اور ایران کے وفد اسلام آباد آئیں گے اور پاکستان انہیں بٹھا کر ثالثی کرائے گا۔بھارتی جریدہ ہندوستان ٹائمز کیساتھ دیگر بھارتی میڈیا چینلز نے بھی نام نہاد وشو گرو کے دعویدار مودی سرکار کی قلعی کھول دی ۔بھارتی اپوزیشن راہول گاندھی سمیت دیگر رہنماؤں نے مودی کی ڈپلومیسی کو تصویری، مذاق ، ناکام اور کمزور قرار دے دیاہے۔ماہرین کے مطابق تصویری نمائش اور کھوکھلے دعوؤں پر بنا نام نہاد وشوگرو بھارت انتہاءپسندانہ پالیسیوں کے باعث عالمی سطح پر تنہائی کا شکار ہو چکا ہے۔

سعودی سرکاری نیوز ایجنسی نے بتایاکہ حالیہ حملوں کے باعث ملک کے کئی توانائی منصوبے متاثر ہوئے ، حملوں سے تیل اور گیس کی پیداوار اور ترسیل میں نمایاں کمی آئی ہے۔

سعودی نیوز ایجنسی کے مطابق ایک تیل پمپنگ اسٹیشن پر حملے سے 7 لاکھ بیرل یومیہ ترسیل متاثر ہوئی، منیفہ اور خریص آئل فیلڈز پر حملوں سے پیداوار یومیہ 3 لاکھ بیرل کم ہوئی، سعودی عرب کی تیل پیداواری صلاحیت میں یومیہ 6 لاکھ بیرل کمی ہوئی،رپورٹ میں بتایاگیا کہ جبیل میں سٹورپ، راس تنورہ، ینبع میں سامرف اور ریاض ریفائنری جیسے بڑے پلانٹس بھی متاثر ہوئے اور پلانٹس متاثر ہونے سے عالمی منڈی کو تیل کی سپلائی متاثر ہو رہی ہے،سعودی میڈیا کے مطابق جُعیمہ کے پروسیسنگ پلانٹس میں آگ لگنے سے ایل پی جی کی برآمدات متاثر ہوئیں، ان حملوں میں ایک سکیورٹی اہلکار جاں بحق جبکہ 7 سعودی شہری زخمی ہوئے، اگر یہ حملے جاری رہے تو عالمی تیل کی سپلائی مزید متاثر ہوگی۔