Author: ممتاز حیدر

اسلام آباد یونین آف جرنلسٹس (آئی یو جے) کے نو منتخب عہدیداران کی حلف برداری کی پروقار تقریب کا انعقاد اسلام آباد ہوٹل میں کیا گیا، جس میں سینئر صحافیوں، تجزیہ کاروں، مختلف میڈیا ہاؤسز کے نمائندگان اور صحافتی تنظیموں کے عہدیداران کی بڑی تعداد نے شرکت کی۔

تقریب کے مہمان خصوصی ممتاز سینئر صحافی اور تجزیہ کار خوشنود علی خان تھے، تقریب کے دوران چیئرمین شاہنواز خان نے اپنے عہدے کا حلف ممتاز سینئر صحافی و تجزیہ کار خوشنود علی خان سے لیا۔ بعد ازاں چیئرمین شاہنواز خان نے دیگر عہدیداران سے ان کے عہدوں کا حلف لیا، جبکہ ایگزیکٹو ممبران سے حلف شمشاد مانگٹ نے لیا۔نو منتخب عہدیداران میں صدر عامر چوہدری،نائب صدور فیاض تنولی، ملک ظفر، عباس احمد، منصور قریشی،نائب صدر خواتین فائزہ یونس،جنرل سیکرٹری سردار سجاد طارق،ڈپٹی جنرل سیکرٹری راشد عباسی،ڈپٹی جنرل سیکرٹری خواتین سلمی ملک،جوائنٹ سیکرٹری ملک نجیب،ڈپٹی جوائنٹ سیکرٹریز واجد عباسی، وقار عباسی،انفارمیشن سیکرٹری محمد عادل خان،ڈپٹی انفارمیشن سیکرٹری چوہدری عابد حسین،ڈپٹی انفارمیشن سیکرٹری خواتین نبیلہ حفیظ،ایڈیشنل جنرل سیکرٹری راجہ نعمان،فنانس سیکرٹری راشد اشرف،ڈپٹی فنانس سیکرٹری سردار تنویر عابد،ایڈیشنل انفارمیشن سیکرٹریز عبدالرزاق، قاسم جمشید، عمران قادر،آفس سیکرٹری قاسم منیر،لیگل سیکرٹری ملک سیف ایڈووکیٹ،پریس سیکرٹری ملک احتشام فاروق شامل تھے جبکہ گورننگ باڈی میں شیر دل خان، فاروق خان، راجہ ارسلان، راجہ خلیل جنجوعہ، رجب علی، شیخ طیب، وقاص کھوکھر، عثمان عباسی، چوہدری عبد الرحمان، ملک نوید آصف، عمر فاروق چوہدری، سید ایم فیضان علی شاہ، کامران کھوکھر، ایم سلیم، بلال احمد ملک، راجہ جمیل، امجد کیانی، عمران عمار، ولید خان شلمانی، ملک اختر شامل تھے۔

اس موقع پر خطاب کرتے ہوئے چیئرمین شاہنواز خان نے کہا کہ اسلام آباد یونین آف جرنلسٹس صحافیوں کے حقوق کے تحفظ، آزادیٔ صحافت کے فروغ اور فلاح و بہبود کے لیے ہر ممکن کردار ادا کرے گی۔ انہوں نے اس عزم کا اظہار کیا کہ تنظیم کسی بھی صحافی کو مشکل وقت میں تنہا نہیں چھوڑے گی اور قانونی و پیشہ ورانہ معاونت فراہم کی جائے گی۔
صدر عامر چوہدری نے کہا کہ صحافی معاشرے کی رہنمائی کا اہم فریضہ انجام دیتے ہیں، اس لیے صحافیوں کے اتحاد، تحفظ اور وقار کو یقینی بنانا وقت کی اہم ضرورت ہے۔دیگر عہدیداران نے بھی اس عزم کا اعادہ کیا کہ وہ صحافیوں کے شانہ بشانہ کھڑے رہیں گے، تنظیم کو مضبوط اور فعال پلیٹ فارم بنائیں گے اور صحافتی مسائل کے حل کے لیے بھرپور جدوجہد کریں گے۔

