Author: ممتاز حیدر

پاکستان اور افغانستان کےدرمیان سفارتی بات شروع ہوگئی ہے،

پاکستان اورافغانستان کےدرمیان جونیئرسطح کی سفارتی بات چیت چین کے شہر ارمچی میں شروع ہوگئی،سفارتی ذرائع کا کہنا ہے کہ پاکستان افغانستان سےبات چیت کے لیے تیار ہے مگر دہشت گردی کےٹھکانوں کونشانہ بنانےکی پالیسی تبدیل نہیں ہوگی،پاکستان نے وزارت خارجہ کے ایڈیشنل سیکریٹری کو چین میں مذاکرات کے لیے مقرر کیا ہے۔

دوسری جانب پشاور میں پاک افغان امن جرگہ، سیاسی و قبائلی رہنماؤں نےافغانستان پالیسی میں پارلیمان کو اختیار دینے کا مطالبہ کر دیا،پاک افغان امن جرگے کے دوران سیاسی مشران، علماء کرام اور قبائلی رہنماؤں نے کہا ہے کہ افغانستان سے متعلق تمام فیصلوں کا اختیار پارلیمان اور منتخب سیاسی نمائندوں کو دیا جائے تاکہ مسئلے کا واضح اور عملی حل نکالا جا سکے۔جرگے کے شرکاء نے اس بات پر زور دیا کہ اس وقت افغانستان کے بارے میں تمام پالیسیاں یک طرفہ طور پر بنائی جا رہی ہیں اور ان سے اس حوالے سے کوئی مشاورت نہیں کی جاتی، جو انتہائی تشویشناک ہے۔ ان کا کہنا تھا کہ اگر یہ اختیار انہیں سونپ دیا جائے تو وہ مسئلے کے حل کے لیے عملی اقدامات کر سکتے ہیں۔بی بی سی پشتو کے معروف صحافی طاہر خان کے مطابق جرگے کے شرکاء نے واضح کیا کہ وہ اپنی کوششیں جاری رکھیں گے اور پاک افغان تعلقات میں پائیدار حل تلاش کرنے کے لیے کام کریں گے۔ واضح رہے کہ یہ جرگہ پاکستان اور افغانستان کے درمیان بڑھتی ہوئی کشیدگی کے تناظر میں منعقد کیا گیا تھا۔

پشاور میں پاک افغان کشیدگی ختم کرنے کے حوالےسے منعقدہ جرگہ کے اختتام پر جاری اعلامیے میں کہا گیا کہ دونوں ممالک مسلمہ عالمی اصولوں کے مطابق اس بات پر اتفاق کریں کہ ان کی سرزمین نہ تو ایک دوسرے کے خلاف استعمال ہوگی اور نہ ہی کسی ایسی سرگرمی کے لیے استعمال کرنے کی اجازت دی جائے گی،مزید کہا گیا کہ تمام اختلافات اور تنازعات کو مذاکرات اور سفارت کاری کے ذریعے حل کرنا ہی اولین ترجیح ہونی چاہیے، کیونکہ جنگ کسی مسئلے کا حل نہیں ہے،پائیدار امن کے لیے باہمی احترام اور افہام و تفہیم کو ناگزیر قرار دیا گیا،حکومتوں سے مطالبہ کیا گیا کہ اعتماد سازی کے لیے ٹھوس اقدامات کیے جائیں اور ان پر مؤثر عملدرآمد کو فروغ دیا جائے۔

لندن: برطانیہ کے وزیرِاعظم کیئر اسٹار مر نے عوام کو موجودہ عالمی صورتحال پر اعتماد دینے کی کوشش کی، تاہم مہنگائی سے نمٹنے کے لیے کسی نئی پالیسی یا ریلیف کا اعلان نہیں کیا۔

