Author: ممتاز حیدر
-
وزیر اعلی مریم نواز کا محفوظ پنجاب، جرائم میں نمایاں کمی ریکارڈ
ترجمان پنجاب پولیس کے مطابق دسمبر 2025ء میں ہیلپ لائن 15 پر موصولہ کرائم برخلاف پراپرٹی کی کالز میں دسمبر 2024ء کی نسبت مجموعی طور پر 49 فیصد کمی ریکارڈ کی گئی،
ترجمان پنجاب پولیس کے مطابق دسمبر 2025ء میں ڈکیتی کی 15 پر موصولہ کالز میں دسمبر 2024ء کی نسبت 59 فیصد، راہزنی کی 15 کالز میں 51 فیصد کمی واقع ہوئی،دسمبر 2024ء کے مقابلے میں دسمبر 2025ء میں گاڑی چوری کی 15 کی کالز میں 55 فیصد کمی واقع ہوئی،اسی عرصے کے دوران کار چوری کی 15 کی کالز میں 73 فیصد، موٹر سائیکل چوری کی کالز میں 54 فیصد کمی ہوئی،گزشتہ سال دسمبر کی نسبت دسمبر 2025ء میں گاڑیاں چھینے جانے کی 15 کالز میں 71 فیصد، کار چھیننے کی کالز میں 46 فیصد کمی واقع ہوئی، موٹرسائیکل چھیننے کی 15 کی کالز میں گذشتہ سال کی نسبت 72 فیصد کمی ریکارڈ ہوئی،دسمبر 2024ء کے مقابلے میں دسمبر 2025ء میں قتل کی وارداتوں کی 15 کی کالز میں 36 فیصد، اغواء کی وارداتوں کی کالز میں31 فیصد کمی دیکھنے میں آئی، دسمبر 2024ء کی نسبت دسمبر 2025ء میں نقب زنی اور چوری کی 15 کی کالز میں 33 فیصد کمی ریکارڈ کی گئی،
ترجمان پنجاب پولیس کے مطابق رواں سال خواتین سے اجتماعی زیادتی کے رجسٹرڈ کیسز میں گذشتہ سال کی نسبت 44 فیصد کمی واقع ہوئی، آئی جی پنجاب ڈاکٹر عثمان انور کا کہنا ہے کہ وزیر اعلی مریم نواز شریف نے پنجاب کو محفوظ صوبہ بنانے کے لئے پولیس کو بھرپور وسائل فراہم کئے ہیں،سیف سٹیز کا دائرہ کار شہروں کے بعد اب تحصیلوں کی سطح پر بڑھایا جا رہا ہے،سنگین وارداتوں، سٹریٹ کرائم کی 15 کی کالز میں کمی کا رجحان پنجاب پولیس کی کارکردگی میں بہتری کا عکاس ہے، شہر کے تمام تھانوں میں فری رجسٹریشن آف کرائم یقینی بنایا جا رہا ہے، پنجاب پولیس کا واحد فوکس شہریوں کے جان و مال کا تحفظ، مجرموں کی سرکوبی ہے،
-
ساہیوال،سی ٹی ڈی کاروائی،کالعدم تنظیم تحریک طالبان فتنہ الخوارج کا کارندہ گرفتار
ساہیوال میں سکیورٹی فورسز نے کارروائی کرتے ہوئے کالعدم تنظیم تحریک طالبان فتنہ الخوارج کے ایک اہم کارندے کو گرفتار کر لیا ہے۔ اس اہم کامیابی کا اعلان کاؤنٹر ٹیررازم ڈیپارٹمنٹ (سی ٹی ڈی) نے کیا ہے۔
سی ٹی ڈی کے مطابق گرفتار ملزم کے قبضے سے بڑی مقدار میں نفرت انگیز مواد، کتابیں، لٹریچر اور نقدی برآمد ہوئی ہے۔ حکام کا کہنا ہے کہ ملزم شہریوں کو دہشت گرد تنظیم میں شمولیت کی دعوت دے رہا تھا اور مذہبی جذبات کو بھڑکانے کی کوشش کر رہا تھا۔سی ٹی ڈی ذرائع کے مطابق، گرفتار دہشت گرد ضلع باجوڑ ایجنسی کا رہائشی ہے اور اسے دہشت گردی کی کارروائیوں میں ملوث پایا گیا ہے۔ ملزم کے خلاف دہشت گردی ایکٹ کے تحت مقدمہ درج کر لیا گیا ہے اور مزید تفتیش جاری ہے تاکہ اس کے دیگر ساتھیوں اور ممکنہ کارروائیوں کا پتہ لگایا جا سکے۔
