خیبرپختونخوا کے ضلع بنوں میں پولیس اور دہشت گردوں کے درمیان ہونے والے شدید فائرنگ کے تبادلے میں 3 دہشت گرد ہلاک جبکہ 9 زخمی ہو گئے، جبکہ دو پولیس اہلکار بھی معمولی زخمی ہوئے ہیں۔
ڈی آئی جی بنوں ریجن سجاد خان کے مطابق دہشت گردوں نے رات گئے اچانک پولیس اسٹیشن احمدزالی اور پولیس چوکی فتح خیل پر حملے کیے۔ حملہ آوروں نے خودکار ہتھیاروں سے اندھا دھند فائرنگ کی، جس کے بعد پولیس نے فوری طور پر جوابی کارروائی کرتے ہوئے بھرپور مزاحمت کی۔ڈی آئی جی سجاد خان کا کہنا تھا کہ پولیس کی بروقت اور مؤثر کارروائی کے نتیجے میں دہشت گردوں کو بھاری نقصان اٹھانا پڑا۔ فائرنگ کے تبادلے میں 3 دہشت گرد موقع پر ہلاک جبکہ 9 زخمی ہو گئے۔ زخمی دہشت گردوں کے فرار ہونے کی اطلاعات ہیں، جن کی تلاش کے لیے علاقے میں سرچ آپریشن شروع کر دیا گیا ہے۔انہوں نے مزید بتایا کہ دہشت گردوں کی فائرنگ سے دو پولیس اہلکار معمولی زخمی ہوئے جنہیں فوری طور پر قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے اور ان کی حالت خطرے سے باہر بتائی جا رہی ہے۔
واقعے کے بعد سیکیورٹی فورسز اور پولیس کی اضافی نفری علاقے میں طلب کر لی گئی ہے جبکہ حساس تنصیبات اور تھانوں کی سیکیورٹی مزید سخت کر دی گئی ہے۔ داخلی و خارجی راستوں پر ناکہ بندیاں کر کے مشکوک افراد کی تلاشی کا عمل بھی جاری ہے،پولیس حکام کا کہنا ہے کہ علاقے میں مکمل امن و امان کی بحالی تک سرچ اور کلیئرنس آپریشن جاری رکھا جائے گا، جبکہ حملے میں ملوث عناصر اور ان کے سہولت کاروں کے خلاف بھی کارروائی عمل میں لائی جائے گی۔