برطانوی وزیرِاعظم نے اپنی پریس کانفرنس میں مستقبل میں برطانیہ اور یورپ کے تعلقات کے لیے واضح سمت تو دی، مگر عوام کو درپیش معاشی مشکلات کے حوالے سے کوئی نئی پیش رفت سامنے نہیں آئی۔برطانوی وزیرِاعظم نے آبنائے ہرمز کی بندش پر سخت تشویش کا اظہار کرتے ہوئے خبردار کیا کہ آئندہ چند ہفتے مشکل ہو سکتے ہیں۔ انہوں نے کہا کہ حکومت اس اہم بحری راستے کو دوبارہ کھولنے کے لیے “اگلے مرحلے کی منصوبہ بندی” کر رہی ہے، تاہم یہ اقدام جنگ کے خاتمے کے بعد ہی ممکن ہوگا۔انہوں نے واضح کیا کہ برطانیہ اس جنگ میں براہِ راست شامل نہیں ہوگا اور صورتحال کا دارومدارامریکہ اور اسرائیل کے فیصلوں پر ہے۔ ایران امریکا جنگ ہماری نہیں، اس میں کسی صورت شامل نہیں ہوں گے، ایران جنگ کے اثرات ہمارے مستقبل کو متاثر کریں گے اس لیے ہم برطانیہ کو اس جنگ میں گھسیٹنے کی اجازت نہیں دیں گے، ہم آنے والی نسلوں کو محفوظ ملک دینا چاہتے ہیں۔

مہنگائی کے بڑھتے دباؤ کے باوجود وزیرِاعظم نے کسی نئی امدادی پیکج کا اعلان نہیں کیا۔ انہوں نے گزشتہ بجٹ میں کیے گئے اقدامات کا حوالہ دیا، جن میں کم از کم اجرت میں اضافہ، ادویات کی قیمتوں کو منجمد رکھنا اور توانائی کی قیمتوں پر حد مقرر کرنا شامل ہے۔یہ رویہ آسٹریلوی وزیراعظم کے حالیہ فیصلے کے برعکس ہے، جہاں ایندھن ٹیکس میں عارضی کمی کا اعلان کیا گیا تھا۔دلچسپ بات یہ رہی کہ وزیرِاعظم نے عوام کو اپنی روزمرہ عادات تبدیل کرنے کی کوئی ہدایت بھی نہیں دی، جبکہ دیگر ممالک میں شہریوں کو پبلک ٹرانسپورٹ کے زیادہ استعمال کا مشورہ دیا جا رہا ہے۔ انہوں نے صرف “پُرسکون اور واضح قیادت” کی ضرورت پر زور دیا۔

کیئر اسٹارمر نے کہا کہ عالمی غیر یقینی صورتحال کے پیش نظر یورپی یونین کے ساتھ قریبی تعلقات ضروری ہیں، تاہم انہوں نے واضح کیا کہ برطانیہ کسی ایک کا انتخاب نہیں کرے گا۔انہوں نے کہا کہ دفاع، معیشت اور توانائی کے شعبوں میں یورپ کے ساتھ تعاون بڑھانا برطانیہ کے مفاد میں ہے اور اس سے امریکہ کے ساتھ تعلقات بھی مضبوط ہوں گے۔برطانوی وزیرِاعظم نے نیٹو کے حوالے سے اپنے عزم کا اعادہ کرتے ہوئے کہا کہ یہ دنیا کا سب سے مؤثر فوجی اتحاد ہے اور برطانیہ اس کے لیے مکمل طور پر پرعزم ہے، چاہے امریکی صدرکی جانب سے اس پر تنقید کیوں نہ کی جائے۔

امریکی صدر ڈونلڈ ٹرمپ نے نیٹو سے الگ ہونے کی دھمکی دیدی۔ ان کا کہنا ہے کہ ہمارے اتحادی کاغذی شیر ہیں۔

امریکی صدر ڈونلڈ ٹرمپ نے ٹیلی گراف کو انٹرویو میں کہا کہ امریکا کو نیٹو سے الگ کرنے پر غور کررہا ہوں، ہمارے اتحادی کاغذی شیر ہیں۔ان کا کہنا تھا کہ یورپ اب امریکا کا قابل اعتبار دفاعی شراکت دار نہیں رہا۔علاوہ ازیں امریکا اور نیٹو کے تعلقات میں دراڑیں واضح ہونے لگیں۔ امریکی وزیر خارجہ کا کہنا ہے کہ ایران جنگ کے بعد نیٹو سے تعلقات پر نظرثانی کرنا ہوگی۔مارکو روبیو نے کہا کہ نیٹو سے تعلق یکطرفہ بن چکا، صرف امریکا یورپ کا دفاع کررہا ہے، ہمیں ضرورت پڑنے پر اپنے اڈے اور فضائی حدود استعمال کرنے نہیں دیتے۔ان کا کہنا ہے کہ ایران کے ساتھ پیغامات کا تبادلہ ہورہا ہے، بات چیت جاری ہے، کسی مرحلے پر براہ راست ملاقات کا امکان بھی موجود ہے۔