سکیورٹی حکام نے عوام سے اپیل کی ہے کہ وہ مشکوک افراد کی اطلاع فوراً متعلقہ حکام کو دیں تاکہ دہشت گرد عناصر کے منصوبوں کو ناکام بنایا جا سکے۔ یہ گرفتاری اس بات کی غمازی کرتی ہے کہ ملک بھر میں دہشت گرد تنظیموں کے خلاف موثر کارروائیاں جاری ہیں اور قانون نافذ کرنے والے ادارے عوام کی حفاظت کے لیے بھرپور کوششیں کر رہے ہیں۔
-
ڈھاکہ میں اسپیکر ایاز صادق اور بھارتی وزیر خارجہ کی ملاقات
ڈھاکہ: پاکستان کی قومی اسمبلی کے اسپیکر ایاز صادق کی بنگلہ دیش کے دارالحکومت ڈھاکہ میں بھارتی وزیر خارجہ سے اہم ملاقات ہوئی۔ یہ ملاقات سابق وزیر اعظم خالدہ ضیاء کی رہائش گاہ پر منعقد ہوئی جہاں مختلف ممالک کے اعلیٰ سطحی وفود بھی موجود تھے۔
ذرائع کے مطابق ملاقات کے دوران بھارتی وزیر خارجہ نے خود آگے بڑھ کر اسپیکر قومی اسمبلی ایاز صادق کی نشست پر جا کر ان سے مصافحہ کیا، جسے سفارتی حلقوں میں خیرسگالی اور مثبت اشارہ قرار دیا جا رہا ہے۔ دونوں رہنماؤں کے درمیان خوشگوار ماحول میں مختصر مگر بامعنی گفتگو ہوئی۔دونوں رہنماؤں کے مابین خوشگوار جملوں کا تبادلہ ہوا، یہ ملاقات سابق وزیر اعظم خالدہ ضیاء کی رہائش گاہ پر اس وقت ہوئی جب وہاں ان کی نماز جنازہ اور تعزیتی سرگرمیوں کے سلسلے میں غیر ملکی وفود کی آمد جاری تھی۔ ایاز صادق نے پاکستان کی جانب سے تعزیت اور ہمدردی کا پیغام بھی پہنچایا۔
سیاسی مبصرین کے مطابق ایاز صادق اور بھارتی وزیر خارجہ کی یہ ملاقات اگرچہ غیر رسمی تھی، تاہم اس کے سفارتی مضمرات اہم سمجھے جا رہے ہیں، کیونکہ ایسے مواقع پر ہونے والے رابطے مستقبل میں پارلیمانی اور علاقائی سطح پر بات چیت کی راہ ہموار کر سکتے ہیں۔
-
بنگلادیش کی سابق وزیراعظم خالدہ ضیا کی نمازِ جنازہ ادا
ڈھاکہ: بنگلادیش کی سابق وزیراعظم اور بنگلادیش نیشنلسٹ پارٹی (بی این پی) کی سربراہ خالدہ ضیا کی نمازِ جنازہ ادا کر دی گئی۔ نمازِ جنازہ میں عبوری حکومت کے چیف ایڈوائزر محمد یونس سمیت ہزاروں افراد نے شرکت کی اور مرحومہ کو خراجِ عقیدت پیش کیا۔
