Author: ممتاز حیدر

تہران: ایران کے دارالحکومت میں واقع ایک صدی پرانے اور اہم طبی و تحقیقی ادارے پر امریکی و اسرائیلی حملے کی خبر سامنے آئی ہے،

ایرانی وزارتِ صحت کے ترجمان حسین کرمانپور نے تصدیق کی ہے کہ مشرقِ وسطیٰ کے قدیم ترین اور نمایاں صحت و تحقیقی مراکز میں شمار ہونے والے پاسچر انسٹی ٹیوٹ آف ایران کو نشانہ بنایا گیا۔ اس ادارے کو عالمی صحت کے شعبے میں ایک مضبوط ستون سمجھا جاتا ہے۔ترجمان کے مطابق، “پاسچر انسٹی ٹیوٹ آف ایران پر حملہ عالمی صحت کی سلامتی پر براہِ راست حملہ ہے۔ یہ ادارہ نہ صرف ایران بلکہ بین الاقوامی سطح پر بیماریوں کی تحقیق اور روک تھام میں اہم کردار ادا کرتا رہا ہے۔”انہوں نے مزید کہا کہ یہ ادارہ انٹرنیشنل پاسچر نیٹ ورک کا رکن ہے اور ایک صدی سے زائد عرصے سے طبی تحقیق، ویکسین سازی اور عوامی صحت کے فروغ میں سرگرم ہے۔

حسین کرمانپور نے عالمی اداروں سے فوری نوٹس لینے کا مطالبہ کرتے ہوئے کہا کہ عالمی ادارہ صحت اور انٹرنیشنل کمیٹی آف ریڈ کراس اس حملے کی مذمت کریں، نقصانات کا جائزہ لیں اور بحالی کے عمل میں تعاون فراہم کریں۔واقعے کے بعد سوشل میڈیا اور سرکاری ذرائع پر جاری تصاویر میں عمارت کے مختلف حصوں کو شدید نقصان پہنچنے کے آثار دکھائے گئے ہیں، تاہم جانی نقصان کے بارے میں فوری طور پر کوئی تفصیلات سامنے نہیں آئیں۔ماہرین کے مطابق ایسے حساس طبی مراکز پر حملے نہ صرف ایک ملک بلکہ عالمی صحت کے نظام کے لیے بھی سنگین خطرہ ثابت ہو سکتے ہیں، خصوصاً ایسے وقت میں جب دنیا مختلف بیماریوں اور صحت کے چیلنجز سے نمٹ رہی ہے۔

نئی دہلی: مشرقِ وسطیٰ میں جاری امریکا ،اسرائیل اور ایران کشیدگی کے اثرات اب بھارت کی معیشت پر نمایاں ہونے لگے ہیں۔ ایل پی جی کے بعد اب کنڈوم انڈسٹری بھی بحران کی زد میں آ گئی ہے، جس کے باعث آئندہ ہفتوں میں کنڈوم مہنگے ہونے کا خدشہ ظاہر کیا جا رہا ہے۔

بھارت کی بڑی کنڈوم بنانے والی کمپنیوں، جن میں HLL لائف کیئر، کیوپڈ لمیٹڈ اور مین کائنڈ فارما شامل ہیں، کا کہنا ہے کہ اہم خام مال کی ترسیل متاثر ہو رہی ہے۔ خاص طور پر آبنائے ہرمز کے قریب تجارتی راستوں میں خلل کے باعث سپلائی میں تاخیر ہو رہی ہے۔ماہرین کے مطابق کنڈوم کی تیاری میں استعمال ہونے والا سلیکون آئل، جو چکناہٹ کے لیے ضروری ہے، نایاب ہوتا جا رہا ہے، جبکہ اینہائیڈرس امونیا،جو کنڈوم کو پھٹنے سے بچاتا ہے،کی قیمت میں 40 سے 50 فیصد تک اضافہ ہو چکا ہے۔

بھارت کی کنڈوم انڈسٹری تقریباً 86 کروڑ ڈالر (8000 کروڑ روپے سے زائد) مالیت کی ہے اور سالانہ 400 کروڑ سے زائد کنڈوم تیار کیے جاتے ہیں۔ تاہم خام مال کی کمی اور پیداواری لاگت میں اضافے کے باعث صنعت شدید دباؤ کا شکار ہے۔رپورٹس کے مطابق لیٹیکس کی تیاری کے لیے درکار تقریباً 86 فیصد امونیا سعودی عرب، قطر اور عمان سے درآمد کیا جاتا ہے، لیکن آبنائے ہرمز میں رکاوٹوں نے سپلائی چین کو متاثر کر دیا ہے۔ اس کے علاوہ ایلومینیم فوائل اور پی وی سی جیسے پیکجنگ مواد کی قیمتوں میں بھی اضافہ ہو رہا ہے، جس سے پیداوار مزید سست پڑ رہی ہے۔ایک سینئر انڈسٹری عہدیدار کا کہنا ہے کہ سلیکون آئل کی قیمتوں میں غیر معمولی اضافے نے مارکیٹ میں بے یقینی پیدا کر دی ہے، جبکہ امونیا کی قیمت تقریباً 45 روپے فی کلو سے بڑھ کر 63 روپے فی کلو تک پہنچ گئی ہے۔