تقریب کے اختتام پر ملکی سلامتی، آزادیٔ صحافت، صحافیوں کی فلاح و بہبود اور تنظیم کی ترقی کے لیے خصوصی دعا کی گئی۔ شرکاء نے امید ظاہر کی کہ آئی یو جے کی نئی قیادت صحافتی برادری کو اتحاد، طاقت اور بہتر مستقبل فراہم کرے گی

اسلام آباد: نیشنل الیکٹرک پاور ریگولیٹری اتھارٹی (نیپرا) نے گھریلو صارفین کے لیے بجلی کے بلوں میں فکسڈ چارجز کے نفاذ سے متعلق اہم فیصلہ جاری کر دیا ہے، جس کے تحت اب 300 یونٹ ماہانہ تک بجلی استعمال کرنے والے صارفین پر بھی فکسڈ چارجز عائد ہوں گے۔

نیپرا کی جانب سے یہ فیصلہ پاور ڈویژن کی درخواست پر جاری کیا گیا۔ اس سے قبل فکسڈ چارجز صرف 300 یونٹ سے زائد بجلی استعمال کرنے والے نان پروٹیکٹڈ صارفین پر لاگو تھے، تاہم نئے فیصلے کے بعد پروٹیکٹڈ اور نان پروٹیکٹڈ دونوں اقسام کے صارفین اس دائرہ کار میں آ گئے ہیں۔نیپرا فیصلے کے مطابق ماہانہ 100 یونٹ تک بجلی استعمال کرنے والے پروٹیکٹڈ صارفین پر 200 روپے ماہانہ فکسڈ چارجز عائد کیے گئے ہیں۔ماہانہ 200 یونٹ تک بجلی استعمال کرنے والے پروٹیکٹڈ گھریلو صارفین پر 300 روپے ماہانہ فکسڈ چارجز مقرر کیے گئے ہیں۔

نان پروٹیکٹڈ صارفین کے لیے فکسڈ چارجز کی نئی شرحیں درج ذیل ہیں،100 یونٹ تک استعمال پر 275 روپے ماہانہ فکسڈ چارجز،200 یونٹ تک استعمال پر 300 روپے فکسڈ چارجز،300 یونٹ تک استعمال پر 350 روپے فکسڈ چارجز ہوں گےمزید برآں 301 سے 400 یونٹ تک استعمال کرنے والے نان پروٹیکٹڈ صارفین کے فکسڈ چارجز میں 200 روپے اضافہ کر کے 400 روپے مقرر کر دیے گئے ہیں۔401 سے 500 یونٹ تک استعمال پر 100 روپے اضافے کے بعد فکسڈ چارجز 500 روپے مقرر کیے گئے ہیں۔600 یونٹ ماہانہ استعمال پر فکسڈ چارجز میں 75 روپے اضافہ کر کے 675 روپے کر دیے گئے ہیں۔700 یونٹ تک استعمال کرنے والوں کے لیے 125 روپے کمی کے بعد فکسڈ چارجز 675 روپے مقرر کیے گئے ہیں۔700 یونٹ سے زائد بجلی استعمال کرنے والے صارفین کے لیے 325 روپے کمی کے بعد فکسڈ چارجز 675 روپے مقرر کیے گئے ہیں۔

توانائی ماہرین کے مطابق فکسڈ چارجز کے نفاذ کا مقصد بجلی کی تقسیم کار کمپنیوں کی مالی حالت بہتر بنانا اور ریونیو میں استحکام لانا ہے، تاہم اس فیصلے سے کم اور متوسط آمدنی والے صارفین پر اضافی بوجھ پڑنے کا امکان ہے۔صارفین تنظیموں کی جانب سے خدشہ ظاہر کیا جا رہا ہے کہ بجلی کے بنیادی ٹیرف کے علاوہ فکسڈ چارجز میں اضافے سے مجموعی بلوں میں نمایاں اضافہ ہوگا، جس سے مہنگائی کے موجودہ دور میں عوام کی مشکلات مزید بڑھ سکتی ہیں۔نیپرا کی جانب سے جاری کردہ فیصلہ آئندہ بلنگ سائیکل سے نافذ العمل ہوگا، جس کے بعد صارفین کو اپنے ماہانہ بلوں میں نئی شرحوں کے مطابق فکسڈ چارجز ادا کرنا ہوں گے۔