نمازِ جنازہ کے موقع پر سخت سیکیورٹی انتظامات کیے گئے تھے جبکہ ملکی و غیر ملکی سیاسی و سرکاری شخصیات بھی موجود تھیں۔ پاکستان کی جانب سے اسپیکر قومی اسمبلی ایاز صادق نے نمازِ جنازہ میں شرکت کر کے پاکستان کی نمائندگی کی۔ اس کے علاوہ جنوبی ایشیا کے مختلف ممالک کے اعلیٰ حکام اور بنگلادیش کے مقامی سیاسی و سماجی رہنماؤں نے بھی شرکت کی۔حکام کے مطابق خالدہ ضیا کو ریاستی اعزاز کے ساتھ سپردِ خاک کیا جائے گا۔ ان کی تدفین سابق صدر اور ان کے شوہر ضیا الرحمان کے پہلو میں کی جائے گی۔
خالدہ ضیا بنگلادیش کی پہلی خاتون وزیراعظم تھیں۔ انہیں مسلم دنیا میں پاکستان کی سابق وزیراعظم بے نظیر بھٹو کے بعد دوسری خاتون وزیراعظم ہونے کا اعزاز بھی حاصل تھا۔ انہوں نے دو ادوار میں ملک کی قیادت کی، پہلا دور 1991 سے 1996 جبکہ دوسرا دور 2001 سے 2006 تک رہا،خالدہ ضیا طویل عرصے سے علیل تھیں اور جگر کے عارضے سمیت مختلف بیماریوں میں مبتلا رہیں۔ وہ کافی عرصے سے ڈھاکہ کے ایک اسپتال میں زیر علاج تھیں، تاہم گزشتہ روز خالقِ حقیقی سے جا ملیں،ان کے انتقال پر بنگلادیش بھر میں سوگ کی کیفیت ہے جبکہ سیاسی، سماجی اور عوامی حلقوں کی جانب سے مرحومہ کی خدمات کو خراجِ تحسین پیش کیا جا رہا ہے۔
سپیکر قومی اسمبلی سردار ایاز صادق کی بنگلہ دیش کی سابق وزیراعظم خالدہ ضیاء کی رہائش گاہ آمد ہوئی،سپیکر سردار ایاز صادق نے مرحومہ خالدہ ضیاء کے بیٹے طارق رحمان اور بیٹی سے ملاقات کی اور ان کی والدہ کے انتقال پر گہرے دکھ اور تعزیت کا اظہار کیا،کہا کہ دکھ اور رنج کی اس گھڑی میں حکومت پاکستان اور عوام آپ کے ساتھ کھڑے ہیں ، مرحومہ خالدہ ضیاء کے بیٹے اور بیٹی نے تعزیت اور نماز جنازہ میں شرکت پر سپیکر سردار ایاز صادق کا شکریہ ادا کیا ،سپیکر سردار ایاز صادق نے بنگلہ دیش کے نیشنل سیکیورٹی ایڈوائزر خلیل الرحمٰن سے بھی ملاقات کی،سپیکر سردار ایاز صادق نے صدر اور وزیراعظم پاکستان کی جانب سے اظہار ہمدردی و تعزیت کا پیغام پہنچایا،سپیکر سردار ایاز صادق کی مشیر قانون بنگلہ دیش آصف نظرل سے بھی ملاقات کی،ملاقات میں باہمی دلچسپی کے امور پر تبادلہ خیال کیا گیا،
-
ایئرپورٹ پر مسافروں کی آف لوڈنگ کا معاملہ اسلام آباد ہائیکورٹ پہنچ گیا
پاکستان کے بین الاقوامی ہوائی اڈوں پر مسافروں کی مبینہ آف لوڈنگ اور رشوت طلبی کا سنگین معاملہ اسلام آباد ہائیکورٹ پہنچ گیا، جہاں عدالت نے الزامات کو نہایت تشویشناک قرار دیتے ہوئے ڈائریکٹر جنرل ایف آئی اے کو فوری تحقیقات کی ہدایت جاری کر دی ہے۔