انڈین میڈیکل ایسوسی ایشن کے سابق صدر ڈاکٹر راجیو جے دیون نے خبردار کیا ہے کہ اس صورتحال کے سنگین سماجی اثرات مرتب ہو سکتے ہیں۔ ان کے مطابق کنڈوم کی قیمت میں معمولی اضافہ بھی غریب طبقے کی پہنچ سے اسے دور کر سکتا ہے، جس کے نتیجے میں غیر منصوبہ بند حمل، ماں اور بچے کی شرح اموات میں اضافہ اور جنسی بیماریوں کے پھیلاؤ کا خدشہ بڑھ سکتا ہے۔

دوسری جانب ایران ،امریکہ کشیدگی نے تعمیراتی شعبے کو بھی متاثر کیا ہے۔ ایل این جی اور ایندھن کی قیمتوں میں اضافے کے باعث سیمنٹ، اسٹیل اور ٹائل انڈسٹری کی لاگت بڑھ گئی ہے۔ گجرات کے صنعتی شہر موربی میں سیرامک یونٹس کی پیداوار سست ہو گئی ہے، جبکہ فیروز آباد کی گیس پر انحصار کرنے والی شیشہ سازی کی صنعت میں کئی کارخانے یا تو بند ہو گئے ہیں یا 30 سے 40 فیصد تک پیداوار کم کر دی گئی ہے۔

بھارتی ریاست اتر پردیش کے ضلع رامپور میں ایک حیران کن اور تشویشناک واقعہ پیش آیا، جہاں سہاگ رات کے موقع پر ہی دلہن نے اپنے شوہر پر تشدد کر ڈالا، جبکہ بعد ازاں ہونے والی پنچایت میں بھی معاملہ مزید بگڑ گیا۔

میڈیا رپورٹس کے مطابق متاثرہ نوجوان کی شادی 29 مارچ کو اترکھنڈ میں منعقدہ ایک اجتماعی شادی تقریب میں ہوئی تھی۔ شادی کے بعد جب دلہا سہاگ رات منانے کے لیے کمرے میں گیا تو دلہن نے اچانک اسے تھپڑ مارنا شروع کر دیے اور ساتھ رہنے سے انکار کر دیا۔متاثرہ نوجوان کا کہنا ہے کہ دلہن نے واضح طور پر کہا کہ وہ اس کے ساتھ نہیں رہنا چاہتی کیونکہ اس کی شادی زبردستی کروائی گئی ہے۔ نوجوان کے مطابق دلہن نے نہ صرف اسے تشدد کا نشانہ بنایا بلکہ اس کی چین بھی توڑ دی۔واقعے کے بعد جب نوجوان نے دلہن کے اہل خانہ سے شکایت کی تو دونوں فریقین کے درمیان پنچایت بلائی گئی۔ تاہم، پنچایت کے دوران بھی معاملہ سلجھنے کے بجائے مزید بگڑ گیا اور دلہن کے اہل خانہ نے مبینہ طور پر نوجوان کو تشدد کا نشانہ بنایا، جس سے وہ زخمی ہو گیا۔

ذرائع کے مطابق متاثرہ نوجوان نے کہا ہے کہ وہ اس رشتے کو جاری نہیں رکھنا چاہتا اور اپنی جان کو خطرہ محسوس کر رہا ہے،نوجوان نے پہلی رات کے بعد لڑکی کو طلاق دے دی،

چندی گڑھ میں بی جے پی دفتر میں بم دھماکہ ہوا ہے

بھارتی میڈیا کے مطابق چندی گڑھ میں بھارتی جنتا پارٹی کے دفتر میں بم دھماکہ کے نتیجے میں دفتر مکمل طور پر تباہ ہو گیا ہے، سیکیورٹی حکام نے جائے حادثہ کو فوری طور پر سیل کر دیا – سیکوریٹی حکام نے میڈیا کو جانی نقصان کی تفصیلات فراہم کرنے سے گریز کیا – واقعہ کے بعد چندی گڑھ میں افراتفری پھیل گئی – مقامی ذرائع کے مطابق دھماکہ درمیانی شدت کا تھا ، بی جے پی آفس دھماکہ کی ذمہ داری ابھی کسی گروپ نے قبول نہیں کی – سیکوریٹی حکامُ نے سکھ علیحدگی پسند گروپوں کے ملوث ہونے کے شبہات ظاہر کئے ہیں، ماہرین کا کہنا ہے کہ بھارتی پنجاب میں خالصتان نواز گروپس کے حملوں کی تعداد میں اضافہ ہو رہا ہے ، بھارتی حکام کی خالصتان تحریک کو تشدد سے کچلنے کی پالیسی ناکام ہو رہی ہے۔