مشرقِ وسطیٰ کی بدلتی ہوئی سیکیورٹی صورتحال کے پیش نظر مختلف ممالک میں قائم امریکی سفارت خانوں نے اپنے شہریوں کو ہنگامی بنیادوں پر احتیاطی تدابیر اختیار کرنے اور گھروں تک محدود رہنے کی ہدایت جاری کر دی ہے۔ ان ممالک میں اسرائیل، متحدہ عرب امارات، بحرین، کویت، قطر اور اردن شامل ہیں۔
بحرین کے دارالحکومت منامہ میں قائم امریکی سفارت خانے نے سوشل میڈیا پیغام میں کہا کہ وہ بحرین میں مقیم امریکی شہریوں کو ہدایت کرتا ہے کہ وہ فوری طور پر “شیلٹر اِن پلیس” کی پالیسی اختیار کریں، ممکنہ حملوں کی صورت میں اپنے سیکیورٹی منصوبوں کا ازسرِ نو جائزہ لیں اور کسی بھی نئی صورتحال کے لیے چوکس رہیں۔ سفارت خانے نے خبردار کیا کہ خطے میں مزید حملوں کے خدشات موجود ہیں، اس لیے غیر ضروری نقل و حرکت سے گریز کیا جائے۔
یہ انتباہات ایسے وقت میں سامنے آئے ہیں جب ایران سے منسلک سرکاری میڈیا نے دعویٰ کیا ہے کہ مشرقِ وسطیٰ میں قائم چار امریکی فوجی اڈوں کو میزائل حملوں کا نشانہ بنایا گیا۔ ایرانی خبر رساں ادارے فارس نے اسلامی انقلابی گارڈ کور کے حوالے سے رپورٹ کیا کہ یہ حملے امریکہ اور اسرائیل کی جانب سے ایرانی شہروں پر کیے گئے مبینہ حملوں کے ردِعمل میں کیے گئے۔رپورٹس کے مطابق جن امریکی تنصیبات کو نشانہ بنایا گیا ان میں قطر میں واقع العدید ایئر بیس، کویت کی ال سالم ایئر بیس، متحدہ عرب امارات کی الظفرہ ایئر بیس اور بحرین میں قائم امریکی ففتھ فلیٹ کا اڈہ شامل ہیں۔ ایرانی میڈیا کے مطابق ان مقامات پر میزائل داغے گئے، تاہم فوری طور پر کسی جانی یا مالی نقصان کی تصدیق نہیں ہو سکی۔