تفصیلات کے مطابق ایک شہری احتشام الحق نے اسلام آباد ہائیکورٹ میں درخواست دائر کی، جس میں مؤقف اختیار کیا گیا کہ انہیں تمام قانونی تقاضے مکمل ہونے کے باوجود آذربائیجان جانے والی پرواز سے آف لوڈ کر دیا گیا۔ درخواست گزار کے مطابق ان کا پاسپورٹ، ویزا اور دیگر امیگریشن دستاویزات بالکل درست تھیں، اس کے باوجود امیگریشن حکام نے انہیں سفر سے روک دیا،احتشام الحق نے اپنی درخواست میں الزام عائد کیا کہ امیگریشن حکام نے ان کے پاسپورٹ اور متعلقہ دستاویزات پر “Off-loaded” کی مہر ثبت کر دی اور بعد ازاں انہیں یہ کہا گیا کہ اگر وہ 80 ہزار روپے رشوت ادا کریں تو انہیں سفر کی اجازت دے دی جائے گی۔ درخواست گزار کے مطابق رشوت دینے سے انکار پر انہیں زبردستی واپس بھیج دیا گیا جس سے نہ صرف مالی نقصان ہوا بلکہ ذہنی اذیت اور بدنامی کا بھی سامنا کرنا پڑا۔
اسلام آباد ہائیکورٹ میں سماعت کے دوران عدالت نے درخواست گزار کے الزامات کو انتہائی سنگین قرار دیتے ہوئے ریمارکس دیے کہ اگر ایسے واقعات درست ثابت ہوتے ہیں تو یہ قانون، آئین اور شہریوں کے بنیادی حقوق کی کھلی خلاف ورزی ہے۔ عدالت نے اس معاملے پر سخت برہمی کا اظہار کرتے ہوئے ڈی جی ایف آئی اے کو ہدایت کی کہ وہ فوری طور پر مکمل اور شفاف تحقیقات کرائیں۔عدالت نے ڈی جی ایف آئی اے کو حکم دیا ہے کہ الزامات میں ملوث افسران اور اہلکاروں کا تعین کیا جائے، واقعے کے تمام پہلوؤں کا جائزہ لیا جائے اور تحقیقات مکمل کر کے تفصیلی رپورٹ مقررہ وقت کے اندر عدالت میں جمع کرائی جائے۔ عدالت نے یہ بھی واضح کیا کہ اگر کسی اہلکار کی جانب سے اختیارات کے ناجائز استعمال یا رشوت طلبی کا ثبوت ملا تو اس کے خلاف قانون کے مطابق سخت کارروائی کی جائے گی،عدالت نے کیس کی مزید سماعت بعد کی تاریخ تک ملتوی کرتے ہوئے ڈی جی ایف آئی اے سے رپورٹ طلب کر لی ہے، جس کے بعد آئندہ لائحہ عمل کا فیصلہ کیا جائے گا۔
-
کراچی میں وکلاء اور یوٹیوبر رجب بٹ کے درمیان تنازع میں شدت
کراچی میں وکلاء اور یوٹیوبر رجب بٹ کے درمیان تنازع شدت اختیار کرگیا، سٹی کورٹ تھانے میں رجب بٹ کے وکیل نے مقدمہ درج کرایا تو کراچی بار کے وکیل سراپا احتجاج بن گئے۔
مبینہ طور پر وکلاء نے تھانے پر دھاوا بول کر وہاں موجود ایس ایچ او سٹی کورٹ کو تشدد کا نشانہ بنایا اور پولیس اسٹیشن میں توڑ پھوڑ بھی کی۔ایم اے جناح روڈ پر 6 گھنٹے سے زائد دھرنا دیا، صدر کراچی بار عامر نواز وڑائچ نے کہا پولیس کراچی بار کے وکلاء کی درخواست پر مقدمہ درج نہیں کررہی۔وکلاء نے آج عدالتی امور کے بائیکاٹ اور پولیس کے سٹی کورٹ میں داخل ہونے پر پابندی بھی لگادی۔
-
نادرا کی جانب سے چہرے کی شناخت پر مبنی بائیومیٹرک تصدیقی سہولت کا آغاز
نادرا کی جانب سے چہرے کی شناخت پر مبنی بائیومیٹرک تصدیقی سہولت کا آغاز کردیا گیا، 20 جنوری سے پاک آئی ڈی موبائل ایپ پر چہرے کی شناخت سے بائیومیٹرک تصدیق کی سہولت میسر ہوگی۔