پیپلز پارٹی کی سیکرٹری اطلاعات ،رکن قومی اسمبلی شازیہ مری نے کہا ہے کہ پاکستان پیپلز پارٹی ہمیشہ عوامی مسائل کی آواز بلند کرتی آئی ہے۔ حکومتی بینچز پر موجود ہونے کے باوجود ہم عوام دشمن فیصلوں کا حصہ نہیں بنتے،آج بجلی اور نیٹ میٹرنگ سے متعلق فیصلوں نے نہ صرف ماضی کی غلطیوں کا بوجھ عوام پر ڈالا بلکہ موجودہ اور مستقبل کے صارفین کی حوصلہ شکنی بھی کی ہے،

میڈیا سے گفتگو کرتے ہوئے شازیہ مری کا کہنا تھا کہ عوام معاشی بدحالی کا شکار ہیں، روزگار کے موقع تلاش کر رہے ہیں کھانے کے لالے پڑے ہیں، حکومت کو ایسے وقت میں بھی کوئی احساس نہیں، حکومت اپنی‌صفوں میں وہ لوگ تلاش کرے جو اسے کمزور کر رہے ہیں، پیپلز پارٹی عوام کے ساتھ کھڑی ہے، وزیراعظم کو نوٹس لینا چاہیئے.ایسی پالیسی سے پہلے کیوں نہیں بات کی جاتی ،اعتماد میں لیا جاتا،

اسلام آباد ہائیکورٹ نے 16 سال سے کم عمر بچوں کے سوشل میڈیا استعمال میں نقصانات روکنے کے حوالے سے اقدامات سے متعلق جواب طلب کر لیا۔

اسلام آباد ہائیکورٹ نے کم عمر بچے شنواری کی والد کے ذریعے دائر درخواست پر تحریری حکم جاری کرتے ہوئے کہا درخواست گزار کے مطابق عمر بچوں کے سوشل میڈیا استعمال سے متعلق دنیا بھر میں قوانین بنے ہیں،جسٹس ارباب محمد طاہر نے دو صفحات پر مشتمل حکم نامہ جاری کرتے ہوئے وفاقی حکومت سے کہا ہے کہ 3 مارچ تک جواب جمع کرائے کہ 16 سال سے کم عمر بچوں کے سوشل میڈیا استعمال کرنے کے نقصانات روکنے کے حوالے سے کیا اقدامات کیے گئے، سوشل میڈیا ریگولیٹری اتھارٹی کے قیام سے متعلق بھی پیشرفت سے بھی آگاہ کیا جائے۔

اسلام آباد ہائیکورٹ نے وزارت انفارمیشن ٹیکنالوجی، پی ٹی اے اور پیمرا کو پیرا وائز کمنٹس دینے کا حکم دیتے ہوئے کہا ہے کہ سوشل میڈیا ریگولیشن، مانیٹرنگ اور پیکا کی حالیہ ترامیم پر عملدرآمد کی رپورٹ دیں،عدالتی حکمنامے میں کہا گیا ہے بتایا جائے کہ کم عمر بچوں کے سوشل میڈیا استعمال سے متعلق کیا ریگولیٹری فریم ورک بنایا گیا، بچوں کی (سوشل میڈیااستعمال) عمر کے جائزے کے مکینزم پر اقدامات سےبھی آگاہ کریں،ہائیکورٹ نے کہا ہے کہ بچوں کو آن لائن نقصانات کے اثرات سے تحفظ فراہم کرنا اہمیت کا حامل ہے، بچوں کے تحفظ کے حوالے سے آئینی مینڈیٹ کے حوالے سے بھی آگاہ کریں، بغیر ریگولیشن کے سوشل میڈیا کا استعمال بچوں کے لیے خطرناک ہے،عدالت کا کہنا ہے کہ بغیر ریگولیشن بچوں کے سوشل میڈیا استعمال سے ذہنی امراض کے مسائل ہیں، بغیر ریگولیشن بچوں کے سوشل میڈیا استعمال پر پرائیویسی کی خلاف ورزی کا مسئلہ ہے۔