دوسری جانب صدر ٹرمپ کی جانب سے ایران جنگ کے خاتمے کا عندیہ دینے پر عالمی منڈی میں خام تیل کی قیمتوں میں بڑی کمی آگئی۔رپورٹ کے مطابق عالمی مارکیٹ میں برطانوی خام تیل کی قیمت 118 ڈالر فی بیرل سے کم ہو کر 103 ڈالر پر آگئی۔امریکی خام تیل بھی 3 ڈالر کمی کے ساتھ 101 ڈالر فی بیرل پر فروخت ہورہا ہے۔

صبح نہانا یا رات میں، یہ سوال ہر گھر میں اکثر زیرِ بحث رہتا ہے، لیکن حقیقت یہ ہے کہ دونوں اوقات کے اپنے منفرد فائدے ہیں۔ ہندوستان میں صدیوں سے صبح نہانے کی روایت ہے، جبکہ جاپان، چین اور کوریا میں لوگ دن بھر کی تھکن اتارنے کے لیے رات کو غسل کو ترجیح دیتے ہیں۔

صبح نہانے کے فوائد
آیوروید کے مطابق صبح نہانا جسم کو متحرک اور ذہنی طور پر چوکنا بناتا ہے۔دہلی کے آئی ٹی پروفیشنل روہت کا کہنا ہے کہ صبح نہانے سے وہ دن بھر توانائی سے بھرپور رہتے ہیں۔سائنسی تحقیقات کے مطابق صبح نہانے سے خون کی گردش تیز ہوتی ہے، موڈ بہتر رہتا ہے اور پسینے سے راحت ملتی ہے۔

رات نہانے کے فوائد
جاپان میں اونسن اور سینتو کی روایت کے مطابق نہانا صرف جسم صاف کرنے کے لیے نہیں بلکہ دن بھر کی تھکن دور کرنے کا بھی ذریعہ ہے۔کوریا میں شام کے غسل سے دماغ ریلیکس موڈ میں آ جاتا ہے اور نیند جلدی اور گہری آ سکتی ہے۔سلیپ کنسلٹنٹ ڈاکٹر نہا شرما کے مطابق، سونے سے 60 سے 90 منٹ پہلے نیم گرم پانی سے نہانے سے جسم کا درجہ حرارت آہستہ آہستہ کم ہوتا ہے، جو نیند کے لیے بہترین ہے۔

ماہرین کا مشورہ
جلد کے ماہرین بتاتے ہیں کہ نہانے کا پانی زیادہ گرم نہ ہو تاکہ جلد کی قدرتی نمی برقرار رہے۔بہترین وقت وہ ہے جو آپ کی نیند، توانائی اور روزمرہ کے معمولات سے میل کھائے۔کچھ لوگ ضرورت کے مطابق صبح اور رات دونوں وقت ہلکا نہانا بھی کرتے ہیں، لیکن پانی کی مقدار اور درجہ حرارت کا خیال رکھنا ضروری ہے۔

امریکہ اور یورپ میں زیادہ تر لوگ صبح نہاتے ہیں، جبکہ جاپان، چین اور کوریا میں رات کا نہانا زیادہ مقبول ہے۔
نہانا صرف ذاتی صفائی نہیں بلکہ جسم اور دماغ دونوں کے لیے سکون اور تازگی کا ذریعہ بھی ہے۔چاہے صبح تازگی چاہیے ہو یا رات سکون، نہانا ایک ذاتی عادت ہے جو آپ کے جسم اور دماغ کو متوازن رکھتی ہے۔ صحیح وقت وہ ہے جو آپ کی زندگی اور روزمرہ کے معمولات سے ہم آہنگ ہو۔