وزیراعظم شہباز شریف کی ہدایت پر بزرگوں یا طبی مسائل کے شکار شہریوں کو فنگر پرنٹس کی تصدیق میں دشواری کا مسئلہ ختم کردیا گیا۔ نادرا نے چہرے کی شناختی پر مبنی بایو میٹرک تصدیقی سہولت متعاف کرادی۔پاک آئی ڈی موبائل ایپ پر چہرے کی شناخت سے بایومیٹرک تصدیق کی سہولت 20 جنوری سے دستیاب ہوگی، شہری ضرورت پڑنے پر معمولی فیس دے کر سرٹیفکیٹ حاصل کرسکیں گے۔رپورٹ کے مطابق چہرے کی شناخت کی کارروائی مکمل ہونے پر نادرا ایک سرٹیفکیٹ جاری کرے گا، فنگر پرنٹس کی تصدیق نہ ہونے پر شہری قریبی نادرا رجسٹریشن مرکز جائیں گے۔
-
چترال،روسی شہری کا68 ہزار ڈالر میں کشمیری مارخور کا شکار
چترال کے دور افتادہ اور پہاڑی علاقے گہریت گول میں غیر ملکی شکاری نے کشمیری مارخور کا شکار کر لیا۔ محکمہ جنگلی حیات کے مطابق یہ شکار کمیونٹی بیسڈ ٹرافی ہنٹنگ پروگرام کے تحت کیا گیا، جس کا مقصد نایاب جنگلی حیات کے تحفظ کے ساتھ ساتھ مقامی آبادی کو براہِ راست معاشی فوائد فراہم کرنا ہے۔
محکمہ جنگلی حیات کے حکام نے بتایا کہ روس سے تعلق رکھنے والے غیر ملکی شکاری نے مارخور کے شکار کے لیے 68 ہزار امریکی ڈالر کے عوض باقاعدہ لائسنس حاصل کیا تھا۔ شکار کیے گئے کشمیری مارخور کے سینگوں کی لمبائی 41 انچ ریکارڈ کی گئی ہے، جو اس نسل کے بالغ اور صحت مند جانور کی نشاندہی کرتی ہے۔ حکام کے مطابق شکار سے قبل تمام قانونی تقاضے پورے کیے گئے اور مقررہ ضوابط کے مطابق نگرانی میں کارروائی کی گئی۔محکمہ جنگلی حیات کا کہنا ہے کہ کمیونٹی بیسڈ ٹرافی ہنٹنگ پروگرام کے تحت حاصل ہونے والی آمدن کا بڑا حصہ مقامی آبادی کی فلاح و بہبود پر خرچ کیا جائے گا۔ اس رقم سے علاقے میں تعلیم، صحت، بنیادی انفراسٹرکچر، روزگار کے مواقع اور قدرتی وسائل کے تحفظ سے متعلق منصوبوں پر سرمایہ کاری کی جاتی ہے، جس سے مقامی افراد کی معاشی حالت بہتر بنانے میں مدد ملتی ہے۔
حکام کے مطابق اس پروگرام کا بنیادی مقصد جنگلی حیات، خصوصاً نایاب اور محفوظ نسلوں کے جانوروں کا تحفظ یقینی بنانا ہے۔ محدود اور سائنسی بنیادوں پر دیے جانے والے شکار کے اجازت ناموں کے ذریعے نہ صرف جانوروں کی آبادی کو کنٹرول اور محفوظ رکھا جاتا ہے بلکہ مقامی لوگ بھی جنگلی حیات کے تحفظ میں اپنا کردار ادا کرنے کے لیے ترغیب پاتے ہیں۔محکمہ جنگلی حیات نے مزید کہا کہ کمیونٹی کی شمولیت کے باعث غیر قانونی شکار میں نمایاں کمی آئی ہے اور مقامی آبادی اب جنگلی جانوروں کو نقصان پہنچانے کے بجائے ان کے تحفظ کو اپنے مفاد سے جوڑ کر دیکھتی ہے۔ حکام کے مطابق آئندہ بھی ایسے پروگرام شفافیت، قانون اور ماحولیاتی توازن کو مدنظر رکھتے ہوئے جاری رکھے جائیں گے تاکہ قدرتی ورثے کا تحفظ اور مقامی ترقی ساتھ ساتھ ممکن بنائی جا سکے۔
-
ترکیے میں داعش کے خلاف کریک ڈاؤن، 357 مشتبہ افراد گرفتار
ترکیے میں سکیورٹی فورسز نے دہشت گرد تنظیم داعش کے خلاف ایک بڑی اور منظم کارروائی کرتے ہوئے صرف ایک ہی دن میں 357 مشتبہ افراد کو گرفتار کر لیا۔ یہ ملک گیر آپریشن بیک وقت 21 صوبوں میں کیا گیا جس میں صوبائی پولیس، انسدادِ دہشت گردی یونٹس اور انٹیلی جنس اداروں نے مشترکہ طور پر حصہ لیا۔
ترک وزیر داخلہ کے مطابق یہ کارروائیاں دہشت گردی کے خلاف زیرو ٹالرنس پالیسی کے تحت کی گئیں۔ ان کا کہنا تھا کہ ترکیہ کسی بھی دہشت گرد تنظیم کو اپنے ملک میں جڑیں مضبوط کرنے یا عوام کے جان و مال کو خطرے میں ڈالنے کی اجازت نہیں دے گا۔ وزیر داخلہ نے واضح کیا کہ سکیورٹی ادارے ہر ممکن خطرے سے نمٹنے کے لیے ہمہ وقت متحرک ہیں۔وزارت داخلہ کی جانب سے جاری بیان میں کہا گیا ہے کہ گرفتار کیے گئے افراد پر داعش سے تعلق، مالی معاونت، بھرتی اور دہشت گردانہ سرگرمیوں کی منصوبہ بندی جیسے سنگین الزامات ہیں۔ حکام کے مطابق تحقیقات کے دوران گرفتار مشتبہ افراد کے نیٹ ورکس اور رابطوں کی بھی چھان بین کی جا رہی ہے تاکہ مزید ممکنہ خطرات کا بروقت سدباب کیا جا سکے۔
ادھر استنبول کے چیف پبلک پراسیکیوٹر آفس نے انکشاف کیا ہے کہ شہر میں 110 ایسے مشتبہ افراد کو گرفتار کیا گیا جو نئے سال کے موقع پر استنبول میں دہشت گردانہ کارروائیوں کی منصوبہ بندی کر رہے تھے۔ پراسیکیوٹر آفس کے مطابق ان افراد کے خلاف ٹھوس شواہد موجود تھے اور ممکنہ حملوں کو بروقت ناکام بنا دیا گیا،انقرہ کے چیف پبلک پراسیکیوٹر آفس نے بھی داعش سے تعلق رکھنے والے 17 مشتبہ افراد کے وارنٹ گرفتاری جاری ہونے کی تصدیق کی ہے، جن میں 11 غیر ملکی شہری شامل ہیں۔ حکام کے مطابق ان افراد کے بین الاقوامی روابط کی بھی تحقیقات کی جا رہی ہیں۔
واضح رہے کہ سکیورٹی فورسز نے چند روز قبل بھی استنبول میں کارروائیاں کرتے ہوئے 100 سے زائد مشتبہ داعش ارکان کو گرفتار کیا تھا۔ اس وقت ترک حکام نے بتایا تھا کہ یہ عناصر بھی نئے سال کے موقع پر دہشت گردانہ کارروائیوں کی منصوبہ بندی کر رہے تھے۔ ان چھاپوں کے دوران بڑی تعداد میں اسلحہ اور مشتبہ مواد بھی برآمد کیا گیا تھا،ترک حکام کا کہنا ہے کہ ملک میں امن و امان کو یقینی بنانے اور عوام کو کسی بھی ممکنہ خطرے سے محفوظ رکھنے کے لیے ایسی کارروائیاں مستقبل میں بھی جاری رہیں گی، جبکہ دہشت گردی کے خلاف جنگ میں کسی قسم کی نرمی نہیں برتی جائے گی۔
